ບົດທີ 2
ຄຳພີໄບເບິນເປັນປຶ້ມທີ່ມາຈາກພະເຈົ້າ
1, 2. ເປັນຫຍັງຄຳພີໄບເບິນຈຶ່ງເປັນຂອງຂວັນທີ່ພິເສດຈາກພະເຈົ້າ?
ເຈົ້າຮູ້ສຶກແນວໃດ ໂດຍທີ່ບໍ່ໄດ້ຄາດຄິດໝູ່ກໍເອົາຂອງຂວັນໃຫ້? ເຈົ້າຄືຊິຢາກເປີດເບິ່ງທັນທີວ່າມັນແມ່ນຫຍັງ. ເຈົ້າດີໃຈຫຼາຍທີ່ຮູ້ວ່າໝູ່ຍັງຄິດຮອດແລະເຈົ້າກໍຢາກຂອບໃຈລາວ.
2 ຄຳພີໄບເບິນເປັນຄືກັບຂອງຂວັນທີ່ພະເຈົ້າໃຫ້ເຮົາ. ໃນຄຳພີໄບເບິນມີຄວາມຮູ້ຫຼາຍຢ່າງທີ່ຊອກບໍ່ໄດ້ຢູ່ບ່ອນອື່ນ. ຕົວຢ່າງເຊັ່ນ: ຄຳພີໄບເບິນບອກເຮົາໃຫ້ຮູ້ວ່າພະເຈົ້າສ້າງສະຫວັນ ສ້າງໂລກ ສ້າງມະນຸດທີ່ເປັນຜູ້ຊາຍແລະຜູ້ຍິງຄູ່ທຳອິດ. ຄຳພີໄບເບິນມີຫຼັກການທີ່ຊ່ວຍເຮົາໃຫ້ແກ້ບັນຫາໄດ້ ແລະຍັງບອກອີກວ່າພະເຈົ້າຈະເຮັດແນວໃດເພື່ອເຮັດໃຫ້ໂລກສວຍງາມແລະເປັນຕາຢູ່ຫຼາຍກວ່ານີ້. ຄຳພີໄບເບິນເປັນຂອງຂວັນທີ່ພິເສດແທ້ໆ!
3. ເຈົ້າຈະຮູ້ຫຍັງເມື່ອຮຽນຄຳພີໄບເບິນ?
3 ເມື່ອຮຽນຄຳພີໄບເບິນ ເຈົ້າຈະຮູ້ວ່າພະເຈົ້າຢາກໃຫ້ເຈົ້າເປັນໝູ່ກັບພະອົງ. ແຮ່ງເຈົ້າຮຽນເລື່ອງພະອົງຫຼາຍເທົ່າໃດ ເຈົ້າກໍຈະສະໜິດກັບພະອົງຫຼາຍເທົ່ານັ້ນ.
4. ມີຫຍັງທີ່ເປັນຕາງຶດກ່ຽວກັບຄຳພີໄບເບິນ?
4 ມີການແປຄຳພີໄບເບິນໝົດຫົວຫຼືບາງສ່ວນໃນຫຼາຍກວ່າ 3.000 ພາສາ ແລະມີການພິມຄຳພີໄບເບິນຫຼາຍພັນລ້ານຫົວ. ຜູ້ຄົນຫຼາຍກວ່າ 90 ເປີເຊັນຢູ່ທົ່ວໂລກສາມາດຊອກອ່ານຄຳພີໄບເບິນໄດ້ໃນພາສາຂອງຕົວເອງ ແລະທຸກໆອາທິດມີຫຼາຍກວ່າໜຶ່ງລ້ານຄົນໄດ້ຮັບຄຳພີໄບເບິນ! ບໍ່ມີປຶ້ມຫົວໃດທີ່ຄືກັບຄຳພີໄບເບິນ.
5. ເປັນຫຍັງຈຶ່ງເວົ້າໄດ້ວ່າຄຳພີໄບເບິນເປັນປຶ້ມທີ່ “ພະເຈົ້າດົນໃຈໃຫ້ຂຽນຂຶ້ນມາ”?
5 ຄຳພີໄບເບິນເປັນປຶ້ມທີ່ “ພະເຈົ້າດົນໃຈໃຫ້ຂຽນຂຶ້ນມາ.” (ອ່ານ 2 ຕີໂມທຽວ 3:16) ແຕ່ບາງຄົນອາດຄິດວ່າ ‘ມະນຸດເປັນຄົນຂຽນຄຳພີໄບເບິນ ແລ້ວເປັນຫຍັງຈຶ່ງບອກວ່າເປັນປຶ້ມທີ່ມາຈາກພະເຈົ້າ?’ ຄຳພີໄບເບິນບອກວ່າ: “ມະນຸດເວົ້າສິ່ງທີ່ມາຈາກພະເຈົ້າຕາມທີ່ພະລັງບໍລິສຸດຂອງພະອົງຊີ້ນຳ.” (2 ເປໂຕ 1:21) ເລື່ອງນີ້ກໍຄືກັບຫົວໜ້າຄົນໜຶ່ງທີ່ສັ່ງລູກນ້ອງໃຫ້ຂຽນຈົດໝາຍໃຫ້ລາວ. ຖ້າເຮົາໄດ້ຮັບຈົດໝາຍສະບັບນັ້ນ ເຮົາຈະຄິດວ່າຈົດໝາຍນັ້ນມາຈາກໃຜ? ແນ່ນອນ ເຮົາຈະຄິດວ່າຈົດໝາຍນັ້ນມາຈາກຫົວໜ້າບໍ່ແມ່ນຈາກລູກນ້ອງ. ຄຳພີໄບເບິນກໍເປັນແບບນັ້ນ ພະເຈົ້າເປັນຄືກັບຫົວໜ້າໃນຕົວຢ່າງນີ້ ພະອົງບອກໃຫ້ມະນຸດຂຽນຄຳພີໄບເບິນ. ດັ່ງນັ້ນ ເນື້ອໃນຂອງຄຳພີໄບເບິນຈຶ່ງມາຈາກພະເຈົ້າບໍ່ແມ່ນມະນຸດ. ຄຳພີໄບເບິນເປັນ “ຄຳສອນຂອງພະເຈົ້າ.”—1 ເທຊະໂລນິກ 2:13, ເບິ່ງຄຳອະທິບາຍເພີ່ມເຕີມ 2
ຄຳພີໄບເບິນສະບັບແປໂລກໃໝ່ ມີໃຫ້ອ່ານໃນພາສາຕ່າງໆ
ເລື່ອງທັງໝົດໃນຄຳພີໄບເບິນຖືກຕ້ອງ
6, 7. (ກ) ມີຫຍັງອີກທີ່ພິເສດກ່ຽວກັບຄຳພີໄບເບິນ? (ຂ) ຄຳພີໄບເບິນບໍ່ຂັດແຍ່ງກັນແນວໃດ?
6 ຄຳພີໄບເບິນໃຊ້ເວລາຂຽນດົນກວ່າ 1.600 ປີ. ຄົນທີ່ຂຽນກໍຢູ່ຄົນລະຍຸກຄົນລະສະໄໝ. ບາງຄົນມີຄວາມຮູ້ສູງ ບາງຄົນກໍເປັນປະຊາຊົນທຳມະດາ. ຄົນທີ່ຂຽນຄຳພີໄບເບິນມີຫຼາກຫຼາຍອາຊີບ ເຊັ່ນ: ຊາວໄຮ່ຊາວນາ ຊາວປະມົງ ຄົນລ້ຽງແກະ ຜູ້ພະຍາກອນ ຜູ້ພິພາກສາ ແລະກະສັດ. ເຖິງວ່າຈະມີຫຼາຍຄົນຂຽນແຕ່ເນື້ອໃນທັງໝົດໃນຄຳພີໄບເບິນກໍສອດຄ່ອງກັນ. ບໍ່ມີສ່ວນໃດໃນຄຳພີໄບເບິນຂັດແຍ່ງກັນເລີຍ. *
7 ຄຳພີໄບເບິນບໍ່ໄດ້ຂັດແຍ່ງກັນຕັ້ງແຕ່ບົດຕົ້ນໆຈົນຮອດບົດທ້າຍໆ. ໃນບົດຕົ້ນໆຂອງຄຳພີໄບເບິນບອກໃຫ້ເຮົາຮູ້ວ່າບັນຫາທັງໝົດໃນໂລກນີ້ເລີ່ມຕົ້ນແນວໃດ? ໃນບົດທ້າຍໆບອກວ່າພະເຈົ້າຈະແກ້ໄຂບັນຫາທັງໝົດນີ້ແລະເຮັດໃຫ້ໂລກເປັນສວນທີ່ສວຍງາມອີກຄັ້ງໜຶ່ງ. ເລື່ອງຕ່າງໆໃນຄຳພີໄບເບິນກວມເອົາປະຫວັດສາດຫຼາຍພັນປີຂອງມະນຸດ ແລະເຮັດໃຫ້ເຫັນວ່າເມື່ອພະເຈົ້າຕັ້ງໃຈຈະເຮັດຫຍັງ ທຸກຢ່າງກໍຈະຕ້ອງເປັນໄປຕາມນັ້ນສະເໝີ.
8. ຂໍໃຫ້ເຈົ້າຍົກຕົວຢ່າງທີ່ສະແດງໃຫ້ເຫັນວ່າຄຳພີໄບເບິນຖືກຕ້ອງຕາມຫຼັກວິທະຍາສາດ.
8 ຄຳພີໄບເບິນບໍ່ແມ່ນປຶ້ມວິທະຍາສາດຫຼືປຶ້ມແບບຮຽນ ແຕ່ເນື້ອໃນຂອງຄຳພີໄບເບິນຖືກຕ້ອງຕາມຫຼັກວິທະຍາສາດ ນີ້ເປັນຫຼັກຖານທີ່ຈະແຈ້ງວ່າຄຳພີໄບເບິນຕ້ອງມາຈາກພະເຈົ້າແທ້ໆ. ຕົວຢ່າງເຊັ່ນ: ໃນປຶ້ມພວກເລວີ ພະເຈົ້າສັ່ງຊາວອິດສະຣາເອນກ່ຽວກັບວິທີປ້ອງກັນບໍ່ໃຫ້ເຊື້ອພະຍາດແພ່ກະຈາຍ. ເລື່ອງນີ້ຂຽນຕັ້ງແຕ່ດົນກ່ອນທີ່ຄົນເຮົາຈະຮູ້ກ່ຽວກັບເຊື້ອແບັກທີເຣຍແລະເຊື້ອໄວຣັດ. ນອກຈາກນັ້ນ ສະໄໝທີ່ຄົນເຊື່ອວ່າໜ່ວຍໂລກແບນ ແຕ່ຄຳພີໄບເບິນບອກວ່າໜ່ວຍໂລກກົມ. (ເອຊາອີ 40:22) ແລະຄຳພີໄບເບິນຍັງບອກຢ່າງຖືກຕ້ອງວ່າໜ່ວຍໂລກຫ້ອຍຢູ່ໂດຍບໍ່ຕິດກັບຫຍັງ.—ໂຢບ 26:7
9. ການທີ່ຜູ້ຂຽນຄຳພີໄບເບິນບອກທຸກສິ່ງຢ່າງສັດຊື່ສະແດງໃຫ້ເຫັນຫຍັງ?
9 ເມື່ອເວົ້າເຖິງດ້ານປະຫວັດສາດ ຄຳພີໄບເບິນກໍຖືກຕ້ອງສະເໝີ. ມີປຶ້ມປະຫວັດສາດຫຼາຍຫົວທີ່ບໍ່ໄດ້ໃຫ້ຂໍ້ມູນຄົບຖ້ວນຊັດເຈນເພາະຜູ້ຂຽນບໍ່ບອກຄວາມຈິງທັງໝົດ ເຊັ່ນ: ພວກເຂົາບໍ່ຍອມຂຽນເລື່ອງທີ່ຊາດຂອງຕົນແພ້ໃນສົງຄາມ. ແຕ່ຜູ້ຂຽນຄຳພີໄບເບິນບອກທຸກເລື່ອງແມ່ນແຕ່ເລື່ອງທີ່ຊາດອິດສະຣາເອນເຊິ່ງເປັນຊາດຂອງພວກເຂົາເອງແພ້ສົງຄາມ ແລະຍັງມີຫຼາຍຄົນເຖິງຂັ້ນຂຽນຄວາມຜິດພາດຂອງຕົນເອງດ້ວຍຊ້ຳ ເຊັ່ນ: ໃນປຶ້ມຈົດເຊັນບັນຊີ ໂມເຊບອກວ່າລາວເຮັດຜິດຮ້າຍແຮງແລະຖືກພະເຈົ້າລົງໂທດ. (ຈົດເຊັນບັນຊີ 20:2-12) ການທີ່ຜູ້ຂຽນບອກທຸກສິ່ງຢ່າງສັດຊື່ສະແດງໃຫ້ເຫັນແຈ້ງວ່າຄຳພີໄບເບິນເປັນປຶ້ມທີ່ມາຈາກພະເຈົ້າແລະເຊື່ອຖືໄດ້.
ປຶ້ມທີ່ມີຄຳແນະນຳທີ່ດີສຳລັບທຸກຄົນ
10. ເປັນຫຍັງຄຳແນະນຳໃນຄຳພີໄບເບິນຈຶ່ງເປັນປະໂຫຍດຕໍ່ເຮົາໃນທຸກມື້ນີ້?
10 ຄຳພີໄບເບິນເປັນປຶ້ມທີ່ “ພະເຈົ້າດົນໃຈໃຫ້ຂຽນຂຶ້ນມາ ມີປະໂຫຍດສຳລັບສອນ ຕັກເຕືອນ ແກ້ໄຂສິ່ງຕ່າງໆໃຫ້ຮຽບຮ້ອຍ.” (2 ຕີໂມທຽວ 3:16) ດັ່ງນັ້ນ ຄຳພີໄບເບິນຈຶ່ງມີຄຳແນະນຳທີ່ເປັນປະໂຫຍດຕໍ່ເຮົາໃນທຸກມື້ນີ້. ເນື່ອງຈາກວ່າພະເຢໂຫວາເປັນຜູ້ສ້າງເຮົາ ພະອົງຈຶ່ງເຂົ້າໃຈວ່າເຮົາຄິດແລະຮູ້ສຶກແນວໃດ. ພະອົງຮູ້ຈັກເຮົາດີກວ່າທີ່ເຮົາຮູ້ຈັກຕົວເອງດ້ວຍຊ້ຳ. ພະອົງຍັງຮູ້ອີກວ່າສິ່ງໃດດີຫຼືສິ່ງໃດບໍ່ດີສຳລັບເຮົາ ແລະພະອົງຢາກໃຫ້ເຮົາມີຄວາມສຸກ.
11, 12. (ກ) ພະເຢຊູໃຫ້ຄຳແນະນຳທີ່ດີຫຍັງແດ່ໃນປຶ້ມມັດທາຍບົດ 5 ເຖິງ 7? (ຂ) ໃນຄຳພີໄບເບິນຍັງມີຄຳສອນທີ່ດີຫຍັງອີກ?
11 ມັດທາຍບົດ 5 ເຖິງບົດ 7 ມີຄຳແນະນຳທີ່ດີຫຼາຍ. ພະເຢຊູແນະນຳວ່າເຮົາຕ້ອງເຮັດແນວໃດເພື່ອຈະມີຄວາມສຸກ ເຮັດແນວໃດຈຶ່ງຈະເຂົ້າກັບຄົນອື່ນໄດ້ ເຮົາຄວນອະທິດຖານແນວໃດ ແລະຄວນຄິດແນວໃດເລື່ອງເງິນ. ເຖິງວ່າພະເຢຊູຈະໃຫ້ຄຳແນະນຳນີ້ 2.000 ກວ່າປີມາແລ້ວ ແຕ່ຄຳແນະນຳນີ້ຍັງໃຊ້ໄດ້ແທ້ແລະເປັນປະໂຫຍດຕໍ່ເຮົາໃນທຸກມື້ນີ້ນຳ.
12 ໃນຄຳພີໄບເບິນຍັງມີຄຳສອນຂອງພະເຢໂຫວາກ່ຽວກັບຫຼັກການຕ່າງໆທີ່ຊ່ວຍໃຫ້ຊີວິດຄອບຄົວຂອງເຮົາດີຂຶ້ນ ຊ່ວຍໃຫ້ເຮົາມີນິດໄສທີ່ດີໃນການເຮັດວຽກ ແລະສອນວິທີຢູ່ຮ່ວມກັບຄົນອື່ນຢ່າງເປັນມິດ. ຫຼັກການໃນຄຳພີໄບເບິນຊ່ວຍເຮົາໄດ້ສະເໝີບໍ່ວ່າເຮົາເປັນໃຜ ມາຈາກໃສ ຫຼືກຳລັງມີບັນຫາຫຍັງ.—ອ່ານເອຊາອີ 48:17; ເບິ່ງຄຳອະທິບາຍເພີ່ມເຕີມ 3
ຄຳພະຍາກອນໃນຄຳພີໄບເບິນເຊື່ອຖືໄດ້
ຜູ້ຂຽນຄຳພີໄບເບິນຊື່ເອຊາຢາບອກລ່ວງໜ້າວ່າເມືອງບາບີໂລນຈະຖືກຍຶດ
13. ເອຊາຢາບອກລ່ວງໜ້າວ່າຈະເກີດຫຍັງຂຶ້ນກັບເມືອງບາບີໂລນ?
13 ໃນຄຳພີໄບເບິນມີຄຳພະຍາກອນຫຼາຍເລື່ອງແລະຕໍ່ມາກໍເກີດຂຶ້ນແທ້ ເຊັ່ນ: ດົນມາແລ້ວທີ່ພະເຈົ້າໄດ້ໃຊ້ຜູ້ຊາຍຄົນໜຶ່ງທີ່ຊື່ເອຊາຢາໃຫ້ພະຍາກອນວ່າເມືອງບາບີໂລນຈະຖືກທຳລາຍ. (ເອຊາອີ 13:19) ລາວບອກລ່ວງໜ້າຢ່າງລະອຽດຈະແຈ້ງວ່າເມືອງນີ້ຈະຖືກຍຶດແນວໃດ. ເຖິງວ່າຕອນນັ້ນເມືອງບາບີໂລນມີປະຕູໃຫຍ່ທີ່ແໜ້ນໜາແລະຍັງມີແມ່ນ້ຳອ້ອມຮອບເຊິ່ງປ້ອງກັນເມືອງໄດ້ຢ່າງດີ. ແຕ່ເອຊາຢາພະຍາກອນວ່າແມ່ນ້ຳຈະແຫ້ງແລະປະຕູຈະຖືກເປີດປະໄວ້ ສັດຕູຈະຍຶດເມືອງໄດ້ໂດຍບໍ່ຕ້ອງສູ້ຮົບ ແລະຍັງບອກອີກວ່າຜູ້ທີ່ຈະມາຍຶດເມືອງບາບີໂລນຊື່ຊີຣຶຊ.—ອ່ານເອຊາອີ 44:27–45:2; ເບິ່ງຄຳອະທິບາຍເພີ່ມເຕີມ 4
14, 15. ເລື່ອງທີ່ເອຊາຢາພະຍາກອນໄວ້ເກີດຂຶ້ນແທ້ແນວໃດ?
14 ຫຼັງຈາກນັ້ນ 200 ປີ ເຫດການກໍເກີດຂຶ້ນແທ້ຕາມຄຳພະຍາກອນທີ່ຂຽນໄວ້ ມີກອງທັບໜຶ່ງມາໂຈມຕີເມືອງບາບີໂລນ. ແມ່ທັບທີ່ນຳໜ້າກອງທັບຊື່ຫຍັງ? ລາວຊື່ຊີຣຶຊເປັນກະສັດຂອງເປີເຊຍ (ເປເຣເຊ) ເຊິ່ງກົງກັບທີ່ຄຳພະຍາກອນບອກໄວ້ແທ້ໆ. ແລ້ວເຫດການອື່ນໆກໍເກີດຂຶ້ນກັບເມືອງບາບີໂລນຕາມທີ່ພະຍາກອນໄວ້.
15 ໃນຄືນທີ່ມີການໂຈມຕີ ຊາວບາບີໂລນກຳລັງຈັດງານລ້ຽງທີ່ຍິ່ງໃຫຍ່. ພວກເຂົາຮູ້ສຶກວ່າຕົວເອງປອດໄພເພາະເມືອງບາບີໂລນມີກຳແພງທີ່ແໜ້ນໜາທົນທານແລະມີແມ່ນ້ຳອ້ອມຮອບ. ແຕ່ທາງນອກຊີຣຶຊກັບທະຫານໄດ້ຂຸດຮ່ອງເພື່ອປ່ຽນທິດທາງການໄຫຼຂອງນ້ຳ ແລະເມື່ອລະດັບນ້ຳຫຼຸດລົງທະຫານເປີເຊຍກໍຍ່າງລຸຍນ້ຳຂ້າມໄປໄດ້. ແຕ່ພວກເຂົາຈະເຂົ້າໄປໃນເມືອງໄດ້ແນວໃດເພາະບາບີໂລນມີກຳແພງແໜ້ນໜາ? ເປັນໄປຕາມຄຳພະຍາກອນກໍຄື ປະຕູເມືອງຖືກເປີດປະໄວ້ ພວກເຂົາຈຶ່ງເຂົ້າໄປແລະຍຶດເມືອງໄດ້ໂດຍບໍ່ຕ້ອງສູ້ຮົບ.
16. (ກ) ຍັງມີຄຳພະຍາກອນຫຍັງອີກກ່ຽວກັບເມືອງບາບີໂລນ? (ຂ) ຄຳພະຍາກອນນີ້ໄດ້ເກີດຂຶ້ນແທ້ແນວໃດ?
16 ເອຊາຢາຍັງພະຍາກອນອີກວ່າໃນທີ່ສຸດຈະບໍ່ມີຜູ້ໃດອາໄສຢູ່ໃນເມືອງບາບີໂລນອີກເລີຍ. ລາວຂຽນວ່າ: “ເມືອງນັ້ນຈະບໍ່ມີຊາວຊົນ [ອາໄສຢູ່] ຈັກເທື່ອແລະເຂົາຈະບໍ່ຕັ້ງຢູ່ທີ່ນັ້ນແຕ່ຊົ່ວອາຍຸນີ້ສືບໄປຊົ່ວອາຍຸນັ້ນ.” (ເອຊາອີ 13:20) ເປັນແນວນັ້ນແທ້ໆບໍ? ສະຖານທີ່ທີ່ເມືອງບາບີໂລນບູຮານເຄີຍຕັ້ງຢູ່ ເຊິ່ງຫ່າງຈາກເມືອງແບກແດດຂອງປະເທດອີຣັກໄປທາງໃຕ້ປະມານ 80 ກິໂລແມັດ ຕອນນີ້ເປັນພຽງຊາກຫັກພັງ. ທຸກມື້ນີ້ກໍຍັງບໍ່ມີໃຜອາໄສຢູ່ທີ່ນັ້ນ. ພະເຢໂຫວາ “ກວາດທຳລາຍເມືອງນັ້ນໃຫ້ສິ້ນຊາກເໝືອນໃຊ້ໄມ້ກວາດ.”—ເອຊາອີ 14:22, 23, ລ.ມ. *
ຊາກຫັກພັງຂອງເມືອງບາບີໂລນ
17. ເປັນຫຍັງເຮົາໝັ້ນໃຈໄດ້ວ່າທຸກສິ່ງທີ່ພະເຈົ້າສັນຍາໄວ້ຈະເກີດຂຶ້ນແທ້?
17 ເມື່ອເຫັນວ່າຄຳພະຍາກອນໃນຄຳພີໄບເບິນຫຼາຍເລື່ອງເກີດຂຶ້ນແລ້ວ ເຮັດໃຫ້ເຮົາໝັ້ນໃຈວ່າຄຳພະຍາກອນເລື່ອງອື່ນໆທີ່ຄຳພີໄບເບິນບອກໄວ້ກ່ຽວກັບອະນາຄົດຈະຕ້ອງເກີດຂຶ້ນແທ້ແນ່ນອນ. ເຮົາໝັ້ນໃຈໄດ້ວ່າພະເຢໂຫວາຈະເຮັດໃຫ້ໂລກເປັນສວນທີ່ສວຍງາມຕາມທີ່ສັນຍາໄວ້. (ອ່ານຈົດເຊັນບັນຊີ 23:19) ເຮົາສາມາດໝັ້ນໃຈໃນ “ຄວາມຫວັງເລື່ອງຊີວິດຕະຫຼອດໄປ ພະເຈົ້າສັນຍາເລື່ອງນີ້ໄວ້ດົນນານມາແລ້ວ ແລະພະເຈົ້າເວົ້າຕົວະບໍ່ໄດ້.”—ຕີໂຕ 1:2 *
ຄຳພີໄບເບິນປ່ຽນຊີວິດເຈົ້າໄດ້
18. ໂປໂລເວົ້າແນວໃດກ່ຽວກັບ “ຖ້ອຍຄຳຂອງພະເຈົ້າ”?
18 ເຮົາໄດ້ຮູ້ແລ້ວວ່າບໍ່ມີປຶ້ມຫົວໃດຄືກັບຄຳພີໄບເບິນ. ຄຳພີໄບເບິນບໍ່ຂັດແຍ່ງກັນ ແລະເມື່ອເວົ້າເຖິງເລື່ອງວິທະຍາສາດຫຼືເລື່ອງປະຫວັດສາດກໍຖືກຕ້ອງສະເໝີ. ນອກຈາກນັ້ນ ຄຳພີໄບເບິນຍັງມີຄຳແນະນຳທີ່ດີແລະມີຄຳພະຍາກອນທີ່ເກີດຂຶ້ນແທ້. ແຕ່ຍັງມີຫຼາຍກວ່ານັ້ນອີກ ຜູ້ຂຽນຄຳພີໄບເບິນຄົນໜຶ່ງທີ່ຊື່ໂປໂລບອກວ່າ: “ຖ້ອຍຄຳຂອງພະເຈົ້າມີຊີວິດ ມີພະລັງຫຼາຍ.” ນີ້ໝາຍຄວາມວ່າແນວໃດ?—ອ່ານເຮັບເຣີ 4:12
19, 20. (ກ) ຄຳພີໄບເບິນມີພະລັງແນວໃດ? (ຂ) ເຈົ້າຈະສະແດງຄວາມຂອບໃຈແນວໃດສຳລັບຄຳພີໄບເບິນທີ່ເປັນຄືກັບຂອງຂວັນ?
19 ຄຳພີໄບເບິນມີ “ພະລັງ” ສາມາດປ່ຽນຊີວິດເຈົ້າໄດ້. ຄຳພີໄບເບິນມີຫຼັກການທີ່ຊ່ວຍເຈົ້າໃຫ້ປັບປຸງຕົວເອງແລະມີຊີວິດທີ່ດີຂຶ້ນ. ທີ່ຈິງ ເຈົ້າຈະມີຊີວິດທີ່ດີແລະມີຄວາມສຸກຖ້າເຈົ້າເອົາຄຳສອນທີ່ມີພະລັງຂອງຄຳພີໄບເບິນມາໃຊ້ໃນຊີວິດ. ນອກຈາກນັ້ນ ຄຳພີໄບເບິນຍັງຊ່ວຍໃຫ້ຮູ້ວ່າເຈົ້າເປັນຄົນແນວໃດແທ້ໆ ແລະຊ່ວຍເຈົ້າໃຫ້ເຂົ້າໃຈຄວາມຄິດແລະຄວາມຮູ້ສຶກເລິກໆຂອງເຈົ້າ ເຊັ່ນ: ເຮົາອາດບອກວ່າຮັກພະເຈົ້າ ແຕ່ຖ້າເຮົາຮຽນຄຳພີໄບເບິນແລ້ວບໍ່ໄດ້ເຮັດຕາມສິ່ງທີ່ພະເຈົ້າບອກ ກໍສະແດງວ່າເຮົາບໍ່ໄດ້ຮັກພະເຈົ້າແທ້ໆ.
20 ຄຳພີໄບເບິນເປັນປຶ້ມທີ່ມາຈາກພະເຈົ້າແທ້ໆ. ພະອົງຢາກໃຫ້ເຈົ້າອ່ານ ສຶກສາ ແລະຮັກຄຳພີໄບເບິນ. ຂໍໃຫ້ເຈົ້າຂອບໃຈພະເຈົ້າທີ່ໃຫ້ຂອງຂວັນນີ້ໂດຍຮຽນຮູ້ຕໍ່ໆໄປ ແລ້ວເຈົ້າກໍຈະເຂົ້າໃຈວ່າພະເຈົ້າຢາກໃຫ້ມະນຸດມີຊີວິດແບບໃດ. ໃນບົດຕໍ່ໄປ ເຮົາຈະຮຽນຫຼາຍຂຶ້ນກ່ຽວກັບເລື່ອງນີ້.
^ ຂໍ້ 6 ບາງຄົນບອກວ່າເລື່ອງໃນຄຳພີໄບເບິນຂັດແຍ່ງກັນ ແຕ່ນີ້ບໍ່ແມ່ນຄວາມຈິງ ເບິ່ງຈຸນລະສານໜັງສືສຳລັບທຸກຄົນ ໜ້າ 16, 17 (ບໍ່ມີໃນພາສາລາວ) ຫົວຂໍ້ຍ່ອຍ “ຖືກຕ້ອງແມ່ນຢຳທຸກລາຍລະອຽດ.” ຈັດພິມໂດຍພະຍານພະເຢໂຫວາ.
^ ຂໍ້ 16 ຖ້າເຈົ້າຢາກຮູ້ຫຼາຍຂຶ້ນກ່ຽວກັບຄຳພະຍາກອນໃນຄຳພີໄບເບິນ ໃຫ້ອ່ານຈຸນລະສານໜັງສືສຳລັບທຸກຄົນ ໜ້າ 27-29 (ບໍ່ມີໃນພາສາລາວ) ຈັດພິມໂດຍພະຍານພະເຢໂຫວາ.
^ ຂໍ້ 17 ການທີ່ເມືອງບາບີໂລນຖືກທຳລາຍເປັນພຽງຕົວຢ່າງໜຶ່ງຂອງຄຳພະຍາກອນໃນຄຳພີໄບເບິນທີ່ເກີດຂຶ້ນແທ້ ຍັງມີຄຳພະຍາກອນອີກຫຼາຍເລື່ອງທີ່ເກີດຂຶ້ນແລ້ວ. ເຈົ້າສາມາດອ່ານລາຍລະອຽດຂອງຄຳພະຍາກອນກ່ຽວກັບພະເຢຊູຄລິດໃນຄຳອະທິບາຍເພີ່ມເຕີມ 5.
ເລື່ອງທີ່ເຈົ້າອາດຈະມັກ
ຄຳສອນ
ເຮົາໝັ້ນໃຈໄດ້ແນວໃດວ່າຄຳພີໄບເບິນເປັນຄວາມຈິງ?
ຖ້າພະເຈົ້າເປັນຜູ້ແຕ່ງຄຳພີໄບເບິນກໍຄົງຈະບໍ່ຄືກັບປຶ້ມອື່ນໆທີ່ຂຽນຂຶ້ນ.
