Virginia, Kamoni wa Yehova, ubelanga misongo ya bulebe. I mutyumukile panshi. Ubwanya kumona ne kwivwana, kupūtula meso ne kwiapūta, ne kujinya mutwe bityetye. Ino kabwanyapo kwisamba nansha kudya. Kyaba kimo wadi’tu na bukomo bwa ngitu buyampe kadi mukomo nkē. Ino difuku dimo lubanga mu 1997, waivwana mwikoshi misanshi mikatampe, kadi keipu. Wandi mulume waenda nandi ku lupitalo, kupwa wakotoka ne kukotoka. Pa kumundapa bininge wapumputumuka’mo kupwa kwa mayenga abidi, na bulebe kadi bamwele kya kwesela’ko. Mu mafuku abala-anga kadipo ubwanya kuvuluka kintu, ne kwiyuka aye mwine mpika.

 Virginia ushintulula bintu byalondele’po. Unena’mba: “Bityebitye ñeni yaanza kungiya. Nalombela bininge. Nkyadipo nsaka kufwa ne kushiya wami mwana mwana-mulume pampikwa inandi. Pa kwikala monka na bukankamane, nalonga bukomo bwa kuvuluka bisonekwa bivule bya mu Bible.

 “Mwenda mafuku, badokitele bandupula mu kyumba kya bundapi bwa peulu. Pa kupwa kulonga myeji isamba mu mpitalo mishileshile, najokela ku njibo. Inoko nadi’nka mutyumukile panshi, kadi nadi nsakilwa kukwashibwa na kintu kyonso. Natyumukilwe mutyima bininge! Nadi nemona bu nkidipo na mvubu ku meso a bakwetu ne a Yehova. Kadi nadi nzumbija mutyima pa mwa kuvuijija bisakibwa bya wami mwana.

 “Nashilula kulangulukila pa bimfwa bya Batumoni bakwabo badi babela misongo mikomo pamo bwa ami, inoko badi balonga byonso byobabwanya mu mwingilo wa Yehova. Ebiya nami nekankila’ko kwikala na mumweno muyampe, na kuta mutyima ku byobya byombwanya kulonga. Kumeso kwa ami kubela, nkyadipo na kitatyi kivule kya kwingila mingilo ya ku mushipiditu. Pano kendi na difuku dituntulu, kadi difuku dyo-dyonso. O mwanda pa kyaba kya kutyumukwa mutyima, ntanga mutyima ku kipwano kyami na Yehova.

 “Nefundile kwingidija olodinatele. Nembanga’ko kupityila ku mpangiko idi’mo ibwanya kulemba ponjinya mutwe. I bipungija shabyo, inoko bino bya busendwe i binkwashe nefunde Bible ne kusapwila bakwetu lukulupilo lwami kupityila ku mikanda. Pa kwisamba na bantu botudi nabo, ñingidijanga tabulo palembelwe masomo a alufabe. Muntu otudi nandi unfunkilanga masomo, dimo ne dimo. Shi wafunka pa disomo dingi, natolomona meso, ino shi wafunka disomo dya bine, napūta meso. Upitulukanga’mo misunsa ne misunsa kufika ne byonunga bishima ne kulonga musemwa. Bakaka bamo bapityijanga pamo nami kitatyi kilampe, ke bapēlelwanga kujingulula byonkimba kunena. Ino kyaba kimo shi abetupe, tusepanga’tu.

 “Nsenswe bininge kwingila mingilo ya kipwilo. Nekwikanga nyeke ku kupwila, kadi pano nondanga’ko ku bya busendwe twimwene. Nembanga malondololo ami, ebiya muntu umo weatanga shi ke bipindi bya bipangujo ne malondololo. Kadi nekwikanga na kisumpi kya busapudi mwanda wa kutala mpangiko ya Televijo ya JW * kweji ne kweji.

 “Nalonga ke myaka 23 na misongo ya bulebe. Kyaba kimo ngivwananga bulanda. Inoko mbwanya kūminina bino bitatyi bya makambakano, na kulombela, kupityija kitatyi na batutu ne bakaka, ne na kwingila mingilo ya bwine Kidishitu. Ne kadi bibi, na bukwashi bwa kipwilo, ne mubwanye kwingila bu pania mukwashi mu myaka isamba ne kupita. Ne mulonge bukomo bwa kushila Alessandro wami mwana kimfwa kiyampe, mwine udi pano na mukaji kadi mukulumpe pa kipwilo. Aye ne wandi mukaji i bapania ba lonso.

 “Nangulukilanga nyeke pa bintu byonkabwanya kulonga mu paladisa. Kintu kibajinji nkyosaka kulonga i kwingidija diwi dyami pa kwisamba myanda ya Yehova. Nkasangela kwenda mu ntanda kufula kwa kamunga, koku ntala ntanda miyampe ya biyombo. Kadi byombwanya kudīla ku sonde bya kudya bidi bwa mema pano ke padi myaka 20, ntengēle kukāpa pome ku mutyi ne kumudya. Na bubine, byondi mwine Itadi, ntengēle kukatēka ne kudya bya kudya byobasenswe mu Itadi, kimfwa pizza!

 “‘Lukulupilo lwa lupandilo’ i lunkwashe ndame milangwe yami. (1 Bene Tesalonika 5:8) Kwimona mu ñeni mu ntanda mipya, kundetelanga nsangaji nansha byondi na misongo ku ngitu, kadi nkulupile amba isa kupwa panopano ponka. Bine, ntengēle na kipyupyu kukekala na ‘būmi bwinebwine’ bulaile kwitupa Yehova kupityila ku Bulopwe bwandi.”—1 Temote 6:19; Mateo 6:9, 10.