ການຂ້າມແມ່ນ້ຳຢູລະເດນ
ບົດ 45
ການຂ້າມແມ່ນ້ຳຢູລະເດນ
ເບິ່ງ! ຊົນຍິດສະລາເອນພວມຂ້າມແມ່ນ້ຳຢູລະເດນແດ່! ແຕ່ນ້ຳຫາຍໄປໃສໝົດ? ເພາະວ່າໃນລະດູນີ້ມີຝົນຕົກຫຼາຍ ພຽງແຕ່ສອງສາມນາທີເທົ່ານັ້ນກ່ອນໜ້ານີ້ແມ່ນ້ຳຍັງເຕັມຝັ່ງຢູ່. ແຕ່ບັດນີ້ນ້ຳຫາຍໄປໝົດ! ແລະຊົນຍິດສະລາເອນພວມຍ່າງຂ້າມໄປເທິງດິນແຫ້ງ ແບບດຽວກັນກັບທີ່ເຄີຍເກີດຂຶ້ນເມື່ອຂ້າມນ້ຳທະເລແດງ! ນ້ຳທັງໝົດນີ້ຫາຍໄປໃສ? ໃຫ້ເຮົາເບິ່ງຕໍ່ໄປ.
ເມື່ອເຖິງເວລາທີ່ຊົນຍິດສະລາເອນຈະຂ້າມແມ່ນ້ຳຢູລະເດນ ພະເຢໂຫວາໃຫ້ໂຢຊວຍບອກກັບຜູ້ຄົນດັ່ງນີ້ວ່າ: ‘ພວກປະໂລຫິດຈະຫາມຫີບແຫ່ງຄຳສັນຍາໄປກ່ອນໜ້າພວກເຮົາ. ເມື່ອເຂົາເອົາຕີນຂອງເຂົາກ້າວລົງໃນແມ່ນ້ຳຢູລະເດນ ແລ້ວນ້ຳກໍ່ຈະຢຸດໄຫຼ.’
ພວກປະໂລຫິດຈຶ່ງຍົກຫີບແຫ່ງຄຳສັນຍາຫາມໄປກ່ອນໜ້າຜູ້ຄົນ. ເມື່ອເຂົາມາເຖິງແມ່ນ້ຳຢູລະເດນພວກປະໂລຫິດກໍ່ກ້າວລົງໄປໃນນ້ຳ. ເວລານັ້ນນ້ຳໄຫຼແຮງແລະເລິກຫຼາຍ. ແຕ່ທັນທີທັນໃດທີ່ຕີນຂອງເຂົາແຕະຕ້ອງນ້ຳ ນ້ຳກໍ່ຄ່ອຍໆຢຸດໄຫຼ! ນີ້ເປັນການອັດສະຈັນແທ້ໆ! ພະເຢໂຫວາໄດ້ກັ້ນນ້ຳບໍ່ໃຫ້ໄຫຼມາ. ສະນັ້ນໃນບໍ່ດົນແມ່ນ້ຳບໍ່ມີນ້ຳເຫຼືອຢູ່ອີກເລີຍ!
ພວກປະໂລຫິດຜູ້ທີ່ຫາມຫີບແຫ່ງຄຳສັນຍາກໍ່ຍ່າງອອກໄປຢືນຢູ່ກາງແມ່ນ້ຳທີ່ແຫ້ງແລ້ວ. ເຈົ້າເຫັນເຂົາໃນຮູບນີ້ບໍ? ຂະນະທີ່ເຂົາຢືນຢູ່ນະທີ່ນັ້ນ ຊົນຍິດສະລາເອນທັງໝົດກໍ່ຍ່າງຂ້າມແມ່ນ້ຳຢູລະເດນໄປເທິງດິນແຫ້ງ!
ເມື່ອທຸກຄົນຂ້າມໄປແລ້ວ ພະເຢໂຫວາໃຫ້ໂຢຊວຍບອກຜູ້ຊາຍທີ່ແຂງແຮງ 12 ຄົນວ່າ: ‘ຈົ່ງເຂົ້າໄປໃນແມ່ນ້ຳບ່ອນທີ່ພວກປະໂລຫິດຢືນຫາມຫີບແຫ່ງຄຳສັນຍາຢູ່. ຈົ່ງເກັບເອົາຫີນ 12 ກ້ອນແລ້ວເອົາມາກອງຂຶ້ນໄວ້ນະທີ່ພວກເຈົ້າທັງຫຼາຍຈະຢຸດພັກຄ່ຳຄືນນີ້. ແລ້ວໃນອະນາຄົດເມື່ອລູກຫຼານຂອງເຈົ້າຖາມວ່າຫີນເຫຼົ່ານີ້ໝາຍເຖິງອັນໃດ ເຈົ້າຈະບອກເຂົາວ່າຂະນະທີ່ຫາມຫີບແຫ່ງຄຳສັນຍາຂອງພະເຢໂຫວາຂ້າມແມ່ນ້ຳຢູລະເດນໄປນັ້ນນ້ຳກໍ່ຢຸດໄຫຼ. ກ້ອນຫີນເຫຼົ່ານີ້ຈະເຮັດໃຫ້ເຈົ້າລະລຶກເຖິງການອັດສະຈັນນີ້!’ ໂຢຊວຍໄດ້ເອົາຫີນ 12 ກ້ອນກອງວາງໄວ້ບ່ອນທີ່ພວກປະໂລຫິດເຄີຍຢືນທີ່ກາງແມ່ນ້ຳນັ້ນດ້ວຍ.
ໃນທີ່ສຸດໂຢຊວຍບອກພວກປະໂລຫິດທີ່ຫາມຫີບແຫ່ງຄຳສັນຍາວ່າ: ‘ຈົ່ງຂຶ້ນມາຈາກແມ່ນ້ຳຢູລະເດນ.’ ແລະໃນທັນໃດທີ່ພວກເຂົາຂຶ້ນມາ ແມ່ນ້ຳກໍ່ເລີ່ມໄຫຼກັບມາອີກຄືເດີມ.
