Bakreste ki “nto yebuhiwa ki lifasi.” (1 Makor. 4:9) Kacwalo, luswanela kuhupulanga kuli fokuñwi batu balubuhanga inze bali fa mahaulo abona kamba kuluteeleza inze lusaba boni. Mwendi ndu yeluyo potela inani kamera ni maikulofoni yekonisa muñaa ndu kulemuha zeezahala, kuteeleza zelubulela, kamba kuunga manzwi aluna. Luswanela kubonisa mikwa yeminde haluli fa munyako mwa linzila zelatelela.—2 Makor. 6:3.

• Mukuteke muñaa ndu ka kusanangela mwa lapa lahae. Hamunze muyemi fa munyako, muambuke kuca, kunwa, kuliza foni, kamba kuluma kashango fa foni

• Hamuli fa munyako, musike mwabulela lika zemusa tabeli kuli muñaa ndu aliutwe. Bahasanyi babañwi mane bona baambukanga makande ka nako yebayema fa munyako ilikuli banahanisise hande zebabata kubulela