ບົດທີ 98
ສາສະໜາຄລິດສະຕຽນແຜ່ຂະຫຍາຍໄປປະເທດຕ່າງໆ
ພວກອັກຄະສາວົກເຊື່ອຟັງຄຳສັ່ງຂອງພະເຢຊູທີ່ໃຫ້ປະກາດຂ່າວດີໄປທົ່ວໂລກ. ໃນປີ 47 ພີ່ນ້ອງໃນເມືອງອັນຕີໂອເຂຍສົ່ງໂປໂລກັບບາຣະນາບາໄປປະກາດຂ່າວດີ. ຜູ້ປະກາດທີ່ກະຕືລືລົ້ນ 2 ຄົນນີ້ໄດ້ເດີນທາງໄປປະກາດຈົນທົ່ວເຂດອາຊີໄມເນີ ເຊັ່ນ: ເມືອງເດຣະເບ ເມືອງລີຊະທາ ແລະເມືອງອີໂກນີອົນ.
ໂປໂລກັບບາຣະນາບາປະກາດກັບທຸກຄົນ ບໍ່ວ່າຈະເປັນຄົນລວຍ ຄົນທຸກ ຄົນໜຸ່ມ ຫຼືຄົນເຖົ້າ. ຫຼາຍຄົນຍອມຮັບຄວາມຈິງກ່ຽວກັບພະຄລິດ. ຕອນທີ່ໂປໂລແລະບາຣະນາບາປະກາດກັບເຊຄີໂອໂປໂລທີ່ເປັນເຈົ້າແຂວງຂອງເກາະໄຊປຣັດ ພໍ່ມົດຄົນໜຶ່ງກໍພະຍາຍາມຂັດຂວາງເຂົາເຈົ້າ. ໂປໂລເວົ້າກັບພໍ່ມົດວ່າ: “ພະເຢໂຫວາຈະລົງໂທດເຈົ້າ.” ທັນໃດນັ້ນ ພໍ່ມົດກໍຕາບອດ. ເມື່ອເຊຄີໂອໂປໂລເຫັນແບບນີ້ ລາວກໍເຂົ້າມາເປັນຄລິດສະຕຽນ.
ໂປໂລກັບບາຣະນາບາປະກາດໄປທົ່ວທຸກບ່ອນ ບໍ່ວ່າຈະເປັນຕາມບ້ານເຮືອນ ຕາມຕະຫຼາດ ຕາມຫົນທາງ ແລະຕາມບ່ອນປະຊຸມຂອງຄົນຢິວ. ເມື່ອຄົນໃນເມືອງລີຊະທາເຫັນໂປໂລກັບບາຣະນາບາປົວຄົນເປັນລ່ອຍໂດຍການອັດສະຈັນ ເຂົາເຈົ້າກໍຄິດວ່າໂປໂລກັບບາຣະນາບາເປັນເທບພະເຈົ້າແລະພະຍາຍາມຈະຂາບໄຫວ້. ແຕ່ໂປໂລກັບບາຣະນາບາຫ້າມເຂົາເຈົ້າແລະເວົ້າວ່າ: ‘ໃຫ້ນະມັດສະການພະເຈົ້າ! ພວກເຮົາເປັນພຽງແຕ່ຄົນທຳມະດາ.’ ມີຄົນຢິວບາງຄົນມາຍົວະຄົນກຸ່ມນັ້ນໃຫ້ຕໍ່ຕ້ານໂປໂລ. ເຂົາເຈົ້າເອົາກ້ອນຫີນດຶກໃສ່ໂປໂລ ແລ້ວລາກລາວອອກໄປຖິ້ມໃຫ້ຕາຍຢູ່ນອກເມືອງ. ແຕ່ໂປໂລຍັງບໍ່ຕາຍ! ພີ່ນ້ອງມາຊ່ວຍລາວທັນທີແລະພາລາວກັບເຂົ້າໄປໃນເມືອງ. ຕໍ່ມາ ໂປໂລກໍກັບໄປເມືອງອັນຕີໂອເຂຍ.
ໃນປີ 49 ໂປໂລເດີນທາງໄປປະກາດອີກເທື່ອໜຶ່ງ. ລາວກັບໄປຢາມພີ່ນ້ອງຄລິດສະຕຽນຢູ່ອາຊີໄມເນີ ແລ້ວກໍໄປປະກາດຂ່າວດີໄກຈົນຮອດທະວີບເອີຣົບ. ລາວໄປເມືອງອາແຖນ ເມືອງເອເຟໂຊ ເມືອງຟີລິບປອຍ ເມືອງເທຊະໂລນິກ ແລະອີກຫຼາຍບ່ອນ. ຄົນທີ່ເດີນທາງໄປນຳໂປໂລມີ ຊີລາ ລູກາ ແລະຕີໂມທຽວ. ເຂົາເຈົ້າຊ່ວຍກັນກໍ່ຕັ້ງປະຊາຄົມໃໝ່ຫຼາຍບ່ອນແລະຊ່ວຍປະຊາຄົມເຫຼົ່ານັ້ນໃຫ້ເຂັ້ມແຂງ. ໂປໂລຢູ່ເມືອງໂກຣິນໂທ 1 ປີເຄິ່ງແລະຊ່ວຍພີ່ນ້ອງຢູ່ຫັ້ນໃຫ້ເຂັ້ມແຂງຫຼາຍຂຶ້ນ. ລາວປະກາດ ສອນ ແລະຂຽນຈົດໝາຍຫາຫຼາຍປະຊາຄົມ. ລາວຍັງເຮັດວຽກເປັນຊ່າງຫຍິບເຕັ້ນນຳ. ຕໍ່ມາ ໂປໂລກໍກັບໄປເມືອງອັນຕີໂອເຂຍ.
ໃນປີ 52 ໂປໂລເດີນທາງໄປປະກາດຮອບທີ 3. ລາວເລີ່ມຈາກອາຊີໄມເນີ ລາວເດີນທາງຂຶ້ນເໜືອໄປໄກຈົນຮອດເມືອງຟີລິບປອຍ ແລ້ວລາວກໍກັບລົງມາເມືອງໂກຣິນໂທ. ໂປໂລຢູ່ເມືອງເອເຟໂຊຫຼາຍປີເພື່ອສອນຜູ້ຄົນ ປົວຄົນປ່ວຍ ແລະຊ່ວຍປະຊາຄົມຢູ່ຫັ້ນ. ໂປໂລຍັງບັນລະຍາຍສາທາລະນະໃນຫ້ອງປະຊຸມຂອງໂຮງຮຽນທຸກໆມື້. ມີຫຼາຍຄົນມັກຟັງໂປໂລແລະປ່ຽນມາເປັນຄລິດສະຕຽນ. ຫຼັງຈາກໂປໂລເດີນທາງໄປປະກາດຂ່າວດີຫຼາຍບ່ອນ ລາວກໍກັບໄປເມືອງເຢຣູຊາເລັມ.
“ດັ່ງນັ້ນ ໃຫ້ພວກເຈົ້າໄປຫາຄົນທຸກຊາດແລະສອນເຂົາເຈົ້າໃຫ້ເຂົ້າມາເປັນລູກສິດ.”—ມັດທາຍ 28:19
ເລື່ອງທີ່ເຈົ້າອາດຈະມັກ
ຄຳພີໄບເບິນ—ບອກເລື່ອງຫຍັງ?
ຂ່າວດີແຜ່ຂະຫຍາຍອອກໄປ
ມີຫຍັງເກີດຂຶ້ນພາຍຫຼັງທີ່ໂປໂລໄດ້ປິ່ນປົວຊາຍພິການໃນເມືອງລີສະທາ? ໂປໂລໄປຮອດເມືອງໂລມໄດ້ແນວໃດ?
ລາຊະອານາຈັກຂອງພະເຈົ້າປົກຄອງແລ້ວ!
ການປະກາດເລື່ອງລາຊະອານາຈັກ—ການເຜີຍແຜ່ຂ່າວດີໄປທົ່ວໂລກ
ພະເຍຊູບອກລ່ວງໜ້າວ່າໃນສະໄໝສຸດທ້າຍວຽກປະກາດຈະມີຂອບເຂດກວ້າງຂວາງຫຼາຍ. ຄຳພະຍາກອນນີ້ເປັນຈິງແນວໃດ?
