ຕອນ​ທີ່​ຜູ້​ສອດແນມ​ຄົນ​ອິດສະຣາເອນ 2 ຄົນ​ໄປ​ເມືອງ​ເຢຣິໂກ ເຂົາເຈົ້າ​ໄດ້​ພັກ​ຢູ່​ເຮືອນ​ຂອງ​ຜູ້​ຍິງ​ຄົນ​ໜຶ່ງ​ຊື່​ຣາຮາບ. ເມື່ອ​ກະສັດ​ເມືອງ​ເຢຣິໂກ​ຮູ້​ເລື່ອງ​ນີ້ ລາວ​ກໍ​ສົ່ງ​ທະຫານ​ໄປ​ເຮືອນ​ຂອງ​ຣາຮາບ. ແຕ່​ຣາຮາບ​ເຊື່ອງ​ຜູ້​ສອດແນມ 2 ຄົນ​ໄວ້​ຢູ່​ເທິງ​ດາດຟ້າ​ແລະ​ບອກ​ທະຫານ​ໃຫ້​ໄປ​ອີກ​ທາງ​ໜຶ່ງ. ລາວ​ເວົ້າ​ກັບ​ຜູ້​ສອດແນມ​ວ່າ: ‘ຂ້ອຍ​ຈະ​ຊ່ວຍ​ພວກ​ເຈົ້າ ຍ້ອນ​ຂ້ອຍ​ຮູ້​ວ່າ​ພະ​ເຢໂຫວາ​ຢູ່​ຝ່າຍ​ພວກ​ເຈົ້າ​ແລະ​ພວກ​ເຈົ້າ​ຈະ​ຍຶດ​ແຜ່ນດິນ​ນີ້​ໄດ້. ແຕ່​ຂໍ​ສັນຍາ​ກັບ​ຂ້ອຍ​ແດ່​ວ່າ​ພວກ​ເຈົ້າ​ຈະ​ຊ່ວຍ​ຊີວິດ​ຄອບຄົວ​ຂອງ​ຂ້ອຍ.’

ຜູ້​ສອດແນມ​ເວົ້າ​ກັບ​ຣາຮາບ​ວ່າ: ‘ພວກ​ເຮົາ​ສັນຍາ​ວ່າ​ທຸກ​ຄົນ​ໃນ​ຄອບຄົວ​ຂອງ​ເຈົ້າ​ຈະ​ປອດໄພ.’ ເຂົາເຈົ້າ​ບອກ​ລາວ​ອີກ​ວ່າ: ‘ໃຫ້​ເຈົ້າ​ມັດ​ເຊືອກ​ສີ​ແດງ​ສົດ​ໄວ້​ຢູ່​ປ່ອງ​ຢ້ຽມ​ເດີ້ ແລ້ວ​ຄອບຄົວ​ຂອງ​ເຈົ້າ​ຈະ​ລອດ​ຊີວິດ.’

ຣາຮາບ​ເອົາ​ເຊືອກ​ຢ່ອນ​ລົງ​ປ່ອງ​ຢ້ຽມ​ເພື່ອ​ໃຫ້​ຄົນ​ສອດແນມ​ປີນ​ລົງ​ໄປ. ເຂົາເຈົ້າ​ໜີ​ໄປ​ລີ້​ຢູ່​ເຂດ​ພູ 3 ມື້ ແລ້ວ​ກໍ​ກັບ​ໄປ​ຫາ​ໂຢຊວຍ. ຫຼັງ​ຈາກ​ນັ້ນ ພວກ​ອິດສະຣາເອນ​ກໍ​ຂ້າມ​ແມ່​ນ້ຳ​ຈໍແດນ​ແລະ​ກຽມ​ຍຶດ​ແຜ່ນດິນ​ການາອານ. ເຂົາເຈົ້າ​ຍຶດ​ເມືອງ​ເຢຣິໂກ​ໄດ້​ເປັນ​ເມືອງ​ທຳອິດ.  ພະ​ເຢໂຫວາ​ບອກ​ເຂົາເຈົ້າ​ໃຫ້​ຍ່າງ​ອ້ອມ​ເມືອງ​ນັ້ນ 6 ມື້ ມື້​ລະ 1 ຮອບ. ແຕ່​ໃນ​ມື້​ທີ 7 ໃຫ້​ຍ່າງ 7 ຮອບ. ແລ້ວ​ພວກ​ປະໂລຫິດ​ກໍ​ເປົ່າ​ແກ ແລະ​ທະຫານ​ທຸກ​ຄົນ​ກໍ​ຮ້ອງ​ສຽງ​ບັກ​ດັງໆ​ຈົນ​ສຸດ​ສຽງ ແລ້ວ​ກຳແພງ​ເມືອງ​ກໍ​ພັງ​ລົງ​ມາ! ແຕ່​ເຮືອນ​ຂອງ​ຣາຮາບ​ທີ່​ຢູ່​ເທິງ​ກຳແພງ​ບໍ່​ເປັນ​ຫຍັງ. ຣາຮາບ​ກັບ​ຄອບຄົວ​ປອດໄພ​ຍ້ອນ​ວ່າ​ລາວ​ມີ​ຄວາມ​ເຊື່ອ​ໃນ​ພະ​ເຢໂຫວາ.