Ñimbo ya Mitōto 147:1-20
147 Tendelai Yah!*
I biyampe kwimbila Leza wetu mitendelo;*Bine, bisangajanga kadi i byendele’mo kumutendela!+
2 Yehova ūbakanga Yelusalema;+Ukongakanyanga pamo bantu ba Isalela bapalakanibwe.+
3 Undapanga ba mityima mityumuke;Ukuta bilonda byabo.
4 Ubalanga bungi bwa ñenyenye;Wiita yonso pa majina.+
5 Mfumwetu i mukatampe kadi i mukomokomo mu bukomo;+Ñeni yandi i mitabuke kipimo.+
6 Yehova ulangulanga betyepeje,+Ino welanga babi pa nshi.
7 Imbilai Yehova ne kufwija’ko;Imbilai Leza wetu mitendelo pamo na lunsense,
8 Mwine upūtanga madiulu na makumbi,Mwine uletanga mvula pa ntanda,+Mwine umenejanga biyombo+ pa ngulu.
9 Upanga banyema byakudya,+Ne binkombe bididila’byo.+
10 Aye kaloelelwangapo bukomo bwa kabalwe;+Nansha kutulumunwa na maulu makomo a muntu.+
11 Yehova usangelanga boba bamutyina,+Boba batengele buswe bwandi bwa ndamatyidile.+
12 Tumbija Yehova, a Yelusalema.
Tendela Leza obe, a Ziona.
13 Aye ukomejanga mikabo ya bibelo bya kibundi kyobe;Weselanga bobe bana badi munda mobe.
14 Uletanga ndoe mu ntanda yobe;+Ukwikutyijanga ñano milumbuluke.*+
15 Utumanga musoñanya wandi pa ntanda;Kinenwa kyandi kyendanga lubilo.
16 Utumanga mashika mekwate pamo bwa myoya;+Upalakanyanga mashika pamo bwa buto.+
17 Uponejanga mabwe a mvula* pamo bwa bibese bya mikate.+
Le i ani ubwanya kukomena mashika andi?+
18 Utambijanga kinenwa kyandi, nao asunguluka.
Upukumijanga kivula kyandi,+ mema keakuke.
19 Usapulanga kinenwa kyandi kudi Yakoba,Misoñanya yandi ne butyibi bwandi kudi Isalela.+
20 Kalongelepo namino ku muzo mukwabo;+Abo kebayukilepo kintu pa butyibi bwandi.
Tendelai Yah!*+
Kunshi kwa Dyani
^ Nansha’mba “Aleluya!” “Yah” i dijina Yehova mu kīpi.
^ Nansha’mba “kumombela minjiki.”
^ Kishima pa kishima i, “māni a ñano.”
^ Nansha’mba “maimakasa.”
^ Nansha’mba “Aleluya!” “Yah” i dijina Yehova mu kīpi.
