Na bubine, Mikele utelelwe na bipwilo bimo bu “Mikele Musanto,” i dijina dyāinikilwe Yesu kumeso ne pa kupwa kwiya pano pa ntanda. a Mikele wēpatenye na Satana pāfwile Mosesa, kadi wākweshe mwikeulu asapwile mupolofeto Danyele musapu wa Leza. (Danyele 10:13, 21; Yude 9) Mikele uloñanga bintu mungya mushintulwila dijina dyandi​—“I Ani Udi bwa Leza?”​—na kubingija buludiki bwa Leza ne kulwa na balwana na Leza.​—Danyele 12:1; Kusokwelwa 12:7.

 Tala kinenenwa’mba i byendele’mo tufule ku kunena’mba Yesu i Mikele mwikeulu mukatampe.

•   Mikele i “mwikeulu mukatampe.” (Yude 9) Kitenta “mwikeulu mukatampe,” kishintulula’mba “mukata wa bamwikeulu,” kidi mu Bible misunsa ibidi kete. Ponso pabidi kekidipo mu buvule, kintu kilombola’mba kino kitenta kidi na mwikeulu umo kete. Vese umo pa ano abidi unena’mba, Mfumwetu Yesu musanguke “ukatūka mūlu na lubila lwa lupusa, na diwi dya mwikeulu mukatampe.” (1 Bene Tesalonika 4:16) Yesu udi na “diwi dya mwikeulu mukatampe” mwanda i Mikele, mwikeulu mukatampe.

•   Mikele wendejanga kibumbo kya bamwikeulu. “Mikele ne bamwikeulu bandi balwa na mpumina,” Satana. (Kusokwelwa 12:7) Mikele udi na lupusa lukatampe mu kīkalo kya mishipiditu, o mwanda witwa bu “umo wa mu bamfumu bakatampe” ne bu “mfumu mukatampe.” (Danyele 10:13, 21; 12:1) Bino bitenta bilombola’mba Mikele i “komanda, mukulu wa bibumbo bya bamwikeulu,” monka mwanenene’kyo shayuka wa Kipwanino Kipya David Aune.

   Bible utela dijina dikwabo dimo kete dya muntu udi na lupusa pa bibumbo bya bamwikeulu. Wisambila pa “kusokolwa kwa Mfumwetu Yesu momwa mūlu pamo na bamwikeulu bandi bakomokomo mu lubimbi lwa mudilo, [palubula] kinongo.” (2 Bene Tesalonika 1:7, 8; Mateo 16:27) Yesu “waendele mūlu, kadi bamwikeulu ne ba lupusa ne bya bukomo byatūdilwe munshi mwandi.” (1 Petelo 3:21, 22) Kebyadipo bya kwikala na buluji Leza atūle Yesu ne Mikele bu bakomanda babidi belwa ba bamwikeulu bajila. Ino i byendele’mo tufule ku kunena’mba ano majina abidi, Yesu ne Mikele, i a muntu umo.

•   Mikele “ukemana” mu “kitatyi kya tusua” ketwamwekele kashā. (Danyele 12:1) Mu mukanda wa Danyele, kishima ‘kwimana’ i kingidijibwe divule mwanda wa kufunkila pa mulopwe wimana mwanda wa kulonga kilongwa kya pa bula. (Danyele 11:2-4, 21) Yesu Kidishitu, utelelwe bu “Kinenwa kya Leza,” ukemana kulonga kilongwa kya pa bula bu “Mulopwe wa balopwe,” kya konakanya balwana na Leza ne kukinga bantu ba Leza. (Kusokwelwa 19:11-16) Ukalonga namino pa “kyamalwa kikatampe kekyaikele’ko kashā tamba ku ngalwilo ya ino ntanda.”​—Mateo 24:21, 42.