Mu Kanyise Mulimu Isi Mutu

LIKWELINYANA ze felile, batu ba ba lata ku luka mwa lifasi kaufela ne ba itutile ku kanyisa Mulimu ha ne ba kopani kwa Mikopano ya Sikiliti ya Lipaki za Jehova ya “Mu Kanyise Mulimu.” Ha lu nyakisiseñi lituto ze ne itutilwe teñi.

Ku ba bañata, tukiso yeo ye tomile fa Bibele ne li ya mazazi a malalu mi ku be ne ba ile kwa mikopano ye ipitezi ya macaba, ne li ya mazazi a mane. Baputehi ne ba teelelize kwa lingambolo ze tomile fa Mañolo ze fitelela 30, ze kopanyeleza lingambolo ze ne tungisize buitebuho ni kutwisiso ya bona ya lika za kwa moya, ze bonwi ze ne tiisize tumelo, liponiso ze ne bonisize lituso za ku latelela likuka za Bibele, ni drama ya ba ba apezi mikanjo ye ne bonisize twaniso ye ne ba talimani ni yona Bakreste ba kwa makalelo. Haiba ne mu li teñi ku o muñwi wa mikopano yeo, mwa kona ku lundulula lisupo ze ne mu ñozi ha mu nze mu bala taba ye. Lu kolwa kuli taba ye i ka mi luta se siñwi ni ku mi hupulisa mukitituna wani wa kwa moya.

Toho ya Taba ya Lizazi la Pili: “Mulimu . . . Ki Wena ya Lukela ku Fiwa Kanya”

Hamulaho wa pina ni tapelo ya ku kwalula, mubuleli wa pili n’a amuhezi baputehi kaufela ka ngambolo ye ne kanatezi fa mulelotuna wa mukopano, ye li: “Lu Kopanezi ku T’o Kanyisa Mulimu.” Ha n’a balile Sinulo 4:11, mubuleli n’a koñomekile toho ya taba ya mukopano. Kapili-pili a bonisa seo ku kanyisa Mulimu ku si talusa. Ka ku itusisa buka ya Lisamu, a bonisa kuli ku kanyisa Mulimu ku ama “ku kubama,” “ku lumbeka” ni “ku itumela.”—Samu 95:6; 100:4, 5; 111:1, 2.

Ngambolo ye tatama ne i ize “Mbuyoti Ki Ya Ba Ba Kanyisa Mulimu.” Mubuleli n’a bulezi nto ye ñwi ye hoha mamelelo. Bakeñisa kuli Lipaki za Jehova ba ba fitelela 6 milioni ba mwa linaha ze 234 lifasi kaufela, ku konwa ku bulelwa kuli lizazi ha li likeleli ba ba kanyisa Jehova. (Sinulo 7:15) Mwa ngambolo yeo ne ku bile ni puhisano ye ne itebuhilwe hahulu ki baputehi ya mizwale ni likaizeli ba sikai ba ba mwa sebelezo ye ñwi ye ipitezi.

Ngambolo ye tatama ne i ize “Pupo I Bulela Kanya ya Mulimu.” Mahalimu niha sa buleli se siñwi, a bonahaza butuna bwa m’ata a Mulimu, mi a lu tusa ku itebuha hahulu pabalelo ya hae ye lilato. Seo ne si talusizwe hande ka ku tala.—Isaya 40:26.

 Nyandiso, twaniso, moya wa lifasi, ni litakazo za sibi ki lika ze tahisa muliko kwa Bakreste ba niti. Kacwalo, ngambolo ye li “Mu Zamaye ka ku Sepahala” ne i tokwa ku teelezwa hahulu. Ne li nyakisiso ya timana ka timana ya Samu 26, hamohocwalo ni puhisano ni Paki wa mwan’a sikolo ya ikutekile ni yo muñwi hape ya n’a ngile muhato wa ku tula butata bwa n’a na ni bona bwa ku sinyezanga nako ye ñata ku za ku itabisa ka zona ze maswe.

Ngambolo ye tuna ye li, “Lipono Ze Kanya Za Bupolofita Za Lu Susueza!” ne i unguzi tukiso ya kakusasana. Mubuleli n’a file mitala ya mupolofita Daniele ni baapositola bo Joani ni Pitrosi mi n’a bulezi kuli tumelo ya bona ne i tiisizwe ki lipono ze kanya za bupolofita za ku tomiwa ni ku busa kwa Mubuso wa Mesiya. Ku bao kaufela ba ba kana ba libezi bupaki bo bu iponahaza hande bwa kuli lu mwa mazazi a maungulelo, mubuleli n’a ize: “Lu sepa kuli ba ba cwalo ba ka lemuha kuli Kreste s’a li teñi mwa kanya ya Mubuso mi haike taba yeo i ba tiise hape kwa moya.”

Tukiso ya musihali ne i kalile ka ngambolo ye li “Kanya ya Jehova I Patululelwa Baikokobezi.” Mubuleli n’a bonisize ka m’o Jehova a li mutala wa buikokobezo, nihaike kuli yena ki Muambakani ya pahami ka ku fitisisa. (Samu 18:35) Jehova u fuyola ba ba ikokobeza luli, kono u kwahule ni ba ba iponahaza fela ku ikokobeza kwa balikani ba bona kamba bazamaisi ba bona; kono ili ba ba na ni buhali ku ba ba mwatas’a bona.—Samu 138:6.

Ku zwa f’o, ne ku nyakisisizwe bupolofita bwa Bibele mwa ngambolo ya ka ku tatamana ye ne kanatezi fa toho ya taba ye li “Bupolofita bwa Amosi—Litaba za Bona Ze Lu Ama Kacenu.” Ka ku itusisa mutala wa Amosi, mubuleli wa pili n’a bonisize musebezi o lu na ni ona wa ku lemusa batu ka za lizazi la Jehova la katulo le li taha. Ngambolo ya hae ne i ize “Mu Bulele Linzwi la Mulimu ka Bundume.” Mubuleli ya tatama n’a buzize puzo ye li: “Kana luli Jehova u ka feza bumaswe ni manyando fa lifasi fa?” Ngambolo ya hae ye li “Katulo ya Mulimu ku Ba Ba Maswe” ne i bonisize kuli katulo ya Mulimu kamita ki ye swanela, ha i bandehi, mi ya keta. Mubuleli wa mafelelezo wa ngambolo yeo ya ka ku tatamana n’a file ngambolo ye li “Jehova U Lika Lipilu.” Ba ba bata ku tabisa Jehova ba ka utwa manzwi a kwa Amosi 5:15 a li: “Mu toye bumaswe mi mu late bunde.”

Bucwala, bo bu cwale inge veine ye tabisa pilu, bwa kona ku sa nwiwa hande. Mwa ngambolo ya hae ye li “Mu Pime Lilaba la Bucakolwa,” mubuleli n’a kolokisize likozi za kwa mubili ni za kwa moya za ku nwa hahulu bucwala, mutu niha sa kolwi. N’a bulezi sikuka se lu kona ku latelela se: Bakeñisa kuli mutu ni mutu u na ni sipimo sa fa kolwela, mutu a sa latehelwa fela ki “butali ni buitemuso,” u zibe u nwile hahulu.—Liproverbia 3:21, 22.

Bakeñisa kuli lu pila mwa linako ze t’ata, ngambolo ye tatama ye li “Jehova ki ‘Sisabelo sa Luna mwa Nako ya Ziyezi,’” ne li ye omba-omba hahulu. Tapelo, moya o kenile, ni Bakreste ba bañwi ba kona ku lu tusa ku itiisa.

Ngambolo ya mafelelezo lizazi leo ye li “‘Naha ye Nde’—Mbengenge ya Paradaisi,” ne i felile ka nto ye ne si ka libelelwa—ku zwisiwa kwa hatiso ye nca ya limapa ze ñata za mwa Bibele! I na ni toho ya taba ye li Bona Naha ye Nde.

Toho ya Taba ya Lizazi la Bubeli: “Mu Bulele Kanya ya Hae Mwahal’a Macaba”

Hamulaho wa liñolo la zazi, ne ku filwe ngambolo ye ñwi ya ka ku tatamana, ye li: “Mu Bonise Kanya ya Jehova Sina Siiponi.” Ngambolo ya pili ne i bulezi ka butungi ka za “Ku Hasanya Taba Ye Nde Kai ni Kai” mi ne ku ezizwe ni liponiso za ze ne ezahezi luli mwa sebelezo ya mwa simu. Ngambolo ya bubeli ne i kopanyelelize ni poniso ya musipili wa makutisezo mubuleli ha n’a file ngambolo ye li “Ka ku Zwisa Kapai ka Ba Ba Foufalizwe.” Ngambolo ya mafelelezo ye li “Ka ku Ekeza ka  Nako ni Nako kwa Bukombwa bwa Luna,” ne i kopanyelelize ni lipuhisano ze tabisa ka za bukombwa bwa mwa simu.

Ngambolo ye tatama ne i ize “Ku Toiwa Fela ku Si Na Libaka.” Ne i kopanyelelize ni lipuhisano ze susueza ni Bakreste ba ba sepahala bao ka m’ata a Mulimu ne ba itiisize ka nako ya twaniso.

Nto ye ñwi ye libelelwanga hahulu fa mikopano ye mituna ki ngambolo ya kolobezo ye latelelwanga ki nweliso luli ya mwa mezi ya ba ba swanela ku kolobezwa. Kolobezo ya mwa mezi ki poniso ya buineelo bo bu tezi bwa mutu ku Jehova. Kacwalo, toho ya ngambolo yeo ye ne li “Ku Peta Za Buineelo Bwa Luna ku Kanyisa Mulimu” ne i swanela luli.

Tukiso ya manzibwana ne i kalile ka ngambolo ye ne susuelize baputehi ku itekula ye  li “Ku Ba ni Mubonelo wa Kreste wa Butuna.” Mubuleli n’a bulezi sisupo se sinde sa kuli: Butuna bu taha ka ku likanyisa buikokobezo bwa Kreste. Kacwalo, Mukreste ha swaneli ku bata buikalabelo ka libaka la ku bata ku ipahamisa. U swanela ku ipuza kuli, ‘Kana na tabela ku eza misebezi ye sa lemusehi ya ku tusa ba bañwi?’

Kana mwa katalanga? Ku si na kuliñi mwa katalanga. Ngambolo ye li “Ku Katala kwa Mubili Kono Isi kwa Moya” ne i itebuhilwe hahulu ki bote. Lipuhisano ni Bakreste ba ba sebelize ka nako ye telele ne li bonisize kuli Jehova wa kona ku lu ‘tiisa ka moya.’—Maefese 3:16.

Bufani haki mukwa wa luna wa ka sipepo kono ki mukwa o lu na ni ku ituta. Sisupotuna seo ne si bulezwi mwa ngambolo ye li “Mu Abelane, Mu Tuse Ba Bañwi.” Mi ne ku buzizwe puzo ye ye tokwa ku nyakisiswa: “Kana lwa kona ku tanda mizuzunyana ni mizwale ni likaizeli ba ba supezi, ba ba kula, ba ba zwafile, kamba ba ba pila mwa buinosi?”

Baputehi ne ba teelelize hahulu kwa ngambolo ye li “Mu Tokomele Linzwi la Ba Sili.” Ngambolo yeo ne i swaniselize balateleli ba Jesu kwa lingu ze teeleza fela kwa linzwi la hae ka ku ba yena “mulisana yo munde” mi ha li teelezi kwa “linzwi la ba sili” le li bulelwa ka linzila ze ñata ze tahiswa ki Diabulosi.—Joani 10:5, 14, 27.

Baopeli ba na ni ku opela ka buñwi kuli ba utwahale. Kuli ba kanyise Mulimu, balapeli ba niti lifasi kaufela ba swanela ku swalisana. Kacwalo, ngambolo ye li “Mu Kanyise Mulimu ‘ka Mulomo U Li Muñwi’” ne i file litaelo ze tusa ka za mo lu kona ku bulelela ka ‘milomo kamba puo ye kenile’ ni ku sebeleza Jehova “ka pilu i li ñwi.”—Zefania 3:9.

Bashemi, sihulu ba ba na ni bana ba banyinyani, ne ba tabisizwe hahulu ki ngambolo ya mafelelezo lizazi leo la bubeli ye li “Bana ba Luna Ki Sanda sa Butokwa.” Ne ku zwisizwe buka ye nca ya makepe a 256, ye ne tabisize ni ku komokisa baputehi. Buka ya Itute ku Muluti yo Mutuna i ka tusa bashemi ku banga ni nako ye nde ya ku buhisana za kwa moya ni bana ba bona, be li mpo ye ba filwe ki Mulimu.

Toho ya Taba ya Lizazi la Bulalu: “Mu Eze Linto Kaufela Kuli Mulimu A Lumbekwe ka Zona”

Lizazi la mafelelezo la mukopano ne li kalile hande ka likupuliso za mwa liñolo la zazi. Kalulo ya pili ya litukiso za lizazi leo ne i kanatezi hape fa lubasi. Ngambolo ya pili ye li “Bashemi, Mu Yahe Lubasi lwa Mina” ne i nyangumuzi baputehi. Mubuleli ha s’a bulezi za buikalabelo bwa bashemi bwa ku uta mabasi  a bona, a bonisa kuli buikalabelo bo butuna bwa bashemi ki ku babalela bana ba bona kwa moya.

Mubuleli ya tatama n’a ambozi kwa mikulwani mi n’a file ngambolo ye li “Ka M’o Mikulwani Ba Lumbekela Jehova.” N’a bulezi kuli ba banca ba swana sina “puka” kakuli ki ba bañata mi tukufalelo ya bona ya bunca ya tabisa. Ba bahulu ba tabile ku sebeleza Jehova hamoho ni bona. (Samu 110:3) Ngambolo yeo ne i kopanyelelize ni lipuhisano ze tabisa ni mikulwani ba ba na ni mitala ye minde.

Drama ya ba ba apezi mikanjo ya tabisanga luli fa mikopano ya sikiliti, mi ne i li teñi ni fa mukopano wo. Drama ye li “Ku Paka Ka Bundume Niha Ku Na ni Twaniso” ne i bonisize za balateleli ba Jesu ba kwa makalelo. Ne i si ka tabisa fela, kono sa butokwa hahulu kikuli ne i na ni tuto. Ngambolo ye ne latelezi drama ye li “Mu Si Ke Mwa ‘Lisela’ ku Bulela Taba Ye Nde” ne i koñomekile hande lisupo ze tuna za drama.

Baputehi kaufela ne ba libelezi ngambolo ye ipitezi ya la Sunda, yona ngambolo ya nyangela ye li “Ki Bomañi Ba Ba Kanyisa Mulimu Kacenu?” Mubuleli n’a bulezi bupaki bo bu bonisa kuli ba sayansi ni ba bulapeli ha ba si ka kanyisa Mulimu. Ki bao fela ba ba bizwa ka libizo la hae, bona ba ba kutaza ni ku luta niti ka za Jehova, ba ba kanyisa luli libizo la hae kacenu.

Ngambolo ya nyangela ne i latelezwi ki tuto ye kusufalizwe ya Tora ya ku Libelela ye ne itutilwe mwa viki yeo. Kihona cwale ku taha ngambolo ya mafelelezo ye li “‘Mu Beye Muselo Hahulu’ kuli Jehova a Kanyiswe.” Mubuleli n’a balile katulo ya lisupo ze lishumi kuli baputehi kaufela ba i amuhele. Katulo yeo ne i kanatela fa linzila ze fitana-fitana za ku kanyisa ka zona Jehova, yena Mubupi. Kwa mikopano kaufela lifasi lote, bote ne ba utwahezi ka buñwi ha ne ba alabile kuli “Ee.”

Kacwalo mukopano n’o felile mañi ni mañi inz’a sa hupula toho ya taba ye li “Mu Kanyise Mulimu.” Mi ka tuso ya moya wa Jehova ni ka kopano ya hae ye bonahala, haike kamita lu bate ku kanyisa Mulimu isi batu.

[Mbokisi/Maswaniso a fa likepe 23]

Mikopano ya Macaba

Mikopano ya macaba ya mazazi a mane ne i ezizwe mwa Africa, Asia, Australia, Yurope, ni kwa North America ni South America. Lipaki ba kwa linaha ze ñwi mwa lifasi kaufela ne ba memilwe ku yo fumaneha ku yona mikopano yeo. Ka nzila yeo ne ku bile ni ku “kutazana” mwahal’a be ne ba tile ni ba kwa linaha zona zeo. (Maroma 1:12) Balikani ba kale ne ba kopani sinca hape, mi be ne ba sa zibani kale ne ba kalisize bulikani. Nto ye ne i ipitezi kwa mikopano ya macaba ne li ngambolo ye li “Lipiho Ze Zwa Kwa Linaha Li Sili.”

[Mbokisi/Maswaniso a fa likepe 25]

Lihatiso ze Nca Ze Kanyisa Mulimu

Ne ku zwisizwe lihatiso ze nca ze peli fa Mikopano ya Sikiliti ya “Mu Kanyise Mulimu.” Buka ya limapa za mwa Bibele ye li Bona Naha ye Nde i na ni muputo o tiile mi ki ya makepe a 36 a limapa ni maswaniso a libaka za mwa Bibele. Likepe ni likepe la yona ki la mubala mi li na ni limapa za mibuso ya Asirya, Babilona, Medo-persia, Greece, ni Roma. Ku na ni limapa ze ñwi ze bonisa za bukombwa bwa Jesu ni za yanduluko ya Bukreste.

Itute ku Muluti yo Mutuna ki buka ya makepe a 256 ye na ni maswaniso a bat’o eza 230. Lipuhisano ze ñata ze tabisa ni banana za kona ku ikoliwa ka ku talima fela fa maswaniso ni ku alaba lipuzo ze tokwa nahanisiso ze mwa buka ye. Hatiso ye i lukiselizwe ku taka twaniso ya Satani ya ku bata ku sinya mizamao ya bana ba luna.

[Siswaniso se si fa likepe 23]

Balumiwa ne ba kandekile ze ne ba ipumani ku zona ze tiisa tumelo

[Maswaniso a fa likepe 24]

Kolobezo ne i tabisize hahulu fa mikopano ya sikiliti ya “Mu Kanyise Mulimu”

[Maswaniso a fa likepe 24]

Madrama a mwa Bibele a ikoliwa ki banana ni ba bahulu