ບົດຄວາມສຶກສາທີ 30
ໃຊ້ຊີວິດຕາມຄວາມຈິງຕໍ່ໆໄປ
“ສິ່ງທີ່ເຮັດໃຫ້ຂ້ອຍມີຄວາມສຸກຫຼາຍທີ່ສຸດກໍຄື ການໄດ້ຍິນວ່າພວກລູກຂອງຂ້ອຍຍັງໃຊ້ຊີວິດຕາມຄວາມຈິງ.”—3 ຢຮ. 4
ເພງ 54 “ທາງເສັ້ນນີ້ແຫຼະ”
ໃຈຄວາມສຳຄັນ *
1. ຕາມ 3 ໂຢຮັນ 3, 4 ອັນໃດເຮັດໃຫ້ເຮົາມີຄວາມສຸກ?
ລອງຄິດເບິ່ງດູວ່າອັກຄະສາວົກໂຢຮັນຈະຮູ້ສຶກດີໃຈຫຼາຍສ່ຳໃດເມື່ອໄດ້ຍິນວ່າຜູ້ທີ່ລາວຊ່ວຍໃຫ້ຮຽນຮູ້ຄວາມຈິງຍັງຮັບໃຊ້ພະເຢໂຫວາຢ່າງສັດຊື່. ເຂົາເຈົ້າມີບັນຫາຫຼາຍຢ່າງ ແຕ່ໂຢຮັນກໍພະຍາຍາມຫຼາຍທີ່ຈະຊ່ວຍເຂົາເຈົ້າໃຫ້ມີຄວາມເຊື່ອທີ່ເຂັ້ມແຂງເພາະລາວເບິ່ງວ່າເຂົາເຈົ້າເປັນຄືກັບລູກ. ຄ້າຍຄືກັນເຮົາກໍຮູ້ສຶກດີໃຈເມື່ອເຫັນວ່າລູກຂອງເຮົາບໍ່ວ່າຈະເປັນລູກແທ້ໆຫຼືຜູ້ທີ່ເຮົາຊ່ວຍໃຫ້ຮຽນຮູ້ຄວາມຈິງໄດ້ອຸທິດຕົວໃຫ້ພະເຢໂຫວາແລະຮັບໃຊ້ພະອົງຕໍ່ໆໄປ.—ອ່ານ 3 ໂຢຮັນ 3, 4
2. ໂຢຮັນຂຽນຈົດໝາຍເພື່ອຫຍັງ?
2 ໃນປີ ຄ.ສ. 98 ໂຢຮັນອາດຈະຍ້າຍໄປທີ່ເມືອງເອເຟໂຊຫຼືຢູ່ແຖວໆເມືອງນັ້ນ ຫຼັງຈາກທີ່ລາວຖືກປ່ອຍອອກຈາກຄຸກທີ່ຢູ່ໃນເກາະປັດໂມ ແລະໃນປີນັ້ນພະລັງບໍລິສຸດຂອງພະເຢໂຫວາໄດ້ດົນໃຈໃຫ້ລາວຂຽນຈົດໝາຍສາມສະບັບເຖິງຄລິດສະຕຽນທີ່ສັດຊື່ເພື່ອຊ່ວຍເຂົາເຈົ້າໃຫ້ຮັກສາຄວາມເຊື່ອໃນພະເຢຊູ ແລະໃຊ້ຊີວິດຕາມຄວາມຈິງຕໍ່ໆໄປ.
3. ເຮົາຈະຕອບຄຳຖາມຫຍັງແດ່?
3 ໂຢຮັນເປັນອັກຄະສາວົກຄົນສຸດທ້າຍທີ່ຍັງມີຊີວິດຢູ່ ແລະລາວກໍເປັນຫ່ວງວ່າຄຳສອນຂອງພວກທີ່ທໍລະຍົດພະເຈົ້າຈະສົ່ງຜົນຕໍ່ພີ່ນ້ອງໃນປະຊາຄົມ. * (1 ຢຮ. 2:18, 19, 26) ເຂົາເຈົ້າອ້າງວ່າຮູ້ຈັກພະເຈົ້າ ແຕ່ເຂົາເຈົ້າບໍ່ໄດ້ເຮັດຕາມຄຳສອນຂອງພະອົງ. ໃນບົດຄວາມນີ້ເຮົາຈະມາເບິ່ງຄຳແນະນຳທີ່ໂຢຮັນໃຫ້ ແລະເຮົາຈະຕອບສາມຄຳຖາມເຫຼົ່ານີ້ຄື: ການໃຊ້ຊີວິດຕາມຄວາມຈິງໝາຍຄວາມວ່າແນວໃດ? ອັນໃດອາດຂັດຂວາງເຮົາບໍ່ໃຫ້ໃຊ້ຊີວິດຕາມຄວາມຈິງ? ແລະເຮົາຈະຊ່ວຍຄົນອື່ນໃຫ້ໃຊ້ຊີວິດຕາມຄວາມຈິງຕໍ່ໆໄປໄດ້ແນວໃດ?
ການໃຊ້ຊີວິດຕາມຄວາມຈິງໝາຍຄວາມວ່າແນວໃດ?
4. ຕາມ 1 ໂຢຮັນ 2:3-6; 2 ໂຢຮັນ 4, 6 ເຮົາຕ້ອງເຮັດຫຍັງເພື່ອຈະໃຊ້ຊີວິດຕາມຄວາມຈິງ?
4 ເພື່ອຈະໃຊ້ຊີວິດຕາມຄວາມຈິງເຮົາຕ້ອງຮູ້ຈັກຄວາມຈິງໃນຄຳພີໄບເບິນ. ນອກຈາກນັ້ນ ເຮົາຕ້ອງເຮັດຕາມຄຳສັ່ງຂອງພະເຢໂຫວານຳ. (ອ່ານ 1 ໂຢຮັນ 2:3-6; 2 ໂຢຮັນ 4, 6) ພະເຢຊູເປັນຕົວຢ່າງທີ່ສົມບູນແບບໃນການເຊື່ອຟັງພະເຢໂຫວາ ດັ່ງນັ້ນ ວິທີໜຶ່ງທີ່ດີທີ່ສຸດທີ່ເຮົາຈະເຊື່ອຟັງພະເຢໂຫວາກໍໂດຍການເຮັດຕາມຕົວຢ່າງຂອງພະເຢຊູໃຫ້ຫຼາຍທີ່ສຸດເທົ່າທີ່ຈະເຮັດໄດ້.—ຢຮ. 8:29; 1 ປຕ. 2:21
5. ເຮົາຕ້ອງໝັ້ນໃຈໃນເລື່ອງຫຍັງ?
5 ເພື່ອຈະໃຊ້ຊີວິດຕາມຄວາມຈິງຕໍ່ໆໄປເຮົາຕ້ອງໝັ້ນໃຈວ່າ ທຸກສິ່ງທີ່ພະເຢໂຫວາບອກເຮົາໃນຄຳພີໄບເບິນເປັນຄວາມຈິງ ແລະເຮົາກໍຕ້ອງໝັ້ນໃຈວ່າພະເຢຊູເປັນເມຊີອາຕາມທີ່ບອກໄວ້. ໃນທຸກມື້ນີ້ ຫຼາຍຄົນບໍ່ເຊື່ອວ່າພະເຢຊູຖືກແຕ່ງຕັ້ງໃຫ້ເປັນກະສັດໃນການປົກຄອງຂອງພະເຈົ້າ. ໂຢຮັນເຕືອນວ່າຈະມີ “ຄົນຫຼອກລວງຫຼາຍຄົນ” ເຊິ່ງຈະຫຼອກຄົນທີ່ບໍ່ໄດ້ໝັ້ນໃຈໃນຄວາມຈິງກ່ຽວກັບພະເຢໂຫວາແລະພະເຢຊູ. (2 ຢຮ. 7-11) ໂຢຮັນບອກວ່າ “ແມ່ນຜູ້ໃດທີ່ເວົ້າຕົວະ? ກໍແມ່ນຜູ້ທີ່ປະຕິເສດວ່າພະເຢຊູເປັນພະຄລິດ.” (1 ຢຮ. 2:22) ວິທີດຽວທີ່ເຮົາຈະບໍ່ຖືກຫຼອກກໍຄືການສຶກສາຄຳພີໄບເບິນ ເພາະຖ້າເຮົາເຮັດແບບນັ້ນເຮົາກໍຈະຮູ້ຈັກພະເຢໂຫວາແລະພະເຢຊູ (ຢຮ. 17:3) ແລະນີ້ຈະຊ່ວຍໃຫ້ເຮົາໝັ້ນໃຈວ່າສິ່ງທີ່ເຮົາໄດ້ຮຽນຈາກຄຳພີໄບເບິນເປັນຄວາມຈິງ.
ອັນໃດຂັດຂວາງເຮົາບໍ່ໃຫ້ໃຊ້ຊີວິດຕາມຄວາມຈິງ?
6. ສິ່ງໜຶ່ງທີ່ຂັດຂວາງຄລິດສະຕຽນທີ່ເປັນໄວໜຸ່ມບໍ່ໃຫ້ໃຊ້ຊີວິດຕາມຄວາມຈິງແມ່ນຫຍັງ?
6 ຄລິດສະຕຽນທຸກຄົນຕ້ອງລະວັງທີ່ຈະບໍ່ຖືກຫຼອກດ້ວຍຄຳສອນຂອງມະນຸດ. (1 ຢຮ. 2:26) ໂດຍສະເພາະແມ່ນຄລິດສະຕຽນທີ່ເປັນໄວໜຸ່ມຕ້ອງລະວັງເປັນພິເສດ. ພີ່ນ້ອງອາເລັກເຊຍ * ອາຍຸ 25 ປີທີ່ເປັນຄົນຝຣັ່ງບອກວ່າ “ຕອນທີ່ຢູ່ໂຮງຮຽນຂ້ອຍໄດ້ຮຽນກ່ຽວກັບທິດສະດີວິວັດທະນາການແລະຫຼັກປັດຊະຍາຂອງມະນຸດ ເຊິ່ງຄວາມຄິດເຫຼົ່ານີ້ເຮັດໃຫ້ຂ້ອຍຮູ້ສຶກສັບສົນ. ບາງເທື່ອຄຳສອນເຫຼົ່ານັ້ນກໍຟັງຂຶ້ນຢູ່ໄດ໋ ແຕ່ຂ້ອຍກໍຮູ້ສຶກວ່າມັນບໍ່ຖືກທີ່ຈະເຊື່ອທຸກຢ່າງທີ່ອາຈານສອນໂດຍບໍ່ໄດ້ເບິ່ງວ່າຄຳພີໄບເບິນບອກແນວໃດ.” ບໍ່ເທົ່າໃດອາທິດຕໍ່ມາລາວກໍເຊົາສົງໄສເພາະລາວໄດ້ສຶກສາປຶ້ມຊີວິດ—ເກີດຂຶ້ນມາແນວໃດ? ໂດຍວິວັດທະນາການຫຼືມີຜູ້ສ້າງ? ລາວບອກວ່າ “ຂ້ອຍໄດ້ພິສູດດ້ວຍຕົວເອງວ່າຄຳສອນໃນຄຳພີໄບເບິນເປັນຄວາມຈິງ ແລະຮູ້ວ່າການໃຊ້ຊີວິດຕາມຄຳສອນນັ້ນໄດ້ເຮັດໃຫ້ຂ້ອຍສະບາຍໃຈແລະມີຄວາມສຸກ.”
7. ເຮົາຕ້ອງລະວັງທີ່ຈະບໍ່ເຮັດຫຍັງ ແລະຍ້ອນຫຍັງ?
7 ຄລິດສະຕຽນທຸກຄົນບໍ່ວ່າຈະອາຍຸຫຼາຍຫຼືໜ້ອຍກໍຕ້ອງລະວັງທີ່ຈະບໍ່ໃຊ້ຊີວິດແບບຕີສອງໜ້າ. ໂຢຮັນບອກວ່າ ເຮົາບໍ່ສາມາດໃຊ້ຊີວິດຕາມຄວາມຈິງໄດ້ຖ້າຍັງໃຊ້ຊີວິດແບບຜິດສິນລະທຳຢູ່. (1 ຢຮ. 1:6) ຖ້າເຮົາຢາກໃຫ້ພະເຢໂຫວາພໍໃຈເຮົາໃນຕອນນີ້ແລະອະນາຄົດ ເຮົາຕ້ອງຈື່ໄວ້ສະເໝີວ່າພະເຢໂຫວາເຫັນທຸກຢ່າງທີ່ເຮົາຄິດແລະເຮັດ ແລະບໍ່ມີຫຍັງທີ່ຈະເປັນຄວາມລັບຕໍ່ພະເຢໂຫວາ.—ຮຣ. 4:13
8. ເຮົາຕ້ອງປະຕິເສດຫຍັງ?
8 ເຮົາຕ້ອງປະຕິເສດມຸມມອງຂອງຄົນໃນໂລກໃນເລື່ອງບາບ. ອັກຄະສາວົກໂຢຮັນບອກວ່າ “ຖ້າພວກເຮົາບອກວ່າ ພວກເຮົາບໍ່ມີບາບ ພວກເຮົາກໍຕົວະຕົວເອງ.” (1 ຢຮ. 1:8) ໃນສະໄໝຂອງໂຢຮັນ ພວກທີ່ທໍລະຍົດພະເຈົ້າບອກວ່າ ຄົນເຮົາສາມາດເປັນໝູ່ກັບພະເຈົ້າໄດ້ເຖິງວ່າຈະເຮັດບາບກໍຕາມ. ໃນປັດຈຸບັນຫຼາຍຄົນກໍຄິດແບບນີ້ຄືກັນ. ເຂົາເຈົ້າບອກວ່າເຊື່ອໃນພະເຈົ້າ ແຕ່ເຂົາເຈົ້າບໍ່ໄດ້ເຮັດຕາມມຸມມອງຂອງພະເຢໂຫວາໃນເລື່ອງບາບ ໂດຍສະເພາະກ່ຽວກັບເລື່ອງເພດ. ສິ່ງທີ່ພະເຢໂຫວາບອກວ່າຜິດ ເຂົາເຈົ້າພັດບອກວ່າບໍ່ຜິດແລະເປັນສິດຂອງເຂົາເຈົ້າທີ່ຈະເຮັດແບບນັ້ນ.
ພີ່ນ້ອງທີ່ເປັນໄວໜຸ່ມ ຂໍໃຫ້ເຈົ້າເຮັດໃຫ້ຄວາມເຊື່ອຂອງເຈົ້າເຂັ້ມແຂງຂຶ້ນເພື່ອຈະຮູ້ວ່າອັນໃດຖືກອັນໃດຜິດ ແລ້ວເຈົ້າຈະປົກປ້ອງຄວາມເຊື່ອຂອງເຈົ້າໄດ້. (ເບິ່ງຂໍ້ 9) *
9. ເປັນຫຍັງຄລິດສະຕຽນທີ່ເປັນໄວລຸ້ນຄວນເຮັດຕາມຫຼັກການໃນຄຳພີໄບເບິນ?
9 ຄລິດສະຕຽນທີ່ເປັນໄວລຸ້ນອາດຮູ້ສຶກກົດດັນຈາກໝູ່ຢູ່ໂຮງຮຽນຫຼືຢູ່ບ່ອນເຮັດວຽກໃຫ້ມີມຸມມອງແບບດຽວກັບເຂົາເຈົ້າ. ເລື່ອງນີ້ເກີດຂຶ້ນກັບອາເລັກຊັນເດີ ລາວບອກວ່າ “ຜູ້ຍິງບາງຄົນທີ່ຢູ່ໃນໂຮງຮຽນພະຍາຍາມກົດດັນຂ້ອຍໃຫ້ໄປນອນນຳໂດຍທ້າວ່າ ຖ້າຂ້ອຍບໍ່ໄດ້ເຮັດແບບນັ້ນກໍສະແດງວ່າຂ້ອຍເປັນເກ.” ຖ້າເຈົ້າເຈິສະຖານະການແບບນີ້ຂໍໃຫ້ຈື່ໄວ້ວ່າ ເມື່ອເຈົ້າເຮັດຕາມຄຳສອນໃນຄຳພີໄບເບິນເຈົ້າຈະມີຄວາມນັບຖືຕົວເອງ ມີສຸຂະພາບທີ່ດີທາງຮ່າງກາຍແລະຈິດໃຈ ແລະຍັງເປັນໝູ່ທີ່ດີກັບພະເຢໂຫວາ ແລະທຸກຄັ້ງທີ່ເຮົາປະຕິເສດການລໍ້ໃຈມັນກໍງ່າຍຂຶ້ນທີ່ເຮົາຈະເຮັດສິ່ງທີ່ຖືກຕ້ອງ. ຂໍໃຫ້ຈື່ໄວ້ວ່າແທ້ໆແລ້ວມຸມມອງຂອງຄົນໃນໂລກໃນເລື່ອງເພດມາຈາກຊາຕານ. ດັ່ງນັ້ນ ເມື່ອເຈົ້າບໍ່ເຮັດຕາມຄວາມຄິດຂອງຄົນໃນໂລກນີ້ ເຈົ້າກໍ “ຊະນະຊາຕານຕົວຊົ່ວຮ້າຍ.”—1 ຢຮ. 2:14
10. 1 ໂຢຮັນ 1:9 ຊ່ວຍເຮົາແນວໃດໃຫ້ຮັບໃຊ້ພະເຢໂຫວາໂດຍບໍ່ຮູ້ສຶກຜິດ?
10 ເຮົາຮູ້ວ່າພະເຢໂຫວາມີສິດທີ່ຈະບອກວ່າອັນໃດຖືກອັນໃດຜິດ ແລະເຮົາກໍພະຍາຍາມໃຫ້ດີທີ່ສຸດທີ່ຈະບໍ່ເຮັດຜິດ. ແຕ່ເມື່ອເຮົາເຮັດຜິດເຮົາກໍຕ້ອງສາລະພາບບາບກັບພະເຢໂຫວາໃນຄຳອະທິດຖານ. (ອ່ານ 1 ໂຢຮັນ 1:9) ແລະຖ້າເຮົາເຮັດຜິດຮ້າຍແຮງເຮົາກໍຕ້ອງຂໍຄວາມຊ່ວຍເຫຼືອຈາກຜູ້ດູແລ ເຊິ່ງເປັນຜູ້ທີ່ພະເຢໂຫວາແຕ່ງຕັ້ງໃຫ້ເບິ່ງແຍງເຮົາ. (ຢກບ. 5:14-16) ແຕ່ເຮົາກໍບໍ່ຄວນຮູ້ສຶກຜິດຫຼາຍເກີນໄປກັບຄວາມຜິດໃນອະດີດ. ຍ້ອນຫຍັງ? ກໍຍ້ອນວ່າພະເຢໂຫວາຮັກເຮົາ ພະອົງຈຶ່ງໄດ້ຈັດໃຫ້ມີຄ່າໄຖ່ເພື່ອຈະໃຫ້ອະໄພບາບເຮົາ. ເມື່ອພະເຢໂຫວາບອກວ່າພະອົງໃຫ້ອະໄພຄົນທີ່ເຮັດຜິດທີ່ກັບໃຈ ພະອົງກໍເຮັດແບບນັ້ນແທ້ໆ. ດັ່ງນັ້ນ ພະເຢໂຫວາສາມາດຊ່ວຍເຮົາໃຫ້ຮັບໃຊ້ພະອົງໂດຍບໍ່ຮູ້ສຶກຜິດໄດ້.—1 ຢຮ. 2:1, 2, 12; 3:19, 20
11. ເຮົາຈະປົກປ້ອງຕົວເອງແນວໃດຈາກຄຳສອນຕົວະ?
11 ເຮົາຕ້ອງປະຕິເສດຄຳສອນຂອງພວກທີ່ທໍລະຍົດພະເຈົ້າ. ຕັ້ງແຕ່ເລີ່ມມີປະຊາຄົມຄລິດສະຕຽນຊາຕານກໍພະຍາຍາມໃຊ້ຄວາມຄິດຕ່າງໆເພື່ອຫຼອກລວງຜູ້ຮັບໃຊ້ທີ່ສັດຊື່ຂອງພະເຈົ້າ. ດັ່ງນັ້ນ ເຮົາຕ້ອງແຍກໃຫ້ອອກວ່າອັນໃດເປັນເລື່ອງຈິງແລະອັນໃດເປັນເລື່ອງຕົວະ. * ສັດຕູຂອງເຮົາອາດຈະໃຊ້ອິນເຕີເນັດຫຼືສື່ສັງຄົມອອນລາຍເພື່ອພະຍາຍາມເຮັດໃຫ້ເຮົາບໍ່ເຊື່ອໝັ້ນໃນພະເຢໂຫວາແລະພີ່ນ້ອງຂອງເຮົາ. ຂໍໃຫ້ເຮົາຢ່າເຊື່ອຄຳຕົວະເຫຼົ່ານັ້ນທີ່ມາຈາກຊາຕານ!—1 ຢຮ. 4:1, 6; ພນມ. 12:9
12. ເປັນຫຍັງເຮົາຄວນເຊື່ອໝັ້ນໃນຄວາມຈິງທີ່ເຮົາໄດ້ຮຽນຮູ້?
12 ເພື່ອຈະຕ້ານທານການໂຈມຕີຂອງຊາຕານ ເຮົາຕ້ອງເຊື່ອໃນພະເຢຊູແລະເຊື່ອວ່າພະເຢໂຫວາໃຊ້ພະເຢຊູມາເພື່ອເຮັດຕາມຄວາມຕ້ອງການຂອງພະອົງ ແລະເຮົາຍັງຕ້ອງເຊື່ອວ່າພະເຢໂຫວາໃຊ້ອົງການຂອງພະອົງເພື່ອຊີ້ນຳເຮົາໃນທຸກມື້ນີ້. (ມທ. 24:45-47) ເພື່ອເຮົາຈະມີຄວາມເຊື່ອແບບນັ້ນເຮົາຕ້ອງສຶກສາຄຳພີໄບເບິນເປັນປະຈຳ ແລ້ວຄວາມເຊື່ອຂອງເຮົາກໍຈະເປັນຄືກັບຕົ້ນໄມ້ທີ່ມີຮາກເລິກລົງໄປໃນດິນ. ໂປໂລກໍເວົ້າຄ້າຍໆກັນນີ້ເມື່ອລາວຂຽນເຖິງພີ່ນ້ອງໃນປະຊາຄົມໂກໂລຊາຍໂດຍບອກວ່າ “ເມື່ອພວກເຈົ້າຍອມຮັບພະເຢຊູຄລິດຜູ້ເປັນນາຍແລ້ວ ກໍໃຫ້ໃຊ້ຊີວິດແບບເພິ່ນຕໍ່ໆໄປ . . . ພວກເຈົ້າຈະໄດ້ເປັນຄືຕົ້ນໄມ້ໃຫຍ່ທີ່ມີຮາກເລິກໃນດິນ.” (ກລຊ. 2:6, 7) ຖ້າເຮົາພະຍາຍາມເຮັດໃຫ້ຄວາມເຊື່ອເຂັ້ມແຂງ ຊາຕານແລະຜູ້ທີ່ຢູ່ຝ່າຍມັນກໍຈະບໍ່ສາມາດຂັດຂວາງເຮົາບໍ່ໃຫ້ໃຊ້ຊີວິດຕາມຄວາມຈິງໄດ້.—2 ຢຮ. 8, 9
13. ເຮົາຄາດໝາຍວ່າຈະຕ້ອງເຈິຫຍັງ ແລະຍ້ອນຫຍັງ?
13 ເຮົາຄາດໝາຍໄດ້ເລີຍວ່າໂລກຈະກຽດຊັງເຮົາ. (1 ຢຮ. 3:13) ໂຢຮັນບອກວ່າ “ໂລກທັງໝົດຢູ່ໃນອຳນາດຊາຕານຕົວຊົ່ວຮ້າຍ.” (1 ຢຮ. 5:19) ແຮ່ງລະບົບຂອງໂລກນີ້ໃກ້ຈະເຖິງຈຸດຈົບຫຼາຍເທົ່າໃດ ຊາຕານກໍແຮ່ງໃຈຮ້າຍຫຼາຍຂຶ້ນເລື້ອຍໆ. (ພນມ. 12:12) ຊາຕານບໍ່ພຽງແຕ່ໃຊ້ການຜິດສິນລະທຳທາງເພດ ແລະຄຳຕົວະຂອງພວກທີ່ທໍລະຍົດພະເຈົ້າເພື່ອໂຈມຕີເຮົາທາງອ້ອມ ແຕ່ມັນຍັງຂົ່ມເຫງເຮົາເຊິ່ງເປັນການໂຈມຕີແບບເຊິ່ງໆໜ້ານຳ. ຊາຕານຮູ້ວ່າເວລາຂອງມັນຍັງແຕ່ໜ້ອຍດຽວ ມັນຈຶ່ງພະຍາຍາມຂັດຂວາງວຽກປະກາດແລະເຮັດໃຫ້ຄວາມເຊື່ອຂອງເຮົາອ່ອນລົງ. ດັ່ງນັ້ນ ເຮົາຈຶ່ງບໍ່ແປກໃຈທີ່ວຽກປະກາດໃນບາງປະເທດຖືກສັ່ງຫ້າມ ແຕ່ພີ່ນ້ອງຂອງເຮົາທີ່ຢູ່ໃນປະເທດເຫຼົ່ານັ້ນກໍຍັງປະກາດຕໍ່ໆໄປ. ນີ້ສະແດງວ່າ ບໍ່ວ່າຊາຕານຈະຂັດຂວາງເຮົາຫຼາຍປານໃດກໍ່ຕາມ ເຮົາກໍຍັງສາມາດຮັບໃຊ້ພະເຢໂຫວາຢ່າງສັດຊື່ໄດ້!
ຊ່ວຍຄົນອື່ນໃຫ້ໃຊ້ຊີວິດຕາມຄວາມຈິງຕໍ່ໆໄປ
14. ເຮົາຈະຊ່ວຍພີ່ນ້ອງໃຫ້ໃຊ້ຊີວິດຕາມຄວາມຈິງຕໍ່ໆໄປໂດຍວິທີໃດ?
14 ເພື່ອຈະຊ່ວຍພີ່ນ້ອງຂອງເຮົາໃຫ້ໃຊ້ຊີວິດຕາມຄວາມຈິງຕໍ່ໆໄປ ເຮົາຕ້ອງສະແດງຄວາມເຫັນອົກເຫັນໃຈ. (1 ຢຮ. 3:10, 11, 16-18) ເຮົາຕ້ອງສະແດງຄວາມຮັກຕໍ່ພີ່ນ້ອງບໍ່ພຽງແຕ່ຕອນທີ່ສະດວກສະບາຍ ແຕ່ຕອນທີ່ເຂົາເຈົ້າຫຍຸ້ງຍາກລຳບາກນຳ ເຊັ່ນ: ເຈົ້າຮູ້ຈັກບາງຄົນທີ່ສູນເສຍຄົນທີ່ຮັກແລະຕ້ອງການກຳລັງໃຈຫຼືຄວາມຊ່ວຍເຫຼືອບໍ? ຫຼືເຈົ້າໄດ້ຍິນວ່າພີ່ນ້ອງບາງຄົນໄດ້ຮັບຄວາມເສຍຫາຍຈາກໄພທຳມະຊາດແລະຕ້ອງການໃຫ້ຊ່ວຍສ້າງຫໍປະຊຸມໃໝ່ຫຼືສ້າງເຮືອນໃໝ່ບໍ? ເຮົາສະແດງໃຫ້ເຫັນວ່າເຮົາຮັກແລະເຫັນອົກເຫັນໃຈພີ່ນ້ອງບໍ່ພຽງແຕ່ທາງຄຳເວົ້າເທົ່ານັ້ນ ແຕ່ໂດຍການກະທຳນຳ.
15. ຕາມ 1 ໂຢຮັນ 4:7, 8 ເຮົາຕ້ອງເຮັດຫຍັງ?
15 ເຮົາຮຽນແບບພະເຢໂຫວາເມື່ອສະແດງຄວາມຮັກຕໍ່ຄົນອື່ນໆ. (ອ່ານ 1 ໂຢຮັນ 4:7, 8) ວິທີໜຶ່ງທີ່ສະແດງວ່າເຮົາຮັກກໍຄືການໃຫ້ອະໄພກັນ. ຕົວຢ່າງ: ບາງຄົນອາດເຮັດໃຫ້ເຮົາເສຍໃຈແລະມາຂໍໂທດຕາມຫຼັງ ເຮົາຈະສະແດງຄວາມຮັກໂດຍໃຫ້ອະໄພລາວແລະລືມສິ່ງທີ່ລາວເຮັດບໍ? (ກລຊ. 3:13) ພີ່ນ້ອງຊາຍທີ່ຊື່ ອໍໂດ ກໍເຈິເລື່ອງແບບນີ້ຄືກັນ ລາວຮູ້ສຶກເສຍໃຈທີ່ພີ່ນ້ອງຊາຍທີ່ລາວນັບຖືເວົ້າບໍ່ດີກ່ຽວກັບຊາດຂອງລາວ. ອໍໂດບອກວ່າ “ຂ້ອຍອະທິດຖານເຖິງພະເຢໂຫວາເລື້ອຍໆເພື່ອຊ່ວຍຂ້ອຍບໍ່ໃຫ້ຄຽດໃຫ້ພີ່ນ້ອງຜູ້ນັ້ນ.” ແທນທີ່ອໍໂດຈະຄຽດ ລາວໄດ້ຊວນພີ່ນ້ອງຜູ້ນັ້ນອອກໄປປະກາດນຳກັນ. ຕອນທີ່ເຂົາເຈົ້າຢູ່ນຳກັນອໍໂດກໍໄດ້ບອກວ່າລາວຮູ້ສຶກແນວໃດຕໍ່ສິ່ງທີ່ພີ່ນ້ອງຄົນນັ້ນເວົ້າ. ອໍໂດບອກວ່າ “ເມື່ອພີ່ນ້ອງຄົນນັ້ນຮູ້ວ່າຂ້ອຍຮູ້ສຶກເສຍໃຈ ລາວກໍຂໍໂທດຂ້ອຍ. ຈາກນ້ຳສຽງທີ່ລາວເວົ້າ ຂ້ອຍຮູ້ເລີຍວ່າລາວເສຍໃຈແທ້ໆຕໍ່ສິ່ງທີ່ລາວໄດ້ເວົ້າໄປ. ສຸດທ້າຍເຮົາກໍກັບມາເປັນໝູ່ທີ່ດີຕໍ່ກັນອີກ ແລະຂ້ອຍກໍລືມເລື່ອງນັ້ນໄປເລີຍ.”
16-17. ເຮົາຄວນຕັ້ງໃຈທີ່ຈະເຮັດຫຍັງ?
16 ອັກຄະສາວົກໂຢຮັນຮັກພີ່ນ້ອງຫຼາຍ ແລະຢາກໃຫ້ເຂົາເຈົ້າມີຄວາມເຊື່ອທີ່ເຂັ້ມແຂງ. ຄວາມຮັກແລະຄວາມຫ່ວງໃຍທີ່ລາວມີຕໍ່ພີ່ນ້ອງເຫັນໄດ້ແຈ້ງຈາກຄຳແນະນຳທີ່ລາວໃຫ້ເຂົາເຈົ້າເຊິ່ງຢູ່ໃນຈົດໝາຍສາມສະບັບ. ນີ້ໃຫ້ເຮົາຮູ້ສຶກອົບອຸ່ນໃຈຫຼາຍແທ້ໆທີ່ຮູ້ວ່າພີ່ນ້ອງເຫຼົ່ານັ້ນເຊິ່ງຈະໄດ້ຮ່ວມປົກຄອງກັບພະເຢຊູໃນສະຫວັນຮັກແລະເປັນຫ່ວງເຮົາຄືກັນກັບໂຢຮັນ!—1 ຢຮ. 2:27
17 ຂໍໃຫ້ເຮົາເຮັດຕາມຄຳແນະນຳທີ່ເຮົາໄດ້ຮຽນໃນບົດຄວາມນີ້ໂດຍ ຕັ້ງໃຈໃຊ້ຊີວິດຕາມຄວາມຈິງ ແລະເຊື່ອຟັງພະເຢໂຫວາໃນທຸກແງ່ມຸມຂອງຊີວິດ. ສຶກສາຄຳພີໄບເບິນ ແລະໝັ້ນໃຈໃນສິ່ງທີ່ໄດ້ຮຽນ ສ້າງຄວາມເຊື່ອໃນພະເຢຊູ ປະຕິເສດຄຳສອນຂອງມະນຸດແລະຄຳສອນຂອງພວກທີ່ທໍລະຍົດພະເຈົ້າ ບໍ່ໃຊ້ຊີວິດແບບຕີສອງໜ້າ ແລະບໍ່ຍອມແພ້ຕໍ່ການລໍ້ໃຈທີ່ໃຫ້ເຮັດຜິດ. ໃຊ້ຊີວິດຕາມມາດຕະຖານດ້ານສິນລະທຳຂອງພະເຢໂຫວາ ແລະຊ່ວຍພີ່ນ້ອງໃຫ້ໃຊ້ຊີວິດຕາມຄວາມຈິງຕໍ່ໆໄປໂດຍຊ່ວຍເຫຼືອເຂົາເຈົ້າໃນຍາມທີ່ຍາກລຳບາກ ແລະໃຫ້ອະໄພຖ້າເຂົາເຈົ້າເຮັດໃຫ້ເຮົາເສຍໃຈ. ເມື່ອເຮົາເຮັດແບບນັ້ນ ບໍ່ວ່າເຮົາຈະມີບັນຫາແບບໃດໃນຊີວິດກໍຕາມ ເຮົາກໍຈະຍັງໃຊ້ຊີວິດຕາມຄວາມຈິງຕໍ່ໆໄປ.
ເພງ 49 ເຮັດໃຫ້ພະເຢໂຫວາພໍໃຈ
^ ຂໍ້ 5 ເຮົາມີຊີວິດຢູ່ໃນໂລກທີ່ຊາຕານປົກຄອງເຊິ່ງມັນເປັນພໍ່ຂອງການຕົວະ. ດັ່ງນັ້ນ ຈຶ່ງເປັນເລື່ອງຍາກທີ່ເຮົາຈະໃຊ້ຊີວິດຕາມຄວາມຈິງ. ຄລິດສະຕຽນທີ່ມີຊີວິດໃນຕອນທ້າຍສະຕະວັດທຳອິດກໍມີບັນຫາແບບດຽວກັນນີ້. ພະເຢໂຫວາໄດ້ດົນໃຈໃຫ້ອັກຄະສາວົກໂຢຮັນຂຽນຈົດໝາຍສາມສະບັບເພື່ອຊ່ວຍເຂົາເຈົ້າແລະຊ່ວຍເຮົານຳ. ໃນຈົດໝາຍເຫຼົ່ານັ້ນຈະຊ່ວຍເຮົາໃຫ້ຮູ້ວ່າສິ່ງໃດອາດຂັດຂວາງເຮົາບໍ່ໃຫ້ໃຊ້ຊີວິດຕາມຄວາມຈິງ ແລະເຮົາຈະແກ້ໄຂບັນຫານັ້ນໄດ້ແນວໃດ.
^ ຂໍ້ 3 ເບິ່ງຂອບ “ ເປັນຫຍັງໂຢຮັນຈຶ່ງຂຽນຈົດໝາຍເຫຼົ່ານີ້.”
^ ຂໍ້ 6 ບາງຊື່ເປັນຊື່ສົມມຸດ.
^ ຂໍ້ 11 ເບິ່ງບົດຄວາມສຶກສາຊື່ເລື່ອງ “ເຈົ້າມີມູນຄວາມຈິງທີ່ເຊື່ອຖືໄດ້ບໍ?” ໃນຫໍສັງເກດການ ສິງຫາ 2018.
^ ຂໍ້ 59 ຄຳອະທິບາຍຮູບພາບ: ຕອນທີ່ຢູ່ໂຮງຮຽນ ພີ່ນ້ອງຍິງຄົນໜຶ່ງມັກຈະໄດ້ຍິນແລະໄດ້ເຫັນວ່າການຮັກຮ່ວມເພດເປັນເລື່ອງທຳມະດາ. (ໃນບາງປະເທດສີຂອງສາຍຮຸ້ງມັກໃຊ້ເປັນສັນຍະລັກເຖິງການຮັກຮ່ວມເພດ.) ຕໍ່ມາລາວໄດ້ໃຊ້ເວລາສຶກສາຄົ້ນຄວ້າເພື່ອຈະໝັ້ນໃຈວ່າສິ່ງທີ່ໄດ້ຮຽນຈາກຄຳພີໄບເບິນເປັນຄວາມຈິງ. ນີ້ໄດ້ຊ່ວຍລາວໃຫ້ຮັບມືກັບເລື່ອງນີ້ໄດ້.
