ບົດທີ 4
ພະເຢຊູຄລິດແມ່ນໃຜ?
1, 2. (ກ) ຖ້າເຈົ້າຮູ້ຈັກແຕ່ຊື່ຂອງຄົນທີ່ມີຊື່ສຽງໝາຍຄວາມວ່າເຈົ້າຮູ້ຈັກຄົນນັ້ນແທ້ໆບໍ? ຂໍໃຫ້ອະທິບາຍ. (ຂ) ຫຼາຍຄົນຄິດວ່າພະເຢຊູແມ່ນໃຜ?
ໃນໂລກນີ້ມີຄົນທີ່ມີຊື່ສຽງຢູ່ຫຼາຍຄົນ. ເຈົ້າອາດຮູ້ຈັກຊື່ຂອງບາງຄົນ ແຕ່ການຮູ້ຈັກຊື່ຂອງລາວບໍ່ໄດ້ໝາຍຄວາມວ່າເຈົ້າຮູ້ຈັກລາວດີ ຫຼືຮູ້ຈັກນິດໄສໃຈຄໍຂອງລາວແທ້ໆວ່າເປັນຄົນແນວໃດ.
2 ເຈົ້າອາດເຄີຍໄດ້ຍິນເລື່ອງພະເຢຊູ ເຖິງວ່າເພິ່ນເຄີຍມີຊີວິດຢູ່ໃນໂລກປະມານ 2.000 ປີມາແລ້ວ. ແຕ່ຄົນສ່ວນຫຼາຍບໍ່ຮູ້ວ່າພະເຢຊູເປັນຄົນແບບໃດ. ມີບາງຄົນບອກວ່າເພິ່ນເປັນຄົນດີຄົນໜຶ່ງ ບາງຄົນບອກວ່າເພິ່ນເປັນຜູ້ພະຍາກອນ ສ່ວນບາງຄົນກໍບອກວ່າເພິ່ນເປັນພະເຈົ້າ. ແລ້ວເຈົ້າເດ ເຈົ້າຄິດວ່າພະເຢຊູແມ່ນໃຜ?—ເບິ່ງຄຳອະທິບາຍເພີ່ມເຕີມ 12
3. ເປັນຫຍັງການຮູ້ຈັກພະເຢໂຫວາພະເຈົ້າແລະພະເຢຊູຄລິດຈຶ່ງເປັນເລື່ອງທີ່ສຳຄັນ?
3 ການຮູ້ຈັກຄວາມຈິງວ່າພະເຢຊູແມ່ນໃຜນັ້ນເປັນເລື່ອງສຳຄັນ. ຍ້ອນຫຍັງ? ຍ້ອນຄຳພີໄບເບິນບອກເຮົາວ່າ: “ຜູ້ທີ່ຈະໄດ້ຊີວິດຕະຫຼອດໄປຕ້ອງຮູ້ຈັກພະອົງທີ່ເປັນພະເຈົ້າທ່ຽງແທ້ອົງດຽວ ແລະຮູ້ຈັກຜູ້ທີ່ພະອົງໃຊ້ມາ ຜູ້ນັ້ນແມ່ນເຢຊູຄລິດ.” (ໂຢຮັນ 17:3) ຖ້າເຈົ້າຮູ້ຄວາມຈິງກ່ຽວກັບພະເຢໂຫວາແລະພະເຢຊູ ເຈົ້າກໍຈະມີຊີວິດຕະຫຼອດໄປໃນໂລກທີ່ເປັນອຸທິຍານ. (ໂຢຮັນ 14:6) ນອກຈາກນັ້ນ ການຮູ້ກ່ຽວກັບຊີວິດຂອງພະເຢຊູຍັງເປັນປະໂຫຍດຕໍ່ເຮົາໃນຕອນນີ້ນຳອີກ ເພາະເພິ່ນເປັນຕົວຢ່າງທີ່ດີທີ່ສຸດໃນການໃຊ້ຊີວິດແລະການປະຕິບັດຕໍ່ຄົນອື່ນ. (ໂຢຮັນ 13:34, 35) ໃນບົດທີ 1 ເຮົາໄດ້ຮຽນຄວາມຈິງກ່ຽວກັບພະເຈົ້າແລ້ວ. ຕອນນີ້ເຮົາຈະມາຮຽນວ່າຄຳພີໄບເບິນສອນແນວໃດເລື່ອງພະເຢຊູ.
“ພວກເຮົາພົບເມຊີອາແລ້ວ”
4. ຄຳວ່າ “ເມຊີອາ” ແລະ “ພະຄລິດ” ໝາຍເຖິງຫຍັງ?
4 ດົນນານມາແລ້ວກ່ອນທີ່ພະເຢຊູຈະເກີດ ພະເຢໂຫວາສັນຍາໄວ້ໃນຄຳພີໄບເບິນວ່າຈະສົ່ງເມຊີອາຫຼືພະຄລິດມາ. ເມຊີອາແລະພະຄລິດເປັນຄຳບອກຕຳແໜ່ງ. ຄຳວ່າ “ເມຊີອາ” ມາຈາກຄຳພາສາເຮັບເຣີ. ສ່ວນຄຳວ່າ “ພະຄລິດ” ມາຈາກຄຳພາສາກຣີກ ເຊິ່ງທັງສອງຄຳນີ້ໝາຍເຖິງ ຜູ້ທີ່ພະເຈົ້າແຕ່ງຕັ້ງໃຫ້ມີຕຳແໜ່ງພິເສດ. ເມຊີອາຄົນນີ້ຈະເຮັດໃຫ້ທຸກເລື່ອງທີ່ພະເຈົ້າສັນຍາໄວ້ເກີດຂຶ້ນແທ້. ດັ່ງນັ້ນ ຕັ້ງແຕ່ກ່ອນທີ່ພະເຢຊູຈະມາເກີດ ຜູ້ຄົນລໍຖ້າການມາຂອງເມຊີອາ ແລະສົງໄສວ່າໃຜທີ່ຈະເປັນເມຊີອາ?
5. ລູກສິດຂອງພະເຢຊູເຊື່ອບໍວ່າເພິ່ນເປັນເມຊີອາ?
5 ລູກສິດຂອງພະເຢຊູໝັ້ນໃຈວ່າເພິ່ນເປັນເມຊີອາຕາມທີ່ພະເຈົ້າສັນຍາໄວ້. (ໂຢຮັນ 1:41) ຕົວຢ່າງເຊັ່ນ: ຊີໂມນເປໂຕເວົ້າກັບພະເຢຊູວ່າ: “ທ່ານເປັນພະຄລິດ.” (ມັດທາຍ 16:16) ແລ້ວເຮົາເດ ມີຫຍັງທີ່ຈະເຮັດໃຫ້ເຮົາໝັ້ນໃຈໄດ້ວ່າພະເຢຊູເປັນເມຊີອາ?
6. ພະເຢໂຫວາເຮັດຫຍັງເພື່ອຊ່ວຍຄົນທີ່ຈິງໃຈໃຫ້ຮູ້ວ່າໃຜເປັນເມຊີອາ?
6 ດົນນານມາແລ້ວກ່ອນພະເຢຊູເກີດ ພະເຢໂຫວາໃຊ້ຜູ້ພະຍາກອນຂອງພະອົງຂຽນລາຍລະອຽດຫຼາຍຢ່າງທີ່ຊ່ວຍເຮົາໃຫ້ຮູ້ວ່າໃຜເປັນເມຊີອາ. ເປັນຫຍັງຕ້ອງເຮັດແບບນັ້ນ? ສົມມຸດວ່າໝູ່ຂໍໃຫ້ເຈົ້າໄປຮັບຜູ້ໃດຜູ້ໜຶ່ງທີ່ເຈົ້າບໍ່ຮູ້ຈັກແລະບໍ່ເຄີຍເຫັນໜ້າຈັກເທື່ອຢູ່ຄິວລົດເມເຊິ່ງມີຄົນຫຼາຍ. ເຈົ້າຄິດວ່າຈະຊອກຫາຄົນນັ້ນເຫັນບໍ? ຄືຊິບໍ່ເຫັນ. ແຕ່ຖ້າໝູ່ອະທິບາຍລັກສະນະຂອງຄົນນັ້ນຢ່າງລະອຽດ ເຈົ້າກໍຈະຊອກຫາລາວໄດ້ງ່າຍຂຶ້ນແມ່ນບໍ? ເລື່ອງເມຊີອາກໍຄືກັນ. ພະເຢໂຫວາບອກລາຍລະອຽດວ່າເມຊີອາຈະເຮັດຫຍັງແດ່ແລະຈະເກີດຫຍັງຂຶ້ນກັບເພິ່ນ. ເມື່ອເຫັນວ່າຄຳພະຍາກອນທຸກເລື່ອງກົງກັບພະເຢຊູ ຄົນທີ່ຈິງໃຈຊອກຫາເມຊີອາກໍຈະຮູ້ເລີຍວ່າພະເຢຊູເປັນເມຊີອາ.
7. ຄຳພະຍາກອນ 2 ເລື່ອງຫຍັງທີ່ພິສູດວ່າພະເຢຊູເປັນເມຊີອາ?
7 ໃຫ້ເຮົາມາເບິ່ງຄຳພະຍາກອນສອງເລື່ອງນຳກັນ. ເລື່ອງທຳອິດ ຜູ້ພະຍາກອນມີເກບອກໄວ້ລ່ວງໜ້າ 700 ປີກ່ອນທີ່ພະເຢຊູຈະເກີດ ລາວບອກວ່າເມຊີອາຈະມາເກີດໃນເມືອງນ້ອຍໆຊື່ເບັດເລເຮັມ. (ມີເກ 5:2) ແລ້ວພະເຢຊູກໍເກີດຢູ່ເມືອງນັ້ນແທ້ໆ. (ມັດທາຍ 2:1, 3-9) ເລື່ອງທີ 2 ຜູ້ພະຍາກອນດານີເອນບອກວ່າເມຊີອາຈະຖືກລະບຸຕົວຢ່າງຈະແຈ້ງໃນປີ ຄ.ສ 29 ແລະກໍເປັນແບບນັ້ນແທ້ໆ. (ດານຽນ 9:25) ນີ້ເປັນພຽງສອງເລື່ອງໃນຄຳພະຍາກອນຫຼາຍໆເລື່ອງທີ່ເຮັດໃຫ້ເຫັນແຈ້ງວ່າພະເຢຊູເປັນເມຊີອາຕາມຄຳສັນຍາ.—ເບິ່ງຄຳອະທິບາຍເພີ່ມເຕີມ 13
ພະເຢຊູເປັນເມຊີອາຫຼືພະຄລິດຕອນທີ່ເພິ່ນຮັບບັບເຕມາ
8, 9. ມີຫຍັງເກີດຂຶ້ນຕອນພະເຢຊູຮັບບັບເຕມາເຊິ່ງພິສູດວ່າເພິ່ນເປັນເມຊີອາ?
8 ນອກຈາກນັ້ນ ພະເຢໂຫວາຍັງເຮັດໃຫ້ເຫັນແຈ້ງດ້ວຍພະອົງເອງວ່າພະເຢຊູເປັນເມຊີອາ. ພະອົງສັນຍາກັບໂຢຮັນຜູ້ໃຫ້ບັບເຕມາ *ວ່າພະອົງຈະເຮັດການອັດສະຈັນເພື່ອໃຫ້ລາວຮູ້ວ່າໃຜເປັນເມຊີອາ. ໂຢຮັນໄດ້ເຫັນການອັດສະຈັນນີ້ຕອນທີ່ພະເຢຊູໄປຫາລາວເພື່ອຮັບບັບເຕມາຢູ່ແມ່ນ້ຳຈໍແດນໃນປີ ຄ.ສ 29. ຄຳພີໄບເບິນເລົ່າເຫດການຕອນນັ້ນວ່າ: “ເມື່ອຮັບບັບເຕມາແລ້ວ ພະເຢຊູກໍຂຶ້ນຈາກນ້ຳທັນທີ ແລະຕອນນັ້ນທ້ອງຟ້າກໍເປີດອອກ ແລະໂຢຮັນເຫັນພະລັງຂອງພະເຈົ້າຮູບຮ່າງຄືກັບນົກເຂົາໄດ້ລົງມາຢູ່ເທິງພະເຢຊູ. ແລ້ວກໍມີສຽງເວົ້າຈາກຟ້າວ່າ: ‘ນີ້ແມ່ນລູກຮັກຂອງເຮົາ ເຮົາພໍໃຈໃນຕົວລາວຫຼາຍ.’” (ມັດທາຍ 3:16, 17) ເມື່ອໂຢຮັນເຫັນການອັດສະຈັນນີ້ແລະໄດ້ຍິນສຽງພະເຈົ້າ ລາວຮູ້ທັນທີເລີຍວ່າພະເຢຊູເປັນເມຊີອາ. (ໂຢຮັນ 1:32-34) ໃນມື້ນັ້ນແຫຼະພະເຢໂຫວາໄດ້ແຕ່ງຕັ້ງພະເຢຊູໃຫ້ເປັນເມຊີອາໂດຍເທພະລັງຂອງພະອົງລົງເທິງເພິ່ນ ເຊິ່ງເປັນການສະແດງໃຫ້ຮູ້ວ່າພະເຈົ້າເລືອກພະເຢຊູໃຫ້ເປັນຜູ້ນຳແລະເປັນກະສັດ.—ເອຊາອີ 55:4
9 ຄຳພະຍາກອນໃນຄຳພີໄບເບິນ ຄຳເວົ້າຂອງພະເຢໂຫວາ ລວມທັງການອັດສະຈັນທີ່ພະອົງເຮັດຕອນທີ່ພະເຢຊູຮັບບັບເຕມາເປັນຫຼັກຖານວ່າພະເຢຊູເປັນເມຊີອາ. ແຕ່ພະເຢຊູມາຈາກໃສ ແລະເປັນຄົນແບບໃດ? ໃຫ້ເຮົາມາເບິ່ງວ່າຄຳພີໄບເບິນບອກເລື່ອງນີ້ແນວໃດ.
ພະເຢຊູມາຈາກໃສ?
10. ຄຳພີໄບເບິນສອນວ່າພະເຢຊູເຄີຍຢູ່ໃສກ່ອນຈະມາເກີດຢູ່ໂລກ?
10 ຄຳພີໄບເບິນສອນວ່າ ພະເຢຊູເປັນທູດສະຫວັນຢູ່ໃນສະຫວັນແຕ່ດົນແລ້ວກ່ອນຈະມາເກີດຢູ່ໂລກ. ມີເກບອກວ່າເມຊີອາມີຊີວິດຢູ່ “ມານານແສນນານ.” (ມີເກ 5:2, ລ.ມ.) ແລະພະເຢຊູເອງກໍເວົ້າຫຼາຍຄັ້ງວ່າເພິ່ນເຄີຍຢູ່ໃນສະຫວັນກ່ອນມາເກີດເປັນມະນຸດ. (ອ່ານໂຢຮັນ 3:13; 6:38, 62; 17:4, 5) ດັ່ງນັ້ນ ພະເຢຊູມີສາຍສຳພັນທີ່ພິເສດກັບພະເຢໂຫວາຕັ້ງແຕ່ກ່ອນຈະມາຢູ່ໂລກດ້ວຍຊ້ຳ.
11. ເປັນຫຍັງພະເຢໂຫວາຈຶ່ງຮັກພະເຢຊູຫຼາຍ?
11 ພະເຢໂຫວາຮັກພະເຢຊູຫຼາຍ. ຍ້ອນຫຍັງ? ຍ້ອນພະອົງສ້າງພະເຢຊູກ່ອນທຸກສິ່ງທຸກຢ່າງ. ດັ່ງນັ້ນ ເພິ່ນຈຶ່ງຖືກເອີ້ນວ່າ “ຜູ້ທຳອິດທີ່ຖືກສ້າງກ່ອນທຸກສິ່ງ.” * (ໂກໂລຊາຍ 1:15) ອີກເຫດຜົນໜຶ່ງທີ່ພະເຢໂຫວາຮັກພະເຢຊູຫຼາຍກໍຍ້ອນພະເຢຊູເປັນຜູ້ດຽວທີ່ພະເຢໂຫວາສ້າງດ້ວຍຕົວເອງ. ດັ່ງນັ້ນ ຄຳພີໄບເບິນຈຶ່ງເອີ້ນພະເຢຊູວ່າ: “ລູກຄົນດຽວຂອງພະເຈົ້າ.” (ໂຢຮັນ 3:16) ພະເຢຊູຍັງເປັນຜູ້ດຽວເທົ່ານັ້ນທີ່ພະເຢໂຫວາໃຊ້ໃຫ້ສ້າງທຸກສິ່ງທຸກຢ່າງ. (ໂກໂລຊາຍ 1:16) ນອກຈາກນັ້ນ ພະເຢຊູເປັນຜູ້ດຽວທີ່ຄຳພີໄບເບິນເອີ້ນວ່າ: “ໂຄສົກ” ຫຼືຜູ້ເວົ້າແທນພະເຈົ້າ ເພາະພະເຢໂຫວາໃຫ້ເພິ່ນຖ່າຍທອດຂ່າວສານແລະຄຳສັ່ງຕ່າງໆຂອງພະອົງໄປເຖິງທູດສະຫວັນແລະມະນຸດ.—ໂຢຮັນ 1:14
12. ເຮົາຮູ້ໄດ້ແນວໃດວ່າພະເຢຊູກັບພະເຈົ້າບໍ່ໄດ້ເປັນອົງດຽວກັນ?
12 ບາງຄົນເຊື່ອວ່າພະເຢຊູກັບພະເຈົ້າເປັນອົງດຽວກັນ. ແຕ່ຄຳພີໄບເບິນບໍ່ໄດ້ສອນແບບນັ້ນ. ຄຳພີໄບເບິນບອກວ່າພະເຢຊູຖືກສ້າງຂຶ້ນມາ ເຊິ່ງໝາຍຄວາມວ່າພະເຢຊູມີຈຸດເລີ່ມຕົ້ນ. ສ່ວນພະເຢໂຫວາເປັນຜູ້ສ້າງທຸກສິ່ງທຸກຢ່າງ. ພະອົງມີຊີວິດຢູ່ຕະຫຼອດມາບໍ່ມີຈຸດເລີ່ມຕົ້ນ. (ຄຳເພງ 90:2) ໃນຖານະລູກ ພະເຢຊູບໍ່ເຄີຍຄິດຢາກເປັນພະເຈົ້າ. ຄຳພີໄບເບິນສອນຢ່າງຈະແຈ້ງວ່າພະເຈົ້າຜູ້ເປັນພໍ່ຍິ່ງໃຫຍ່ກວ່າລູກ. (ອ່ານໂຢຮັນ 14:28; 1 ໂກຣິນໂທ 11:3) ພະເຢໂຫວາອົງດຽວເປັນ “ພະເຈົ້າອົງມີລິດເດດອັນໃຫຍ່ທີ່ສຸດ.” (ຕົ້ນເດີມ 17:1) ດັ່ງນັ້ນ ພະອົງເປັນອົງຍິ່ງໃຫຍ່ສູງສຸດໃນເອກະພົບ.—ເບິ່ງຄຳອະທິບາຍເພີ່ມເຕີມ 14
13. ເປັນຫຍັງຄຳພີໄບເບິນຈຶ່ງບອກວ່າພະເຢຊູ “ຖອດແບບພະເຈົ້າທີ່ພວກເຮົາເບິ່ງບໍ່ເຫັນ”?
13 ພະເຢໂຫວາແລະພະເຢຊູລູກຂອງພະອົງເຮັດວຽກນຳກັນມາດົນຫຼາຍພັນລ້ານປີກ່ອນທີ່ຈະສ້າງທຸກສິ່ງທຸກຢ່າງ. ພວກເພິ່ນຕ້ອງຮັກກັນຫຼາຍແທ້ໆ! (ໂຢຮັນ 3:35; 14:31) ພະເຢຊູຮຽນແບບນິດໄສໃຈຄໍພໍ່ຂອງເພິ່ນທຸກຢ່າງຈົນຄຳພີໄບເບິນບອກວ່າ “ເພິ່ນຖອດແບບພະເຈົ້າທີ່ພວກເຮົາເບິ່ງບໍ່ເຫັນ.”—ໂກໂລຊາຍ 1:15
14. ພະເຢຊູມາເກີດເປັນມະນຸດໄດ້ແນວໃດ?
14 ພະເຢຊູລູກທີ່ພະເຢໂຫວາຮັກຫຼາຍທີ່ສຸດເຕັມໃຈສະລະຊີວິດທີ່ຢູ່ໃນສະຫວັນແລ້ວມາເກີດເປັນມະນຸດຢູ່ໂລກ. ເລື່ອງນີ້ເປັນໄປໄດ້ແນວໃດ? ພະເຢໂຫວາເຮັດການອັດສະຈັນໂດຍຍ້າຍຊີວິດພະເຢຊູຈາກສະຫວັນໃຫ້ມາຢູ່ໃນທ້ອງຂອງມາຣີທີ່ເປັນສາວບໍລິສຸດ. ດັ່ງນັ້ນ ໂດຍວິທີນີ້ພະເຢຊູຈຶ່ງບໍ່ຕ້ອງມີພໍ່ທີ່ເປັນມະນຸດ. ມາຣີໃຫ້ກຳເນີດລູກຊາຍທີ່ສົມບູນແບບ ແລະລາວຕັ້ງຊື່ລູກວ່າເຢຊູ.—ລູກາ 1:30-35
ພະເຢຊູເປັນຄົນແບບໃດ?
15. ເຈົ້າຈະຮູ້ຈັກພະເຢໂຫວາຫຼາຍຂຶ້ນໄດ້ແນວໃດ?
15 ປຶ້ມຂ່າວດີ 4 ຫົວໃນຄຳພີໄບເບິນ ເຊັ່ນ: ມັດທາຍ ມາຣະໂກ ລູກາ ແລະໂຢຮັນບອກກ່ຽວກັບຊີວິດແລະນິດໄສໃຈຄໍຂອງພະເຢຊູ. ຖ້າເຮົາອ່ານເລື່ອງຂອງພະເຢຊູໃນປຶ້ມ 4 ຫົວນີ້ກໍຈະເຮັດໃຫ້ເຮົາຮູ້ຈັກພະເຢໂຫວາພໍ່ຂອງເພິ່ນຫຼາຍຂຶ້ນ ເພາະພະເຢຊູຄືກັບພໍ່ຂອງເພິ່ນຫຼາຍ. ພະເຢຊູເຄີຍບອກໄວ້ວ່າ: “ຜູ້ທີ່ໄດ້ເຫັນຂ້ອຍກໍໄດ້ເຫັນພະເຈົ້າຜູ້ເປັນພໍ່.”—ໂຢຮັນ 14:9
16. ພະເຢຊູສອນເລື່ອງຫຍັງແລະເລື່ອງທີ່ເພິ່ນສອນມາຈາກໃສ?
16 ຫຼາຍຄົນເອີ້ນພະເຢຊູວ່າ “ອາຈານ.” (ໂຢຮັນ 1:38; 13:13) ເພິ່ນສອນເລື່ອງຫຍັງ? ເລື່ອງສຳຄັນທີ່ສຸດເລື່ອງໜຶ່ງທີ່ເພິ່ນສອນແມ່ນ “ຂ່າວດີເລື່ອງການປົກຄອງຂອງພະເຈົ້າ.” ການປົກຄອງນີ້ແມ່ນຫຍັງ? ແມ່ນລັດຖະບານຂອງພະເຈົ້າທີ່ຢູ່ໃນສະຫວັນເຊິ່ງຈະປົກຄອງທົ່ວໂລກແລະຈະເຮັດໃຫ້ຄົນທີ່ເຊື່ອຟັງພະເຈົ້າໄດ້ຮັບພອນ. (ມັດທາຍ 4:23) ທຸກສິ່ງທີ່ພະເຢຊູສອນມາຈາກພະເຢໂຫວາ. ພະເຢຊູບອກວ່າ: “ຂ້ອຍບໍ່ໄດ້ສອນຄຳສອນຂອງຂ້ອຍເອງ ແຕ່ເປັນຄຳສອນຂອງພະອົງທີ່ໃຊ້ຂ້ອຍມາ.” (ໂຢຮັນ 7:16) ພະເຢຊູຮູ້ວ່າພະເຢໂຫວາຢາກໃຫ້ຜູ້ຄົນໄດ້ຍິນຂ່າວດີເລື່ອງການປົກຄອງຂອງພະເຈົ້າທີ່ຈະມາປົກຄອງໂລກນີ້.
17. ພະເຢຊູສອນຢູ່ໃສແດ່? ເປັນຫຍັງເພິ່ນຈຶ່ງທຸ່ມເທໃຫ້ກັບວຽກສອນຜູ້ຄົນ?
17 ພະເຢຊູໄປສອນຢູ່ທຸກບ່ອນທີ່ມີຄົນ ບໍ່ວ່າຈະເປັນຊົນນະບົດ ໃນເມືອງ ໃນບ້ານຕ່າງໆ ໃນຕະຫຼາດ ວິຫານ ບ່ອນປະຊຸມຂອງຊາວຢິວ ແລະຕາມເຮືອນ. ພະເຢຊູບໍ່ໄດ້ລໍຖ້າໃຫ້ຜູ້ຄົນມາຫາເພິ່ນ ແຕ່ເພິ່ນເປັນຝ່າຍໄປຫາພວກເຂົາ. (ມາຣະໂກ 6:56; ລູກາ 19:5, 6) ພະເຢຊູທຸ່ມເທກຳລັງແລະເວລາເພື່ອສອນຜູ້ຄົນຢ່າງຂະຫຍັນຂັນແຂງ. ເປັນຫຍັງເພິ່ນຈຶ່ງເຮັດແບບນັ້ນ? ກໍຍ້ອນເພິ່ນຮູ້ວ່າພະເຈົ້າຢາກໃຫ້ເພິ່ນເຮັດ ແລະເພິ່ນເຊື່ອຟັງພໍ່ຂອງເພິ່ນສະເໝີ. (ໂຢຮັນ 8:28, 29) ອີກເຫດຜົນໜຶ່ງທີ່ພະເຢຊູປະກາດແລະສອນກໍຍ້ອນເພິ່ນອີ່ຕົນຜູ້ຄົນ. (ອ່ານມັດທາຍ 9:35, 36) ເພິ່ນເຫັນວ່າພວກຫົວໜ້າສາສະໜາບໍ່ໄດ້ສອນຄວາມຈິງກ່ຽວກັບພະເຈົ້າແລະການປົກຄອງຂອງພະອົງ ເພິ່ນຈຶ່ງຢາກຊ່ວຍຜູ້ຄົນໃຫ້ຫຼາຍທີ່ສຸດເທົ່າທີ່ຈະເຮັດໄດ້ເພື່ອໃຫ້ພວກເຂົາໄດ້ຍິນຂ່າວດີ.
18. ເຈົ້າມັກນິດໄສອັນໃດຂອງພະເຢຊູຫຼາຍທີ່ສຸດ?
18 ພະເຢຊູຮັກແລະເປັນຫ່ວງຄົນອື່ນ. ເພິ່ນໃຈດີແລະເປັນກັນເອງ. ແມ່ນແຕ່ເດັກນ້ອຍກໍມັກມາຫາເພິ່ນ. (ມາຣະໂກ 10:13-16) ພະເຢຊູບໍ່ລຳອຽງ. ເພິ່ນກຽດຊັງການສໍ້ໂກງແລະຄວາມບໍ່ຍຸຕິທຳ. (ມັດທາຍ 21:12, 13) ໃນສະໄໝຂອງພະເຢຊູ ຜູ້ຍິງເກືອບຈະບໍ່ມີສິດມີສຽງຫຍັງ ແລະຄົນທົ່ວໄປມັກບໍ່ໃຫ້ກຽດຜູ້ຍິງ. ແຕ່ພະເຢຊູນັບຖືແລະໃຫ້ກຽດຜູ້ຍິງສະເໝີ. (ໂຢຮັນ 4:9, 27) ພະເຢຊູເປັນຄົນຖ່ອມຕົວແທ້ໆ. ຕົວຢ່າງເຊັ່ນ: ໃນຄືນໜຶ່ງເພິ່ນໄດ້ລ້າງຕີນໃຫ້ພວກອັກຄະສາວົກທັງໆທີ່ເປັນວຽກຂອງຄົນໃຊ້.—ໂຢຮັນ 13:2-5, 12-17
ພະເຢຊູໄປປະກາດຢູ່ທຸກບ່ອນທີ່ມີຄົນ
19. ຕົວຢ່າງຫຍັງທີ່ສະແດງວ່າພະເຢຊູເຂົ້າໃຈຄວາມຮູ້ສຶກຂອງຜູ້ຄົນແລະຢາກຊ່ວຍແທ້ໆ?
19 ພະເຢຊູເຂົ້າໃຈວ່າຜູ້ຄົນຮູ້ສຶກແນວໃດແລະຢາກຊ່ວຍພວກເຂົາ. ເລື່ອງນີ້ເຫັນໄດ້ແຈ້ງຕອນທີ່ເພິ່ນໃຊ້ພະລັງຂອງພະເຈົ້າເຮັດການອັດສະຈັນເພື່ອປິ່ນປົວຄົນເຈັບປ່ວຍ. (ມັດທາຍ 14:14) ຕົວຢ່າງເຊັ່ນ: ມີຜູ້ຊາຍຄົນໜຶ່ງທີ່ເປັນຂີ້ທູດໄດ້ມາຫາພະເຢຊູແລ້ວບອກວ່າ: “ພຽງແຕ່ທ່ານຢາກຊ່ວຍ ທ່ານກໍຈະປິ່ນປົວຂ້ອຍໄດ້.” ພະເຢຊູຮູ້ສຶກອີ່ຕົນແລະຢາກຊ່ວຍລາວ ເພາະເພິ່ນເຂົ້າໃຈຄວາມເຈັບປວດແລະຄວາມທຸກຂອງລາວ. ດັ່ງນັ້ນ ພະເຢຊູຈຶ່ງເດ່ມືໄປຈັບຕົວລາວແລະເວົ້າວ່າ: “ຂ້ອຍຢາກຊ່ວຍ! ໃຫ້ເຈົ້າເຊົາພະຍາດເດີ້.” ແລ້ວຜູ້ຊາຍຄົນນັ້ນກໍເຊົາເປັນຂີ້ທູດ! (ມາຣະໂກ 1:40-42) ເຈົ້ານຶກພາບອອກບໍວ່າຜູ້ຊາຍຄົນນັ້ນຈະຮູ້ສຶກແນວໃດ?
ສັດຊື່ຕໍ່ພໍ່ຂອງເພິ່ນສະເໝີ
20, 21. ພະເຢຊູເປັນຕົວຢ່າງທີ່ດີທີ່ສຸດແນວໃດໃນການເຊື່ອຟັງພະເຈົ້າ?
20 ພະເຢຊູເປັນຕົວຢ່າງທີ່ດີທີ່ສຸດໃນເລື່ອງການເຊື່ອຟັງພະເຈົ້າ. ບໍ່ວ່າຈະເກີດຫຍັງຂຶ້ນຫຼືບໍ່ວ່າພວກສັດຕູຈະເຮັດຫຍັງໃຫ້ເພິ່ນ ພະເຢຊູກໍຍັງສັດຊື່ຕໍ່ພໍ່ຂອງເພິ່ນ. ຕົວຢ່າງເຊັ່ນ: ຕອນທີ່ຊາຕານພະຍາຍາມລໍ້ໃຈເພິ່ນໃຫ້ເຮັດຜິດ ພະເຢຊູບໍ່ຍອມເຮັດຜິດຕໍ່ພະເຈົ້າ. (ມັດທາຍ 4:1-11) ທັງໆທີ່ບາງຄົນໃນຄອບຄົວຂອງພະເຢຊູບໍ່ເຊື່ອວ່າເພິ່ນເປັນເມຊີອາ ແລະເວົ້າໃຫ້ເພິ່ນວ່າ “ເສຍຈິດແລ້ວ” ແຕ່ພະເຢຊູກໍຍັງເຮັດວຽກຂອງພະເຈົ້າຕໍ່ໄປ. (ມາຣະໂກ 3:21) ເມື່ອພວກສັດຕູເຮັດຕໍ່ເພິ່ນຢ່າງໂຫດຮ້າຍ ເພິ່ນກໍບໍ່ເຄີຍແກ້ແຄ້ນແລະຍັງສັດຊື່ຕໍ່ພະເຈົ້າສະເໝີ.—1 ເປໂຕ 2:21-23
21 ແມ່ນແຕ່ຕອນທີ່ພະເຢຊູທົນທຸກແລະເຈັບປວດທໍລະມານຈົນຕາຍ ເພິ່ນກໍຍັງເຊື່ອຟັງແລະສັດຊື່ຕໍ່ພະເຢໂຫວາ. (ອ່ານຟີລິບປອຍ 2:8) ຄິດເບິ່ງແມ້ ເພິ່ນຕ້ອງອົດທົນຫຼາຍສ່ຳໃດໃນມື້ສຸດທ້າຍຂອງຊີວິດ. ເພິ່ນຖືກຈັບ ຖືກພະຍານຕົວະໃສ່ຮ້າຍວ່າໝິ່ນປະໝາດພະເຈົ້າ ຖືກຕັດສິນຜິດໆ ຖືກຝູງຄົນເຍາະເຍີ້ຍ ຖືກພວກທະຫານທໍລະມານ ແລະຖືກຕອກເທິງເສົາ. ກ່ອນຕາຍເພິ່ນໄດ້ເວົ້າວ່າ: “ສຳເລັດແລ້ວ!” (ໂຢຮັນ 19:30) ຫຼັງຈາກພະເຢຊູຕາຍໄດ້ສາມມື້ ພະເຢໂຫວາກໍປຸກເພິ່ນໃຫ້ກັບມາມີຊີວິດອີກແຕ່ເປັນຮ່າງກາຍສຳລັບສະຫວັນ. (1 ເປໂຕ 3:18) ແລ້ວຫຼັງຈາກນັ້ນບໍ່ເທົ່າໃດອາທິດ ພະເຢຊູກໍກັບໄປສະຫວັນ “ນັ່ງຢູ່ເບື້ອງຂວາມືຂອງພະເຈົ້າ” ແລະລໍຖ້າຈົນກວ່າພະເຈົ້າຈະໃຫ້ເພິ່ນເປັນກະສັດ.—ເຮັບເຣີ 10:12, 13
22. ການທີ່ພະເຢຊູສັດຊື່ຕໍ່ພໍ່ຂອງເພິ່ນເຮັດໃຫ້ເຮົາມີໂອກາດໄດ້ຮັບຫຍັງ?
22 ຍ້ອນພະເຢຊູສັດຊື່ຕໍ່ພະເຈົ້າຜູ້ເປັນພໍ່ສະເໝີ ເຮົາຈຶ່ງມີໂອກາດໄດ້ຮັບຊີວິດຕະຫຼອດໄປໃນໂລກທີ່ເປັນສວນອຸທິຍານຕາມທີ່ພະເຈົ້າຕັ້ງໃຈໄວ້. ໃນບົດຕໍ່ໄປ ເຮົາຈະຮູ້ວ່າເປັນຫຍັງຄວາມຕາຍຂອງພະເຢຊູຈຶ່ງເຮັດໃຫ້ເຮົາມີຊີວິດຕະຫຼອດໄປໄດ້.
^ ຂໍ້ 8 ໃນສະໄໝທີ່ພະເຢຊູມີຊີວິດຢູ່ ມີຜູ້ພະຍາກອນຄົນໜຶ່ງຊື່ໂຢຮັນ. ຜູ້ຄົນມາຫາໂຢຮັນເພື່ອຮັບບັບເຕມາ. ການຮັບບັບເຕມາແມ່ນການຈຸ່ມຕົວຫຼິບລົງໃນນ້ຳເຊິ່ງເປັນການສະແດງວ່າພວກເຂົາກັບໃຈຈາກບາບທີ່ໄດ້ເຮັດ. ແຕ່ການຮັບບັບເຕມາຂອງພະເຢຊູບໍ່ຄືກັບຂອງຄົນອື່ນ. ພະເຢຊູບໍ່ໄດ້ຮັບບັບເຕມາເພື່ອສະແດງການກັບໃຈຈາກບາບ. ແຕ່ເພິ່ນຮັບບັບເຕມາເພື່ອສະແດງວ່າເພິ່ນສະເໜີຕົວເຮັດທຸກສິ່ງຕາມຄວາມຕ້ອງການຂອງພະເຢໂຫວາ.
^ ຂໍ້ 11 ພະເຢໂຫວາຖືກເອີ້ນວ່າ “ພໍ່” ຍ້ອນພະອົງເປັນຜູ້ສ້າງ. (ເອຊາອີ 64:8) ພະເຢຊູຖືກເອີ້ນວ່າລູກຂອງພະເຈົ້າຍ້ອນພະເຢໂຫວາເປັນຜູ້ສ້າງເພິ່ນ. ທູດສະຫວັນລວມທັງອາດາມກໍຖືກເອີ້ນວ່າລູກຂອງພະເຈົ້າຄືກັນ.—ໂຢບ 1:6; ລູກາ 3:38
