ຕອນ 6
ເປັນຫຍັງພະເຢໂຫວາຈຶ່ງສ້າງເຮົາ?
ກະສັດຊາໂລໂມນໄດ້ກວດສອບຄຳຖາມນັ້ນເຊີ່ງກ່ຽງພັນເຖິງຄວາມໝາຍຂອງຊີວິດ
ສໍາລັບເຮົາ ການຮູ້ຈັກພະເຢໂຫວາໝາຍເຖິງຫຍັງ? ປະການໜຶ່ງຄື ໝາຍເຖິງການພົບຄຳຕອບສຳລັບຄຳຖາມເຊິ່ງເຮັດໃຫ້ຫຼາຍພັນລ້ານຄົນຄຶດບໍ່ອອກນັ້ນແມ່ນ ‘ເປັນຫຍັງຂ້ອຍຢູ່ທີ່ນີ້?’ ເຮົາອາດຄຶດສົງໄສກ່ຽວກັບເລື່ອງນີ້ບາງຄັ້ງຄາວ. ກະສັດອົງໜຶ່ງທີ່ສະຫຼາດແລະຮັ່ງມີ “ກວ່າກະສັດທັງປວງ” ໃນສະໄໝນັ້ນ ໄດ້ກວດສອບຄຳຖາມນີ້ເຊິ່ງກ່ຽວພັນເຖິງຄວາມໝາຍຂອງຊີວິດ. (ຂ່າວຄາວທີ2 9:22; ຜູ້ເທສະໜາປ່າວປະກາດ 2:1-13) ກະສັດອົງນີ້ຄືຊາໂລໂມນ ຜູ້ມີອຳນາດຍິ່ງໃຫຍ່, ຮັ່ງມີຫຼາຍ, ແລະດ້ານສະຕິປັນຍາບໍ່ມີໃຜທຽບເທົ່າໄດ້. ຜົນຈາກການກວດສອບຂອງລາວເປັນແນວໃດ? “ຈົ່ງຢ້ານຢຳພະເຈົ້າ ແລະຈົ່ງຖືຮັກສາຄຳສັ່ງທັງຫຼາຍຂອງພະອົງ ເຫດວ່າການນີ້ເປັນສັບພະທຸກສິ່ງແກ່ມະນຸດ.” (ຜູ້ເທສະໜາປ່າວປະກາດ 12:13) ເນື່ອງຈາກປະສົບການຂອງຊາໂລໂມນມີຫຼາຍກວ່າປະສົບການຂອງຄົນສ່ວນຫຼາຍ ຂໍ້ສະຫລຸບຂອງລາວຈຶ່ງມີຄຸນຄ່າຕໍ່ການພິຈາລະນາ.—ຜູ້ເທສະໜາປ່າວປະກາດ 2:12.
2 ຄວາມຢ້ານຢຳພະເຈົ້າທີ່ຊາໂລໂມນກ່າວເຖິງນັ້ນ ບໍ່ແມ່ນຄວາມຢ້ານແບບຜິດທຳມະຊາດຕໍ່ອຳນາດວິນຍານເຊິ່ງບໍ່ຮູ້ຈັກ ແຕ່ເປັນຄວາມຢ້ານທີ່ເໝາະສົມວ່າຈະເຮັດໃຫ້ຄົນເຊິ່ງເຮົາຮັກທີ່ສຸດບໍ່ພໍໃຈ. ຖ້າເຮົາຮັກບຸກຄົນໜຶ່ງຢ່າງເລິກເຊິ່ງ ແນ່ນອນເຮົາຕ້ອງການເຮັດໃຫ້ຜູ້ນັ້ນພໍໃຈຕະຫຼອດເວລາ ແລະພະຍາຍາມຫຼີກລ່ຽງການເຮັດສິ່ງໃດກໍຕາມທີ່ອາດພາໃຫ້ເຂົາເຈົ້າຂັດເຄືອງໃຈ. ເຮົາຈະຮູ້ສຶກແບບດຽວກັນຕໍ່ພະເຢໂຫວາ ເມື່ອເຮົາຮັກພະອົງແລ້ວ.
3 ໂດຍການອ່ານຄຳພີໄບເບິນ ເຮົາສາມາດຮູ້ວ່າພະຜູ້ສ້າງຂອງເຮົາມັກແລະກຽດຊັງສິ່ງໃດແດ່ ພ້ອມທັງໄດ້ຮູ້ເຖິງຈຸດປະສົງຂອງພະອົງໃນການສ້າງແຜ່ນດິນໂລກ. ຄຳພີໄບເບິນພັນລະນາວ່າພະເຢໂຫວາເປັນ “ຜູ້ໄດ້ແຕ່ງແຜ່ນດິນແລະໄດ້ສ້າງດິນ” ນອກຈາກນັ້ນ ຍັງບອກວ່າພະອົງເປັນຜູ້ທີ່ “ໄດ້ນິລະມິດສ້າງແຜ່ນດິນບໍ່ໃຊ່ໃຫ້ຢູ່ເປົ່າ ພະອົງໄດ້ສ້າງແຜ່ນດິນໃຫ້ມີຊາວຊົນ.” (ເອຊາອີ 45:18) ພະເຢໂຫວາໄດ້ກຽມແຜ່ນດິນໂລກໄວ້ໃຫ້ເປັນບ່ອນຢູ່ອາໄສຂອງມະນຸດ ຜູ້ທີ່ຕ້ອງເບິ່ງແຍງຮັກສາແຜ່ນດິນໂລກແລະສິ່ງມີຊີວິດທັງປວງເທິງແຜ່ນດິນໂລກ. (ຕົ້ນເດິມ 1:28) ເຖິງແນວນັ້ນກໍຕາມ ພະເຢໂຫວາໄດ້ສ້າງມະນຸດດ້ວຍຈຸດປະສົງເພື່ອໃຫ້ເບິ່ງແຍງແຜ່ນດິນໂລກຢ່າງດຽວເທົ່ານັ້ນບໍ?
ອາດາມແລະເອວາເຄີຍມີສາຍສຳພັນອັນດີກັບພະເຈົ້າ
4 ບໍ່ແມ່ນ ພະອົງມີຈຸດປະສົງທີ່ສູງກວ່ານັ້ນ. ອາດາມມະນຸດຄົນທຳອິດໄດ້ມີສາຍສຳພັນອັນດີກັບພະເຢໂຫວາ. ອາດາມສາມາດຕິດຕໍ່ກັບພະຜູ້ສ້າງໄດ້ໂດຍກົງ ສາມາດຟັງສິ່ງທີ່ພະເຈົ້າກ່າວຕໍ່ລາວ ແລະສາມາດບອກພະເຢໂຫວາເຖິງຄວາມຄິດເຫັນຂອງລາວ. (ຕົ້ນເດິມ 1:28-30; 3:8-13, 16-19; ກິດຈະການ 17:26-28) ເພາະສະນັ້ນ ອາດາມແລະເອວາເມຍຂອງລາວ ໄດ້ມີໂອກາດອັນດີເພື່ອຮູ້ຈັກພະເຢໂຫວາຫຼາຍຂຶ້ນແລະພ້ອມທັງພັດທະນາສາຍສຳພັນອັນເລິກເຊິ່ງກັບພະອົງ. ໂດຍການຮູ້ຈັກພະເຢໂຫວາແລະຮຽນເອົາແບບຢ່າງຂອງພະອົງ ການດຳເນີນຊີວິດຂອງທັງສອງຈະເປັນເລື່ອງທີ່ອີ່ມໃຈພໍໃຈ ເພາະພະອົງເປັນ “ພະເຈົ້າຜູ້ມີຄວາມສຸກ.” (1 ຕີໂມເຕ 1:11) ໃນຖານະພະເຈົ້າ “ຜູ້ໄດ້ປະທານສິ່ງສາລະພັດໃຫ້ແກ່ເຮົາທັງຫຼາຍເປັນອັນບໍລິບູນສຳລັບຄວາມຍິນດີຂອງເຮົາທັງຫຼາຍ” ພະເຢໂຫວາໃຫ້ມະນຸດຄູ່ທຳອິດຢູ່ໃນອຸທິຍານເຊິ່ງເອີ້ນວ່າສວນເອເດນ ພ້ອມດ້ວຍຄວາມຫວັງທີ່ຈະມີຊີວິດຕະຫຼອດໄປ.—1 ຕີໂມເຕ 6:17; ຕົ້ນເດິມ 2:8, 9, 16, 17.
ການຄົ້ນພົບເມື່ອບໍ່ດົນມານີ້ກ່ຽວກັບຈຸລັງຂອບມະນຸດຊີ້ບອກເຖິງເລື່ອງໃດ?
5 ຊີວິດຕະຫຼອດໄປບໍ? ເຮົາອາດຖືວ່າເລື່ອງຊີວິດຕະຫຼອດໄປເປັນເລື່ອງເຫຼືອເຊື່ອ ບໍ່ມີເຫດຜົນແຕ່ຢ່າງໃດເລີຍ ແຕ່ວ່າມັນເປັນແນວນັ້ນແທ້ໆບໍ? ນັກວິທະຍາສາດເຊື່ອວ່າໃນເວລານີ້ເຂົາເຈົ້າມີຄວາມເຂົ້າໃຈຢ່າງເລິກເຊິ່ງໃນສິ່ງທີ່ເຮັດໃຫ້ຈຸລັງເຖົ້າແກ່ລົງ. ສານພັນທຸກຳນ້ອຍໆເອີ້ນວ່າເທໂລເມຍ ເຊິ່ງຕິດຢູ່ທາງປາຍຂອງໂຄຣໂມໂຊມ ນັ້ນຈະສັ້ນເຂົ້າເມື່ອຈຸລັງແບ່ງຕົວ. ຫຼັງຈາກຈຸລັງແບ່ງຕົວ 50 ເຖິງ 100 ເທື່ອ ເທໂລເມຍໝົດພະລັງແລະຈຸລັງສ່ວນຫຼາຍຈະຢຸດການແບ່ງຕົວ. ເຖິງແນວນັ້ນກໍຕາມ ການຄົ້ນພົບທາງວິທະຍາສາດເມື່ອບໍ່ດົນມານີ້ຊີ້ບອກວ່າ ດ້ວຍຄວາມຊ່ວຍເຫຼືອຂອງເອນໄຊມເຊິ່ງເອີ້ນວ່າເທໂລມີເຣສ ຈຸລັງມະນຸດສາມາດແບ່ງຕົວຕໍ່ໆໄປໂດຍບໍ່ມີສິ້ນສຸດ. ເຖິງແມ່ນວ່າການຄົ້ນພົບນີ້ບໍ່ໄດ້ໝາຍຄວາມວ່າພະເຢໂຫວາເຮັດໃຫ້ຊີວິດຕະຫຼອດໄປເປັນໄປໄດ້ໂດຍທາງເອນໄຊມ ແຕ່ມັນຊີ້ບອກເຖິງສິ່ງໜຶ່ງຄື ຄວາມຄິດເລື່ອງຊີວິດຕະຫຼອດໄປບໍ່ແມ່ນເລື່ອງທີ່ບໍ່ມີເຫດຜົນ!
6 ແນ່ນອນ ສິ່ງທີ່ຄຳພີໄບເບິນບັນທຶກໄວ້ສະແດງໃຫ້ເຫັນວ່າມະນຸດຄູ່ທຳອິດຖືກສ້າງຂຶ້ນເພື່ອມີຊີວິດຕະຫຼອດໄປນັ້ນເປັນເລື່ອງເຊື່ອຖືໄດ້. ມະນຸດຈະມີສຳພັນທະພາບທີ່ດີຂຶ້ນເລື້ອຍໆກັບພະເຢໂຫວາໂດຍບໍ່ມີເວລາກຳນົດ. ເຂົາເຈົ້າຈະສ້າງຄວາມຜູກພັນອັນແໜ້ນແຟ້ນກັບພະບິດາຝ່າຍສະຫວັນ ໂດຍມີຄວາມເຂົ້າໃຈຢ່າງຄົບຖ້ວນເຖິງຈຸດປະສົງຂອງພະອົງສຳລັບມະນຸດຊາດເທິງແຜ່ນດິນໂລກ ແລະເຮັດໃຫ້ຈຸດປະສົງນັ້ນສຳເລັດ. ຊີວິດຂອງເຂົາເຈົ້າຈະບໍ່ເປັນເລື່ອງເບື່ອໜ່າຍ. ອາດາມແລະເອວາເຄີຍມີໂອກາດດີທີ່ສຸດທີ່ຈະເຮັດໃຫ້ແຜ່ນດິນໂລກເຕັມໄປດ້ວຍລູກຫຼານທີ່ສົມບູນແລະມີຄວາມສຸກ. ເຂົາເຈົ້າຈະມີວຽກທີ່ໜ້າພໍໃຈແລະມີຄວາມໝາຍໃຫ້ເຮັດຕະຫຼອດໄປ. ນັ້ນຄົງຈະເປັນຊີວິດທີ່ອີ່ມໃຈພໍໃຈຢ່າງແທ້ຈິງ!—ຕົ້ນເດິມ 1:28.
ເລື່ອງທີ່ເຈົ້າອາດຈະມັກ
ຄຳສອນ
ເປັນຫຍັງພະເຈົ້າຈຶ່ງສ້າງໂລກ?
ໂລກຂອງເຮົາເຕັມໄປດ້ວຍສິ່ງທີ່ງົດງາມ. ໂລກຢູ່ຫ່າງຈາກດວງຕາເວັນໃນໄລຍະທີ່ເໝາະສົມ ແລະໃຫ້ໂລກປິ່ນອ້ອມຕົວມັນເອງດ້ວຍຄວາມໄວທີ່ພໍດີ. ເປັນຫຍັງພະເຈົ້າຈຶ່ງສ້າງໂລກໃຫ້ສວຍງາມຫຼາຍປານນີ້?
