ບົດຄວາມສຶກສາທີ 49
ພະເຢໂຫວາຈະຕອບຄຳອະທິດຖານຂອງຂ້ອຍບໍ?
“ພວກເຈົ້າຈະເອີ້ນເຮົາແລະຈະມາອະທິດຖານຫາເຮົາ ແລະເຮົາຈະຟັງພວກເຈົ້າ.”—ຢເຣ. 29:12
ເພງ 41 ຂໍຟັງຄຳອະທິດຖານຂອງເຮົາ
ໃຈຄວາມສຳຄັນ a
1-2. ເປັນຫຍັງເຮົາອາດຮູ້ສຶກວ່າພະເຢໂຫວາບໍ່ຕອບຄຳອະທິດຖານຂອງເຮົາ?
“ເຈົ້າຈະມີຄວາມຍິນດີຍ້ອນພະເຢໂຫວາ ແລະເພິ່ນຈະໃຫ້ທຸກສິ່ງຕາມທີ່ເຈົ້າຕ້ອງການ.” (ເພງ. 37:4, ລ.ມ) ນີ້ເປັນຄຳສັນຍາທີ່ຄັກແທ້ໆ! ແຕ່ເຮົາຊິຄາດໝາຍວ່າພະເຢໂຫວາຈະໃຫ້ທຸກສິ່ງຕາມທີ່ເຮົາຂໍທັນທີເລີຍບໍ? ເປັນຫຍັງຄຳຖາມນີ້ຈຶ່ງສຳຄັນ? ຂໍໃຫ້ເບິ່ງຕົວຢ່າງຕໍ່ໄປນີ້: ພີ່ນ້ອງຍິງຄົນໜຶ່ງອະທິດຖານຂໍໃຫ້ຖືກເຊີນເຂົ້າໂຮງຮຽນສຳລັບຜູ້ປະກາດລາຊະອານາຈັກ ແຕ່ຫຼາຍປີຜ່ານໄປລາວກໍຍັງບໍ່ຖືກເຊີນ. ພີ່ນ້ອງຊາຍທີ່ຍັງໜຸ່ມຄົນໜຶ່ງຂໍໃຫ້ພະເຢໂຫວາຊ່ວຍລາວໃຫ້ເຊົາຈາກຄວາມເຈັບປ່ວຍຮ້າຍແຮງເພື່ອລາວຈະຊ່ວຍວຽກໃນປະຊາຄົມໄດ້ຫຼາຍຂຶ້ນ ແຕ່ສຸຂະພາບຂອງລາວກໍບໍ່ດີຂຶ້ນເລີຍ. ພໍ່ແມ່ອະທິດຖານໃຫ້ລູກຢູ່ໃນຄວາມຈິງຕໍ່ໆໄປ ແຕ່ລູກພັດຕັດສິນໃຈເຊົາຮັບໃຊ້ພະເຢໂຫວາ.
2 ເຈົ້າກໍອາດເຄີຍຂໍບາງສິ່ງຈາກພະເຢໂຫວາ ແຕ່ຍັງບໍ່ທັນໄດ້ເທື່ອ. ເຈົ້າຈຶ່ງຄິດວ່າພະເຢໂຫວາຕອບຄຳອະທິດຖານຂອງຄົນອື່ນ ແຕ່ບໍ່ຕອບຄຳອະທິດຖານຂອງເຈົ້າ ຫຼືເຈົ້າອາດຄິດວ່າເຈົ້າຕ້ອງເຮັດບາງຢ່າງຜິດແຫຼະພະເຢໂຫວາຈຶ່ງບໍ່ຕອບ. ພີ່ນ້ອງເຈນິດສ໌ bຮູ້ສຶກແບບນັ້ນ. ລາວກັບຜົວອະທິດຖານບອກພະເຢໂຫວາວ່າຢາກໄປຮັບໃຊ້ຢູ່ເບເທນ. ລາວເວົ້າວ່າ: “ຂ້ອຍໝັ້ນໃຈວ່າເຮົາຈະໄດ້ໄປຮັບໃຊ້ຢູ່ເບເທນໄວໆ.” ແຕ່ຫຼາຍປີຜ່ານໄປ ເຂົາເຈົ້າກໍຍັງບໍ່ຖືກເຊີນ. ເຈນິດສ໌ເວົ້າວ່າ: “ຂ້ອຍຮູ້ສຶກເສຍໃຈແລະສັບສົນ. ຂ້ອຍສົງໄສວ່າຂ້ອຍເຮັດຫຍັງໃຫ້ພະເຢໂຫວາບໍ່ພໍໃຈບໍ. ຂ້ອຍອະທິດຖານຫຼາຍແທ້ໆວ່າຢາກໄປຮັບໃຊ້ຢູ່ເບເທນ ແຕ່ເປັນຫຍັງພະເຢໂຫວາຈຶ່ງບໍ່ຕອບຄຳອະທິດຖານຂອງຂ້ອຍ?”
3. ເຮົາຈະຮຽນຫຍັງໃນບົດຄວາມນີ້?
3 ບາງເທື່ອເຮົາອາດສົງໄສວ່າພະເຢໂຫວາຟັງຄຳອະທິດຖານຂອງເຮົາບໍ? ຜູ້ຮັບໃຊ້ບາງຄົນໃນສະໄໝແຕ່ກີ້ກໍສົງໄສແບບນັ້ນຄືກັນ. (ໂຢບ 30:20; ເພງ. 22:2; ຮບກ. 1:2) ສິ່ງໃດຈະຊ່ວຍໃຫ້ເຈົ້າໝັ້ນໃຈວ່າພະເຢໂຫວາຟັງຄຳອະທິດຖານຂອງເຈົ້າ? (ເພງ. 65:2) ເພື່ອຕອບຄຳຖາມນີ້ ເຮົາຈະເບິ່ງ 3 ຈຸດຕໍ່ໄປນີ້: (1) ພະເຢໂຫວາຈະເຮັດຫຍັງ? (2) ພະເຢໂຫວາຢາກໃຫ້ເຮົາເຮັດຫຍັງ? ແລະ (3) ເປັນຫຍັງເຮົາອາດຕ້ອງປັບຄຳຂໍບາງຢ່າງ?
ພະເຢໂຫວາຈະເຮັດຫຍັງ?
4. ຕາມເຢເຣມີ 29:12 ພະເຢໂຫວາສັນຍາວ່າຈະເຮັດຫຍັງ?
4 ພະເຢໂຫວາສັນຍາວ່າຈະຟັງຄຳອະທິດຖານຂອງເຮົາ. (ອ່ານເຢເຣມີ 29:12) ພະເຈົ້າຂອງເຮົາຮັກຜູ້ຮັບໃຊ້ຂອງເພິ່ນທີ່ສັດຊື່. ດັ່ງນັ້ນ ເພິ່ນຈະຟັງຄຳອະທິດຖານຂອງເຮົາສະເໝີ. (ເພງ. 10:17; 37:28) ແຕ່ກໍບໍ່ໄດ້ໝາຍຄວາມວ່າເພິ່ນຈະໃຫ້ທຸກຢ່າງຕາມທີ່ເຮົາຂໍ. ບາງເທື່ອເຮົາອາດລໍຖ້າຈົນຮອດໂລກໃໝ່ເພື່ອຈະໄດ້ສິ່ງທີ່ເຮົາຂໍ.
5. ພະເຢໂຫວາຄິດເຖິງຫຍັງຕອນທີ່ຟັງຄຳອະທິດຖານຂອງເຮົາ? ຂໍໃຫ້ອະທິບາຍ
5 ພະເຢໂຫວາເບິ່ງວ່າສິ່ງທີ່ເຮົາຂໍກ່ຽວຂ້ອງກັບຄວາມຕ້ອງການຂອງເພິ່ນແນວໃດ. (ອຊຢ. 55:8, 9) ສິ່ງໜຶ່ງທີ່ພະເຢໂຫວາຕ້ອງການແມ່ນໃຫ້ມີຄົນເຕັມໂລກນີ້ ແລະເຂົາເຈົ້າເຕັມໃຈເຊື່ອຟັງເພິ່ນໃນຖານະຜູ້ປົກຄອງ. ແຕ່ຊາຕານເວົ້າວ່າມະນຸດຈະມີຄວາມສຸກຫຼາຍກວ່າຖ້າເຂົາເຈົ້າປົກຄອງໂຕເອງ. (ປຖກ. 3:1-5) ເພື່ອພິສູດວ່າຊາຕານເວົ້າຕົວະ ພະເຢໂຫວາຍອມໃຫ້ມະນຸດປົກຄອງໂຕເອງ. ການທີ່ມະນຸດປົກຄອງໂຕເອງສ້າງບັນຫາຫຼາຍຢ່າງທີ່ເຮົາເຈິໃນທຸກມື້ນີ້. (ຜູ້ປ. 8:9) ເຮົາເຂົ້າໃຈວ່າພະເຢໂຫວາຈະບໍ່ກຳຈັດບັນຫາທຸກຢ່າງໃນຕອນນີ້. ຖ້າເພິ່ນເຮັດແນວນັ້ນ ບາງຄົນທີ່ບໍ່ເຊື່ອໃນພະເຈົ້າອາດຄິດວ່າມະນຸດກຳລັງເປັນຜູ້ແກ້ໄຂບັນຫາເຫຼົ່ານີ້. ເຂົາເຈົ້າຈະຄິດວ່າມະນຸດສາມາດປົກຄອງໄດ້ສຳເລັດ.
6. ເປັນຫຍັງເຮົາໝັ້ນໃຈໄດ້ວ່າພະເຢໂຫວາຈະເຮັດໃນສິ່ງທີ່ສະແດງເຖິງຄວາມຮັກແລະຍຸຕິທຳສະເໝີ?
6 ພະເຢໂຫວາອາດຕອບຄຳອະທິດຖານທີ່ຄ້າຍກັນໃນອີກແບບໜຶ່ງ. ຍົກຕົວຢ່າງ ຕອນທີ່ກະສັດເຮເຊກີຢາບໍ່ສະບາຍແຮງແລະໃກ້ຊິຕາຍ ລາວອະທິດຖານຂໍພະເຢໂຫວາຊ່ວຍລາວໃຫ້ເຊົາ. ພະເຢໂຫວາຕອບຄຳອະທິດຖານນັ້ນແລະປົວລາວໃຫ້ເຊົາ. (2ກສ. 20:1-6) ກົງກັນຂ້າມ ໂປໂລອ້ອນວອນພະເຢໂຫວາໃຫ້ກຳຈັດ “ໜາມຢູ່ໃນຮ່າງກາຍ” ຂອງລາວເຊິ່ງອາດແມ່ນບັນຫາເລື່ອງສຸຂະພາບ. ແຕ່ພະເຢໂຫວາກໍບໍ່ໄດ້ກຳຈັດບັນຫານັ້ນ. (2ກຣ. 12:7-9) ນອກຈາກນັ້ນ ໃຫ້ເບິ່ງເລື່ອງຂອງຢາໂກໂບກັບເປໂຕ ກະສັດເຮໂລດຢາກຂ້າເຂົາເຈົ້າ. ດັ່ງນັ້ນ ພີ່ນ້ອງໃນປະຊາຄົມໄດ້ອະທິດຖານເພື່ອເປໂຕ ແລະເຂົາເຈົ້າຄືຊິອະທິດຖານເພື່ອຢາໂກໂບນຳ. ຢາໂກໂບຖືກຂ້າ ແຕ່ທູດສະຫວັນພັດມາຊ່ວຍເປໂຕແບບອັດສະຈັນ. (ກຈກ. 12:1-11) ເຮົາອາດສົງໄສວ່າ: ‘ເປັນຫຍັງພະເຢໂຫວາຊ່ວຍເປໂຕ ແຕ່ຄືບໍ່ຊ່ວຍຢາໂກໂບ?’ ຄຳພີໄບເບິນບໍ່ໄດ້ເວົ້າເຖິງເລື່ອງນີ້. c ແຕ່ເຮົາໝັ້ນໃຈວ່າແນວທາງຂອງພະເຢໂຫວາ “ຍຸຕິທຳສະເໝີ.” (ພບຍ. 32:4) ເຮົາຮູ້ວ່າພະເຢໂຫວາຮັກເປໂຕແລະຢາໂກໂບ. (ພນມ. 21:14) ບາງເທື່ອພະເຢໂຫວາອາດຈະບໍ່ຕອບຄຳອະທິດຖານຂອງເຮົາໃນແບບທີ່ເຮົາຄິດໄວ້. ແຕ່ຍ້ອນເຮົາໝັ້ນໃຈວ່າພະເຢໂຫວາເຮັດສິ່ງທີ່ສະແດງເຖິງຄວາມຮັກແລະຍຸຕິທຳສະເໝີ. ເຮົາຈະບໍ່ສົງໄສໃນວິທີທີ່ເພິ່ນເລືອກຕອບຄຳອະທິດຖານຂອງເຮົາ.—ໂຢບ 33:13
7. ເຮົາຕ້ອງຫຼີກລ່ຽງໃນເລື່ອງໃດ ແລະຍ້ອນຫຍັງ?
7 ເຮົາຕ້ອງພະຍາຍາມຫຼີກລ່ຽງທີ່ຈະບໍ່ປຽບທຽບສະພາບການຂອງເຮົາກັບຂອງຄົນອື່ນ. ຕົວຢ່າງເຊັ່ນ: ເຮົາອາດຂໍພະເຢໂຫວາໃຫ້ຊ່ວຍເຮົາໃນແບບທີ່ເຈາະຈົງໃນເລື່ອງໃດເລື່ອງໜຶ່ງ ແຕ່ກໍບໍ່ໄດ້ຕາມທີ່ຂໍ. ຕໍ່ມາ ເຮົາພັດໄດ້ຍິນວ່າບາງຄົນອະທິດຖານຂໍໃນແບບດຽວກັນ ແຕ່ເບິ່ງຄືວ່າພະເຢໂຫວາຕອບຄຳອະທິດຖານຂອງຜູ້ນັ້ນ. ພີ່ນ້ອງແອນນາມີປະສົບການແບບນັ້ນ. ລາວອະທິດຖານໃຫ້ແມັດທິວຜົວຂອງລາວດີຂຶ້ນຈາກການເປັນມະເຮັງ. ໃນເວລາດຽວກັນ ພີ່ນ້ອງຍິງສູງອາຍຸ 2 ຄົນກໍເປັນມະເຮັງຄືກັນ. ແອນນາອະທິດຖານຢ່າງຈິງຈັງເພື່ອແມັດທິວແລະພີ່ນ້ອງ 2 ຄົນນັ້ນ. ສອງຄົນນັ້ນດີຂຶ້ນ ແຕ່ແມັດທິວພັດຕາຍ. ທຳອິດ ແອນນາສົງໄສວ່າພີ່ນ້ອງຍິງ 2 ຄົນນັ້ນດີຂຶ້ນຍ້ອນພະເຢໂຫວາຊ່ວຍເຂົາເຈົ້າບໍ. ຄັນຊັ້ນ ເປັນຫຍັງເພິ່ນບໍ່ຕອບຄຳອະທິດຖານຂອງລາວທີ່ຂໍໃຫ້ແມັດທິວດີຂຶ້ນ? ເຮົາບໍ່ຮູ້ວ່າພີ່ນ້ອງຍິງ 2 ຄົນນັ້ນດີຂຶ້ນໄດ້ແນວໃດ ແຕ່ເຮົາຮູ້ວ່າພະເຢໂຫວາຈະກຳຈັດຄວາມເຈັບປ່ວຍທຸກຢ່າງແບບຖາວອນ ແລະເພິ່ນຢາກປຸກໝູ່ຂອງເພິ່ນທີ່ຕາຍໄປແລ້ວໃຫ້ຟື້ນຄືນມາ.—ໂຢບ 14:15
8. (ກ) ຕາມເອຊາຢາ 43:2 ພະເຢໂຫວາຊ່ວຍເຮົາແນວໃດ? (ຂ) ການອະທິດຖານຊ່ວຍເຮົາແນວໃດ? (ເບິ່ງວິດີໂອການອະທິດຖານຊ່ວຍເຮົາຮັບມືກັບບັນຫາ)
8 ພະເຢໂຫວາຈະຊ່ວຍເຮົາສະເໝີ. ພະເຢໂຫວາພໍ່ທີ່ມີຄວາມຮັກບໍ່ຢາກໃຫ້ເຮົາເຈິຄວາມເຈັບປວດທໍລະມານ. (ອຊຢ. 63:9) ເພິ່ນບໍ່ໄດ້ປົກປ້ອງເຮົາໄວ້ຈາກບັນຫາຕ່າງໆທີ່ເປັນຄືກັບແມ່ນ້ຳຫຼືໄຟ. (ອ່ານເອຊາຢາ 43:2) ແຕ່ເພິ່ນສັນຍາວ່າຈະຊ່ວຍເຮົາໃຫ້ “ຍ່າງຂ້າມ [ແລະ] ຍ່າງລຸຍ” ມັນໄປໄດ້. ໃນຕອນນີ້ ບໍ່ວ່າເຮົາຈະເຈິກັບຄວາມຍາກລຳບາກແບບໃດກໍຕາມ ພະເຢໂຫວາຈະໃຫ້ພະລັງບໍລິສຸດກັບເຮົາເພື່ອຊ່ວຍເຮົາໃຫ້ຮັບໃຊ້ເພິ່ນຕໍ່ໄປໄດ້. (ລກ. 11:13; ຟລປ. 4:13) ເຮົາໝັ້ນໃຈໄດ້ວ່າພະເຢໂຫວາຈະໃຫ້ເຮົາມີສິ່ງທີ່ຈຳເປັນເພື່ອໃຫ້ເຮົາອົດທົນແລະຮັກສາຄວາມສັດຊື່ຕໍ່ໆໄປໄດ້. d
ພະເຢໂຫວາຢາກໃຫ້ເຮົາເຮັດຫຍັງ?
9. ຕາມຢາໂກໂບ 1:6, 7 ເປັນຫຍັງເຮົາໝັ້ນໃຈວ່າພະເຢໂຫວາຈະຊ່ວຍເຮົາ?
9 ພະເຢໂຫວາຢາກໃຫ້ເຮົາໄວ້ວາງໃຈເພິ່ນ. (ຮຣ. 11:6) ບາງເທື່ອເຮົາອາດຮູ້ສຶກວ່າບັນຫາທີ່ເຮົາເຈິມັນຍາກໂພດທີ່ຈະຮັບມືໄດ້. ເຮົາອາດເລີ່ມສົງໄສວ່າພະເຢໂຫວາຈະຊ່ວຍເຮົາຫຼືບໍ່. ຄຳພີໄບເບິນເຮັດໃຫ້ເຮົາໝັ້ນໃຈວ່າໂດຍພະລັງຂອງພະເຈົ້າ ເຮົາສາມາດ “ປີນຂ້າມກຳແພງໄດ້.” (ເພງ. 18:29, ລ.ມ) ແທນທີ່ຈະປ່ອຍໃຫ້ຄວາມສົງໄສແບບນັ້ນເພີ່ມຂຶ້ນ ເຮົາຄວນອະທິດຖານດ້ວຍຄວາມເຊື່ອແລະໝັ້ນໃຈວ່າພະເຢໂຫວາຈະຕອບຄຳອະທິດຖານຂອງເຮົາ.—ອ່ານຢາໂກໂບ 1:6, 7
10. ເຮົາຕ້ອງອອກຄວາມພະຍາຍາມແນວໃດຫຼັງຈາກອະທິດຖານຂໍໃຫ້ພະເຢໂຫວາຊ່ວຍ? ຂໍໃຫ້ຍົກຕົວຢ່າງ
10 ພະເຢໂຫວາຢາກໃຫ້ເຮົາເຮັດສອດຄ່ອງກັບຄຳອະທິດຖານຂອງເຮົາ. ຍົກຕົວຢ່າງ ພີ່ນ້ອງຊາຍຄົນໜຶ່ງອາດຂໍໃຫ້ພະເຢໂຫວາຊ່ວຍລາວໃຫ້ພັກວຽກໄດ້ເພື່ອເຂົ້າຮ່ວມການປະຊຸມພາກ. ພະເຢໂຫວາອາດຕອບຄຳອະທິດຖານຂອງລາວແນວໃດ? ພະເຢໂຫວາອາດຊ່ວຍລາວໃຫ້ກ້າທີ່ຈະລົມກັບຫົວໜ້າ. ແຕ່ລາວຍັງຕ້ອງໄປຫາຫົວໜ້າແລະຂໍລາພັກ. ລາວອາດຕ້ອງຂໍກັບຫົວໜ້າຫຼາຍເທື່ອ. ບາງເທື່ອລາວອາດຕ້ອງສະເໜີປ່ຽນມື້ເຮັດວຽກກັບຄົນອື່ນ. ຖ້າຈຳເປັນແທ້ໆລາວອາດຕ້ອງຂໍພັກວຽກໂດຍບໍ່ເອົາເງິນ.
11. ເປັນຫຍັງເຮົາຕ້ອງອະທິດຖານເລື້ອຍໆໃນເລື່ອງທີ່ເຮົາກັງວົນ?
11 ພະເຢໂຫວາຢາກໃຫ້ເຮົາອະທິດຖານຕໍ່ໆໄປໃນເລື່ອງທີ່ເຮົາກັງວົນ. (1ທຊ. 5:17) ພະເຢຊູບອກວ່າບາງສິ່ງທີ່ເຮົາຂໍຈະບໍ່ໄດ້ຮັບຄຳຕອບທັນທີ. (ລກ. 11:9) ດັ່ງນັ້ນ ຢ່າເຊົາອະທິດຖານ. ໃຫ້ອະທິດຖານຢ່າງຈິງຈັງແລະອະທິດຖານເລື້ອຍໆ. (ລກ. 18:1-7) ເມື່ອເຮົາອະທິດຖານຕໍ່ໆໄປໃນເລື່ອງໃດເລື່ອງໜຶ່ງ ເຮົາເຮັດໃຫ້ພະເຢໂຫວາເຫັນວ່າສິ່ງທີ່ເຮົາຂໍມັນສຳຄັນແທ້ໆຕໍ່ເຮົາ ແລະຍັງສະແດງໃຫ້ເຫັນວ່າເຮົາເຊື່ອວ່າພະເຢໂຫວາສາມາດຊ່ວຍເຮົາໄດ້.
ເປັນຫຍັງເຮົາອາດຕ້ອງປັບຄຳຂໍບາງຢ່າງ?
12. (ກ) ຄຳຖາມທີ່ເຮົາຄວນຖາມໂຕເອງໃນສິ່ງທີ່ເຮົາອະທິດຖານຂໍແມ່ນຫຍັງ? ແລະຍ້ອນຫຍັງຈຶ່ງຖາມແບບນັ້ນ? (ຂ) ເຮົາຈະແນ່ໃຈໄດ້ແນວໃດວ່າຄຳອະທິດຖານຂອງເຮົາສະແດງວ່າເຮົານັບຖືພະເຢໂຫວາ? (ເບິ່ງຂອບ “ ສິ່ງທີ່ຂ້ອຍຂໍສະແດງໃຫ້ເຫັນບໍວ່າຂ້ອຍນັບຖືພະເຢໂຫວາ?”)
12 ຖ້າເຮົາບໍ່ໄດ້ຮັບຄຳຕອບໃນສິ່ງທີ່ເຮົາອະທິດຖານຂໍ ໃຫ້ເຮົາຖາມໂຕເອງ 3 ຄຳຖາມ. ຄຳຖາມທີ 1 ແມ່ນ ‘ຂ້ອຍອະທິດຖານຂໍໃນສິ່ງທີ່ຖືກຕ້ອງບໍ?’ ຫຼາຍເທື່ອເຮົາຄິດວ່າເຮົາຮູ້ວ່າສິ່ງໃດດີທີ່ສຸດສຳລັບເຮົາ. ແຕ່ສິ່ງທີ່ເຮົາຂໍອາດບໍ່ແມ່ນສິ່ງທີ່ດີທີ່ສຸດສຳລັບເຮົາກໍໄດ້. ຖ້າເຮົາອະທິດຖານກ່ຽວກັບເລື່ອງໃດເລື່ອງໜຶ່ງ ມັນອາດຈະມີວິທີແກ້ໄຂທີ່ດີກວ່າສຳລັບເລື່ອງນັ້ນເມື່ອສົມທຽບກັບວິທີທີ່ເຮົາອະທິດຖານຂໍ. ບາງສິ່ງທີ່ເຮົາອະທິດຖານຂໍອາດບໍ່ສອດຄ່ອງກັບຄວາມຕ້ອງການຂອງພະເຢໂຫວາ. (1ຢຮ. 5:14) ໃຫ້ເຮົາຄິດເຖິງຕົວຢ່າງຂອງພໍ່ແມ່ທີ່ເວົ້າເຖິງກ່ອນໜ້ານີ້. ເຂົາເຈົ້າຂໍໃຫ້ພະເຢໂຫວາຊ່ວຍລູກຂອງເຂົາເຈົ້າໃຫ້ຮັບໃຊ້ເພິ່ນຕໍ່ໆໄປ. ເບິ່ງຄືວ່າເປັນຄຳຂໍທີ່ເໝາະສົມ ແຕ່ພະເຢໂຫວາຈະບໍ່ບັງຄັບເຮົາໃຫ້ຮັບໃຊ້ເພິ່ນ. ເພິ່ນຢາກໃຫ້ເຮົາແລະລູກຂອງເຮົາເລືອກຮັບໃຊ້ເພິ່ນເອງ. (ພບຍ. 10:12, 13; 30:19, 20) ພໍ່ແມ່ຄວນຂໍໃຫ້ພະເຢໂຫວາຊ່ວຍເຂົາເຈົ້າໃຫ້ເຂົ້າເຖິງຫົວໃຈຂອງລູກ ເພື່ອລູກຈະຖືກກະຕຸ້ນໃຫ້ຮັກພະເຢໂຫວາແລະເປັນໝູ່ກັບເພິ່ນ.—ສຸພາ. 22:6; ອຟຊ. 6:4
13. ຕາມເຮັບເຣີ 4:16 ພະເຢໂຫວາຈະຊ່ວຍເຮົາຕອນໃດ? ຂໍໃຫ້ອະທິບາຍ
13 ຄຳຖາມທີ 2 ແມ່ນ ‘ຮອດເວລາຂອງພະເຢໂຫວາແລ້ວບໍທີ່ຈະຕອບຄຳຂໍຂອງຂ້ອຍ?’ ເຮົາອາດຮູ້ສຶກວ່າເຮົາຕ້ອງການຄຳຕອບທັນທີໃນສິ່ງທີ່ເຮົາອະທິດຖານຂໍ. ທີ່ຈິງ ພະເຢໂຫວາຮູ້ວ່າຕອນໃດເປັນເວລາທີ່ດີທີ່ສຸດທີ່ຈະຊ່ວຍເຮົາ. (ອ່ານເຮັບເຣີ 4:16) ເມື່ອເຮົາບໍ່ໄດ້ຮັບຄຳຕອບທັນທີໃນສິ່ງທີ່ເຮົາຂໍ ເຮົາອາດຄິດວ່າຄຳຕອບຂອງພະເຢໂຫວາແມ່ນ ‘ບໍ່.’ ແຕ່ຄຳຕອບຂອງເພິ່ນອາດຈະແມ່ນ ‘ຍັງບໍ່ຮອດເວລາເທື່ອ.’ ໃຫ້ຄິດເຖິງພີ່ນ້ອງຊາຍທີ່ຍັງໜຸ່ມທີ່ໄດ້ອະທິດຖານຂໍໃຫ້ໂຕເອງເຊົາຈາກຄວາມເຈັບປ່ວຍ. ຖ້າພະເຢໂຫວາປົວລາວແບບອັດສະຈັນ ຊາຕານກໍຈະເວົ້າໃຫ້ວ່າພີ່ນ້ອງຜູ້ນີ້ຍັງຮັບໃຊ້ພະເຢໂຫວາກໍຍ້ອນວ່າພະເຢໂຫວາໄດ້ປົວລາວໃຫ້ເຊົາຈາກພະຍາດ. (ໂຢບ 1:9-11; 2:4) ທີ່ຈິງ ພະເຢໂຫວາໄດ້ຕັ້ງເວລາໄວ້ແລ້ວທີ່ຈະປົວຄວາມເຈັບປ່ວຍທຸກຢ່າງ. (ອຊຢ. 33:24; ພນມ. 21:3, 4) ແຕ່ຈົນກວ່າຈະຮອດຕອນນັ້ນ ເຮົາບໍ່ສາມາດຄາດໝາຍໃຫ້ພະເຢໂຫວາເຮັດການອັດສະຈັນເພື່ອປົວເຮົາໃຫ້ເຊົາຈາກຄວາມເຈັບປ່ວຍ. ພີ່ນ້ອງຊາຍຜູ້ນີ້ສາມາດຂໍໃຫ້ພະເຢໂຫວາຊ່ວຍລາວໃຫ້ມີຄວາມເຊື່ອທີ່ເຂັ້ມແຂງ ແລະມີຄວາມສະຫງົບໃຈທີ່ຈະອົດທົນຕໍ່ຄວາມເຈັບປ່ວຍຂອງໂຕເອງ ແລະຮັບໃຊ້ພະເຢໂຫວາຢ່າງສັດຊື່ຕໍ່ໆໄປ.—ເພງ. 29:11
14. ເຮົາຮຽນຫຍັງຈາກປະສົບການຂອງພີ່ນ້ອງເຈນິດສ໌
14 ຂໍໃຫ້ຄິດເຖິງປະສົບການຂອງພີ່ນ້ອງເຈນິດສ໌ທີ່ອະທິດຖານວ່າຢາກຮັບໃຊ້ຢູ່ເບເທນ. ຫຼັງຈາກ 5 ປີຜ່ານໄປ ລາວຈຶ່ງເຂົ້າໃຈວ່າພະເຢໂຫວາໄດ້ຕອບຄຳອະທິດຖານຂອງລາວໃນແບບທີ່ລາວບໍ່ຄາດຄິດ. ເຈນິດສ໌ເວົ້າວ່າ: “ພະເຢໂຫວາໃຊ້ເວລານັ້ນເພື່ອສອນແລະຫຼໍ່ຫຼອມຂ້ອຍ. ຂ້ອຍຕ້ອງຮຽນຮູ້ທີ່ຈະໄວ້ວາງໃຈພະເຢໂຫວາຫຼາຍຂຶ້ນ ແລະປັບປຸງນິດໄສການສຶກສາສ່ວນຕົວໃຫ້ດີຂຶ້ນ. ຂ້ອຍຕ້ອງຮຽນຮູ້ວ່າຂ້ອຍສາມາດມີຄວາມສຸກໄດ້ບໍ່ວ່າຈະຮັບໃຊ້ພະເຢໂຫວາຢູ່ໃສກໍຕາມ.” ຕໍ່ມາ ເຈນິດສ໌ກັບຜົວກໍຖືກເຊີນໃຫ້ຮັບໃຊ້ໃນວຽກໝວດ. ເມື່ອເບິ່ງຄືນຫຼັງ ເຈນິດສ໌ເວົ້າວ່າ: “ພະເຢໂຫວາໄດ້ຕອບຄຳອະທິດຖານຂອງຂ້ອຍໃນແບບທີ່ຂ້ອຍບໍ່ຄາດຄິດ. ຂ້ອຍຕ້ອງໃຊ້ເວລາໄລຍະໜຶ່ງເພື່ອຈະເຫັນວ່າຄຳຕອບຂອງພະເຢໂຫວາເປັນຂອງຂວັນທີ່ມີຄ່າຫຼາຍ. ຂ້ອຍຂອບໃຈແທ້ໆທີ່ມີໂອກາດໄດ້ສຳຜັດຄວາມຮັກແລະຄວາມເມດຕາຂອງເພິ່ນ.”
ຖ້າເຈົ້າຮູ້ສຶກວ່າພະເຢໂຫວາບໍ່ຕອບຄຳອະທິດຖານຂອງເຈົ້າ ໃຫ້ລອງອະທິດຖານຂໍແນວອື່ນແທນ (ເບິ່ງຂໍ້ 15) f
15. ເປັນຫຍັງບາງເທື່ອເຮົາບໍ່ຄວນອະທິດຖານແບບເຈາະຈົງຫຼາຍໂພດ? (ເບິ່ງຮູບ)
15 ຄຳຖາມທີ 3 ແມ່ນ ‘ຂ້ອຍຄວນອະທິດຖານຂໍແນວອື່ນແທນບໍ?’ ການອະທິດຖານແບບເຈາະຈົງເປັນສິ່ງທີ່ດີ ແຕ່ບາງເທື່ອມັນອາດຈະດີກວ່າທີ່ຈະບໍ່ເຈາະຈົງຫຼາຍໂພດເພື່ອເຮົາຈະເຫັນສິ່ງທີ່ພະເຢໂຫວາຢາກໃຫ້ເຮົາເຮັດ. ຂໍໃຫ້ຄິດເຖິງຕົວຢ່າງຂອງພີ່ນ້ອງຍິງທີ່ອະທິດຖານກ່ຽວກັບການເຂົ້າໂຮງຮຽນສຳລັບຜູ້ປະກາດລາຊະອານາຈັກ. ລາວຢາກເຂົ້າໂຮງຮຽນນັ້ນຍ້ອນຢາກໄປຮັບໃຊ້ຢູ່ບ່ອນທີ່ຈຳເປັນຫຼາຍກວ່າ. ໃນຂະນະທີ່ອະທິດຖານຕໍ່ໆໄປເພື່ອໃຫ້ຖືກເຊີນເຂົ້າໂຮງຮຽນນັ້ນ ລາວອາດຂໍໃຫ້ພະເຢໂຫວາຊ່ວຍລາວໃຫ້ຊອກທາງເລືອກອື່ນເພື່ອຮັບໃຊ້ເພິ່ນໃຫ້ຫຼາຍຂຶ້ນ. (ກຈກ. 16:9, 10) ຫຼັງຈາກອະທິດຖານກ່ຽວກັບເລື່ອງນີ້ ລາວອາດຖາມຜູ້ດູແລໝວດວ່າມີປະຊາຄົມທີ່ຢູ່ໃກ້ໆຕ້ອງການໄພໂອເນຍຕື່ມບໍ? ຫຼືລາວອາດຂຽນຈົດໝາຍໄປຖາມສຳນັກງານສາຂາວ່າມີບ່ອນໃດຕ້ອງການຜູ້ປະກາດຕື່ມບໍ? e
16. ເຮົາໝັ້ນໃຈໄດ້ໃນເລື່ອງໃດ?
16 ຄືກັບທີ່ເຮົາໄດ້ຮຽນແລ້ວ ເຮົາໝັ້ນໃຈໄດ້ວ່າພະເຢໂຫວາຈະຕອບຄຳອະທິດຖານຂອງເຮົາໃນວິທີທີ່ຍຸຕິທຳແລະສະແດງເຖິງຄວາມຮັກ. (ເພງ. 4:3; ອຊຢ. 30:18) ບາງເທື່ອເຮົາອາດບໍ່ໄດ້ຮັບຄຳຕອບຕາມທີ່ເຮົາຫວັງໄວ້. ແຕ່ພະເຢໂຫວາຟັງຄຳອະທິດຖານຂອງເຮົາແນ່ນອນ. ເພິ່ນຮັກເຮົາຫຼາຍ ແລະເພິ່ນຈະບໍ່ມີທາງປະຖິ້ມເຮົາ. (ເພງ. 9:10) ໃຫ້ເຮົາ “ໄວ້ໃຈເພິ່ນຕະຫຼອດເວລາ” ແລະລະບາຍຄວາມຮູ້ສຶກຂອງເຮົາກັບເພິ່ນໃນຄຳອະທິດຖານ.—ເພງ. 62:8, ລ.ມ
ເພງ 43 ຄຳອະທິດຖານຂອບໃຈ
a ບົດຄວາມນີ້ຈະອະທິບາຍເຫດຜົນທີ່ເຮົາໝັ້ນໃຈໄດ້ວ່າພະເຢໂຫວາຈະຕອບຄຳອະທິດຖານຂອງເຮົາສະເໝີໃນວິທີທີ່ຍຸຕິທຳແລະສະແດງເຖິງຄວາມຮັກ.
b ຊື່ສົມມຸດ
c ໃຫ້ເບິ່ງບົດຄວາມ “ເຈົ້າເຊື່ອວ່າວິທີການຂອງພະເຢໂຫວາດີສະເໝີບໍ? ໃນຫໍສັງເກດການ ເດືອນກຸມພາ 2022 ຂໍ້ 3-6.
d ສຳລັບຂໍ້ມູນເພີ່ມເຕີມກ່ຽວກັບວິທີທີ່ພະເຢໂຫວາຊ່ວຍເຮົາໃຫ້ອົດທົນກັບບັນຫາຕ່າງໆໄດ້ ໃຫ້ເບິ່ງວິດີໂອການອະທິດຖານຊ່ວຍເຮົາຮັບມືກັບບັນຫາ ໃນເວັບໄຊ jw.org.
e ສຳລັບຄຳແນະນຳຕ່າງໆກ່ຽວກັບການຮັບໃຊ້ຢູ່ບ່ອນອື່ນໃຫ້ເບິ່ງປຶ້ມລວບລວມເປັນອົງການເພື່ອເຮັດຕາມຄວາມປະສົງຂອງພະເຢໂຫວາ ບົດ 10 ຂໍ້ 6-9.
f ຄຳອະທິບາຍຮູບ: ພີ່ນ້ອງຍິງ 2 ຄົນອະທິດຖານກ່ອນຍື່ນໃບສະໝັກເຂົ້າໂຮງຮຽນສຳລັບຜູ້ປະກາດລາຊະອານາຈັກ. ຕໍ່ມາ ພີ່ນ້ອງຜູ້ໜຶ່ງຖືກເຊີນ ແຕ່ອີກຜູ້ໜຶ່ງບໍ່ຖືກເຊີນ. ແທນທີ່ຈະເສຍໃຈຫຼາຍ ພີ່ນ້ອງທີ່ບໍ່ຖືກເຊີນໃຫ້ເຂົ້າໂຮງຮຽນໄດ້ອະທິດຖານຂໍໃຫ້ພະເຢໂຫວາຊ່ວຍລາວໃຫ້ຊອກທາງເລືອກອື່ນທີ່ຈະຂະຫຍາຍວຽກປະກາດ. ຈາກນັ້ນ ລາວໄດ້ຂຽນຈົດໝາຍໄປຫາສຳນັກງານສາຂາເພື່ອບອກເຂົາເຈົ້າໃຫ້ຮູ້ວ່າລາວພ້ອມທີ່ຈະໄປຮັບໃຊ້ໃນບ່ອນທີ່ມີຄວາມຈຳເປັນຫຼາຍກວ່າ.
