ບົດທີ 47
ພະເຢໂຫວາຊ່ວຍເອລີຢາໃຫ້ມີກຳລັງເຂັ້ມແຂງ
ລາຊີນີເຢເຊເບນໃຈຮ້າຍຫຼາຍເມື່ອຮູ້ວ່າຜູ້ພະຍາກອນຂອງພະບາອານຖືກຂ້າຕາຍໝົດແລ້ວ. ລາວໃຫ້ຄົນໄປບອກເອລີຢາວ່າ: ‘ມື້ອື່ນເຈົ້າຈະຕ້ອງຕາຍຄືກັບພວກຜູ້ພະຍາກອນຂອງພະບາອານ.’ ເອລີຢາຢ້ານຫຼາຍ ລາວຈຶ່ງໜີໄປບ່ອນກັນດານ. ລາວອະທິດຖານວ່າ: ‘ພະເຢໂຫວາເອີ້ຍ ລູກບໍ່ໄຫວແລ້ວ ປ່ອຍໃຫ້ລູກຕາຍສະ.’ ແລ້ວເອລີຢາກໍນອນຫຼັບຢູ່ກ້ອງຕົ້ນໄມ້ຍ້ອນວ່າເມື່ອຍແຮງ.
ມີທູດສະຫວັນອົງໜຶ່ງມາປຸກລາວແລະເວົ້າກັບລາວແບບອ່ອນໂຍນວ່າ: “ລຸກມາກິນເຂົ້າແມ້.” ເອລີຢາແນມເຫັນເຂົ້າຈີ່ມົນໆກ້ອນໜຶ່ງຢອງຢູ່ເທິງກ້ອນຫີນທີ່ຮ້ອນໆແລະມີນ້ຳໂຖໜຶ່ງຢູ່ນຳ. ລາວລຸກຂຶ້ນມາກິນແລ້ວກໍໄປນອນຕໍ່. ທູດສະຫວັນມາປຸກລາວອີກເທື່ອໜຶ່ງແລະເວົ້າວ່າ: ‘ກິນອີກແມ້ເພື່ອເຈົ້າຊິມີແຮງ ຍ້ອນເຈົ້າຕ້ອງເດີນທາງອີກໄກ.’ ເອລີຢາຈຶ່ງລຸກຂຶ້ນມາກິນອີກ. ຫຼັງຈາກນັ້ນ ລາວກໍເດີນທາງຕໍ່ໄປອີກ 40 ມື້ 40 ຄືນຈົນຮອດພູເຮັບໂຣນ. ເອລີຢາເຂົ້າໄປນອນຢູ່ໃນຖ້ຳ ແຕ່ພະເຢໂຫວາຖາມລາວວ່າ: “ເອລີຢາ ເຈົ້າມາເຮັດຫຍັງຢູ່ນີ້?” ລາວຕອບວ່າ: ‘ພວກອິດສະຣາເອນບໍ່ເຮັດຕາມສັນຍາທີ່ເຮັດກັບພະອົງ. ເຂົາເຈົ້າມ້າງແທ່ນບູຊາຂອງພະອົງແລະຂ້າຜູ້ພະຍາກອນຂອງພະອົງ. ຕອນນີ້ເຂົາເຈົ້າກໍກຳລັງຊອກຂ້າລູກຄືກັນ.’
ພະເຢໂຫວາບອກລາວວ່າ: ‘ໃຫ້ອອກຈາກຖ້ຳແລະໄປຢືນຢູ່ພູ.’ ທຳອິດ ມີລົມພາຍຸພັດບັກແຮງໆຜ່ານຖ້ຳໄປ ຕໍ່ມາກໍມີແຜ່ນດິນໄຫວ ແລ້ວກໍມີໄຟລຸກບັກແຮງໆ. ສຸດທ້າຍ ເອລີຢາໄດ້ຍິນສຽງເວົ້າຄ່ອຍໆແລະນຸ້ມນວນ. ລາວເອົາເສື້ອມາບັງໜ້າໄວ້ແລະອອກໄປຢືນຢູ່ປາກຖ້ຳ. ແລ້ວພະເຢໂຫວາຖາມລາວວ່າມາເຮັດຫຍັງຢູ່ນີ້. ເອລີຢາຕອບວ່າ: ‘ຕອນນີ້ເຫຼືອແຕ່ລູກຄົນດຽວ.’ ແຕ່ພະເຢໂຫວາບອກລາວວ່າ: ‘ເຈົ້າບໍ່ໄດ້ຢູ່ໂຕຄົນດຽວ. ຍັງມີອີກ 7.000 ຄົນໃນອິດສະຣາເອນທີ່ນະມັດສະການເຮົາ. ໃຫ້ເຈົ້າແຕ່ງຕັ້ງເອລີຊາເປັນຜູ້ພະຍາກອນແທນເຈົ້າ.’ ເອລີຢາເຮັດຕາມທີ່ພະເຢໂຫວາບອກທັນທີ. ເຈົ້າຄິດວ່າພະເຢໂຫວາຈະຊ່ວຍເຈົ້າຄືກັນບໍຖ້າເຈົ້າເຮັດສິ່ງທີ່ເພິ່ນບອກ? ເພິ່ນຈະຊ່ວຍເຈົ້າແນ່ນອນ! ແຕ່ຕອນນີ້ ໃຫ້ເຮົາຄືນໄປເບິ່ງນຳກັນກ່ອນວ່າມີຫຍັງເກີດຂຶ້ນໃນຊ່ວງທີ່ມີຄວາມແຫ້ງແລ້ງ.
“ຢ່າອຸກໃຈໃນເລື່ອງໃດເລີຍ ແຕ່ໃຫ້ອະທິດຖານເຖິງພະເຈົ້າຕະຫຼອດ. ອ້ອນວອນຂໍໃຫ້ເພິ່ນຊີ້ນຳແລະໃຫ້ຂອບໃຈເພິ່ນພ້ອມ.”—ຟີລິບປອຍ 4:6
ເລື່ອງທີ່ເຈົ້າອາດຈະມັກ
ສອນລູກໃຫ້ເປັນຄົນດີ
ລູກເຄີຍຮູ້ສຶກຢ້ານແລະໂດດດ່ຽວບໍ
ພະເຢໂຫວາໄດ້ເວົ້າຫຍັງກັບເອລີຢາເມື່ອລາວຮູ້ສຶກໂດດດ່ຽວທີ່ສຸດ ລູກສາມາດຮຽນຫຍັງໄດ້ຈາກສິ່ງທີ່ເກີດຂຶ້ນກັບເອລີຢາ?
