En-en! Bible i mutambe kudi “Leza, mwine useñanga ba mityima minyoñame.” (2 Bene Kodinda 7:6) Nansha Bible byakadipo bu dibuku dya kundapa bantu ñeni, ke mukwashe bantu baleke kwikala na milangwe ya kwiyoa. Madingi mayampe adi’mo abwanya kukukwasha ne abe.

•  Le Bible uleta madingi’ka mayampe?

•  Le Bible wisambila pa bantu bādi basaka kufwa?

•  Le i bisonekwa’ka bibwanya kukukwasha uleke kwikala na milangwe ya kwiyoa?

•  Le ukalonga namani shi mulunda nobe wakusapwila’mba “Nsakanga kufwa”?

•  Le nkalonga namani shi nadi nsaka kwiyoa pa kala?

• ● Lombola bakwenu mowiivwanina.

   Binena Bible: “Mulunda wa bine ulombolanga buswe kitatyi kyonso kadi i mwanenu mubutulwe mwanda wa bitatyi bya tusua.”—Nkindi 17:17.

   Mokishintulwila: Tusakilwa bakwetu ba kwitukwasha kitatyi kitwiya milangwe mibi mu ñeni.

   Shi kulombolapo mowiivwanina, ukasela kiselwa kibwanya kukulemena bininge. Shi ulombola mowiivwanina, kikakupēlela kadi ukatūkijibwa mutyima.

   Longa namino: Lombola’mo muntu dyalelo, padi muntu wa mu kisaka nansha mulunda ukulupilwa. a Ukokeja ne kulemba mowiivwanina.

• ● Enda ku lupitalo.

   Binena Bible: “Bakomo kebadipo kyobasakila muñanga, poso boba babela.”—Mateo 9:12.

   Mokishintulwila: Tufwaninwe kwenda ku lupitalo shi tubabela.

   Milangwe ya kwiyoa ibwanya kwikala bu kilomboji kya misongo ya mu ñeni nansha mu malango. Pamo bwa misongo yo-yonso, misongo ya mu ñeni ne mu malango ibwanya kundapibwa; nanshi i kutupu kya kwivwanina bumvu.

   Longa namino: Kimba bukidibukidi muñanga wa bwino akundape.

• ● Vuluka’mba Leza ukutele mutyima.

   Binena Bible: “Le kebapotejangapo misolwe itano ku bityele bibidi bya mvubu mityetye’ni? Inoko, i kutupu nansha umo obedilwe kudi Leza. . . . Kemwakityinai; mudi na bulēme kutabuka misolwe mingi.”—Luka 12:6, 7.

   Mokishintulwila: Wi mulēme kumeso a Leza.

   Ubwanya kulanga’mba udi bunka, ino Leza umwene masusu osusuka. Aye ukutele mutyima nansha shi kukisakepo kwikala mūmi. Kisonekwa kya Ñimbo ya Mitōto 51:17 kinena’mba: “Mutyima mutyumuke ne musonsakane, abe Leza, kukewelapo.” Leza ukusakilanga wikale mūmi mwanda ukusenswe.

   Longa namino: Langulukila pa bukamoni buleta Bible bulombola’mba Leza ukusenswe. Kimfwa, tala shapita wa 24 wa dibuku Fwena Kudi Yehova, dibuku dya kwifunda nadyo Bible.

• ● Lombela kudi Leza.

   Binena Bible: “[Elai] kuzumbazumba kwenu konso kwadi, mwanda aye wimutele mutyima.”—1 Petelo 5:7.

   Mokishintulwila: Leza ukwita umulombole mowiivwanina ne bintu bikuzumbija mutyima.

   Leza ubwanya kukupa ndoe ya mutyima ne bukomo bwa kūminina. (Bene Fidipai 4:6, 7, 13) O mwanda, ukwashanga boba bamwita pampikwa budimbidimbi.—Ñimbo ya Mitōto 55:22

   Longa namino: Lombela kudi Leza difuku ne difuku. Tela dijina dyandi, Yehova, kadi mulombole mowiivwanina. (Ñimbo ya Mitōto 83:18) Mulombe akukwashe ūminine.

• ● Langulukila pa lukulupilo lwa mu Bible lwa mu mafuku a kumeso.

   Binena Bible: “Tudi na luno lukulupilo pamo bwa ñanga wa būmi bwetu, lwa binebine kadi lushimate.”—Bahebelu 6:19, kunshi kwa dyani.

   Mokishintulwila: Pano ubwanya kwivwana bulanda ne nsangaji pamo bwa kyombo kilumbakana na kivula, ino lukulupilo lwa mu Bible lubwanya kukukwasha wikale mushimatyije.

   Luno lukulupilo ke kilotwapo, ino i lwimanine pa mulao wa Leza wa kutalula’ko bintu bitususula.—Kusokwelwa 21:4.

   Longa namino: Wifunde myanda mivule itala lukulupilo lwa mu Bible, na kutanga kifundwa 5 kya boloshile Myanda Miyampe Itamba Kudi Leza!

• ● Longa bintu byosenswe.

   Binena Bible: “Mutyima wa nsangaji i bwanga buyampe.”—Nkindi 17:22.

   Mokishintulwila: Shi tulonga bintu bituletela nsangaji, tubwanya kwikala biyampe mu ñeni ne mu malango.

   Longa namino: Longa bintu bivudile kukusangaja. Kimfwa, kuteja minjiki isangaja, kutanga bintu bikankamika, nansha kwipwija mukose. Kadi ukekala na nsangaji mivule shi ulonga bintu mwanda wa kukwasha bakwenu, nansha’tu ke bintu bityetye.—Bilongwa 20:35.

• ● Tá mutyima ku bukomo bobe bwa ngitu.

   Binena Bible: “Kwibidija ngitu kudi na kamweno.”—1 Temote 4:8.

   Mokishintulwila: Shi twitamuna bidyoma, tulāla biyampe ne kudya biyampe, tukamwena’mo.

   Longa namino: Enda matadi, nansha’tu mu minite 15.

• ● Vuluka’mba mwiivwanino ne bintu bikwabo bishintanga.

   Binena Bible: ‘Kemuyukilepo mukekadila būmi bwenu kesha.’—Yakoba 4:14.

   Mokishintulwila: Mwanda uvutakanya ñeni, enka ne owa omona bu keubwanyapo kupwa, ubwanya kwikala wa lupito.

   Nansha shi ngikadilo yodi’mo imweka bu mikomo dyalelo, ino ibwanya kushinta dya kesha. Nanshi kimba muswelo wa kūminina. (2 Bene Kodinda 4:8) Ngikadilo ikuvutakanya ñeni isa padi kushinta kyaba kimo, ino shi ubeyoa kubapu.

   Longa namino: Tanga nsekununi ya mu Bible ya bantu bātyumukilwe mutyima bininge kebasake ne kufwa, tala mwālumbulukīle būmi bwabo mwenda mafuku, kadi divule dine mu muswelo okebādipo balangila. Langulukila pa bimfwa bimobimo.

 En-en. Bible witusapwila bantu bamo bādi ‘basaka kufwa.’ Leza kēbafuninepo, ino wēbakweshe. Ubwanya kukukwasha ne abe.

Ediya

•  ● Le wādi ani? Ediya wādi mupolofeto nkanka. Ino kyaba kimo nandi wātyumukilwe mutyima. Kisonekwa kya Yakoba 5:17 kinena’mba, “Ediya wādi muntu pamo’nka bwa batwe.”

•  ● Mwanda waka wāsakile kufwa? Kintu kimo bidi, Ediya wēmwene bu udi bunka, wākwatwa moyo, ne kwimona bule. Ebiya wālomba’mba: “Talula būmi bwami”—1 Balopwe 19:4.

•  ● Le i bika byāmukweshe? Ediya wālombwele Leza mwawiivwanina. Lelo Leza wāmukankamikile namani? Leza wāmutele mutyima ne kumulombola mwikadile bukomo bwandi. Kadi wākulupije Ediya amba ukidi na mvubu, kupwa wakwasha Ediya na buswe.

•  ▸ Tanga myanda ya Ediya: 1 Balopwe 19:2-18

Yoba

•  ● Le wādi ani? Yoba wādi mpeta wa kisaka kikatampe, muntu wādi utōta Leza wa bine na kikōkeji.

•  ● Mwanda waka wāsakile kufwa? Būmi bwa Yoba bwābipile bininge mu kitulumukila. Wājimije bintu byandi byonso. Bandi bana bonso bafwa na kimpengele. Wābela misongo ya mpanda-mfwa. Ku mfulo, bāmubepela bubela bubibubi amba i aye mwine wiletela makambakano. Yoba wānenene amba: “Nakwatwa būmi bwami mukenye; nkisakilepo kwikala monka mūmi.”—Yoba 7:16.

•  ● Le i bika byāmukweshe? Yoba wālombēle kudi Leza ne kwisamba na bakwabo. (Yoba 10:1-3) Bāmukankamikile kudi Edihu, mulunda nandi wa lusa, wāmukwasha ekale na mumweno muyampe pa byāmutene. Ne kadi, Yoba wāitabije Leza amudingile ne kumukwasha.

•  ▸ Tanga myanda ya Yoba: Yoba 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13

Mosesa

•  ● Le wādi ani? Mosesa wādi mwendeji wa Isalela wa kala, kadi mupolofeto wa kikōkeji.

•  ● Mwanda waka wāsakile kufwa? Mosesa wādi na mingilo mivule, bādi bamufutulula kyaba kyonso, kādi wākõkele bininge. Ebiya wālombela kudi Leza amba: “Nakwisāshila ngipaye’tu enka pano’pa.”—Umbadilo 11:11, 15.

•  ● Le i bika byāmukweshe? Mosesa wāsapwidile Leza mwaādi wiivwanina. Leza nandi wākwasha Mosesa apēleje’ko mingilo yandi, kupwa wāleka kuvutakanibwa ñeni bininge.

•  ▸ Tanga myanda ya Mosesa: Umbadilo 11:4-6, 10-17.