ບົດທີ 94
ພວກລູກສິດໄດ້ຮັບພະລັງບໍລິສຸດ
ຫຼັງຈາກພະເຢຊູກັບໄປສະຫວັນໄດ້ 10 ມື້ ພວກລູກສິດຂອງເພິ່ນກໍໄດ້ຮັບພະລັງບໍລິສຸດ. ຕອນນັ້ນເປັນເທດສະການເພັນເຕກອດປີ 33 ແລະຄົນຈາກຫຼາຍປະເທດໄດ້ເດີນທາງມາເມືອງເຢຣູຊາເລັມເພື່ອສະຫຼອງເທດສະການນີ້. ພວກລູກສິດຂອງພະເຢຊູປະມານ 120 ຄົນໄດ້ມາລວມກັນຢູ່ຫ້ອງຊັ້ນເທິງໃນເຮືອນຫຼັງໜຶ່ງ. ທັນໃດນັ້ນກໍມີສິ່ງທີ່ເປັນຕາງຶດເກີດຂຶ້ນ. ມີບາງສິ່ງຄືກັບແປວໄຟຢູ່ເທິງຫົວຂອງລູກສິດແຕ່ລະຄົນ ແລ້ວເຂົາເຈົ້າກໍເລີ່ມເວົ້າພາສາຕ່າງໆຫຼາຍພາສາ ແລະມີສຽງຄືກັບສຽງພາຍຸດັງສະໜັ່ນໄປທົ່ວເຮືອນ.
ເມື່ອຄົນຕ່າງຊາດທີ່ມາສະຫຼອງເທດສະການໃນເມືອງເຢຣູຊາເລັມໄດ້ຍິນສຽງດັງມາຈາກເຮືອນຫຼັງໜຶ່ງ ເຂົາເຈົ້າກໍແລ່ນມາເບິ່ງວ່າເກີດຫຍັງຂຶ້ນ. ເຂົາເຈົ້າຮູ້ສຶກງຶດຫຼາຍທີ່ເຫັນພວກລູກສິດເວົ້າພາສາຕ່າງໆຂອງເຂົາເຈົ້າໄດ້. ເຂົາເຈົ້າເວົ້າວ່າ: ‘ຄົນເຫຼົ່ານີ້ເປັນຄົນຄາລີເລຕົ໋ວ. ເຂົາເຈົ້າເວົ້າພາສາຂອງພວກເຮົາໄດ້ແນວໃດ?’
ເປໂຕກັບພວກອັກຄະສາວົກຄົນອື່ນໆກໍຢືນຂຶ້ນຕໍ່ໜ້າຜູ້ຄົນ. ລາວບອກທຸກຄົນວ່າພະເຢຊູຖືກຂ້າແນວໃດແລະບອກວ່າພະເຢໂຫວາປຸກເພິ່ນໃຫ້ຟື້ນຄືນຈາກຕາຍແລ້ວ. ເປໂຕເວົ້າວ່າ: ‘ຕອນນີ້ ພະເຢຊູຢູ່ເບື້ອງຂວາມືຂອງພະເຈົ້າໃນສະຫວັນແລ້ວ ແລະເພິ່ນໄດ້ໃຫ້ພະລັງບໍລິສຸດກັບພວກເຮົາຕາມທີ່ສັນຍາໄວ້. ພວກເຈົ້າຈຶ່ງໄດ້ຍິນແລະໄດ້ເຫັນການອັດສະຈັນເຫຼົ່ານີ້.’
ຄົນທີ່ໄດ້ຟັງເປໂຕເວົ້າຮູ້ສຶກສຳນຶກຜິດ ເຂົາເຈົ້າຈຶ່ງຖາມວ່າ: “ພວກເຮົາຈະເຮັດແນວໃດດີ?” ເປໂຕຕອບເຂົາເຈົ້າວ່າ: ‘ພວກເຈົ້າຕ້ອງກັບໃຈ ເຊົາເຮັດຊົ່ວ ແລະຮັບບັບເຕມາໃນນາມພະເຢຊູຄລິດ. ແລ້ວພວກເຈົ້າຈະໄດ້ຮັບພະລັງບໍລິສຸດເປັນຂອງຂວັນຄືກັນ.’ ໃນມື້ນັ້ນ ມີຄົນຮັບບັບເຕມາປະມານ 3.000 ຄົນ. ຕັ້ງແຕ່ນັ້ນມາ ລູກສິດຢູ່ເມືອງເຢຣູຊາເລັມກໍເພີ່ມຂຶ້ນຢ່າງໄວວາ. ພະລັງບໍລິສຸດໄດ້ຊ່ວຍພວກອັກຄະສາວົກກໍ່ຕັ້ງປະຊາຄົມອີກຫຼາຍບ່ອນເພື່ອຈະສອນທຸກສິ່ງທີ່ພະເຢຊູສັ່ງເຂົາເຈົ້າໄວ້.
“ຖ້າພວກເຈົ້າປະກາດຢ່າງເປີດເຜີຍວ່າພະເຢຊູແມ່ນຜູ້ເປັນນາຍ ແລະເຊື່ອໃນໃຈວ່າພະເຈົ້າປຸກພະເຢຊູໃຫ້ຄືນມາຈາກຕາຍແລ້ວ ພວກເຈົ້າກໍຈະລອດຊີວິດ.”—ໂຣມ 10:9
ເລື່ອງທີ່ເຈົ້າອາດຈະມັກ
ຖາມ-ຕອບເລື່ອງຄຳພີໄບເບິນ
ພະລັງບໍລິສຸດແມ່ນຫຍັງ?
ເປັນເລື່ອງທີ່ມີເຫດຜົນທີ່ຄຳພີໄບເບິນເວົ້າເຖິງພະລັງບໍລິສຸດວ່າເປັນ “ມື” ຂອງພະເຈົ້າ.
