Ki Kabakalañi Batu Habasa Ikuungi Kuli ki ba Butokwa?
LIBAKA KUIKUNGA KULI MUBA BUTOKWA HAKULI KWA BUTOKWA
Batu babaikunga kuli ki ba butokwa bakona kutiyela miinelo yataata ya mwa bupilo ka bundume. Habazwafangi kapili.
-
Lipatisiso libonisa kuli batu babasa ikungi kuli ki ba butokwa, hañata babanga ni lipilaelo, kulembwala, mane ni butata bwa kupalelwa kuca hande. Mi mane fokuñwi bakona kunwa maswe bucwala ni kuitusisa maswe milyani yekola.
-
Batu babaikunga kuli ki ba butokwa baambukanga kuibapanya ku babañwi, ili nto yetahisa kuli kubabele bunolo kuswalisana hande ni babañwi ni kuba ni silikani sesinde ni bona. Kono batu babaikutwa kuli haki ba butokwa balatanga hahulu kunyaza-nyaza babañwi, ili nto yekona kusinya silikani sabona ni batu babañwi.
-
Batu babaikunga kuli ki ba butokwa niha bakopana ni miinelo yetaata, bazwelangapili kutiya mi habalumelezangi lika zeneezahezi kwamulaho kubapalelwisa kupeta likonkwani zabona. Kono batu babaikutwa kuli haki ba butokwa bona bakona kuunga butata bobunyinyani kuba bobutuna hahulu. Taba yeo ikona kutahisa kuli bazwafe kapili.
ZEMUKONA KUEZA
Mukete balikani babaka misusueza. Muswalisane ni batu babanani likute ili babatabela kuziba buiketo bwamina ni kumisususeza.
Mutuse babañwi. Haiba mubonisa sishemo ni kuezeza batu babañwi lika zende, ili kukopanyeleza cwalo ni batu babasa koni kumiezeza lika zemubaezeza, mukaba ni tabo yezwa mwa kufana. Mi mukaba ni tabo ya luli kusina taba ni kuli batu babañwi habalemuhi lika zemuezize.
Mulute bana bamina kuikutwa kuli ki ba butokwa. Nzila yeñwi yemukona kueza cwalo ki kubatuhelela kuli batatulule matata ebakona kutatula ka ili bona. Kueza cwalo kukona kutusa bana bamina kuituta mwa kutatululela matata ebakona kukopana ni ona mwa bupilo. Kuzwa fo hape, kuka batusa kuikutwa kuli ki ba butokwa ka nako ya cwale mane niha bakahula.
ZEBAEZA LIPAKI ZA JEHOVA
Mikopano ya Lipaki za Jehova ni tukiso ya kuituta Bibele ni batu, itusanga batu kucinca mupilelo wabona ili nto yebatusanga kuikutwa kuli ki ba butokwa.
MIKOPANO YALUNA YA KA SUNDA
Kwa mikopano yaluna ya ka sunda, luikolanga kuteeleza kwa lingambolo zetomile fa Bibele ili zefanga liakalezo ka za mo batu bakona kuikutwela kuli ki ba butokwa. Batu balukuluhile kufumaneha kwa mikopano yaluna mi habatokwi kulifa sesiñwi. Ka mutala, kwa mikopano yaluna mukaituta ka za . . .
-
libaka hamuli ba butokwa ku Mulimu
-
momukona kuzibela zemupilela
-
mwa kubela ni balikani ba niti
Hape mukakopana ni balikani ba niti ili baba ‘babalelana.’—1 Makorinte 12:25, 26.
Kuli muzibe zeñata ka za mikopano yaluna, muye fa jw.org mi mubate vidio yekuswani yeli Kiñi Zeezahalanga Kwa Ndu ya Mubuso?
TUKISO YA KUITUTA BIBELE
Luitutanga ni batu Bibele kusina kulifa sesiñwi, ili ka kuitusisa buka ya Muikole Bupilo Kuya Kuile! Mwa buka ye kunani mañolo a kubala, litaba zekona kutusa muituti kunahanisisa, lipuzo zeswanela, mavidio atabisa, ni maswaniso a mande. Tukiso ya kuituta Bibele ye itusa batu kuikutwa kuli ki ba butokwa mane ni kuba ni mupilelo omunde.
Kuli mubone mo kuituta Bibele ni Lipaki za Jehova kukona kumituseza, muye fa jw.org mi mubate vidio yekuswani yeli Ki Kabakalañi Haluswanela Kuituta Bibele?
Hape Mwendi Mwakona Kutabela Litaba Ze
MUZUHE!
Mwakuboniseza Likute
Kubonisa likute mwa linyalo haki nto yemutokwa kubonisanga feela ka linako zeñwi—ki nto yetokwahala luli. Mukona kubonisa cwañi kuli mwakuteka bakumina?
KA ZA LUNA
Mukupe Kuli Mutu Yomuñwi Ato Mipotela
Munyakisise puzo yeñwi ka za taba ya mwa Bibele, kamba muitute zeñata ka za Lipaki za Jehova.
KA ZA LUNA
Mufumanehe Kwa Mukopano
Muzibe litaba ka za mikopano yaluna. Mufumane sibaka sa mikopano sesili bukaufi ni komupila.
