En-en. Bible, dibuku dya kala dya tunangu, dilondolola bipangujo bya kamweno bya mu būmi, kadi ubwanya kukukwasha wivwena biyampe ne kwimona biyampe. Tala bipangujo bimobimo byalondolwele.

1.   Le kudi Umpangi? Bible unena’mba Leza “wapangile bintu byonso.” (Kusokwelwa 4:11) Byadi Umpangi wetu, Leza uyukile byotusakilwa pa kwikala biyampe ne kusangela būmi.

2.   Lelo Leza untele mutyima? Bible kalombolapo amba Leza udi kulampe na bantu, ino unena’mba: “[Kadipo] bine kulampe na batwe bonso.” (Bilongwa 17:27) Utele mutyima ku byobya bikufikila kadi usakanga kukukwasha wikale biyampe mu būmi.—Isaya 48:17, 18; 1 Petelo 5:7.

3.   Le kuyuka Leza kubwanya kunkwasha namani ngikale biyampe? Leza wētupangile na ‘byotusakilwa ku mushipiditu,’ ko kunena’mba na mutyima wa kukimba kwivwanija buluji ne kitungo kya būmi. (Mateo 5:3) Mu bisakibwa byetu bya ku mushipiditu mubadilwa ne kusaka kuyuka Umpangi wetu ne kupwana nandi. Leza ukasangela bukomo bolonga bwa kumuyuka, mwanda Bible unena’mba: “Fwenai kudi Leza, nandi ukemufwena.”—Yakoba 4:8.

 Bantu midiyo ne midiyo bamwene amba kupwana na Leza kwebakweshe bekale biyampe ne kuyuka bya kulonga pa kwikala biyampe mu būmi. Nansha kuyuka Leza byokekukapupo makambano obe, inoko tunanga twandi tudi mu Bible tubwanya kukukwasha

•   Wikale na būmi bwa nsangaji mu kisaka.

•   Wikale mu ndoe na bakwenu.

•   Ūminine makambakano meshileshile, kimfwa kutyumukwa mutyima, kuvutakanibwa ñeni pa mwanda wa lupeto, ne misongo ya zenzeka.

 Bipwilo bivule bingidijanga Bible, ino kulonda byafundija mpika. Ino kipwilo kya bine, kine kilonda bininge binena Bible, kikakukwasha uyuke Leza.