ບົດທີ 75
ຊາຕານທົດສອບພະເຢຊູ
ຫຼັງຈາກພະເຢຊູຮັບບັບເຕມາ ພະລັງຂອງພະເຈົ້າກໍພາເພິ່ນເຂົ້າໄປໃນບ່ອນກັນດານ. ພະເຢຊູບໍ່ໄດ້ກິນຫຍັງເລີຍ 40 ມື້ແລະເພິ່ນກໍຫິວຫຼາຍ. ຊາຕານຈຶ່ງມາລໍ້ໃຈເພິ່ນແລະເວົ້າວ່າ: ‘ຖ້າເຈົ້າເປັນລູກຂອງພະເຈົ້າແທ້ໆ ເສກກ້ອນຫີນເຫຼົ່ານີ້ໃຫ້ເປັນຂອງກິນແມ້.’ ແຕ່ພະເຢຊູຕອບຊາຕານໂດຍອ້າງຂໍ້ຄຳພີວ່າ: ‘ພະຄຳພີບອກໄວ້ວ່າ ຄົນເຮົາຈະມີຊີວິດຢູ່ໄດ້ ບໍ່ແມ່ນດ້ວຍອາຫານເທົ່ານັ້ນ ແຕ່ດ້ວຍຄຳເວົ້າທຸກຄຳທີ່ອອກມາຈາກປາກພະເຢໂຫວາ.’
ຈາກນັ້ນ ຊາຕານກໍທ້າພະເຢຊູວ່າ: ‘ຖ້າເຈົ້າເປັນລູກຂອງພະເຈົ້າແທ້ໆ ກໍໂດດຈາກບ່ອນສູງສຸດຂອງວິຫານລົງໄປໂລດ ເພາະພະຄຳພີບອກວ່າພະເຈົ້າຈະສົ່ງທູດສະຫວັນຂອງເພິ່ນມາຮັບເຈົ້າໄວ້.’ ແຕ່ພະເຢຊູກໍຕອບຊາຕານໂດຍອ້າງຂໍ້ຄຳພີອີກວ່າ: ‘ພະຄຳພີບອກໄວ້ວ່າ ຢ່າທ້າທາຍພະເຢໂຫວາພະເຈົ້າຂອງເຈົ້າ.’
ແລ້ວຊາຕານກໍເຮັດໃຫ້ພະເຢຊູເຫັນຄວາມຮັ່ງມີກັບຄວາມຍິ່ງໃຫຍ່ຂອງທຸກປະເທດໃນໂລກແລະເວົ້າວ່າ: ‘ຂ້ອຍຈະຍົກປະເທດແລະຄວາມຍິ່ງໃຫຍ່ທັງໝົດນີ້ໃຫ້ເຈົ້າ ຖ້າເຈົ້າກົ້ມກາບຂ້ອຍແຕ່ເທື່ອດຽວ.’ ແຕ່ພະເຢຊູຕອບຊາຕານວ່າ: ‘ໜີໄປໄກໆ ຊາຕານ! ພະຄຳພີບອກໄວ້ວ່າ ເຈົ້າຕ້ອງນະມັດສະການພະເຢໂຫວາຜູ້ດຽວເທົ່ານັ້ນ.’
ຊາຕານຈຶ່ງໜີໄປຈາກພະເຢຊູ ແລ້ວທູດສະຫວັນກໍເອົາອາຫານມາໃຫ້ເພິ່ນກິນ. ຕັ້ງແຕ່ນັ້ນມາ ພະເຢຊູກໍເລີ່ມປະກາດຂ່າວດີເລື່ອງການປົກຄອງທີ່ຢູ່ໃນສະຫວັນ ເພາະເພິ່ນຖືກສົ່ງມາໃນໂລກເພື່ອເຮັດວຽກນີ້. ປະຊາຊົນມັກສິ່ງທີ່ພະເຢຊູສອນແລະຕິດຕາມເພິ່ນໄປທົ່ວທຸກບ່ອນ.
“[ຊາຕານ] ຂີ້ຕົວະຕາມສັນດານຂອງມັນ ຍ້ອນມັນເປັນຈອມຂີ້ຕົວະແລະເປັນພໍ່ຂອງການຕົວະ.”—ໂຢຮັນ 8:44
