Nkasampe umo witwa bu Will unena’mba, “Bibe ubwanya kumweka bu upungijana, shi kuyukilepo muswelo muyampe wa kumutanga.”

 Le usaka kuyuka bya kulonga pa kusangela butangi bwa Bible? Kino kishinte kisa kukukwasha.

•  Mona myanda ya mu Bisonekwa na ayo ilongeka

•  Kimba!

•  Binena bakwenu

 Wiele mu byotanga. Ubwanya kulonga namino:

1.   Tonga nsekununi ya mu Bible yosaka kwifunda. Ubwanya kutonga mwanda wa mu Bible nansha vese wa mu Evanjile, nansha kadi ubwanya kutonga nsekununi ya mu drame ya butangi bwa Bible idi pa jw.org.

2.   Tanga nsekununi. Ubwanya kutanga’yo pa bunka, nansha kutanga’yo na diwi ditunduke na balunda nansha na bantu ba mu kisaka. Muntu umo ubwanya kutanga bu mubangi, bakwabo nabo bu bantu bakwabo besambilwe’mo.

3.   Tompa madingi amo nansha mavule pa ano:

   •   Elekeja nsekununi na bifwatulo. Nansha kufwatula mānga na tubifwatulo tulombola kipindi ne kipindi kya myanda’ya. Lemba myanda ishintulula mobyāpityile.

   •   Fwatula tulata. Kimfwa, potanga myanda ya muntu wa kikōkeji, kwatañanya ngikadila ne bilongwa byandi na madyese obāmwesele.

   •   Mona nsekununi na ayo ilongeka dyalelo. Sekununa mwanda mu miswelo palapala, kadi wimone na abe “wipangula” bantu bene besambilwe’mo ne boba bātenwe’po.

   •   Shi muntu umo wa mu nsekununi wākwete butyibi bwampikwa tunangu, fwatakanya mobyāfudile. Kimfwa, langulukila pa kutuna kobātunine Yesu kudi Petelo. (Mako 14:66-72) Le i muswelo’ka muyampe wādi wa kulonga Petelo pobāmutyininye mbavu?

   •   Shi wimona bu mulembi, nabya lemba yobe myanda kukwatañana na nsekununi ya mu Bible. Lombola’mo ne ñeni ibwanya kuboila’ko bantu.—Bene Loma 15:4.

 Shi ulangulukila pa kanda ne kanda, ubwanya kusokola byabulēme bifyeme mu nsekununi. kyaba kimo kishima kimo nansha bibidi bya mu nsekununi ya mu Bible bibwanya kukufundija bivule.

 Kimfwa, dingakanya Mateo 28:7 na Mako 16:7.

•    Mwanda waka Mako wānenene amba Yesu kakejepo kumwekela bana ba bwanga “ne Petelo”?

•  Bubinga: Mako kēmweninepo ino myanda; na bubine bāmulombwele’yo kudi Petelo.

•  Byabulēme bifyame: Mwanda waka Petelo wāikele na kikulupiji pa kwivwana’mba Yesu usa kwimona nandi monka? (Mako 14:66-72) Le Yesu wēlombwele namani bu mulunda wa bine wa Petelo? Le i muswelo’ka okokeja kwiula Yesu ne kwikala mulunda wa bine ku bakwenu?

 Shi umone myanda ya mu Bisonekwa bwa ayo ilongeka na kukimba kanda ne kanda, nabya ukasangela bininge butangi bwa Bible!