BATU ba bañwi ba kona ku nahana kuli mutu ya tabela hahulu za sayansi u ka bulela kuli bupilo “ne bu tahile ka ku ipilaula kwa lika” ni kuli ya tabela za bulapeli yena u ka bulela kuli bupilo “ne bu tahile ka ku bupiwa.”

Kono taba yeo ha i yo cwalo kamita.

Niti ki kuli, batu ba ba ñata ba ba itutile, ku beya cwalo ni ba sayansi, ba kakanya taba ya kuli lika ne litile ka ku ipilaula.

Mu nyakisise ka mutala bo Gerard, licaziba ba tuto ya likokwani ili ba ne ba lutilwe tuto ya kuli lika ne li tahile ka ku ipilaula, kwa koleji. Ba bulela kuli: “Ha ne ni ñolanga litatubo, ne ni fanga licaziba ba ne ba lu luta, likalabo ze ne ba tokwa—kono ne ni sa lumeli tuto ya kuli lika ne li tahile ka ku ipilaula.”

Ki kabakalañi ha ku eza kuli nihaiba batu ba ba lumela mwa sayansi ba fumana taata ku lumela kuli lika ze pila li tahile ka ku ipilaula? Kuli lu alabe puzo yeo, ha lu nyakisiseñi lipuzo ze peli ze zingile babatisisi ba bañata: (1) Bupilo ne bu kalile cwañi? ni (2) Lika ze pila ne li kalile cwañi ku ba ze ipitezi?