KALULO 5

Mukutele ku ‘Mulisana ni Muokameli wa Mioyo Yamina’

MUBAPALE

Kana muinelo wamina waswana ni yeñwi ya litaba zenyakisisizwe mwa broshuwa ye? Haiba ki cwalo, uzibe mukafumana tuso yetokwahala. Batanga ba Mulimu babasepahala, ba mwa linako zeneiñolwa Bibele ni ba mwa linako za cwale, batalimani ni miinelo yeswana ni yeo. Sina feela mone batuselizwe ki Jehova kuli batiyele miinelo yeo, ni mina mwakona kufumana tuso yeswana.

Jehova ukamiamuhela hamukakutela kuyena

MUKOLWE kuli Jehova ukamiamuhela hamukakutela kuyena. Ukamitusa kuambuka lipilaelo, maikuto a zwafisa, ni kumitusa kuba ni kozo ya mwa munahano, hamohocwalo ni tabo yetiswa ki kuba ni lizwalo lelikenile. Mi mukasusuezwa kukala kuswalisana hape ni balapeli babañwi mwa kusebeleza Jehova. Muinelo wamina ukaswana ni wa Bakreste ba mwa linako za baapositola, bane bañolezwi ki muapositola Pitrosi kuli: ‘Nemuswana sina lingu, zelatehile; kono cwale mukutezi ku mulisana ni muokameli wa mioyo yamina.’—1 Pitrosi 2:25.

Kukutela ku Jehova ki yona nto yabutokwa hahulu yemuswanela kueza. Libaka kikuli hamukaeza cwalo mukatabisa pilu ya Jehova. (Liproverbia 27:11) Sina hamuziba, Jehova unani maikuto, kacwalo, likezo zaluna za muamanga. Niteñi, Jehova haluhapelezi kuli lumulate ni kumusebeleza. (Deuteronoma 30:19, 20) Caziba yomuñwi wa litaba za Bibele ubulela kuli: “Hakuna yaka mikwahululela pilu yamina, muswanela kuikwahululela yona mina bañi.” Luiketela kukwahulula sikwalo sa pilu yaluna, ka kulapela Jehova ka pilu yetezi lilato. Halueza cwalo, lumufa mpo yabutokwa, bona busepahali bwaluna, ili nto yekamutahiseza hahulu tabo. Kubulela feela niti, hakuna nto yekona kufita tabo yelufumana mwa kusebeleza Jehova ka nzila yemuswanela.—Likezo 20:35; Sinulo 4:11.

Kutuha fo, hamukakalisa kulapela Jehova hape, silikani samina ni Jehova sikatiya. (Mateu 5:3) Ka nzila ifi? Batu babañata mwa lifasi baipuzanga kuli: ‘Lupilelañi?’ Babata hahulu kuziba likalabo kwa lipuzo zeama mulelo wa bupilo. Jehova naabupile batu ni takazo ya kubata kuziba likalabo kwa lipuzo zecwalo. Naalubupile ka nzila yelukonisa kumusebeleza ka tabo. Kuziba kuli lusebeleza Jehova bakeñisa kuli lwamulata, kulutahiseza tabo yetuna, mi hakuna nto yefita yeo.—Samu 63:1-5.

Shangwe muzibe kuli Jehova ubata kuli mukutele kuyena. Mukona kuziba cwañi taba yeo? Mulemuhe kuli, broshuwa ye isika lukiswa kale, nekufitisizwe litapelo zeñata, mi hamulaho neilukisizwe ka tokomelo yetuna hahulu. Mwendi yanaamitiselize broshuwa ye, ki muuna-muhulu mwa puteho kamba mulumeli ka mina. Mi nemususuelizwe kuibala ni kunga muhato kulikana ni lushango loluli ku yona. Ze kaufela ki lisupo zebonisa kuli Jehova hasika milibala. Kono mane yena umimema ka musa kuli mukutele kuyena.—Joani 6:44.

Kuziba kuli Jehova halibali batanga bahae babakeluhile mwa nzila, kwa luomba-omba luli. Ki yona nto yanaaitebuhile hahulu kaizeli yabizwa Donna. Kaizeli yo uli: “Nenikeluhile mwa niti hanyinyani hanyinyani, kono kamita neninahananga manzwi a kwa Samu 139:23, 24, ali: ‘Unisefe Mulimu, mi uzibe pilu yaka; unilike, mi uzibe mihupulo yaka. Ubone haiba kunani mukwa omuñwi omaswe ku na, mi unizamaise mwa nzila ya bupilo bobusa feli.’ Neniziba kuli haniswaneli kuba wa lifasi, mi hape neniziba kuli nenilukela feela kuba mwa kopano ya Jehova. Nakala kulemuha kuli Jehova naasika nilibala, nenitokwa feela kukutela kuyena. Mi nitabile hahulu kuli neniezize cwalo!”

“Nakala kulemuha kuli Jehova naasika nilibala, nenitokwa feela kukutela kuyena”

Lulapela hahulu kuli ni mina mube hape ni ‘tabo ya Muñaa Bupilo.’ (Nehemia 8:10) Hamuna kuinyaza hamukakutela ku Jehova.

Likalabo Kwa Lipuzo Zeama Kukutela ku Jehova

NIKAKALELA KAI?

Mutu yanaakula, utokwa kukala hanyinyani hanyinyani kueza lika zanaaezanga sapili. Ka nzila yeswana, mwakona kukutela ku Jehova ka kukala hanyinyani hanyinyani kucanga lico za kwa moya zazi ni zazi. Musike mwaikutwa kuli mutokwa kueza lika kaufela ka nako iliñwi. Mwendi mwakona kutandanga mizuzu isikai kubala Bibele kamba kuteeleza kwa litaba zayona zebalilwe kale, kuituta yeñwi ya lihatiso zaluna, kamba kukena fa Webusaiti ya jw.org kuyo bala litaba ze fa teñi. Hape mukale kapili kufumanehanga kwa mikopano ya Sikreste. Fahalimwaa zeo kaufela, mulapele ku Jehova kumukupa kuli amituse. ‘Munze munepela lipilaelo zamina kuyena, kakuli wamitokomela.’—1 Pitrosi 5:7.

Bo Eeva babulela kuli: “Hase nifokozi kwa moya, nakala kuikutwanga maswabi kulapela. Hanenibile ni bundume bwa kulapela, muuna-muhulu wa kwa puteho yahesu atonipotela. Naanitusize kulemuha kuli Jehova hasika nilibala. Muuna-muhulu yo, naanifile akalezo ya kuli nikale ka kubalanga Bibele zazi ni zazi. Hane niezize cwalo, nenibile ni maata akukala kukopana hape. Mi nako hane inze iya, nakala kuyanga ni mwa sebelezo ya mwa simu. Nitabile hahulu kuli Jehova naasika nilibala.”

MIZWALE NI LIKAIZELI BAKA NIAMUHELA CWAÑI?

Mukolwe kuli mizwale ni likaizeli mwa puteho, baka miamuhela ka tabo yetuna. Mwasibaka sakuminyaza kamba kumiatula, baka mibonisa kuli bamilata mi bakaeza mobakonela kaufela kumisusueza.—Maheberu 10:24, 25.

Bo Javier bali: “Neniikutwa maswabi kukutela kwa Ndu ya Mubuso. Neniikalezwi haninahana mone baka ningela balikani baka. Kaizeli yomuñwi wa musupali yanaa liteñi lilimo ze 30 kwamulaho, hanaaniboni naaize: ‘Ukutile mwanaka!’ Manzwi ao naanifitile hahulu kwa pilu, naaswanela luli, kakuli nenikeluhile mwa niti.”

Bo Marco, bali: “Neniile kwa Ndu ya Mubuso ni kuyo ina fa sipula sa kwamulaho kuli kusike kwaba ni yaka nilemuha. Niteñi, babañata sebaniziba bakeñisa kuli neba nibonanga kwa mikopano inze nisali mwanana. Baniamuhela, banikumbata ka lilato kuli mane naikutwa kulukuluha hahulu. Nekuswana feela inge kuli nifitile mwahae kuluna.”

BAANA-BAHULU BAKA NITUSA CWAÑI?

Baana-bahulu baka mibonisa musa. Baka mibabaza bakeñisa takazo yamina ya kubata kukutela kuba ni ‘lilato lene munani lona sapili.’ (Sinulo 2:4) Baka mitusa ka musa kuli mueze licinceho zeswanela, ilikuli muambuke lika zesika luka, mi bakaeza cwalo ka ‘moya obunolo.’ (Magalata 6:1; Liproverbia 28:13) Baana-bahulu bakalukisa kuli mulumeli yomuñwi amizamaiseze tuto, mwendi ka kuitusisa buka ya Mu Sutelele ku Jehova kamba ya Muikole Bupilo Kuya Kuile! Muikolwise kuli baana-bahulu baka miomba-omba ni kumitusa hamunze muzwelapili kunga muhato wa kukutela ku Jehova.—Isaya 32:1, 2.

Bo Victor bali: “Baana-bahulu nebazwezipili kuikataza kunitusa kuli nikutele ku Jehova ka lilimo ze 8 zene nifokozi kwa moya. Zazi leliñwi muuna-muhulu naanibonisize maswaniso anaakile aluunga. Maswaniso ao naanihupulisize lika zeñata zende zene niikolanga kuli mane nakala kunyolelwa kukalisa hape kusebeleza Jehova. Baana-bahulu nebanitusize ka lilato kukalisa kueza lika za kwa moya hape.”

‘Uka Mitiisa’

Buka yaluna ya lipina, ya Mu Opelele Jehova, inani lipina lisikai zende zekona kumiomba-omba ni kumisusueza hamunze muzwelapili kukutela ku Jehova. Ka mutala, munyakisise manzwi a pina 60. Pina ye, itomile fa liñolo la 1 Pitrosi 5:10, mi inani toho ya taba yeli: ‘Uka Mitiisa.’

Mulimu naalumezi niti kumina

Mi amibizeza mwa liseli.

Ka libaka lakuli nemumubata

Mi nemubata kueza zende.

Mwaitama kumusebeleza;

Mi yena ukana amitusa.
Mulimu naamiliuluzi ka Jesu;

Mi ubata kuli mukondise.

Yena yanaasika katwa Mwanaa hae,

Uka mifa maata emutokwa.

Ahupule lilato lamina;

Ababalele bahae tota.

(KORASI)

Mulekilwe ka Jesu, mi muba Mulimu

Uka mitiisa, ni kumifa maata

Amizamaise, ni kumisileleza.

Uka mitiisa, ni kumifa maata.