TOHO YA TABA: KANA MULIMU U SITUHU?

Ki Kabakalañi Batu ha ba Bulela Kuli Mulimu U Situhu?

KANA puzo ya toho ya taba ya magazini ye ya komokisa? Ba bañwi kona mo ba nahanela, kono batu ba bañata mazazi a, ba batanga ku ziba haiba luli Mulimu u situhu kamba ba kana ba akaleza kuli u lukela ku ba ya situhu. Kiñi se si tisa kuli ba nahane cwalo?

Batu ba bañwi ba ba bandukanga likozi za ka taho, ba buzanga kuli: “Ki kabakalañi Mulimu ha tuhelelanga lika ze cwalo ku ezahala? Kana Mulimu haa na taba ni batu? Kamba kana u na ni feela situhu?”

Ba bañwi bona ba buzanga puzo ye swana yeo ha ba bala Bibele. Ha ba bala litaba ze cwale ka likande la Nuwe ni ka za Muunda, ba komokanga ni ku ipuza kuli, ‘Ki kabakalañi Mulimu ya lilato ha naa bulaile batu ba bañata cwalo? Esi mwendi u situhu?’

Kana ni mina fokuñwi mwa ipuzanga lipuzo ze cwalo? Kamba kana ku mi belanga taata ku alaba mutu ya mi buza ka za haiba Mulimu u situhu? Haiba ku cwalo, ha lu nyakisiseñi puzo ye ñwi ye kona ku lu tusa.

KI KABAKALAÑI HA LU SA LATI SITUHU?

Ka bukuswani, ha lu lati situhu bakeñisa kuli lu na ni buikoneli bwa ku ziba lika ze lukile ni ze si ka luka. Fo ki fona fo lu shutanela hahulu ni lifolofolo. Mubupi wa luna naa lu bupile “ka siswaniso sa hae.” (Genese 1:27) Ku bupiwa ka siswaniso sa Mulimu ku talusañi? Ku talusa kuli Mulimu naa lu bupile ka nzila ye lu konisa ku likanyisa tulemeno twa hae, ku pila ka ku latelela likuka za hae, ni ku ziba lika ze lukile ni ze si ka luka. Mu ipuze kuli: Haiba buikoneli bo lu na ni bona bwa ku ziba lika ze lukile ni ze si ka luka bu zwa ku Mulimu mi ki lona libaka le li tahisa kuli lu toye situhu, kana taba yeo ha i bonisi kuli Mulimu ni yena u toile situhu?

Bibele i bonisa kuli Mulimu mane u toile hahulu situhu ku fita luna, kakuli mwa Bibele, Mulimu u lu taluseza kuli: “Linzila za ka li pahami . . . fahalimu a linzila za mina, ni mihupulo ya ka fahalimu a mihupulo ya mina.” (Isaya 55:9) Ha ne lu ka bulela kuli Mulimu u situhu, kana ne lu si ke lwa lwanisa manzwi ao a mwa Bibele, ili ku talusa kuli linzila za luna li fahalimu a linzila za Mulimu? Kanti he, ki kwa butokwa kuli lu zibe ze ñata ka za taba yeo pili lu si ka bulela kale kuli Mulimu u situhu. Mwendi lwa kona ku buza libaka likezo ze ñwi za Mulimu ha li bonahala ku ba ze situhu isiñi ka za haiba Mulimu u situhu. Kuli lu utwisise hande taba ye, ha lu nyakisiseñi taluso luli ya linzwi la “situhu.”

Ha lu bulela kuli mutu yo muñwi u situhu, fo lu talusa kuli u na ni milelo ye maswe. Mutu ya situhu, ki ya tabela ku bona ba bañwi inze ba nyanda kamba ya si na taba ni manyando a batu. Kamukwaocwalo, ndate ya fa mwanaa hae koto kabakala kuli u i kutwanga hande ku mu utwisa butuku, u situhu. Kono ndate ya fa mwanaa hae koto ka mulelo wa ku mu luta tuto ye ñwi kamba ku mu sileleza, ki ndate yo munde. Bakeñisa kuli hañata ha lu zibangi se si tahisanga kuli batu ba bañwi ba eze lika ka nzila ye ñwi, ku bunolo ku nahana kuli ba na ni milelo ye maswe, mwa kona ku utwisisa hande taba yeo haiba mutu yo muñwi sa kile a nahana kuli mu batu ba ba maswe.

Ha lu nyakisiseñi lika ze peli ze tahisa kuli batu ba bañwi ba nahane kuli Mulimu u situhu—likozi za ka taho ze lu iponela kacenu, ni litaba za mwa Bibele ze bonisa ka mo Mulimu naa otezi batu. Kana luli ki niti kuli Mulimu u situhu?

[Siswaniso se si fa likepe 3]

Lu tabela ku bonisa mufelañeke mi ha lu lati situhu