ເຈົ້າຮູ້ບໍ?
ເກີດຫຍັງຂຶ້ນກັບເມືອງນີນີເວຫຼັງຈາກສະໄໝຂອງໂຢນາ?
ເວັບໄຊຫໍພິພິທະພັນຂອງອັງກິດບອກວ່າ: “ປະມານປີ 670 ກ່ອນ ຄ.ສ ອັດຊີເຣຍເປັນຈັກກະພັດທີ່ໃຫຍ່ທີ່ສຸດໃນໂລກເຊິ່ງມີເຂດແດນກວມເອົາຕັ້ງແຕ່ເກາະໄຊປຣັດຕາເວັນຕົກຈົນຮອດອີຣານຕາເວັນອອກ.” ແລະແມ່ນແຕ່ເອຢິບກໍຍັງເຄີຍເປັນເມືອງຂຶ້ນຂອງຈັກກະພັດນີ້. ເມືອງຫຼວງຂອງອັດຊີເຣຍແມ່ນນີນີເວເຊິ່ງເປັນເມືອງຫຼວງທີ່ໃຫຍ່ທີ່ສຸດໃນໂລກໃນຕອນນັ້ນ. ເມືອງນີ້ມີຮູບປັ້ນ ມີສວນທີ່ງາມໆ ມີພະລາຊະວັງຫຼາຍບ່ອນ ແລະມີຫໍສະໝຸດທີ່ໃຫຍ່. ຢູ່ກຳແພງເມືອງນີນີເວບູຮານມີຄຳທີ່ແກະສະຫຼັກວ່າ ກະສັດອາເຊີບານີປານເປັນ “ກະສັດຂອງໂລກ.” ເບິ່ງຄືວ່າໃນຕອນນັ້ນບໍ່ມີໃຜຈະຕີຊະນະອັດຊີເຣຍແລະນີນີເວໄດ້ເລີຍ.
ມະຫາອຳນາດອັດຊີເຣຍເປັນຈັກກະພັດທີ່ໃຫຍ່ທີ່ສຸດໃນໂລກໃນສະໄໝນັ້ນ
ເຖິງວ່າອັດຊີເຣຍຈະມີອຳນາດຫຼາຍທີ່ສຸດໃນໂລກ ແຕ່ໂຊໂຟນີຜູ້ພະຍາກອນຂອງພະເຢໂຫວາໄດ້ບອກວ່າ: “[ພະເຢໂຫວາ] ຈະ . . . ທຳລາຍອັດຊີເຣຍ ແລະພະອົງຈະເຮັດໃຫ້ນີນີເວເປັນເມືອງຮ້າງແລະແຫ້ງແລ້ງຄືກັບທະເລຊາຍ.” ແລະຜູ້ພະຍາກອນນາຫູມກໍຍັງໄດ້ບອກອີກວ່າ: ເມືອງນີ້ຈະຖືກ “ປຸ້ນເອົາເງິນ ປຸ້ນເອົາຄຳ . . . ເມືອງນີ້ຮ້າງເປົ່າ ບໍ່ມີຄົນ ແລະພັງພິນາດໄປແລ້ວ . . . ທຸກຄົນທີ່ເຫັນເມືອງນີ້ກໍຈະຮີບໜີແລະເວົ້າວ່າ ‘ນີນີເວຖືກທຳລາຍບໍ່ເຫຼືອແລ້ວ!’” (ຊໂຟ. 2:13; ນາຫູມ 2:9, 10; 3:7, ລ.ມ.) ຄົນທີ່ໄດ້ຍິນກ່ຽວກັບຄຳພະຍາກອນນີ້ອາດຮູ້ສຶກສົງໄສວ່າ: ‘ຊິເປັນໄປໄດ້ແນວໃດ? ໃຜຊິຕີຊະນະໄດ້? ເມືອງໃຫຍ່ປານນີ້ຊິຫາຍໄປໄດ້ແນວໃດ?’ ມັນເຫຼືອເຊື່ອແທ້ໆ!
ນີນີເວກາຍເປັນດິນທີ່ແຫ້ງແລ້ງແລະຮ້າງເປົ່າ
ເຖິງວ່າມັນຈະເປັນເລື່ອງທີ່ໜ້າເຫຼືອເຊື່ອ ແຕ່ມັນກໍເກີດຂຶ້ນແທ້! ໃນປີ 600 ກ່ອນ ຄ.ສ ບາບີໂລນແລະເມເດຍໄດ້ຕີຊະນະອັດຊີເຣຍ. ໃນທີ່ສຸດກໍບໍ່ມີຄົນອາໄສຢູ່ເມືອງນີນີເວແລະເມືອງນີ້ກໍຖືກລືມ. ຫໍພິພິທະພັນສິລະປະເມໂຕຣປໍລິຕັນຂອງເມືອງນິວຢອກບອກວ່າ: “ເຂດທີ່ເມືອງນີນີເວເຄີຍຢູ່ບໍ່ມີແລ້ວ. ມີແຕ່ຄົນທີ່ອ່ານພະຄຳພີເທົ່ານັ້ນທີ່ຮູ້ຈັກເມືອງນີ້.” ແລະແຫຼ່ງຂໍ້ມູນຈາກສະມາຄົມບູຮານຄະດີຄຳພີໄບເບິນບອກວ່າ ປະມານປີ 1800 “ບໍ່ມີໃຜຮູ້ວ່າເມືອງຫຼວງຂອງອັດຊີເຣຍເຄີຍມີຢູ່ແທ້.” ແຕ່ໃນປີ 1845 ນັກບູຮານຄະດີທີ່ຊື່ອໍຊະເຕັນ ເຮັນຣີ ເລຢາດໄດ້ຂຸດຄົ້ນເຂດທີ່ເມືອງນີນີເວເຄີຍຢູ່ ແລະໄດ້ເຫັນຊາກຫັກພັງເຊິ່ງເຮັດໃຫ້ຮູ້ວ່າເມືອງນີນີເວເຊິ່ງເປັນເມືອງທີ່ຈະເລີນຮຸ່ງເຮືອງເຄີຍມີຢູ່ແທ້.
ຄຳພະຍາກອນທີ່ສຳເລັດເປັນຈິງກ່ຽວກັບເມືອງນີນີເວເຮັດໃຫ້ເຮົາໝັ້ນໃຈວ່າ ຄຳພະຍາກອນໃນຄຳພີໄບເບິນກ່ຽວກັບຈຸດຈົບຂອງອຳນາດການປົກຄອງໃນທຸກມື້ນີ້ຈະສຳເລັດເປັນຈິງຄືກັນ.—ດາ. 2:44; ພນມ. 19:15, 19-21
