ເຈົ້າພ້ອມທີ່ຈະຮັບເອົາ “ໂລກເປັນລາງວັນ” ບໍ?
ເຮົາທຸກຄົນຢາກເຫັນຄຳສັນຍາຂອງພະເຢຊູເກີດຂຶ້ນແທ້ທີ່ວ່າ: “ຄົນທີ່ຈິດໃຈອ່ອນໂຍນກໍມີຄວາມສຸກ ຍ້ອນພວກເຂົາຈະໄດ້ຮັບໂລກເປັນລາງວັນ.” (ມທ. 5:5) ຜູ້ຖືກເຈີມຈະໄດ້ຮັບໂລກເປັນລາງວັນເຊິ່ງກໍຄື ເຂົາເຈົ້າຈະໄດ້ຮ່ວມປົກຄອງກັບພະເຢຊູໃນສະຫວັນ. (ພນມ. 5:10; 20:6) ສ່ວນຄລິດສະຕຽນຫຼາຍຄົນຈະໄດ້ຮັບໂລກເປັນລາງວັນເຊິ່ງກໍຄື ການມີຊີວິດທີ່ສົມບູນແບບແລະມີຄວາມສຸກຕະຫຼອດໄປ. ແຕ່ເພື່ອຈະເປັນແບບນີ້ ເຂົາເຈົ້າຕ້ອງເຮັດວຽກທີ່ສຳຄັນບາງຢ່າງ ນັ້ນກໍຄື: ການເຮັດໃຫ້ໂລກນີ້ເປັນອຸທິຍານ ການຈັດກຽມສິ່ງຈຳເປັນແລະສອນຜູ້ທີ່ຄືນມາຈາກຕາຍ. ຕອນນີ້ເຮົາຈະສະແດງໃຫ້ເຫັນແນວໃດວ່າເຮົາຢາກມີສ່ວນຮ່ວມໃນວຽກສາມຢ່າງນີ້?
ກຽມພ້ອມທີ່ຈະເຮັດໃຫ້ໂລກນີ້ເປັນອຸທິຍານ
ເມື່ອພະເຢໂຫວາບອກມະນຸດໃຫ້ “ມີລູກມີຫຼານຫຼາຍໆຈົນເຕັມໂລກແລະໃຫ້ເບິ່ງແຍງໂລກ” ເພິ່ນໝາຍຄວາມວ່າໂລກນີ້ຈະຄ່ອຍໆກາຍເປັນອຸທິຍານ. (ປຖກ. 1:28, ລ.ມ.) ດັ່ງນັ້ນ ຜູ້ທີ່ຈະຮັບເອົາໂລກເປັນລາງວັນກໍຕ້ອງເຮັດໃຫ້ໂລກນີ້ກາຍເປັນອຸທິຍານຄືກັນ. ແຕ່ເຂົາເຈົ້າຈະບໍ່ໄດ້ເລີ່ມຕົ້ນຈາກສວນອຸທິຍານ ເພາະສວນເອເດັນບໍ່ມີແລ້ວ. ແຕ່ຫຼັງຈາກຈົບສົງຄາມອາມາເຄໂດນ ເຂົາເຈົ້າຕ້ອງເຮັດວຽກຫຼາຍຢ່າງເພື່ອຟື້ນຟູໂລກນີ້ໃຫ້ກາຍເປັນອຸທິຍານ. ຈະມີວຽກຫຼາຍຢ່າງທີ່ເຮົາຕ້ອງເຮັດແທ້ໆ!
ເລື່ອງນີ້ເຮັດໃຫ້ເຮົາຄິດເຖິງວຽກທີ່ຊາວອິດສະຣາເອນຕ້ອງເຮັດຕອນທີ່ກັບມາຈາກການເປັນຊະເລີຍຢູ່ບາບີໂລນ. ແຜ່ນດິນຂອງເຂົາເຈົ້າຖືກປະໄວ້ເປັນເວລາ 70 ປີ. ແຕ່ເອຊາຢາບອກລ່ວງໜ້າວ່າພະເຢໂຫວາຈະຊ່ວຍເຂົາເຈົ້າໃຫ້ຟື້ນຟູແຜ່ນດິນຂອງຕົວເອງໃຫ້ກັບມາງາມອີກເທື່ອໜຶ່ງ. ລາວບອກວ່າ: “ເພິ່ນຈະເຮັດໃຫ້ບ່ອນກັນດານຂອງເມືອງນີ້ເປັນຄືກັບສວນເອເດັນ ແລະເຮັດໃຫ້ບ່ອນທີ່ແຫ້ງແລ້ງຂອງເມືອງນີ້ເປັນຄືກັບສວນຂອງພະເຢໂຫວາ.” (ອຊຢ. 51:3, ລ.ມ.) ແລ້ວພະເຢໂຫວາກໍຊ່ວຍເຂົາເຈົ້າໃຫ້ເຮັດວຽກໄດ້ສຳເລັດແທ້ໆ. ພະເຢໂຫວາຈະຊ່ວຍຜູ້ທີ່ຮັບເອົາໂລກເປັນລາງວັນເພື່ອເຮັດໃຫ້ໂລກນີ້ກາຍເປັນອຸທິຍານໄດ້ຄືກັນ. ຕອນນີ້ເຈົ້າສາມາດສະແດງໃຫ້ເຫັນວ່າເຈົ້າຢາກມີສ່ວນໃນການເຮັດວຽກນີ້.
ວິທີໜຶ່ງທີ່ສະແດງວ່າເຈົ້າຢາກເຮັດໃຫ້ໂລກນີ້ກາຍເປັນອຸທິຍານກໍຄື ເຮັດໃຫ້ເຮືອນແລະອ້ອມແອ້ມເຮືອນຂອງເຈົ້າສະອາດຢູ່ສະເໝີ ເຖິງວ່າເພື່ອນບ້ານຈະບໍ່ຢາກເຮັດແບບນັ້ນກໍຕາມ. ນອກຈາກນັ້ນ ເຈົ້າຍັງສາມາດຊ່ວຍອະນາໄມແລະບຳລຸງຮັກສາຫໍປະຊຸມ. ຖ້າສະພາບການຂອງເຈົ້າເອື້ອອຳນວຍ ເຈົ້າອາດຈະອາສາໄປຊ່ວຍໃນວຽກບັນເທົາທຸກ. ການເຮັດແບບນີ້ສະແດງວ່າເຈົ້າຢາກຊ່ວຍເຫຼືອພີ່ນ້ອງໃນຍາມທີ່ຈຳເປັນແທ້ໆ. ຂໍໃຫ້ຖາມຕົວເອງວ່າ: ‘ຂ້ອຍຈະຮຽນຮູ້ບາງທັກສະໄດ້ບໍເພື່ອທີ່ພະເຢໂຫວາຈະໃຊ້ຂ້ອຍຕອນທີ່ຂ້ອຍໄດ້ຊີວິດຕະຫຼອດໄປໃນໂລກໃໝ່?’
ກຽມພ້ອມທີ່ຈະຊ່ວຍຜູ້ທີ່ຄືນມາຈາກຕາຍໃຫ້ມີສິ່ງຈຳເປັນ
ຫຼັງຈາກທີ່ພະເຢຊູປຸກລູກສາວຂອງຢາອີໂຣ ເພິ່ນກໍບອກໃຫ້ເອົາອາຫານມາໃຫ້ລູກສາວຂອງຢາອີໂຣກິນທັນທີ. (ມຣກ. 5:42, 43) ມັນອາດຈະບໍ່ຍາກທີ່ຈະຫາອາຫານມາໃຫ້ເດັກນ້ອຍອາຍຸ 12 ປີກິນ. ແຕ່ລອງນຶກພາບວ່າ ຖ້າພະເຢຊູເຮັດໃຫ້ຄຳສັນຍາຂອງເພິ່ນເກີດຂຶ້ນແທ້ທີ່ວ່າ: “ທຸກຄົນເຊິ່ງຢູ່ໃນອຸໂມງຝັງສົບຈະໄດ້ຍິນສຽງເພິ່ນ ແລະຈະອອກມາ” ເຮົາຈະມີວຽກຫຼາຍສ່ຳໃດ! (ຢຮ. 5:28, 29) ເຖິງຄຳພີໄບເບິນຈະບໍ່ໄດ້ບອກລາຍລະອຽດວ່າເຮົາຕ້ອງກຽມຫຍັງແດ່ ແຕ່ເຮົາກໍນຶກພາບໄດ້ວ່າຜູ້ທີ່ຄືນມາຈາກຕາຍຈະຕ້ອງມີອາຫານ ເຄື່ອງນຸ່ງ ແລະບ່ອນຢູ່ອາໄສ. ແລ້ວຕອນນີ້ເຮົາຈະສະແດງໃຫ້ເຫັນແນວໃດວ່າ ເຮົາພ້ອມທີ່ຈະຊ່ວຍເຫຼືອຄົນເຫຼົ່ານັ້ນ? ໃຫ້ເຮົາຄິດເຖິງຄຳຖາມຕໍ່ໄປນີ້.
ຕອນນີ້ເຈົ້າຈະສະແດງໃຫ້ເຫັນແນວໃດວ່າເຈົ້າພ້ອມທີ່ຈະຮັບເອົາໂລກເປັນລາງວັນ?
ເມື່ອມີຄຳປະກາດວ່າຜູ້ດູແລໝວດຈະມາຢາມປະຊາຄົມຂອງເຈົ້າ ເຈົ້າໄດ້ເຊີນເຂົາເຈົ້າມາກິນເຂົ້ານຳບໍ? ເມື່ອເບເທນຍ້າຍຜູ້ຮັບໃຊ້ເຕັມເວລາປະເພດພິເສດມາຢູ່ໃນເຂດເຈົ້າ ຫຼືເມື່ອຜູ້ດູແລໝວດເຊົາເດີນໝວດແລ້ວ ເຈົ້າຈະຊ່ວຍຊອກບ່ອນຢູ່ໃຫ້ເຂົາເຈົ້າໄດ້ບໍ? ຖ້າບ່ອນທີ່ເຈົ້າຢູ່ຈະມີການຈັດການປະຊຸມພາກຫຼືການປະຊຸມພິເສດ ເຈົ້າ ອາສາໄປຊ່ວຍວຽກກ່ອນຫຼືຫຼັງປະຊຸມໄດ້ບໍ ຫຼື ຊ່ວຍຕ້ອນຮັບແຂກທີ່ຈະມາຮ່ວມການປະຊຸມບໍ?
ກຽມພ້ອມທີ່ຈະສອນຜູ້ທີ່ຄືນມາຈາກຕາຍ
ຕາມກິດຈະການ 24:15 ເຮົາຄາດໝາຍໄດ້ວ່າຫຼາຍຕື້ຄົນຈະຄືນມາຈາກຕາຍ. ຄົນສ່ວນຫຼາຍບໍ່ມີໂອກາດໄດ້ຮຽນຮູ້ເລື່ອງພະເຢໂຫວາ ແຕ່ເມື່ອເຂົາເຈົ້າຖືກປຸກໃຫ້ຟື້ນຄືນມາ ເຂົາເຈົ້າກໍຈະມີໂອກາດໄດ້ຮຽນຮູ້ເລື່ອງຂອງເພິ່ນ. a ຜູ້ຮັບໃຊ້ທີ່ສັດຊື່ຂອງພະເຢໂຫວາຈະມີສ່ວນໃນການສອນຄົນເຫຼົ່ານີ້. (ອຊຢ. 11:9) ພີ່ນ້ອງຍິງທີ່ຊື່ຊາລ໋ອດເຊິ່ງເຄີຍປະກາດຢູ່ເອີຣົບ ອາເມຣິກາໃຕ້ແລະອາຝຼິກກາ ກໍລໍຖ້າມື້ນັ້ນ. ລາວບອກວ່າ: “ຂ້ອຍລໍຖ້າມື້ທີ່ຈະໄດ້ສອນຄົນທີ່ຄືນມາຈາກຕາຍໃຫ້ຮູ້ເລື່ອງຂອງພະເຢໂຫວາ. ເມື່ອຂ້ອຍອ່ານເລື່ອງຂອງບາງຄົນທີ່ມີຊີວີດໃນສະໄໝກ່ອນ ຂ້ອຍກໍມັກຈະຄິດວ່າ ‘ຖ້າຜູ້ນັ້ນໄດ້ຮູ້ຈັກພະເຢໂຫວາ ຊີວິດຂອງລາວກໍຄືຊິຕ່າງຈາກທີ່ເປັນຢູ່.’ ຂ້ອຍຢາກຈະບອກຜູ້ທີ່ຄືນມາຈາກຕາຍໃຫ້ຮູ້ວ່າ ຊີວິດຂອງເຂົາເຈົ້າຈະດີຫຼາຍສ່ຳໃດຖ້າໄດ້ຮູ້ຈັກແລະຮັບໃຊ້ພະເຢໂຫວາ.”
ແມ່ນແຕ່ຜູ້ຮັບໃຊ້ຂອງພະເຢໂຫວາທີ່ມີຊີວິດກ່ອນສະໄໝພະເຢຊູກໍຍັງຕ້ອງຮຽນຮູ້ເລື່ອງຂອງພະເຢໂຫວາຫຼາຍຂຶ້ນອີກ. ລອງນຶກພາບວ່າເຮົາຈະມີຄວາມສຸກແລະເປັນສິດທິພິເສດຫຼາຍສ່ຳໃດທີ່ໄດ້ອະທິບາຍໃຫ້ດານີເອນຮູ້ວ່າຄຳພະຍາກອນທີ່ລາວຂຽນໄດ້ສຳເລັດເປັນຈິງແນວໃດ. ຫຼືເຮົາຈະຮູ້ສຶກດີໃຈຫຼາຍສ່ຳໃດທີ່ໄດ້ຊ່ວຍຣຸດແລະນາໂອມີໃຫ້ຮູ້ວ່າເມຊີອາໄດ້ເກີດມາທາງລູກຫຼານຂອງເຂົາເຈົ້າ. ເຮົາຈະມີຄວາມສຸກຫຼາຍແທ້ໆທີ່ໄດ້ສອນຄົນທົ່ວໂລກໃຫ້ຮຽນຮູ້ເລື່ອງພະເຢໂຫວາໂດຍທີ່ບໍ່ມີສິ່ງໃດມາຂັດຂວາງແລະກົດດັນເຮົາແບບທີ່ມີຢູ່ໃນຕອນນີ້!
ຕອນນີ້ເຈົ້າຈະສະແດງໃຫ້ເຫັນແນວໃດວ່າເຈົ້າຢາກມີສ່ວນໃນການສອນຄົນທີ່ຄືນມາຈາກຕາຍ? ວິທີໜຶ່ງທີ່ເຈົ້າເຮັດໄດ້ກໍຄື ປັບປຸງຄວາມສາມາດໃນການສອນແລະມີສ່ວນໃນການປະກາດເປັນປະຈຳ. (ມທ. 24:14) ເຖິງວ່າຕອນນີ້ເຈົ້າຈະປະກາດແລະສອນບໍ່ໄດ້ຫຼາຍຍ້ອນອາຍຸຫຼາຍຂຶ້ນຫຼືມີຂີດຈຳກັດດ້ານອື່ນໆ ແຕ່ຄວາມພະຍາຍາມຂອງເຈົ້າກໍສະແດງໃຫ້ເຫັນວ່າເຈົ້າຢາກສອນຄົນທີ່ຄືນມາຈາກຕາຍໃຫ້ຮຽນຮູ້ເລື່ອງຂອງພະເຢໂຫວາ.
ເປັນເລື່ອງສຳຄັນທີ່ຈະຄິດເຖິງຄຳຖາມຕໍ່ໄປນີ້: ເຈົ້າຢາກຈະຮັບເອົາໂລກເປັນລາງວັນບໍ? ເຈົ້າຮູ້ສຶກຕື່ນເຕັ້ນບໍທີ່ຈະເຮັດໃຫ້ໂລກນີ້ກາຍເປັນອຸທິຍານ ຊ່ວຍຄົນທີ່ຄືນມາຈາກຕາຍໃຫ້ມີສິ່ງຈຳເປັນແລະສອນເຂົາເຈົ້າໃຫ້ຮຽນຮູ້ເລື່ອງພະເຢໂຫວາ? ເຮົາສະແດງໃຫ້ເຫັນວ່າເຮົາພ້ອມທີ່ຈະຮັບເອົາໂລກເປັນລາງວັນໂດຍໃຊ້ທຸກໂອກາດໃນຕອນນີ້ເພື່ອຈະມີສ່ວນຮ່ວມໃນວຽກຕ່າງໆທີ່ຄ້າຍຄືກັບວຽກທີ່ເຮົາຈະເຮັດຕອນທີ່ໄດ້ຮັບໂລກເປັນລາງວັນ.
a ເບິ່ງບົດຄວາມທີ່ຊື່ວ່າ “ຊ່ວຍຫຼາຍຄົນໃຫ້ເຮັດສິ່ງທີ່ຖືກຕ້ອງ” ໃນຫໍສັງເກດການ ເດືອນກັນຍາ 2022.
