ບົດຄວາມສຶກສາທີ 13
ເພງທີ 4 “ພະເຢໂຫວາເປັນຜູ້ລ້ຽງຂ້ອຍ”
ພະເຢໂຫວາເຮັດໄດ້ທຸກຢ່າງ
“ເຈົ້າຄິດວ່າພະເຢໂຫວາເຮັດບໍ່ໄດ້ບໍ?”—ຈຊບ. 11:23
ຈຸດສຳຄັນ
ເພື່ອຊ່ວຍເຮົາໃຫ້ໄວ້ວາງໃຈພະເຢໂຫວາຫຼາຍຂຶ້ນວ່າເພິ່ນຈະເບິ່ງແຍງເຮົາໃຫ້ມີສິ່ງຈຳເປັນໃນຊີວິດສະເໝີ.
1. ໂມເຊໄວ້ວາງໃຈພະເຢໂຫວາແນວໃດຕອນທີ່ພາຄົນອິດສະຣາເອນອອກຈາກເອຢິບ?
ໃນປຶ້ມເຮັບເຣີມີຊື່ຂອງຫຼາຍຄົນທີ່ເປັນຕົວຢ່າງທີ່ດີໃນເລື່ອງຄວາມເຊື່ອ ແລະໂມເຊກໍເປັນຜູ້ໜຶ່ງໃນນັ້ນ. (ຮຣ. 3:2-5; 11:23-25) ລາວສະແດງຄວາມເຊື່ອຕອນທີ່ພາຄົນອິດສະຣາເອນອອກຈາກເອຢິບ. ໂມເຊບໍ່ຢ້ານຟາໂລແລະກອງທັບໃຫຍ່ຂອງລາວ ແຕ່ໂມເຊໄວ້ວາງໃຈພະເຢໂຫວາແລະພາຄົນອິດສະຣາເອນຂ້າມທະເລແດງ ແລະຫຼັງຈາກນັ້ນກໍພາເຂົາເຈົ້າເຂົ້າໄປໃນບ່ອນກັນດານ. (ຮຣ. 11:27-29) ເຖິງວ່າຄົນອິດສະຣາເອນສ່ວນຫຼາຍເລີ່ມສົງໄສວ່າພະເຢໂຫວາຈະເບິ່ງແຍງເຂົາເຈົ້າໄດ້ບໍ ແຕ່ໂມເຊກໍຍັງໄວ້ວາງໃຈພະເຢໂຫວາຕໍ່ໆໄປ. ໂມເຊບໍ່ຜິດຫວັງເລີຍທີ່ໄວ້ໃຈພະເຢໂຫວາຍ້ອນເພິ່ນໄດ້ຈັດກຽມອາຫານແລະນ້ຳຢ່າງອັດສະຈັນເພື່ອເບິ່ງແຍງປະຊາຊົນຂອງເພິ່ນໃນບ່ອນກັນດານ. a—ອພຍ. 15:22-25; ພສ. 78:23-25
2. ເປັນຫຍັງພະເຢໂຫວາຈຶ່ງຖາມໂມເຊວ່າ: “ເຈົ້າຄິດວ່າພະເຢໂຫວາເຮັດບໍ່ໄດ້ບໍ”? (ຈົດເຊັນບັນຊີ 11:21-23)
2 ເຖິງວ່າໂມເຊມີຄວາມເຊື່ອເຂັ້ມແຂງ ແຕ່ປະມານ 1 ປີຫຼັງຈາກພະເຢໂຫວາຊ່ວຍຄົນອິດສະຣາເອນໃຫ້ລອດຈາກພວກເອຢິບຢ່າງອັດສະຈັນ ໂມເຊກໍເລີ່ມສົງໄສໃນຄວາມສາມາດຂອງພະເຢໂຫວາທີ່ວ່າເພິ່ນຈະໃຫ້ເຂົາເຈົ້າມີຊີ້ນກິນຄືກັບທີ່ເພິ່ນເວົ້າໄວ້ບໍ. ໂມເຊຄິດບໍ່ອອກວ່າພະເຢໂຫວາຈະເອົາຊີ້ນມາແຕ່ໃສຈຶ່ງຊິພໍໃຫ້ຫຼາຍລ້ານຄົນຢູ່ທີ່ບ່ອນກັນດານກິນ. ເພິ່ນຈຶ່ງຖາມໂມເຊວ່າ: “ເຈົ້າຄິດວ່າພະເຢໂຫວາເຮັດບໍ່ໄດ້ບໍ?” (ອ່ານຈົດເຊັນບັນຊີ 11:21-23) ຂໍ້ຄຳພີນີ້ໃນພາສາເຮັບເຣີແປຕາມໂຕວ່າ “ມືຂອງພະເຢໂຫວາ” ເຊິ່ງໝາຍເຖິງພະລັງບໍລິສຸດຂອງພະເຈົ້າທີ່ເພິ່ນໃຊ້ເຮັດສິ່ງຕ່າງໆຕາມທີ່ເພິ່ນຕ້ອງການ. ດັ່ງນັ້ນ ຄຳເວົ້ານີ້ຂອງພະເຢໂຫວາຈຶ່ງເປັນຄືກັບເພິ່ນກຳລັງບອກໂມເຊວ່າ: ‘ເຈົ້າຄິດວ່າເຮົາບໍ່ມີລິດເດດພຽງພໍທີ່ຈະເຮັດສິ່ງທີ່ເຮົາບອກວ່າຈະເຮັດບໍ?’
3. ເປັນຫຍັງເຮົາຄວນສົນໃຈສິ່ງທີ່ເກີດຂຶ້ນກັບໂມເຊແລະຄົນອິດສະຣາເອນ?
3 ເຈົ້າເຄີຍສົງໄສບໍວ່າພະເຢໂຫວາຈະສາມາດເບິ່ງແຍງເຈົ້າກັບຄອບຄົວໃຫ້ມີສິ່ງຈຳເປັນໄດ້ຫຼືບໍ່? ບໍ່ວ່າເຈົ້າຈະເຄີຍສົງໄສຫຼືບໍ່ ໃຫ້ເຮົາມາເບິ່ງສິ່ງທີ່ເກີດຂຶ້ນກັບໂມເຊແລະຄົນອິດສະຣາເອນທີ່ເລີ່ມສົງໄສວ່າພະເຢໂຫວາຈະເບິ່ງແຍງເຂົາເຈົ້າໄດ້ແທ້ໆຫຼືບໍ່. ຫຼັກການຕ່າງໆໃນຄຳພີໄບເບິນກ່ຽວກັບເລື່ອງນີ້ຈະຊ່ວຍເຮົາໃຫ້ໝັ້ນໃຈຫຼາຍຂຶ້ນວ່າພະເຢໂຫວາເຮັດໄດ້ທຸກຢ່າງ.
ຮຽນຈາກໂມເຊແລະຄົນອິດສະຣາເອນ
4. ເປັນຫຍັງຄົນອິດສະຣາເອນຫຼາຍຄົນຈຶ່ງເລີ່ມສົງໄສວ່າພະເຢໂຫວາຈະເບິ່ງແຍງເຂົາເຈົ້າໄດ້ແທ້ໆບໍ?
4 ໃຫ້ເຮົາມາເບິ່ງແວດບົດນຳກັນ. ຕອນນັ້ນຄົນອິດສະຣາເອນອອກມາຈາກເອຢິບແລ້ວ ແລະຢູ່ບ່ອນກັນດານໄດ້ໄລຍະໜຶ່ງ. ເຂົາເຈົ້າທັງໝົດກຳລັງເດີນທາງໄປແຜ່ນດິນທີ່ພະເຈົ້າສັນຍາໄວ້ແລະມີ “ຄົນຕ່າງຊາດກຸ່ມໃຫຍ່” ໄປນຳເຂົາເຈົ້າ. (ອພຍ. 12:38; ພບຍ. 8:15) ຄົນຕ່າງຊາດເຫຼົ່ານີ້ເລີ່ມເບື່ອມານາ ແລະຄົນອິດສະຣາເອນຫຼາຍຄົນກໍເລີ່ມເບື່ອຄືກັນ. ເຂົາເຈົ້າຈຶ່ງພາກັນຈົ່ມກ່ຽວກັບເລື່ອງນີ້. (ຈຊບ. 11:4-6) ເຂົາເຈົ້າຄິດຮອດອາຫານຢູ່ເອຢິບ. ໂມເຊຮູ້ສຶກຖືກກົດດັນຫຼາຍ ແລະເບິ່ງຄືລາວຄິດວ່າລາວຕ້ອງເປັນຄົນໄປຊອກຫາສິ່ງເຫຼົ່ານີ້ມາໃຫ້ເຂົາເຈົ້າກິນ.—ຈຊບ. 11:13, 14
5-6. ເຮົາໄດ້ຮຽນຫຍັງຈາກອິດທິພົນຂອງຄົນຕ່າງຊາດທີ່ມີຕໍ່ຄົນອິດສະຣາເອນ?
5 ເບິ່ງຄືວ່າຄົນອິດສະຣາເອນໄດ້ຮັບອິດທິພົນຈາກຄົນຕ່າງຊາດທີ່ບໍ່ເຫັນຄ່າສິ່ງທີ່ພະເຢໂຫວາເຮັດເພື່ອເຂົາເຈົ້າ. ເຮົາກໍອາດໄດ້ຮັບອິດທິພົນທີ່ບໍ່ດີຈາກຄົນໃນໂລກທີ່ບໍ່ເຫັນຄ່າແລະເລີ່ມບໍ່ພໍໃຈໃນສິ່ງທີ່ພະເຢໂຫວາຈັດກຽມໃຫ້. ເຮົາອາດເລີ່ມຄິດເຖິງສິ່ງທີ່ເຮົາເຄີຍມີ ຫຼືເລີ່ມອິດສາສິ່ງທີ່ຄົນອື່ນມີ. ແຕ່ຖ້າເຮົາພໍໃຈໃນສິ່ງທີ່ມີຢູ່ ເຮົາຈະມີຄວາມສຸກຫຼາຍກວ່າບໍ່ວ່າສະພາບການຂອງເຮົາຈະເປັນແນວໃດ.
6 ຄົນອິດສະຣາເອນຄວນຄິດເຖິງສິ່ງທີ່ພະເຢໂຫວາໄດ້ຮັບຮອງກັບເຂົາເຈົ້າທີ່ວ່າເມື່ອໄປຮອດແຜ່ນດິນທີ່ເພິ່ນສັນຍາໄວ້ ເຂົາເຈົ້າຈະໄດ້ຮັບສິ່ງດີໆຫຼາຍຢ່າງ. ຄຳສັນຍານີ້ຈະເປັນຈິງຕອນທີ່ເຂົາເຈົ້າຢູ່ໃນແຜ່ນດິນນັ້ນ ບໍ່ແມ່ນຕອນທີ່ເຂົາເຈົ້າຢູ່ບ່ອນກັນດານ. ເຮົາກໍຄືກັນ ແທນທີ່ຈະຄິດເຖິງແຕ່ສິ່ງທີ່ເຮົາບໍ່ມີໃນຕອນນີ້ ເຮົາຄວນຄິດເຖິງສິ່ງດີໆທີ່ພະເຢໂຫວາສັນຍາວ່າຈະໃຫ້ເຮົາໃນໂລກໃໝ່. ນອກຈາກນັ້ນ ເຮົາຍັງສາມາດຄິດຕຶກຕອງກ່ຽວກັບຂໍ້ພະຄຳພີຕ່າງໆທີ່ຈະຊ່ວຍເຮົາໃຫ້ໄວ້ວາງໃຈພະເຢໂຫວາຫຼາຍຂຶ້ນ.
7. ເປັນຫຍັງເຮົາໝັ້ນໃຈວ່າພະເຢໂຫວາເຮັດໄດ້ທຸກຢ່າງ?
7 ເຖິງຈະເປັນແນວນັ້ນ ເຈົ້າອາດຈະຍັງສົງໄສວ່າເປັນຫຍັງພະເຢໂຫວາຈຶ່ງຖາມໂມເຊວ່າ: “ເຈົ້າຄິດວ່າພະເຢໂຫວາເຮັດບໍ່ໄດ້ບໍ?” ພະເຢໂຫວາອາດຢາກໃຫ້ໂມເຊຄິດເຖິງ 2 ສິ່ງຄື: (1) ເພິ່ນມີລິດເດດທີ່ບໍ່ມີຂີດຈຳກັດ ແລະ (2) ເພິ່ນສາມາດໃຊ້ລິດເດດຂອງເພິ່ນຢູ່ໃສກໍໄດ້ ແມ່ນແຕ່ບ່ອນທີ່ໄກໆ. ດັ່ງນັ້ນ ເຖິງວ່າຄົນອິດສະຣາເອນຈະຢູ່ໃນບ່ອນກັນດານທີ່ຫ່າງໄກ ແຕ່ພະເຢໂຫວາກໍສາມາດເອົາຊີ້ນບັກຫຼາຍໆມາໃຫ້ເຂົາເຈົ້າກິນໄດ້. ເພິ່ນສາມາດ “ໃຊ້ລິດເດດທີ່ຍິ່ງໃຫຍ່ຂອງເພິ່ນ” ໄດ້ທຸກບ່ອນບໍ່ວ່າຈະຢູ່ໃສກໍຕາມ. (ພສ. 136:11, 12) ດັ່ງນັ້ນ ເມື່ອເຈິກັບສະຖານະການທີ່ຍາກລຳບາກ ເຮົາໝັ້ນໃຈໄດ້ວ່າພະເຢໂຫວາສາມາດຊ່ວຍເຮົາແຕ່ລະຄົນເປັນສ່ວນໂຕໄດ້ບໍ່ວ່າເຮົາຈະຢູ່ໃສ.—ພສ. 138:6, 7
8. ເຮົາຈະບໍ່ເຮັດຜິດຄືກັບຫຼາຍຄົນທີ່ຢູ່ໃນບ່ອນກັນດານໄດ້ແນວໃດ? (ເບິ່ງຮູບນຳ)
8 ຈາກນັ້ນບໍ່ດົນ ພະເຢໂຫວາກໍໃຫ້ເຂົາເຈົ້າມີຊີ້ນກິນແທ້ໆ. ເພິ່ນໃຫ້ມີນົກກະທາບັກຫຼາຍໆຢູ່ຄ້າຍຂອງຄົນອິດສະຣາເອນ ແຕ່ເຂົາເຈົ້າບໍ່ໄດ້ຂອບໃຈພະເຢໂຫວາສຳລັບການອັດສະຈັນນີ້. ແທນທີ່ຈະຂອບໃຈ ຫຼາຍຄົນພັດກາຍເປັນຄົນໂລບມາກໂລພາ. ເຂົາເຈົ້າອອກໄປຈັບນົກກະທາທັງກາງເວັນແລະກາງຄືນ. ພະເຢໂຫວາໃຈຮ້າຍຫຼາຍໃຫ້ “ຄົນຂີ້ໂລບທີ່ຢາກກິນອາຫານ” ແລະເພິ່ນກໍລົງໂທດເຂົາເຈົ້າ. (ຈຊບ. 11:31-34) ບົດຮຽນທີ່ເຮົາໄດ້ຈາກເລື່ອງນີ້ແມ່ນ ເຮົາຕ້ອງລະວັງທີ່ຈະບໍ່ກາຍເປັນຄົນໂລບ. ບໍ່ວ່າເຮົາຈະລວຍຫຼືທຸກ ເຮົາຄວນໃຫ້ການສະສົມ “ຊັບສົມບັດໄວ້ໃນສະຫວັນ” ເປັນເລື່ອງສຳຄັນທີ່ສຸດໂດຍສະໜິດກັບພະເຢໂຫວາແລະພະເຢຊູ. (ມທ. 6:19, 20; ລກ. 16:9) ເມື່ອເຮັດແບບນີ້ ເຮົາກໍໝັ້ນໃຈໄດ້ວ່າພະເຢໂຫວາຈະເບິ່ງແຍງເຮົາໃຫ້ມີສິ່ງຈຳເປັນ.
ຢູ່ບ່ອນກັນດານ ຫຼາຍຄົນເປັນແນວໃດເມື່ອພະເຢໂຫວາໃຫ້ເຂົາເຈົ້າມີນົກກະທາກິນ ແລະເລື່ອງນີ້ສອນຫຍັງເຮົາ? (ເບິ່ງຂໍ້ 8)
9. ເຮົາໝັ້ນໃຈເລື່ອງຫຍັງໄດ້ໃນພະເຢໂຫວາ?
9 ໃນທຸກມື້ນີ້ ພະເຢໂຫວາກໍພ້ອມທີ່ຈະເບິ່ງແຍງປະຊາຊົນຂອງເພິ່ນຄືກັນ. ແຕ່ນີ້ໝາຍຄວາມວ່າເຮົາຈະບໍ່ມີບັນຫາເລື່ອງເງິນຫຼືບໍ່ຂາດແຄນອາຫານເລີຍບໍ? b ບໍ່ແມ່ນແບບນັ້ນ. ເຮົາໝັ້ນໃຈໄດ້ວ່າພະເຢໂຫວາຈະບໍ່ປະຖິ້ມເຮົາ. ເພິ່ນຈະຊ່ວຍເຮົາໃຫ້ຮັບມືກັບບັນຫາຕ່າງໆໃນຊີວິດໄດ້. ເຮົາຈະສະແດງໃຫ້ເຫັນແນວໃດວ່າເຮົາໝັ້ນໃຈວ່າພະເຢໂຫວາຈະເບິ່ງແຍງເຮົາ? ໃຫ້ເຮົາມາເບິ່ງ 2 ສະຖານະການນຳກັນ ນັ້ນຄື: (1) ຕອນທີ່ເຮົາມີບັນຫາເລື່ອງເງິນ ແລະ (2) ຕອນທີ່ເຮົາກັງວົນວ່າຈະມີເງິນໃຊ້ບໍຕອນທີ່ເຖົ້າແລ້ວ.
ຕອນທີ່ເຮົາມີບັນຫາເລື່ອງເງິນ
10. ອັນໃດອາດເຮັດໃຫ້ເຮົາມີບັນຫາເລື່ອງເງິນ?
10 ແຮ່ງຈຸດຈົບຂອງລະບົບນີ້ໃກ້ຈະມາຮອດ ເຮົາຄາດໝາຍໄດ້ເລີຍວ່າຈະມີບັນຫາທາງດ້ານເສດຖະກິດໜັກຂຶ້ນເລື້ອຍໆ ມີຄວາມວຸ່ນວາຍທາງການເມືອງ ສົງຄາມ ໄພທຳມະຊາດ ຫຼືມີໂລກລະບາດໃໝ່ໆທີ່ອາດເຮັດໃຫ້ເຮົາມີບັນຫາໃນເລື່ອງເງິນ ເຮັດໃຫ້ເຮົາຕົກວຽກ ສູນເສຍຊັບສິນ ຫຼືເຖິງຂັ້ນສູນເສຍເຮືອນຊານ. ເມື່ອເຈິເຫດການເຫຼົ່ານີ້ ເຮົາອາດຕ້ອງຊອກວຽກໃໝ່ຫຼືອາດຕ້ອງພາຄອບຄົວຍ້າຍໄປຢູ່ບ່ອນອື່ນເພື່ອຈະມີວຽກເຮັດ. ສິ່ງໃດຈະຊ່ວຍເຮົາໃຫ້ຕັດສິນໃຈໃນແບບທີ່ສະແດງໃຫ້ເຫັນວ່າເຮົາໄວ້ວາງໃຈພະເຢໂຫວາ?
11. ອັນໃດຈະຊ່ວຍເຮົາໃຫ້ຮັບມືກັບບັນຫາເລື່ອງເງິນ? (ລູກາ 12:29-31)
11 ສິ່ງໜຶ່ງທີ່ຊ່ວຍເຮົາໄດ້ຫຼາຍແມ່ນອະທິດຖານລະບາຍຄວາມກັງວົນກັບພະເຢໂຫວາ. (ສພສ. 16:3) ໃຫ້ອະທິດຖານຂໍສະຕິປັນຍາຈາກພະເຢໂຫວາເພື່ອເຮົາຈະຕັດສິນໃຈຖືກຕ້ອງແລະຊ່ວຍເຮົາໃຫ້ສະຫງົບໃຈເພື່ອຈະບໍ່ “ອຸກໃຈຫຼາຍເກີນໄປ.” (ອ່ານລູກາ 12:29-31) ນອກຈາກນັ້ນ ໃຫ້ອະທິດຖານຂໍໃຫ້ພະເຢໂຫວາຊ່ວຍເຮົາໃຫ້ພໍໃຈໃນສິ່ງທີ່ມີຢູ່. (1ຕມ. 6:7, 8) ໃຫ້ຊອກເບິ່ງບົດຄວາມຕ່າງໆໃນປຶ້ມຂອງອົງການກ່ຽວກັບວິທີຮັບມືກັບບັນຫາເລື່ອງເງິນ. ພີ່ນ້ອງຫຼາຍຄົນໄດ້ຮັບປະໂຫຍດຈາກຄຳແນະນຳທີ່ຢູ່ໃນເວັບໄຊ jw.org ກ່ຽວກັບເລື່ອງນີ້.
12. ເຮົາຄວນຖາມໂຕເອງແນວໃດເພື່ອຈະຕັດສິນໃຈໃນແບບທີ່ດີທີ່ສຸດສຳລັບຄອບຄົວ?
12 ບາງຄົນຖືກລໍ້ໃຈໃຫ້ຮັບເອົາວຽກທີ່ເຮັດໃຫ້ເຂົາເຈົ້າຕ້ອງຢູ່ໄກຈາກຄອບຄົວ ແຕ່ຕໍ່ມາຫຼາຍຄົນກໍເຫັນວ່ານັ້ນເປັນການຕັດສິນໃຈທີ່ບໍ່ສະຫຼາດ. ກ່ອນທີ່ຈະຮັບເອົາວຽກໃໝ່ຢ່າຄິດເຖິງແຕ່ເງິນທີ່ຈະໄດ້ ແຕ່ໃຫ້ຄິດນຳວ່າມັນຈະກະທົບໃສ່ສາຍສຳພັນຂອງເຈົ້າກັບພະເຢໂຫວາແນວໃດ. (ລກ. 14:28) ໃຫ້ຖາມໂຕເອງວ່າ: ‘ຖ້າຂ້ອຍໄປເຮັດວຽກຢູ່ໄກໆມັນຈະກະທົບໃສ່ຊີວິດຄູ່ຂອງຂ້ອຍແນວໃດ? ຂ້ອຍຈະໄປປະຊຸມກາງອາທິດແລະທ້າຍອາທິດ ໄປປະກາດ ແລະໃຊ້ເວລາກັບພີ່ນ້ອງໄດ້ບໍ?’ ຖ້າເຈົ້າມີລູກ ເຈົ້າກໍຕ້ອງຖາມໂຕເອງດ້ວຍຄຳຖາມທີ່ສຳຄັນນີ້ທີ່ວ່າ: ‘ຂ້ອຍຈະສາມາດລ້ຽງລູກດ້ວຍ “ຫຼັກການແລະຄຳສອນຂອງພະເຢໂຫວາ” ໄດ້ແນວໃດ?’ (ອຟຊ. 6:4) ໃຫ້ຕັດສິນໃຈໃນແບບທີ່ພະເຢໂຫວາຄິດ ບໍ່ແມ່ນແບບທີ່ຄົນໃນຄອບຄົວຫຼືໝູ່ທີ່ບໍ່ໄດ້ໃຊ້ຫຼັກການໃນຄຳພີໄບເບິນ. c ພີ່ນ້ອງໂທນີ້ທີ່ຢູ່ອາຊີຕາເວັນຕົກໄດ້ຮັບການສະເໜີວຽກທີ່ດີຫຼາຍຢ່າງຢູ່ຕ່າງປະເທດເຊິ່ງໄດ້ເງິນເດືອນຫຼາຍ ແຕ່ຫຼັງຈາກອະທິດຖານຫາພະເຢໂຫວາແລະລົມກັບເມຍໃນເລື່ອງນີ້ ລາວຕັດສິນໃຈທີ່ຈະບໍ່ຮັບເອົາວຽກເຫຼົ່ານັ້ນ ແລະລາວຄິດເຖິງວິທີທີ່ເຂົາເຈົ້າຈະປັບປ່ຽນຊີວິດເພື່ອຫຼຸດຄ່າໃຊ້ຈ່າຍລົງ. ເມື່ອຄິດຄືນຫຼັງ ພີ່ນ້ອງໂທນີ້ເວົ້າວ່າ: “ຍ້ອນຂ້ອຍຕັດສິນໃຈແບບນັ້ນຂ້ອຍຈຶ່ງສາມາດຊ່ວຍຫຼາຍຄົນໃຫ້ຮູ້ຈັກພະເຢໂຫວາ ແລະລູກຂອງເຮົາກໍຮັກພະເຢໂຫວາຫຼາຍແລະກະຕືລືລົ້ນໃນຄວາມຈິງ. ຄອບຄົວຂອງເຮົາໄດ້ຮຽນຮູ້ວ່າເມື່ອເຮົາເຮັດຕາມຄຳເວົ້າຂອງພະເຢຊູໃນມັດທາຍ 6:33 ພະເຢໂຫວາຈະເບິ່ງແຍງເຮົາແນ່ນອນ.”
ຕອນທີ່ເຮົາກັງວົນວ່າຈະມີເງິນໃຊ້ບໍຕອນທີ່ເຖົ້າແລ້ວ
13. ມີຫຍັງແດ່ທີ່ເຮົາເຮັດໄດ້ໃນຕອນນີ້ເພື່ອຈະມີສິ່ງຈຳເປັນຕອນທີ່ເຖົ້າແລ້ວ?
13 ເຮົາຍັງສະແດງໃຫ້ເຫັນວ່າເຮົາໄວ້ວາງໃຈພະເຢໂຫວາຫຼາຍສ່ຳໃດເມື່ອເຮົາວາງແຜນສຳລັບຊີວິດຕອນທີ່ເຖົ້າແລ້ວ. ຄຳພີໄບເບິນບອກເຮົາໃຫ້ເຮັດວຽກໜັກເພື່ອຈະມີສິ່ງຈຳເປັນໃນອະນາຄົດ. (ສພສ. 6:6-11) ຖ້າເຮົາເຮັດໄດ້ ມັນກໍດີທີ່ຈະມີເງິນຈຳນວນໜຶ່ງທ້ອນໄວ້ສຳລັບອະນາຄົດຍ້ອນເງິນສາມາດປົກປ້ອງເຮົາໄດ້ໃນລະດັບໜຶ່ງ. (ປຍຈ. 7:12) ແຕ່ເຮົາບໍ່ຄວນໃຫ້ເງິນເປັນສິ່ງສຳຄັນທີ່ສຸດໃນຊີວິດ.
14. ເຮັບເຣີ 13:5 ຊ່ວຍເຮົາແນວໃດບໍ່ໃຫ້ອຸກໃຈຫຼາຍເກີນໄປກ່ຽວກັບອະນາຄົດ?
14 ພະເຢຊູເລົ່າຕົວຢ່າງປຽບທຽບເລື່ອງໜຶ່ງທີ່ສະແດງໃຫ້ເຫັນວ່າຜູ້ທີ່ສະສົມເງິນຄຳໄວ້ “ພະເຈົ້າບໍ່ໄດ້ຖືວ່າລາວເປັນຄົນຮັ່ງ” ແຕ່ເປັນຄົນໂງ່. (ລກ. 12:16-21) ເຮົາບໍ່ຮູ້ວ່າມື້ອື່ນຊີວິດຂອງເຮົາຈະເປັນແນວໃດ. (ສພສ. 23:4, 5; ຢກບ. 4:13-15) ເຮົາເຈິຂໍ້ທ້າທາຍບາງຢ່າງຍ້ອນເປັນລູກສິດຂອງພະເຢຊູ. ເພິ່ນຈຶ່ງເວົ້າວ່າເຮົາຕ້ອງພ້ອມທີ່ຈະ “ຖິ້ມທຸກສິ່ງທຸກຢ່າງ” ເພື່ອຈະເປັນລູກສິດຂອງເພິ່ນ. (ລກ. 14:33) ຄລິດສະຕຽນໃນສະຕະວັດທຳອິດທີ່ຢູ່ແຂວງຢູດາຍຍິນດີຍອມສູນເສຍທຸກສິ່ງທີ່ເຂົາເຈົ້າມີ. (ຮຣ. 10:34) ໃນທຸກມື້ນີ້ ພີ່ນ້ອງຫຼາຍຄົນສູນເສຍຊັບສິນເງິນຄຳແລະວຽກອາຊີບຍ້ອນເຂົາເຈົ້າບໍ່ໄດ້ສະໜັບສະໜູນພັກການເມືອງໃດໜຶ່ງ. (ພນມ. 13:16, 17) ອັນໃດຊ່ວຍເຂົາເຈົ້າໃຫ້ເຮັດແບບນັ້ນ? ເຂົາເຈົ້າໝັ້ນໃຈແທ້ໆໃນຄຳສັນຍາຂອງພະເຢໂຫວາທີ່ບອກວ່າ: “ເຮົາຈະບໍ່ປະບໍ່ຖິ້ມເຈົ້າ ເຮົາຈະຊ່ວຍເຈົ້າຕະຫຼອດ.” (ອ່ານເຮັບເຣີ 13:5) ເຮົາເຮັດສຸດຄວາມສາມາດເພື່ອຈະມີສິ່ງຈຳເປັນຕອນທີ່ເຮົາເຖົ້າແລ້ວ ແລະເຮົາໝັ້ນໃຈວ່າພະເຢໂຫວາຈະເບິ່ງແຍງເຮົາສະເໝີຖ້າມີເຫດການທີ່ບໍ່ຄາດຄິດເກີດຂຶ້ນກັບເຮົາ.
15. ພໍ່ແມ່ທີ່ເປັນຜູ້ຮັບໃຊ້ພະເຢໂຫວາຄວນມີຄວາມຄິດແນວໃດຕໍ່ການມີລູກ? (ເບິ່ງຮູບນຳ)
15 ໃນບາງວັດທະນະທຳ ເຫດຜົນຫຼັກທີ່ຄົນມີລູກແມ່ນເພື່ອໃຫ້ລູກລ້ຽງຕອນເຖົ້າ. ແຕ່ຄຳພີໄບເບິນບອກວ່າພໍ່ແມ່ຄວນເບິ່ງແຍງຄວາມຈຳເປັນຂອງລູກ. (2ກຣ. 12:14) ແນ່ນອນວ່າເມື່ອພໍ່ແມ່ເຖົ້າແລ້ວເຂົາເຈົ້າອາດຢາກໃຫ້ລູກຊ່ວຍທາງດ້ານການເງິນແລະຊ່ວຍໃນເລື່ອງອື່ນໆ ແລະລູກຫຼາຍຄົນກໍຍິນດີທີ່ຈະຊ່ວຍຕາມທີ່ພໍ່ແມ່ຕ້ອງການ. (1ຕມ. 5:4) ແຕ່ພໍ່ແມ່ທີ່ເປັນຜູ້ຮັບໃຊ້ພະເຢໂຫວາເຂົ້າໃຈວ່າສິ່ງທີ່ເຮັດໃຫ້ເຂົາເຈົ້າມີຄວາມສຸກຫຼາຍທີ່ສຸດແມ່ນລ້ຽງລູກໃຫ້ເປັນຜູ້ຮັບໃຊ້ພະເຢໂຫວາ ບໍ່ແມ່ນລ້ຽງລູກເພື່ອໃຫ້ຊ່ວຍເຫຼືອເຂົາເຈົ້າທາງດ້ານການເງິນ.—3ຢຮ. 4
ຜົວເມຍທີ່ໄວ້ວາງໃຈພະເຢໂຫວາໃຊ້ຫຼັກການໃນຄຳພີໄບເບິນເມື່ອຕັດສິນໃຈກ່ຽວກັບອະນາຄົດຂອງເຂົາເຈົ້າ (ເບິ່ງຂໍ້ 15) d
16. ພໍ່ແມ່ຈະກຽມລູກແນວໃດໃຫ້ຫາລ້ຽງໂຕເອງໄດ້? (ເອເຟໂຊ 4:28)
16 ໂດຍທາງຕົວຢ່າງຂອງເຈົ້າ ສອນລູກໃຫ້ໄວ້ວາງໃຈພະເຢໂຫວາແລະຊ່ວຍລູກໃຫ້ກຽມໂຕທີ່ຈະຫາລ້ຽງໂຕເອງເມື່ອໃຫຍ່ຂຶ້ນ. ຕັ້ງແຕ່ລູກຍັງນ້ອຍ ໃຫ້ສອນລູກວ່າການເປັນຄົນດຸໝັ່ນເປັນສິ່ງທີ່ດີ. (ສພສ. 29:21; ອ່ານເອເຟໂຊ 4:28) ເມື່ອລູກໃຫຍ່ຂຶ້ນ ຊ່ວຍລູກໃຫ້ຮຽນໄດ້ດີຢູ່ໂຮງຮຽນ. ພໍ່ແມ່ສາມາດຊອກເບິ່ງຫຼັກການໃນຄຳພີໄບເບິນເພື່ອຊ່ວຍລູກໃຫ້ຕັດສິນໃຈຢ່າງສະຫຼາດວ່າຈະຮຽນຮອດຂັ້ນໃດ. ເປົ້າໝາຍຂອງພໍ່ແມ່ແມ່ນເພື່ອຊ່ວຍລູກໃຫ້ຫາລ້ຽງໂຕເອງໄດ້ແລະທັງມີເວລາເຕັມທີໃນການຮັບໃຊ້ພະເຢໂຫວາ.
17. ເຮົາສາມາດໝັ້ນໃຈໃນເລື່ອງໃດ?
17 ຜູ້ຮັບໃຊ້ທີ່ພັກດີຂອງພະເຢໂຫວາໝັ້ນໃຈໄດ້ວ່າເພິ່ນສາມາດແລະຕ້ອງການທີ່ຈະເບິ່ງແຍງຄວາມຈຳເປັນຂອງເຮົາ. ແຮ່ງຈຸດຈົບຂອງລະບົບນີ້ໃກ້ເຂົ້າມາ ເຮົາກໍແຮ່ງຕ້ອງໄວ້ໃຈພະເຢໂຫວາຫຼາຍຂຶ້ນ. ບໍ່ວ່າຈະເກີດຫຍັງຂຶ້ນ ຂໍໃຫ້ເຮົາໝັ້ນໃຈເຕັມທີວ່າພະເຢໂຫວາຈະໃຊ້ລິດເດດຂອງເພິ່ນເພື່ອຊ່ວຍເຮົາໃຫ້ມີສິ່ງຈຳເປັນທາງດ້ານວັດຖຸ. ເຮົາໝັ້ນໃຈໄດ້ວ່າພະເຢໂຫວາສາມາດໃຊ້ລິດເດດຂອງເພິ່ນຊ່ວຍເຮົາໄດ້ສະເໝີບໍ່ວ່າເຮົາຈະຢູ່ໃສກໍຕາມ.
ເພງທີ 150 ຈົ່ງຊອກຫາພະເຈົ້າເພື່ອເຈົ້າຈະລອດ
a ເບິ່ງ “ຄຳຖາມຈາກຜູ້ອ່ານ” ໃນຫໍສັງເກດການເດືອນຕຸລາ ປີ 2023.
b ເບິ່ງ “ຄຳຖາມຈາກຜູ້ອ່ານ” ໃນຫໍສັງເກດການ 15 ກັນຍາ 2014. (ພາສາໄທ)
c ເບິ່ງບົດຄວາມ “ບໍ່ມີໃຜເປັນທາດຂອງນາຍສອງຄົນໄດ້” ໃນຫໍສັງເກດການ 15 ເມສາ 2014. (ພາສາໄທ)
d ຄຳອະທິບາຍຮູບ: ຜົວເມຍທີ່ເປັນຜູ້ຮັບໃຊ້ພະເຢໂຫວາຕິດຕໍ່ກັບລູກຂອງເຂົາເຈົ້າທີ່ກຳລັງຮັບໃຊ້ກັບຜົວໃນໂຄງການກໍ່ສ້າງຫໍປະຊຸມ.
