Bilongwa bya Mafuku wa Bubidi 24:1-27
24 Yehoashe wadi na myaka isamba-ibidi paabikele,+ wabikele myaka 40 mu Yelusalema. Dijina dya inandi i Zibiha wa ku Bela-Sheba.+
2 Yehoashe wadi ulonga nyeke byoloke ku meso a Yehova mafuku onso a kitobo Yehoyada.+
3 Yehoyada wamutongēle bakaji babidi, wabutula bana bana-balume ne bana-bakaji.
4 Kupwa mutyima wa Yehoashe wasaka kulongolola njibo ya Yehova.+
5 Ebiya wakongakanya babitobo ne bene Levi, webanena’mba: “Endai mu bibundi bya Yuda mukakonge lupeto mu Isalela ense lwa kulongolola nalo njibo ya Leza wenu+ mwaka ne mwaka; pēlakanai na uno mwanda.” Ino bene Levi kebapēlakenepo.+
6 Penepo mulopwe waita mukata Yehoyada, wamunena amba:+ “Mwanda waka kwasakilepo bene Levi bende mu Yuda ne mu Yelusalema bakasele musonko ukola wasoñenye Mosesa+ mwingidi wa Yehova, musonko ukola wa kipwilo kya Isalela mwanda wa pema wa Bukamoni?+
7 Mwanda bana ba Atadia,+ yewa mwana-mukaji mubi, batwelele mu njibo ya Leza wa bine+ ku bukomo, baingidija bintu byonso bijila bya mu njibo ya Yehova mwanda wa Babāla.”
8 Penepo na kishima kya mulopwe, bapunga sanduku,+ bamutūla panja, pa kibelo kya njibo ya Yehova.+
9 Kupwa baela lubila mu Yuda ne mu Yelusalema monso, lwa kuletela Yehova musonko ukola+ obasoñenye Isalela mu ntanda mutuputupu kudi Mosesa mwingidi wa Leza wa bine.
10 Bamfumu bonso ne bantu bonso basangala,+ kebaleta’nka kuleta byabuntu, bebyela mu sanduku kufika ne byaayudile.*
11 Ponso padi patweja bene Levi sanduku amba afike kwa mulopwe ne pa kumona amba kemudi lupeto lungi, mulembi wa mulopwe ne mukwashi wa kitobo mukulu badi bāya kusela’lo mu sanduku,+ kupwa bajokeja sanduku paadi. Badi balonga namino difuku ne difuku, bakongakanya lupeto lungi.
12 Penepo mulopwe ne Yehoyada badi bapa’lo boba badi batala mwingilo wingilwa ku njibo ya Yehova, kadi badi bafuta boba basōnga mabwe, ne basendwe mwanda wa kulongolola njibo ya Yehova,+ ne bengidi bengila byuma ne mukuba mwanda wa kulongolola njibo ya Yehova.
13 Ebiya boba batala mwingilo bashilwija’o, kadi mwingilo wa kulongolola waendelela mu bwendeji bwabo, baaluja njibo ya Leza wa bine’nka moyadi ikadile dibajinji kadi beiningisha.
14 Abo bapwa’tu, baselela mulopwe ne Yehoyada lupeto lwashele’ko, belwingidija mu kulonga bipungwa bya mu njibo ya Yehova, bipungwa bya mingilo ne bya kulambula nabyo byamulambu ne bitomeno, ne bipungwa bya olo ne bya ndalama.+ Kadi badi balambula nyeke bitapwa bisōkwe+ mu njibo ya Yehova mafuku onso a Yehoyada.
15 Yehoyada wafwile paadi ke mununu kadi mubwanwe myaka; wadi na myaka 130 paafwile.
16 Ebiya bamujīka mu Kibundi kya Davida pamo na balopwe,+ mwanda walongele biyampe mu Isalela+ pa mwanda wa Leza wa bine ne njibo Yandi.
17 Yehoyada pa kufwa, bamfumu ba Yuda baiya kebevukwila kudi mulopwe, nandi webevwana.
18 Baleka njibo ya Yehova Leza wa bakulutuba babo kebengidila bipanda bikola* ne bilezaleza, penepo bulobo bwa Leza bwaiya* padi Yuda ne Yelusalema mwanda wa mambo abo.
19 Wadi utuma’nka kutuma bapolofeto umbukata mwabo ba kwibajokeja kudi Yehova, kadi badi bebadyumuna’nka kwibadyumuna,* ino abo bapela kwivwana.+
20 Mushipiditu wa Leza watūkila* Zekadia mwanā kitobo Yehoyada,+ nandi waimana peulu pa bantu kaebanena amba: “Leza wa bine wanena namino amba, ‘I kika kyomujilwila mbila ya Yehova? Kemusapo kunekenya. Byomwaleka Yehova, nandi usa kwimuleka.’”+
21 Ino abo bamukutyila kitumba,+ bamwasa mabwe na kishima kya mulopwe, mu kipango kya njibo ya Yehova.+
22 Enka nenki Mulopwe Yehoashe kavulukilepo buswe bwa ndamatyidile bwamusenswe shandi* Yehoyada, waipaya wandi mwana, mwine wanenene paadi kafu amba: “Yehova mwine amone’kyo, ne kukwita wishintulwile.”+
23 Ku ngalwilo kwa mwaka,* kibumbo kya divita kya bene Shidea kyakanda kulwa na Yehoashe, batwela mu Yuda ne mu Yelusalema+ ku bukomo. Kupwa batukija bamfumu bonso+ ba bantu, batuma bitūtwa byabo byonso kudi mulopwe wa Damakasa.
24 Mwanda nansha kibumbo kya divita kya bene Shidea kyatwelele’mo byokyadi na bantu batyetye, Yehova webapele kibumbo kikatampe bininge+ mu kuboko kwabo, mwanda balekele Yehova Leza wa bakulutuba babo; ebiya nabo* bafikidija butyibi padi Yehoashe.
25 Abo pa kutamba kwadi (mwanda bamushile mutapwe bilonda bibibibi*), bengidi bandi bamukutyila kitumba mwanda wamwangile mashi a bana* ba kitobo Yehoyada.+ Bamwipaila pa butanda bwandi.+ Enka nenki wafwa, bamujīka mu Kibundi kya Davida,+ ino kebamujīkilepo mu ntanda ijīkwanga’mo balopwe.+
26 Bene bamukutyīle kitumba+ i bano: Zabada mwanā Shimeata mwine Amone mwana-mukaji ne Yehozabada mwanā Shimidite mwine Moabu mwana-mukaji.
27 Myanda ya bandi bana ne myanda mibi yadi imunenwa+ ne ya kulongololwa* kwa njibo ya Leza wa bine,+ bino byonso i bilembwe mu bilembwa* bya Mukanda wa Balopwe. Ebiya wandi mwana Amazia wabikala pa kyandi kyaba.
Kunshi kwa Dyani
^ Bibwanika padi i, “kufika ne byaletele bonso.”
^ Tala Nshintulwilo ya Bishima.
^ Kishima pa kishima i, “kwadi bulobo.”
^ Nansha’mba “bebasapwila bukamoni bubi.”
^ Kishima pa kishima i, “wavwika.”
^ Ko kunena’mba, shandya Zekadia.
^ Kishima pa kishima i, “ku kujoka kwa mwaka.”
^ Ko kunena’mba, bene Shidea.
^ Nansha’mba “na misongo mingi.”
^ Nansha’mba “mwana.” Padi buno i buvule bulombola bulēme.
^ Kishima pa kishima i, “kushimika kyalwilo.”
^ Nansha’mba “bushintuludi; nsekununi.”
