LE ANO MAVESE A MU BIBLE ASHINTULULA BIKA?

Ngalwilo 1:26—“Tulonge Muntu mu Kyelekejo Kyetu”

VUMIJA MU

“Ebiya Leza wānena’mba: ‘Tulonge muntu mu kyelekejo kyetu, mwendele kimfwa kyetu, kadi babikale mwita wa lui ne bipangwa bitumbuka bya mūlu ne banyema ba nja ne ntanda yonso ne byonso bilandala, byendakana pa ntanda.’”—Ngalwilo 1:26, Bwalamuni bwa Ntanda Mipya.

“Ku mfulo, Leza wanena’mba Tulongei muntu wa mu kyelekejo kyetu kadi witwifwene amba abikale pa mishipa e, ne pa byonyi, ne pa banyema banja, ne ba mu ntanda ne pa bilandala byonso bine.”—Ngalwilo 1:26, Dibuku Dijila.

Nshintulwilo ya Ngalwilo 1:26

Bantu bāpangilwe mu kyelekejo kya Leza, na bukomo bwa kutamija ne kulombola ngikadila ikalanga na Leza, pamo bwa buswe, lusa, ne boloke. O mwanda muntu ubwanya kwikala na ngikadila ikalanga na Leza.

“Leza wānena’mba: ‘Tulonge muntu mu kyelekejo kyetu.’” Kumeso kwa Yehova Leza a kupanga muntu ye-yense nansha kintu kyo-kyonso, wāpangile kipangwa kya ku mushipiditu kikomo, kyāyukene mwenda mafuku bu Yesu. Kupityila kudi Yesu, “bintu bikwabo byonso byāpangilwe kupityila kudi aye ne mwanda wa aye.” (Bene Kolose 1:16) Yesu udi na ngikadila na ya Yehova—“aye i kyelekejo kya Leza wampikwa kumweka.” (Bene Kolose 1:15) Nanshi byādi byendele’mo Leza alombole Yesu amba: “Tulonge muntu mu kyelekejo kyetu.”

“Babikale . . . banyema ba nja ne ntanda yonso.” Banyema kebāpangilwepo mu kyelekejo kya Leza. Kebāpangilwepo mu muswelo wa bamwekeje ngikadila na ya muntu pamo bwa buswe nansha kwikala na mutyima wa mundamunda. Ino nansha nankyo, Leza utele mutyima banyema, usakanga bekale senene. O mwanda wānenene amba bantu “babikale” banyema, kishima kibwanya kwalamunwa ne bu ‘kubikala bulopwe’ (Mukanda Ukola) nansha “kulela” (Common English Bible). Mu uno muswelo, Yehova wāpele bantu kiselwa kya kuta mutyima banyema. (Ñimbo ya Mitōto 8:6-8; Nkindi 12:10) Usakanga bantu bekale baledi bayampe ba ntanda ne bintu byonso byūmi bidi’po.

Myanda idi mu Ngalwilo 1:26

Mashapita abidi mabajinji a Ngalwilo alombola myanda mikatampe ya bupangi bwa diulu ne ntanda, umbuo wetu ne būmi budi’po. Bintu byonso byāpangilwe na Yehova i bifike’po, inoko bipangwa byandi bya kutendelwa bininge pano pa ntanda i bantu. Pāpwile Leza mwingilo wandi wa bupangi, “wāmona bintu byonso byaālongele, kadi tala! byādi biyampe mpata.”—Ngalwilo 1:31.

Tala ino video mīpi ne kwifunda bivule bitala nsekununi ya bupangi idi mu Ngalwilo.

Betufwile lusa, bibakoma komba.Tentula Ino Video

Milangwe mifwe ikalanga na bantu pa Ngalwilo 1:26

Mulangwe mufwe: I enka bana-balume badi na bukomo bwa kwiula ne kulombola ngikadila ya Leza.

Bubine: Kishima “muntu” mu Kihebelu kya kala kifunkilanga pa bonso, bene mbala ne ba bakaji bene. Ne bana-balume ne bana-bakaji, bonso babwanya kulombola ngikadila ya Leza. Kadi kekudipo upityile mukwabo pa bitala kwikala mu kipwano na Leza ne bitala kyabuntu kya būmi bwa nyeke.—Yoano 3:16.

Mulangwe mufwe: Leza udi na ngitu na ino yotudi nayo.

Bubine: “Leza i Mushipiditu”—ko-kunena’mba, ushikatanga panja pa imbuo imweka na meso. (Yoano 4:24) Shako Bible wisambilanga kyaba kimo padi Leza na kutela mpala yandi, makasa, mutyima, ne bipindi bikwabo, ino bino i binenwa’tu bya kwitufundija mwikadile Leza na kwingidija bishima bipēlela bantu kwivwana.—Divilu 15:6; 1 Petelo 3:12.

Mulangwe mufwe: Ngalwilo 1:26 ulombola amba Yesu i Leza.

Bubine: Leza ne Yesu bapwene bininge kipwano kya bu tata ne mwana, ino ke muntupo umo. Yesu wāfundije amba Leza i mukatampe kumupita. (Yoano 14:28) Pa kuyukila’ko bivule, tala video Lelo Yesu Kidishitu I Leza? nansha kutanga kishinte “Mwanda Waka Yesu Witwanga bu Mwanā Leza?”