ພວກອ້າຍກຽດຊັງໂຍເຊບ
ບົດ 21
ພວກອ້າຍກຽດຊັງໂຍເຊບ
ຈົ່ງເບິ່ງຊາຍຫນຸ່ມນີ້ທີ່ມີໜ້າເສົ້າໃຈແລະໝົດຫວັງຫຼາຍພຽງໃດ. ຜູ້ນີ້ຄືໂຍເຊບ. ພວກອ້າຍເຂົາຫາກໍ່ຂາຍໂຍເຊບໃຫ້ແກ່ຄົນເຫຼົ່ານີ້ທີ່ພວມເດີນທາງຈະໄປອີຢີບ. ໂຍເຊບຈະຕ້ອງຕົກເປັນທາດ. ເປັນຫຍັງພວກອ້າຍຕ່າງແມ່ຈຶ່ງໄດ້ເຮັດສິ່ງຊົ່ວເຊັ່ນນີ້? ກໍ່ເພາະພວກເຂົາອິດສາໂຍເຊບ.
ຍາໂຄບພໍ່ຂອງພວກເຂົາຮັກແພງໂຍເຊບຫຼາຍອີ່ຫຼີ. ພໍ່ສະແດງຄວາມຮັກແພງຕໍ່ໂຍເຊບຫຼາຍເຖິງກັບຈັດໃຫ້ຫຍິບເສື້ອຄຸມຍາວຕົວງາມໃຫ້ແກ່ເຂົາ. ເມື່ອພວກອ້າຍສິບຄົນເຫັນວ່າຍາໂຄບຮັກໂຍເຊບຫຼາຍປານນັ້ນ ເຂົາກໍ່ເລີ່ມອິດສາແລະກຽດຊັງໂຍເຊບ. ແຕ່ກໍ່ມີສາຍເຫດອີກຢ່າງນຶ່ງທີ່ເຮັດໃຫ້ເຂົາກຽດຊັງໂຍເຊບ.
ໂຍເຊບໄດ້ນອນຫຼັບຝັນສອງເທື່ອ. ໃນຄວາມຝັນທັງສອງເທື່ອຂອງໂຍເຊບພວກອ້າຍໄດ້ກົ້ມຕົວລົງໄຫວ້ເຂົາ. ເມື່ອໂຍເຊບເລົ່າໃຫ້ພວກອ້າຍຟັງເຖິງຄວາມຝັນເຫຼົ່ານີ້ ເຂົາກໍ່ຍິ່ງກຽດຊັງໂຍເຊບຫຼາຍຂຶ້ນ.
ມື້ນຶ່ງເມື່ອພວກອ້າຍຂອງໂຍເຊບພວມລ້ຽງຝູງແກະຂອງພໍ່ຢູ່ ຍາໂຄບໄດ້ຂໍໃຫ້ໂຍເຊບໄປເບິ່ງວ່າພວກອ້າຍຂອງເຂົາເປັນຢ່າງໃດ. ເມື່ອພວກອ້າຍຂອງໂຍເຊບແລເຫັນເຂົາພວມຍ່າງມາ ບາງຄົນບອກວ່າ: ‘ໃຫ້ເຮົາຂ້າມັນເສຍ!’ ແຕ່ອ້າຍກົກຊື່ລູເບນບອກວ່າ: ‘ບໍ່ ຢ່າເຮັດຢ່າງນັ້ນ!’ ແທນທີ່ຈະຂ້າ ເຂົາຄວ້າໂຍເຊບແລະໂຍນຖິ້ມລົງໃນບໍ່ນ້ຳແຫ້ງ. ແລ້ວເຂົາກໍ່ພາກັນນັ່ງລົງເພື່ອຕົກລົງກັນວ່າຈະເຮັດຢ່າງໃດກັບເຂົາ.
ປະມານເວລານີ້ພໍດີຄົນຊາດຍິດມາເອນກໍ່ກາຍມາທາງນັ້ນ. ຢູດາກ່າວແກ່ພວກອ້າຍຕ່າງແມ່ວ່າ: ‘ໃຫ້ເຮົາຂາຍນ້ອງໃຫ້ພວກຍິດມາເອນນີ້ເຖີດ.’ ແລະພວກເຂົາຈຶ່ງໄດ້ເຮັດເຊັ່ນນັ້ນ. ເຂົາຂາຍໂຍເຊບເປັນເງິນ 20 ແຜ່ນ. ນັ້ນຊ່າງເປັນການກະທຳທີ່ໜ້າໂຫດຮ້າຍແລະໄຮ້ຄວາມເມດຕາອີ່ຫຼີ!
ພວກອ້າຍຈະບອກພໍ່ຂອງຕົນວ່າຢ່າງໃດ? ເຂົາຂ້າແບ້ຫຼືແພະເຖິກຕົວນຶ່ງແລະເອົາເສື້ອຄຸມຍາວງາມຂອງໂຍເຊບຈຸ່ມແລ້ວຈຸ່ມອີກລົງໄປໃນເລືອດແພະ. ຄັນແລ້ວເຂົາກໍ່ເອົາເສື້ອຄຸມນັ້ນກັບບ້ານໄປໃຫ້ຍາໂຄບພໍ່ຂອງເຂົາແລະບອກວ່າ: ‘ເຮົາພົບເສື້ອຕົວນີ້ ຂໍພໍ່ເບິ່ງວ່າແມ່ນເສື້ອຂອງໂຍເຊບຫຼືບໍ?’
ຍາໂຄບກວດເບິ່ງເສື້ອນັ້ນແລ້ວກໍ່ເຫັນວ່າແມ່ນ. ເຂົາຈຶ່ງສົ່ງສຽງຮ້ອງຂຶ້ນວ່າ: ‘ສັດຮ້າຍຄົງໄດ້ຂ້າໂຍເຊບແນ່.’ ແລະນັ້ນຄືສິ່ງທີ່ພວກອ້າຍຂອງໂຍເຊບຢາກໃຫ້ພໍ່ຄິດເຊັ່ນນັ້ນ. ຍາໂຄບເສົ້າເສຍໃຈຫຼາຍແທ້ໆ. ເຂົາຮ້ອງໄຫ້ຢູ່ຫຼາຍມື້. ແຕ່ໂຍເຊບບໍ່ໄດ້ຕາຍດອກ. ໃຫ້ເຮົາເບິ່ງຕໍ່ໄປວ່າ ມີຫຍັງເກີດຂຶ້ນກັບເຂົາໃນທີ່ຊຶ່ງເຂົາຖືກພາຕົວໄປ.
