ບົດຄວາມສຶກສາທີ 27
ເພງທີ 79 ສອນພວກເຂົາໃຫ້ມີຄວາມເຊື່ອທີ່ໝັ້ນຄົງ
ຊ່ວຍນັກສຶກສາໃຫ້ຕັດສິນໃຈຮັບໃຊ້ພະເຢໂຫວາ
“ມີຄວາມເຊື່ອທີ່ໝັ້ນຄົງ . . . ແລະເຂັ້ມແຂງ.”—1ກຣ. 16:13
ຈຸດສຳຄັນ
ວິທີທີ່ເຮົາຈະຊ່ວຍນັກສຶກສາໃຫ້ມີຄວາມເຊື່ອທີ່ເຂັ້ມແຂງແລະກ້າປ່ຽນແປງໂຕເອງແລະຮັບໃຊ້ພະເຢໂຫວາ.
1-2. (ກ) ເປັນຫຍັງນັກສຶກສາບາງຄົນຈຶ່ງລັງເລທີ່ຈະເຂົ້າມາເປັນພະຍານພະເຢໂຫວາ? (ຂ) ເຮົາຈະຮຽນຫຍັງໃນບົດນີ້?
ມີຫຍັງທີ່ເຄີຍເຮັດໃຫ້ເຈົ້າລັງເລທີ່ຈະເຂົ້າມາເປັນພະຍານພະເຢໂຫວາບໍ? ບາງເທື່ອເຈົ້າອາດຢ້ານວ່າຄົນຢູ່ບ່ອນເຮັດວຽກ ໝູ່ ຫຼືຄົນໃນຄອບຄົວຈະບໍ່ມັກເຈົ້າ. ຫຼືເຈົ້າອາດຮູ້ສຶກວ່າບໍ່ສາມາດເຮັດຕາມມາດຕະຖານຂອງພະເຢໂຫວາໄດ້. ຖ້າເຈົ້າເຄີຍຮູ້ສຶກແບບນັ້ນ ເຈົ້າກໍຈະເຂົ້າໃຈວ່ານັກສຶກສາບາງຄົນຮູ້ສຶກແນວໃດ ແລະເປັນຫຍັງຈຶ່ງຍາກສຳລັບເຂົາເຈົ້າທີ່ຈະເຂົ້າມາເປັນພະຍານພະເຢໂຫວາ.
2 ພະເຢຊູຮູ້ວ່າການຢ້ານແບບນັ້ນອາດເຮັດໃຫ້ບາງຄົນເຊົາຮັບໃຊ້ພະເຢໂຫວາ. (ມທ. 13:20-22) ແຕ່ພະເຢຊູກໍພະຍາຍາມຊ່ວຍຄົນເຫຼົ່ານັ້ນຕໍ່ໆໄປທີ່ລັງເລທີ່ຈະເຂົ້າມາເປັນລູກສິດຂອງເພິ່ນ. ໂດຍທາງສິ່ງທີ່ພະເຢຊູເຮັດ ເພິ່ນວາງຕົວຢ່າງໃຫ້ເຮົາຮູ້ວິທີຊ່ວຍຄົນເຫຼົ່ານັ້ນ (1) ໃຫ້ຮູ້ວ່າສິ່ງໃດຂັດຂວາງເຂົາເຈົ້າບໍ່ໃຫ້ກ້າວໜ້າ (2) ໃຫ້ຮັກພະເຢໂຫວາຫຼາຍຂຶ້ນ (3) ໃຫ້ຮູ້ຈັກຈັດລຳດັບຄວາມສຳຄັນ ແລະ (4) ໃຫ້ຮູ້ວ່າຈະເຮັດແນວໃດເມື່ອເຈິການຕໍ່ຕ້ານ. ເຮົາຈະຮຽນແບບວິທີສອນຂອງພະເຢຊູແນວໃດເມື່ອເຮົາໃຊ້ປຶ້ມຊີວິດທີ່ມີຄວາມສຸກຕະຫຼອດໄປ!ເພື່ອຊ່ວຍນັກສຶກສາໃຫ້ຕັດສິນໃຈທີ່ຈະເຂົ້າມາເປັນພະຍານພະເຢໂຫວາ?
ຊ່ວຍນັກສຶກສາໃຫ້ຮູ້ວ່າສິ່ງໃດຂັດຂວາງລາວບໍ່ໃຫ້ກ້າວໜ້າ
3. ອັນໃດອາດເປັນອຸປະສັກຂັດຂວາງນີໂກເດມບໍ່ໃຫ້ເຂົ້າມາເປັນລູກສິດຂອງພະເຢຊູ?
3 ນີໂກເດມທີ່ເປັນຜູ້ນຳຄົນສຳຄັນຂອງຄົນຢິວເຈິກັບອຸປະສັກຢ່າງໜຶ່ງທີ່ຂັດຂວາງລາວບໍ່ໃຫ້ເຂົ້າມາເປັນລູກສິດຂອງພະເຢຊູ. ພະເຢຊູເລີ່ມເຮັດວຽກປະກາດພຽງແຕ່ 6 ເດືອນ ນີໂກເດມກໍໝັ້ນໃຈວ່າພະເຢຊູເປັນຜູ້ທີ່ພະເຈົ້າສົ່ງມາ. (ຢຮ. 3:1, 2) ແຕ່ນີໂກເດມລັກໄປຫາພະເຢຊູຕອນກາງຄືນຍ້ອນລາວ “ຢ້ານພວກຜູ້ນຳຄົນຢິວ.” (ຢຮ. 7:13; 12:42) ລາວອາດຄິດວ່າຖ້າລາວເຂົ້າມາເປັນລູກສິດຂອງພະເຢຊູ ລາວຈະສູນເສຍຖານະຕຳແໜ່ງ. a
4. ພະເຢຊູຊ່ວຍນີໂກເດມແນວໃດໃຫ້ເຂົ້າໃຈວ່າພະເຢໂຫວາຕ້ອງການໃຫ້ລາວເຮັດຫຍັງ?
4 ນີໂກເດມຮູ້ຈັກກົດໝາຍຂອງໂມເຊດີ ແຕ່ລາວຕ້ອງໄດ້ຮັບຄວາມຊ່ວຍເຫຼືອເພື່ອຈະເຂົ້າໃຈວ່າພະເຢໂຫວາຕ້ອງການໃຫ້ລາວເຮັດຫຍັງ. ພະເຢຊູຊ່ວຍລາວແນວໃດ? ພະເຢຊູເຕັມໃຈໃຊ້ເວລາລົມກັບລາວເຖິງວ່າຈະເປັນຕອນກາງຄືນ. ພະເຢຊູບອກນີໂກເດມແຈ້ງໆວ່າ ເພື່ອຈະເຂົ້າມາເປັນລູກສິດຂອງເພິ່ນ ລາວຕ້ອງກັບໃຈ ຮັບບັບເຕມາ ແລະສະແດງຄວາມເຊື່ອໃນລູກຂອງພະເຈົ້າ.—ຢຮ. 3:5, 14-21
5. ເຮົາຈະຊ່ວຍນັກສຶກສາແນວໃດໃຫ້ຮູ້ວ່າສິ່ງໃດຂັດຂວາງລາວບໍ່ໃຫ້ຮັບໃຊ້ພະເຢໂຫວາ?
5 ເຖິງວ່ານັກສຶກສາເຂົ້າໃຈຄຳພີໄບເບິນດີຢູ່ແລ້ວ ແຕ່ເຮົາອາດຕ້ອງຊ່ວຍລາວໃຫ້ຮູ້ວ່າສິ່ງໃດຂັດຂວາງລາວບໍ່ໃຫ້ຮັບໃຊ້ພະເຢໂຫວາ. ວຽກອາຊີບຫຼືການຕໍ່ຕ້ານຈາກຄອບຄົວອາດເຮັດໃຫ້ລາວບໍ່ສາມາດເຂົ້າມາເປັນພະຍານພະເຢໂຫວາ. ຄືກັບພະເຢຊູ ໃຫ້ໃຊ້ເວລາກັບນັກສຶກສາ. ເຮົາອາດຊວນລາວໄປກິນນັ້ນກິນນີ້ນຳກັນ ຫຼືໄປຍ່າງຫຼິ້ນຢູ່ບ່ອນໃດບ່ອນໜຶ່ງນຳກັນ. ໃນບັນຍາກາດທີ່ຜ່ອນຄາຍແບບນີ້ລາວອາດຈະບອກເຮົາໃຫ້ຮູ້ວ່າລາວມີບັນຫາຫຍັງແດ່. ຈາກນັ້ນ ໃຫ້ກະຕຸ້ນລາວໃຫ້ປ່ຽນແປງໂຕເອງ ບໍ່ແມ່ນເພື່ອເຮັດໃຫ້ເຮົາພໍໃຈ ແຕ່ເພື່ອສະແດງໃຫ້ເຫັນວ່າລາວຮັກພະເຢໂຫວາ.
6. ເຈົ້າຈະຊ່ວຍນັກສຶກສາແນວໃດໃຫ້ກ້າເອົາສິ່ງທີ່ໄດ້ຮຽນໄປໃຊ້? (1 ໂກຣິນໂທ 16:13)
6 ເມື່ອນັກສຶກສາໝັ້ນໃຈວ່າພະເຢໂຫວາຈະຊ່ວຍລາວໃຫ້ໃຊ້ຊີວິດຕາມມາດຕະຖານໃນຄຳພີໄບເບິນ ລາວກໍກ້າທີ່ຈະເອົາສິ່ງທີ່ໄດ້ຮຽນໄປໃຊ້ໃນຊີວິດ. (ອ່ານ 1 ໂກຣິນໂທ 16:13) ໜ້າທີ່ຂອງເຈົ້າເປັນຄືກັບອາຈານ. ໃຫ້ຄິດຄືນຕອນທີ່ເຈົ້າຮຽນໜັງສື ອາຈານຜູ້ໃດທີ່ເຈົ້າມັກຫຼາຍທີ່ສຸດ? ອາດແມ່ນຜູ້ທີ່ອົດທົນຊ່ວຍເຈົ້າໃຫ້ມີຄວາມໝັ້ນໃຈວ່າເຈົ້າສາມາດເຮັດບາງຢ່າງໄດ້. ຄ້າຍຄືກັນ ຜູ້ສອນຄຳພີໄບເບິນທີ່ດີຈະບໍ່ພຽງແຕ່ສອນນັກສຶກສາວ່າພະເຢໂຫວາຢາກໃຫ້ລາວເຮັດຫຍັງ ແຕ່ຍັງຈະຊ່ວຍນັກສຶກສາໃຫ້ໝັ້ນໃຈວ່າດ້ວຍຄວາມຊ່ວຍເຫຼືອຈາກພະເຢໂຫວາ ລາວສາມາດປ່ຽນແປງໂຕເອງໄດ້. ເຈົ້າຈະເຮັດແບບນັ້ນໄດ້ແນວໃດ?
ຊ່ວຍນັກສຶກສາໃຫ້ຮັກພະເຢໂຫວາຫຼາຍຂຶ້ນ
7. ພະເຢຊູຊ່ວຍຄົນທີ່ຟັງເພິ່ນແນວໃດໃຫ້ຮັກພະເຢໂຫວາຫຼາຍຂຶ້ນ?
7 ພະເຢຊູຮູ້ວ່າຄວາມຮັກທີ່ພວກລູກສິດມີຕໍ່ພະເຢໂຫວາຈະກະຕຸ້ນເຂົາເຈົ້າໃຫ້ເອົາສິ່ງທີ່ໄດ້ຮຽນໄປໃຊ້. ເພິ່ນຈຶ່ງມັກສອນພວກລູກສິດໃນສິ່ງທີ່ຈະຊ່ວຍເຂົາເຈົ້າໃຫ້ຮັກພະເຢໂຫວາຫຼາຍຂຶ້ນ. ຕົວຢ່າງເຊັ່ນ: ພະເຢຊູສົມທຽບພະເຢໂຫວາວ່າເປັນຄືກັບພໍ່ທີ່ເອົາສິ່ງດີໆໃຫ້ລູກ. (ມທ. 7:9-11) ບາງຄົນທີ່ຟັງພະເຢຊູອາດຢາກມີພໍ່ທີ່ມີຄວາມຮັກຍ້ອນເຂົາເຈົ້າບໍ່ເຄີຍມີພໍ່ແບບນັ້ນ. ໃຫ້ຄິດເບິ່ງວ່າເຂົາເຈົ້າຈະຮູ້ສຶກແນວໃດເມື່ອພະເຢຊູຍົກຕົວຢ່າງປຽບທຽບເລື່ອງພໍ່ທີ່ມີຄວາມຮັກທີ່ຕ້ອນຮັບລູກຊາຍທີ່ເຄີຍໃຊ້ຊີວິດແບບເສເພກັບຄືນມາໃນຄອບຄົວ. ເຂົາເຈົ້າຄືຊິເຫັນແທ້ໆວ່າພະເຢໂຫວາຮັກມະນຸດຫຼາຍແລະຢາກຊ່ວຍເຂົາເຈົ້າ.—ລກ. 15:20-24
8. ເຈົ້າຈະຊ່ວຍນັກສຶກສາແນວໃດໃຫ້ຮັກພະເຢໂຫວາຫຼາຍຂຶ້ນອີກ?
8 ເຈົ້າກໍສາມາດຊ່ວຍນັກສຶກສາໃຫ້ຮັກພະເຢໂຫວາຫຼາຍຂຶ້ນໂດຍເນັ້ນກ່ຽວກັບຄຸນລັກສະນະຕ່າງໆຂອງເພິ່ນໃນຕອນທີ່ເຈົ້າສອນ. ທຸກເທື່ອທີ່ສຶກສາ ໃຫ້ຊ່ວຍນັກສຶກສາໃຫ້ເຫັນວ່າສິ່ງທີ່ກຳລັງຮຽນກ່ຽວຂ້ອງແນວໃດກັບຄວາມຮັກຂອງພະເຢໂຫວາ. ຕອນທີ່ຮຽນເລື່ອງຄ່າໄຖ່ ໃຫ້ຊ່ວຍນັກສຶກສາໃຫ້ເຂົ້າໃຈວ່າພະເຢໂຫວາຈັດໃຫ້ມີຄ່າໄຖ່ຍ້ອນເພິ່ນຮັກມະນຸດທຸກຄົນແລະລວມເຖິງລາວນຳ. (ຣມ. 5:8; 1ຢຮ. 4:10) ເມື່ອນັກສຶກສາເຂົ້າໃຈວ່າພະເຢໂຫວາຮັກລາວຫຼາຍສ່ຳໃດ ມັນກໍຈະຊ່ວຍລາວໃຫ້ຮັກພະເຢໂຫວາຫຼາຍຂຶ້ນອີກ.—ຄລຕ. 2:20
9. ອັນໃດຊ່ວຍໄມເຄິ້ນໃຫ້ປ່ຽນແປງໂຕເອງ?
9 ໃຫ້ເບິ່ງເລື່ອງຂອງໄມເຄິ້ນທີ່ຢູ່ປະເທດອິນໂດເນເຊຍ. ລາວໃຫຍ່ມາໃນຄອບຄົວທີ່ເປັນພະຍານພະເຢໂຫວາ ແຕ່ລາວບໍ່ໄດ້ຮັບບັບເຕມາ. ຕອນອາຍຸ 18 ປີ ໄມເຄິ້ນໄປເຮັດວຽກຢູ່ຕ່າງປະເທດເປັນຄົນຂັບລົດບັນທຸກ. ຕໍ່ມາ ລາວໄດ້ກັບມາອິນໂດເນເຊຍເພື່ອແຕ່ງດອງ ແລ້ວລາວກໍໄປເຮັດວຽກຢູ່ຕ່າງປະເທດອີກ ແຕ່ເມຍກັບລູກສາວບໍ່ໄດ້ໄປນຳ. ຕອນທີ່ໄມເຄິ້ນຢູ່ຕ່າງປະເທດ ລູກກັບເມຍເລີ່ມຮຽນຄຳພີໄບເບິນແລະເຂົາເຈົ້າກໍກ້າວໜ້າ. ຫຼັງຈາກທີ່ແມ່ຕາຍ ໄມເຄິ້ນກໍຕັດສິນໃຈກັບມາບ້ານເພື່ອເບິ່ງແຍງພໍ່ ແລະລາວໄດ້ເລີ່ມຮຽນຄຳພີໄບເບິນ. ຕອນທີ່ຮຽນປຶ້ມຊີວິດທີ່ມີຄວາມສຸກຕະຫຼອດໄປ! ບົດທີ 27 ສ່ວນ “ຮຽນຮູ້ຫຼາຍຂຶ້ນ” ໄມເຄິ້ນປະທັບໃຈຫຼາຍ. ເມື່ອລາວຄິດເຖິງຄວາມຮູ້ສຶກຂອງພະເຢໂຫວາວ່າເພິ່ນຕ້ອງເຈັບປວດໃຈຫຼາຍແທ້ໆທີ່ເຫັນພະເຢຊູທົນທຸກທໍລະມານ ລາວຈົນໄຫ້. ເມື່ອລາວຮູ້ວ່າພະເຢໂຫວາແລະພະເຢຊູຮັກລາວຫຼາຍສ່ຳໃດ ລາວກໍປ່ຽນແປງໂຕເອງແລະຮັບບັບເຕມາ.
ຊ່ວຍນັກສຶກສາໃຫ້ຮູ້ຈັກຈັດລຳດັບຄວາມສຳຄັນ
10. ພະເຢຊູຊ່ວຍພວກລູກສິດແນວໃດໃຫ້ຕັດສິນໃຈທີ່ຈະຮັບໃຊ້ພະເຢໂຫວາຫຼາຍຂຶ້ນ? (ລູກາ 5:5-11) (ເບິ່ງຮູບນຳ)
10 ພວກລູກສິດລຸ້ນທຳອິດຂອງພະເຢຊູຮູ້ວ່າເພິ່ນເປັນເມຊີອາ ແຕ່ເຂົາເຈົ້າຍັງຕ້ອງໄດ້ຮັບຄວາມຊ່ວຍເຫຼືອເພື່ອຈະຈັດໃຫ້ວຽກປະກາດຂ່າວດີເປັນສິ່ງສຳຄັນທີ່ສຸດໃນຊີວິດ. ເປໂຕກັບອັນເດອາໄດ້ເຂົ້າມາເປັນລູກສິດຂອງພະເຢຊູໄລຍະໜຶ່ງແລ້ວຕອນທີ່ເພິ່ນຊວນເຂົາເຈົ້າໃຫ້ຕິດຕາມເພິ່ນໄປ. (ມທ. 4:18, 19) ເຂົາເຈົ້າເຮັດທຸລະກິດຫາປານຳກັນກັບຢາໂກໂບແລະໂຢຮັນ ແລະທຸລະກິດນີ້ກໍໄປໄດ້ດີ. (ມຣກ. 1:16-20) ແຕ່ເປໂຕກັບອັນເດອາໄດ້ເຊົາເຮັດທຸລະກິດນີ້ເພື່ອຈະຕິດຕາມພະເຢຊູໄປ. ຕອນທີ່ຕັດສິນໃຈໃນເລື່ອງນີ້ ເຂົາເຈົ້າຕ້ອງແນ່ໃຈວ່າເຂົາເຈົ້າຍັງຈະສາມາດເບິ່ງແຍງຄອບຄົວໄດ້ຕອນທີ່ຕິດຕາມພະເຢຊູ. ອັນໃດຊ່ວຍເຂົາເຈົ້າໃຫ້ຈັດໃຫ້ວຽກປະກາດສຳຄັນກວ່າການຫາເງິນໃຫ້ໄດ້ຫຼາຍໆ? ສິ່ງທີ່ຂຽນໄວ້ໃນປຶ້ມລູກາບອກເຮົາໃຫ້ຮູ້ວ່າພະເຢຊູໄດ້ເຮັດການອັດສະຈັນເພື່ອໃຫ້ເຂົາເຈົ້າໝັ້ນໃຈວ່າພະເຢໂຫວາສາມາດເບິ່ງແຍງເຂົາເຈົ້າໄດ້ຖ້າເຂົາເຈົ້າໃຫ້ພະເຢໂຫວາສຳຄັນທີ່ສຸດໃນຊີວິດ.—ອ່ານລູກາ 5:5-11
ເຮົາຮຽນຫຍັງຈາກວິທີທີ່ພະເຢຊູຊ່ວຍພວກລູກສິດໃຫ້ຮູ້ຈັກຈັດລຳດັບຄວາມສຳຄັນ? (ເບິ່ງຂໍ້ 10) b
11. ເຮົາຈະໃຊ້ປະສົບການຂອງໂຕເອງແນວໃດເພື່ອຊ່ວຍນັກສຶກສາໃຫ້ມີຄວາມເຊື່ອເຂັ້ມແຂງຫຼາຍຂຶ້ນ?
11 ເຮົາເຮັດການອັດສະຈັນບໍ່ໄດ້ຄືກັບທີ່ພະເຢຊູເຮັດ ແຕ່ເຮົາສາມາດເລົ່າປະສົບການຂອງພີ່ນ້ອງໃຫ້ນັກສຶກສາຟັງວ່າພະເຢໂຫວາຊ່ວຍເຂົາເຈົ້າແນວໃດເມື່ອເຂົາເຈົ້າໃຫ້ພະເຢໂຫວາສຳຄັນທີ່ສຸດໃນຊີວິດ. ຕົວຢ່າງເຊັ່ນ: ເຈົ້າຈື່ບໍວ່າພະເຢໂຫວາໄດ້ຊ່ວຍເຈົ້າແນວໃດຕອນທີ່ເຈົ້າເລີ່ມເຂົ້າຮ່ວມການປະຊຸມ? ບາງເທື່ອເຈົ້າຕ້ອງໄດ້ໄປຫາຫົວໜ້າແລະອະທິບາຍວ່າເປັນຫຍັງເຈົ້າເຮັດວຽກລ່ວງເວລາບໍ່ໄດ້ຖ້າມັນຕຳກັບໂມງປະຊຸມ. ເມື່ອເຈົ້າເລົ່າປະສົບການໃຫ້ນັກສຶກສາຟັງ ໃຫ້ບອກນັກສຶກສາວ່າຄວາມເຊື່ອຂອງເຈົ້າເຂັ້ມແຂງຂຶ້ນແນວໃດເມື່ອເຈົ້າເຫັນວ່າພະເຢໂຫວາຊ່ວຍເຈົ້າຍ້ອນເຈົ້າເລືອກໃຫ້ການນະມັດສະການເພິ່ນເປັນສິ່ງສຳຄັນທີ່ສຸດ.
12. (ກ) ເປັນຫຍັງເຮົາຄວນຊວນພີ່ນ້ອງຫຼາຍໆຄົນມາຮ່ວມສຶກສານຳ? (ຂ) ເຮົາຈະໃຊ້ວິດີໂອແນວໃດເພື່ອຊ່ວຍນັກສຶກສາ? ຂໍໃຫ້ຍົກຕົວຢ່າງ.
12 ນັກສຶກສາຍັງຈະໄດ້ຮັບປະໂຫຍດຈາກປະສົບການຂອງພີ່ນ້ອງຄົນອື່ນວ່າເຂົາເຈົ້າປັບປ່ຽນຊີວິດແນວໃດເພື່ອຈັດໃຫ້ພະເຢໂຫວາສຳຄັນທີ່ສຸດ. ໃຫ້ຊວນພີ່ນ້ອງຫຼາຍໆຄົນມາຮ່ວມສຶກສານຳ. ຂໍໃຫ້ເຂົາເຈົ້າເລົ່າວ່າເຂົາເຈົ້າເຂົ້າມາໃນຄວາມຈິງແນວໃດ ແລະເຂົາເຈົ້າໄດ້ເຮັດຫຍັງເພື່ອຈັດໃຫ້ການຮັບໃຊ້ພະເຢໂຫວາເປັນສິ່ງສຳຄັນທີ່ສຸດໃນຊີວິດ. ນອກຈາກນັ້ນ ໃຫ້ໃຊ້ເວລາກັບນັກສຶກສາເພື່ອເບິ່ງວິດີໂອໃນສ່ວນ “ຮຽນຮູ້ຫຼາຍຂຶ້ນ” ຫຼືສ່ວນ “ເບິ່ງເພີ່ມເຕີມ” ໃນປຶ້ມຊີວິດທີ່ມີຄວາມສຸກຕະຫຼອດໄປ! ຕົວຢ່າງເຊັ່ນ: ຕອນທີ່ຮຽນປຶ້ມຊີວິດທີ່ມີຄວາມສຸກຕະຫຼອດໄປ! ບົດທີ 37 ໃຫ້ເບິ່ງວິດີໂອພະເຢໂຫວາຈະເບິ່ງແຍງໃຫ້ເຮົາມີສິ່ງຈຳເປັນ. ຈາກນັ້ນ ໃຫ້ລົມກັນກ່ຽວກັບວິດີໂອແລະຊ່ວຍນັກສຶກສາໃຫ້ເຫັນວ່າພະເຢໂຫວາຈະຊ່ວຍລາວເມື່ອລາວຈັດໃຫ້ເພິ່ນສຳຄັນທີ່ສຸດໃນຊີວິດ.
ຊ່ວຍນັກສຶກສາໃຫ້ຮູ້ວ່າຈະເຮັດແນວໃດເມື່ອເຈິການຕໍ່ຕ້ານ
13. ພະເຢຊູກຽມພວກລູກສິດແນວໃດສຳລັບການຕໍ່ຕ້ານ?
13 ພະເຢຊູບອກພວກລູກສິດຫຼາຍເທື່ອວ່າເຂົາເຈົ້າຈະເຈິກັບການຕໍ່ຕ້ານຈາກຄົນອື່ນລວມທັງຈາກຄົນໃນຄອບຄົວນຳ. (ມທ. 5:11; 10:22, 36) ບໍ່ດົນກ່ອນທີ່ພະເຢຊູຈະຕາຍ ເພິ່ນເຕືອນພວກລູກສິດວ່າເຂົາເຈົ້າອາດຈະເຈິການຕໍ່ຕ້ານຈົນເຖິງຂັ້ນຖືກຂ້າ. (ມທ. 24:9; ຢຮ. 15:20; 16:2) ພະເຢຊູເຕືອນເຂົາເຈົ້າໃຫ້ເຮັດວຽກປະກາດຢ່າງລະມັດລະວັງ. ເພິ່ນບອກເຂົາເຈົ້າບໍ່ໃຫ້ຜິດຖຽງກັບຜູ້ທີ່ເວົ້າຕໍ່ຕ້ານຄວາມເຊື່ອຂອງເຂົາເຈົ້າ ແລະໃຫ້ເປັນຄົນສຸຂຸມຮອບຄອບເພື່ອເຂົາເຈົ້າຈະປະກາດຕໍ່ໆໄປໄດ້.
14. ເຮົາຈະຊ່ວຍນັກສຶກສາແນວໃດໃຫ້ກຽມພ້ອມສຳລັບການຕໍ່ຕ້ານ? (2 ຕີໂມທຽວ 3:12)
14 ເຮົາສາມາດຊ່ວຍນັກສຶກສາໃຫ້ກຽມພ້ອມສຳລັບການຕໍ່ຕ້ານໂດຍບອກລາວວ່າການຕໍ່ຕ້ານອາດຈະມາຈາກຄົນຢູ່ບ່ອນເຮັດວຽກ ໝູ່ ແລະຄົນໃນຄອບຄົວ. (ອ່ານ 2 ຕີໂມທຽວ 3:12) ບາງຄົນຢູ່ບ່ອນເຮັດວຽກອາດຈະເຍາະເຍີ້ຍທີ່ລາວພະຍາຍາມໃຊ້ຊີວິດຕາມສິ່ງທີ່ຄຳພີໄບເບິນສອນ. ຄົນອື່ນໆແລະລວມທັງຄົນໃນຄອບຄົວອາດຈະເວົ້າໃຫ້ລາວກ່ຽວກັບສິ່ງທີ່ລາວຮຽນໃນຄຳພີໄບເບິນ. ແຮ່ງເຮົາກຽມນັກສຶກສາຂອງເຮົາໄວເທົ່າໃດໃຫ້ຮູ້ຈັກຮັບມືກັບການຕໍ່ຕ້ານ ເຂົາເຈົ້າກໍແຮ່ງຈະຮູ້ວິທີຮັບມືເມື່ອມັນເກີດຂຶ້ນ.
15. ອັນໃດຈະຊ່ວຍນັກສຶກສາໃຫ້ຮັບມືກັບການຕໍ່ຕ້ານຈາກຄົນໃນຄອບຄົວ?
15 ຖ້ານັກສຶກສາຖືກຄອບຄົວຕໍ່ຕ້ານ ໃຫ້ບອກລາວວ່າບໍ່ແມ່ນເລື່ອງແປກທີ່ເຈິແບບນີ້ຍ້ອນພະເຢຊູກໍຖືກບາງຄົນໃນຄອບຄົວເວົ້າໃຫ້ວ່າເປັນບ້າ. (ມຣກ. 3:21; ຢຮ. 7:5) ໃຫ້ຊ່ວຍນັກສຶກສາຄິດເຖິງເຫດຜົນວ່າເປັນຫຍັງຄົນໃນຄອບຄົວຈຶ່ງບໍ່ມັກທີ່ລາວຮຽນຄຳພີໄບເບິນ. ເຂົາເຈົ້າອາດຄິດວ່າລາວຈະຖືກຕົວະ ຫຼືອາດເປັນຍ້ອນວ່າເຂົາເຈົ້າບໍ່ມັກພະຍານພະເຢໂຫວາ. ໃຫ້ສອນນັກສຶກສາໃຫ້ເປັນຄົນອົດທົນແລະຮູ້ຈັກຜ່ອນສັ້ນຜ່ອນຍາວກັບຄົນອື່ນແລະລວມທັງຄົນໃນຄອບຄົວນຳ.
16. ເຮົາຈະຊ່ວຍນັກສຶກສາແນວໃດໃຫ້ເລົ່າສິ່ງທີ່ລາວຮຽນຈາກຄຳພີໄບເບິນແບບຜ່ອນສັ້ນຜ່ອນຍາວ?
16 ຖ້າຄົນໃນຄອບຄົວຂອງນັກສຶກສາສົນໃຈກ່ຽວກັບສິ່ງທີ່ລາວກຳລັງຮຽນໃນຄຳພີໄບເບິນ ດີກວ່າທີ່ນັກສຶກສາຈະບໍ່ອະທິບາຍທຸກເລື່ອງບາດດຽວ. ຖ້າເຮັດແບບນັ້ນ ຄົນໃນຄອບຄົວອາດຈະຮູ້ສຶກວ່າມັນຫຼາຍໂພດ ແລະເຂົາເຈົ້າອາດຈະບໍ່ຢາກລົມກັບລາວອີກ. ສະນັ້ນ ໃຫ້ບອກນັກສຶກສາທີ່ຈະເລົ່າສິ່ງທີ່ລາວຮຽນຈາກຄຳພີໄບເບິນໃນແບບທີ່ເປີດໂອກາດໄວ້ເພື່ອຈະລົມກັນຕໍ່ເທື່ອໜ້າໄດ້. (ກລຊ. 4:6) ບາງເທື່ອນັກສຶກສາອາດຈະບອກຄົນໃນຄອບຄົວໃຫ້ເຂົ້າໄປເບິ່ງເວັບໄຊ jw.org. ການເຮັດແບບນີ້ຈະຊ່ວຍຄົນໃນຄອບຄົວໃຫ້ຮຽນຮູ້ຫຼາຍຂຶ້ນກ່ຽວກັບພະຍານພະເຢໂຫວາດ້ວຍໂຕເອງ.
17. ເຈົ້າຈະຊ່ວຍນັກສຶກສາແນວໃດໃຫ້ຮູ້ວິທີຕອບຄຳຖາມຂອງຄົນທີ່ອາດເຂົ້າໃຈຜິດກ່ຽວກັບພະຍານພະເຢໂຫວາ? (ເບິ່ງຮູບນຳ)
17 ເຈົ້າອາດຈະໃຊ້ສ່ວນ “ຄຳຖາມທີ່ພົບເລື້ອຍໆກ່ຽວກັບພະຍານພະເຢໂຫວາ” ໃນເວັບໄຊ jw.org ເພື່ອຊ່ວຍນັກສຶກສາໃຫ້ກຽມຄຳຕອບແບບງ່າຍໆທີ່ຄົນໃນຄອບຄົວຫຼືຄົນຢູ່ບ່ອນເຮັດວຽກອາດຈະຖາມ. (2ຕມ. 2:24, 25) ໃນຕອນທ້າຍຂອງການສຶກສາແຕ່ລະບົດໃນປຶ້ມຊີວິດທີ່ມີຄວາມສຸກຕະຫຼອດໄປ! ໃຫ້ທົບທວນສ່ວນ “ບາງຄົນເວົ້າວ່າ “ ຫຼືສ່ວນ “ບາງຄົນອາດຖາມວ່າ.” ກະຕຸ້ນນັກສຶກສາໃຫ້ຝຶກຊ້ອມສ່ວນນີ້ເພື່ອໃຫ້ຮູ້ວິທີອະທິບາຍແບບທີ່ເປັນຄຳເວົ້າຂອງໂຕເອງ. ຖ້າຈຳເປັນ ໃຫ້ຊ່ວຍນັກສຶກສາຊອກວິທີອະທິບາຍໃນແບບທີ່ດີກວ່າ. ການຝຶກຊ້ອມແບບນີ້ກັບນັກສຶກສາຈະຊ່ວຍລາວໃຫ້ປົກປ້ອງຄວາມເຊື່ອຂອງໂຕເອງດ້ວຍຄວາມໝັ້ນໃຈ.
ໃຫ້ຊ່ວຍນັກສຶກສາໃຫ້ຮູ້ວິທີປະກາດໂດຍຝຶກຊ້ອມກັບລາວຕອນທີ່ສຶກສານຳກັນ (ເບິ່ງຂໍ້ 17) c
18. ເຈົ້າຈະກະຕຸ້ນນັກສຶກສາແນວໃດໃຫ້ເປັນຜູ້ປະກາດທີ່ຍັງບໍ່ຮັບບັບເຕມາ? (ມັດທາຍ 10:27)
18 ພະເຢຊູບອກພວກລູກສິດຂອງເພິ່ນໃຫ້ປະກາດຂ່າວດີໃຫ້ຄົນອື່ນຮູ້. (ອ່ານມັດທາຍ 10:27) ແຮ່ງນັກສຶກສາເລີ່ມປະກາດໄວເທົ່າໃດ ລາວກໍແຮ່ງຈະໄວ້ວາງໃຈພະເຢໂຫວາຫຼາຍຂຶ້ນ. ເຮົາຈະຊ່ວຍນັກສຶກສາແນວໃດໃຫ້ເຮັດຕາມເປົ້າໝາຍນີ້? ເມື່ອມີການປະກາດໃນປະຊາຄົມວ່າຈະມີໂຄງການປະກາດແບບພິເສດໃນໄລຍະການປະຊຸມອະນຸສອນຫຼືການປະຊຸມພາກ ກະຕຸ້ນນັກສຶກສາໃຫ້ຄິດເຖິງວິທີທີ່ລາວຈະສາມາດມີຄຸນສົມບັດທີ່ຈະເປັນຜູ້ປະກາດ. ໃຫ້ບອກນັກສຶກສາວ່າຕາມປົກກະຕິແລ້ວມັນງ່າຍກວ່າທີ່ຈະປະກາດໃນໄລຍະທີ່ມີໂຄງການພິເສດແບບນີ້. ນອກຈາກນັ້ນ ໃຫ້ກະຕຸ້ນນັກສຶກສາທີ່ຈະສະໝັກເປັນນັກຮຽນເພື່ອເຮັດສ່ວນໃນການປະຊຸມກາງອາທິດ. ເມື່ອເຮັດແບບນີ້ ລາວຈະຮຽນຮູ້ວິທີອະທິບາຍຄວາມເຊື່ອຂອງໂຕເອງໄດ້ດີຂຶ້ນ.
ເຮັດໃຫ້ນັກສຶກສາເຫັນວ່າເຈົ້າໝັ້ນໃຈໃນໂຕລາວ
19. ພະເຢຊູເຮັດໃຫ້ເຫັນແນວໃດວ່າເພິ່ນໝັ້ນໃຈໃນໂຕພວກລູກສິດ ແລະເຮົາຈະຮຽນແບບເພິ່ນແນວໃດ?
19 ກ່ອນພະເຢຊູຈະຕາຍ ເພິ່ນບອກພວກລູກສິດວ່າມີມື້ໜຶ່ງເຂົາເຈົ້າຈະໄດ້ຢູ່ກັບເພິ່ນອີກ. ພວກລູກສິດບໍ່ເຂົ້າໃຈທີ່ພະເຢຊູກຳລັງບອກວ່າເຂົາເຈົ້າຈະໄດ້ໄປສະຫວັນ. ເຖິງຈະເປັນແນວນັ້ນ ພະເຢຊູເບິ່ງທີ່ຄວາມພັກດີຂອງເຂົາເຈົ້າ ບໍ່ແມ່ນເບິ່ງເລື່ອງທີ່ເຂົາເຈົ້າສົງໄສ. (ຢຮ. 14:1-5, 8) ພະເຢຊູຮູ້ວ່າເຂົາເຈົ້າຕ້ອງການເວລາເພື່ອຈະເຂົ້າໃຈບາງເລື່ອງ ເຊັ່ນ: ເລື່ອງຄວາມຫວັງທີ່ຈະໄປສະຫວັນ. (ຢຮ. 16:12) ເຮົາກໍຄືກັນ ເຮົາຕ້ອງເຮັດໃຫ້ນັກສຶກສາເຫັນວ່າເຮົາຮູ້ວ່າລາວຢາກເຮັດໃຫ້ພະເຢໂຫວາພໍໃຈ.
ແຮ່ງນັກສຶກສາເລີ່ມປະກາດໄວເທົ່າໃດ ລາວກໍແຮ່ງຈະໄວ້ວາງໃຈພະເຢໂຫວາຫຼາຍຂຶ້ນ
20. ພີ່ນ້ອງຊິຟູນໂດ້ເຮັດໃຫ້ເຫັນແນວໃດວ່າລາວໝັ້ນໃຈໃນໂຕນັກສຶກສາ?
20 ເຮົາຕ້ອງຫວັງຢູ່ສະເໝີວ່ານັກສຶກສາຂອງເຮົາຢາກເຮັດສິ່ງທີ່ຖືກຕ້ອງ. ໃຫ້ເຮົາເບິ່ງຕົວຢ່າງຂອງພີ່ນ້ອງຍິງຊື່ຊິຟູນໂດ້ຈາກປະເທດມາລາວີ. ລາວເລີ່ມສຶກສາປຶ້ມຊີວິດທີ່ມີຄວາມສຸກຕະຫຼອດໄປ! ກັບຜູ້ຍິງໄວລຸ້ນຄົນໜຶ່ງຊື່ອາລີນາເຟທີ່ເປັນກາໂຕລິກ. ຫຼັງຈາກຮຽນຈົບບົດທີ 14 ພີ່ນ້ອງຊິຟູນໂດ້ຖາມນັກສຶກສາວ່າລາວຄິດແນວໃດກ່ຽວກັບການໃຊ້ຮູບບູຊາໃນການນະມັດສະການ. ອາລີນາເຟຮູ້ສຶກບໍ່ພໍໃຈຫຼາຍແລະຕອບວ່າ: “ມັນເປັນການເລືອກສ່ວນໂຕ.” ພີ່ນ້ອງຊິຟູນໂດ້ຄິດໃນໃຈວ່າອາລີນາເຟຊິເຊົາສຶກສາບໍ ແຕ່ລາວກໍອົດທົນສຶກສາກັບອາລີນາເຟຕໍ່ໄປໂດຍຫວັງວ່າຮອດຕອນໃດຕອນໜຶ່ງອາລີນາເຟຈະເຂົ້າໃຈວ່າການໃຊ້ຮູບບູຊາເປັນສິ່ງທີ່ຜິດ. ສອງສາມເດືອນຕໍ່ມາ ພີ່ນ້ອງຊິຟູນໂດ້ຖາມຄຳຖາມໃນບົດທີ 34 ທີ່ຖາມວ່າ: “ຕັ້ງແຕ່ເຈົ້າເລີ່ມຮຽນຄຳພີໄບເບິນແລະໄດ້ຮູ້ຈັກກັບພະເຢໂຫວາ ເຈົ້າໄດ້ຮັບປະໂຫຍດຫຍັງແດ່?” ພີ່ນ້ອງຊິຟູນໂດ້ເລົ່າໃຫ້ຟັງໃນສິ່ງທີ່ອາລີນາເຟຕອບ “ລາວເວົ້າເຖິງຫຼາຍຈຸດທີ່ດີ. ຈຸດໜຶ່ງແມ່ນພະຍານພະເຢໂຫວາບໍ່ເຮັດສິ່ງທີ່ຄຳພີໄບເບິນບອກວ່າຜິດ.” ຕໍ່ມາບໍ່ດົນ ອາລີນາເຟກໍເຊົານະມັດສະການຮູບບູຊາແລະມີຄຸນສົມບັດທີ່ຈະຮັບບັບເຕມາ.
21. ເຮົາຈະຊ່ວຍນັກສຶກສາແນວໃດໃຫ້ຕັດສິນໃຈຮັບໃຊ້ພະເຢໂຫວາ?
21 ເຖິງວ່າພະເຢໂຫວາເປັນ “ຜູ້ເຮັດໃຫ້ມັນໃຫຍ່” ແຕ່ເຮົາກໍມີໜ້າທີ່ຊ່ວຍນັກສຶກສາໃຫ້ກ້າວໜ້າ. (1ກຣ. 3:7) ເຮົາບໍ່ພຽງແຕ່ສອນນັກສຶກສາໃຫ້ເຮັດສິ່ງທີ່ພະເຢໂຫວາຕ້ອງການໃຫ້ລາວເຮັດເທົ່ານັ້ນ ແຕ່ເຮົາຊ່ວຍນັກສຶກສາໃຫ້ຮັກພະເຢໂຫວາຫຼາຍຂຶ້ນນຳ. ເຮົາຍັງກະຕຸ້ນລາວໃຫ້ສະແດງຄວາມຮັກຕໍ່ພະເຢໂຫວາໂດຍໃຫ້ເພິ່ນສຳຄັນທີ່ສຸດໃນຊີວິດຂອງລາວ. ນອກຈາກນັ້ນ ເຮົາຍັງສອນນັກສຶກສາໃຫ້ໄວ້ວາງໃຈພະເຢໂຫວາເມື່ອເຈິກັບການຕໍ່ຕ້ານ. ເມື່ອເຮົາເຮັດໃຫ້ນັກສຶກສາເຫັນວ່າເຮົາໝັ້ນໃຈໃນໂຕລາວ ເຮົາກໍຈະຊ່ວຍລາວໃຫ້ມີຄວາມຕັ້ງໃຈທີ່ຈະໃຊ້ຊີວິດໃນແບບທີ່ເຮັດໃຫ້ພະເຢໂຫວາພໍໃຈແລະເລືອກທີ່ຈະຮັບໃຊ້ເພິ່ນ.
ເພງທີ 55 ຢ່າຢ້ານພວກເຂົາເລີຍ!
a ສອງປີເຄິ່ງຫຼັງຈາກທີ່ນີໂກເດມໄປຫາພະເຢຊູ ລາວຍັງເປັນສະມາຊິກຂອງສານສູງຂອງຄົນຢິວຢູ່. (ຢຮ. 7:45-52) ນັກປະຫວັດສາດບາງຄົນຄິດວ່ານີໂກເດມເຂົ້າມາເປັນລູກສິດຂອງພະເຢຊູຫຼັງຈາກທີ່ເພິ່ນຕາຍແລ້ວ.—ຢຮ. 19:38-40
