ບົດທີ 45

ຄວາມເປັນກາງໝາຍເຖິງຫຍັງ?

ເປີດ

ພະເຢຊູບອກວ່າລູກສິດຂອງເພິ່ນຕ້ອງ ‘ບໍ່ເປັນຄົນຂອງໂລກນີ້.’ (ໂຢຮັນ 15:19) ການບໍ່ເປັນຄົນຂອງໂລກລວມເຖິງການຮັກສາຄວາມເປັນກາງນຳ ຖ້າເຮົາຢາກເປັນກາງເຮົາຕ້ອງບໍ່ຫຍຸ້ງກ່ຽວກັບການເມືອງແລະສົງຄາມ. ແຕ່ການເຮັດແບບນັ້ນອາດຈະບໍ່ງ່າຍ. ເພາະເຮົາອາດຈະຖືກບາງຄົນເວົ້າໃຫ້ຫຼືຕຳໜິເຮົາ. ຖ້າເປັນແນວນັ້ນ ເຮົາຈະເຮັດແນວໃດຈຶ່ງຈະຮັກສາຄວາມເປັນກາງແລະພັກດີຕໍ່ພະເຢໂຫວາໄດ້?

1. ຄລິດສະຕຽນຄວນຄິດແນວໃດກັບການປົກຄອງຂອງມະນຸດ?

ຄລິດສະຕຽນເຊື່ອຟັງເຈົ້າໜ້າທີ່ບ້ານເມືອງ. ເຮົາເຮັດແບບນັ້ນເພາະພະເຢຊູສອນວ່າ “ສິ່ງໃດທີ່ເປັນຂອງເຊຊາກໍໃຫ້ແກ່ເຊຊາ” ດັ່ງນັ້ນ ເຮົາຈະເຮັດຕາມກົດໝາຍບ້ານເມືອງ ເຊັ່ນກົດໝາຍທີ່ບອກໃຫ້ເສຍພາສີ. (ມາຣະໂກ 12:17) ຄຳພີໄບເບິນບອກວ່າພະເຢໂຫວາຍອມໃຫ້ການປົກຄອງຕ່າງໆຂອງມະນຸດມີອຳນາດປົກຄອງບ້ານເມືອງ. (ໂຣມ 13:1) ເລື່ອງນີ້ເຮັດໃຫ້ເຮົາຮູ້ວ່າການປົກຄອງຂອງມະນຸດມີອຳນາດຈຳກັດ ແລະມີອຳນາດໜ້ອຍກວ່າພະເຈົ້າ. ແລະເຮົາເຊື່ອວ່າພະເຢໂຫວາແລະການປົກຄອງໃນສະຫວັນຂອງເພິ່ນເທົ່ານັ້ນທີ່ຈະມາແກ້ໄຂບັນຫາທັງໝົດຂອງມະນຸດ.

2. ເຮົາອາດເຮັດຫຍັງໄດ້ແດ່ເພື່ອສະແດງວ່າເຮົາເປັນກາງ?

ເຮົາບໍ່ຫຍຸ້ງກ່ຽວກັບການເມືອງ ຄືທີ່ພະເຢຊູບໍ່ຫຍຸ້ງກ່ຽວກັບການເມືອງ. ມີເທື່ອໜຶ່ງທີ່ຜູ້ຄົນຢາກຕັ້ງເພິ່ນໃຫ້ເປັນກະສັດຂອງເຂົາເຈົ້າເພາະເຫັນເພິ່ນເຮັດການອັດສະຈັນ ແຕ່ພະເຢຊູບໍ່ຍອມຮັບຕຳແໜ່ງນັ້ນ. (ໂຢຮັນ 6:15) ເປັນຫຍັງ? ເພາະເພິ່ນບອກວ່າ “ການປົກຄອງຂອງຂ້ອຍບໍ່ໄດ້ເປັນສ່ວນໜຶ່ງຂອງໂລກນີ້.” (ໂຢຮັນ 18:36) ພວກເຮົາທີ່ເປັນລູກສິດຂອງພະເຢຊູກໍຮຽນແບບຕົວຢ່າງຂອງເພິ່ນນຳ ເຮົາເປັນກາງໃນຫຼາຍວິທີ. ເຊັ່ນ ເຮົາຈະບໍ່ເຂົ້າຮ່ວມໃນສົງຄາມ. (ອ່ານມີເກ 4:3) ເຮົາໃຫ້ຄວາມນັບຖືສັນຍະລັກຂອງຊາດ ເຊັ່ນທຸງຊາດ ແຕ່ເຮົາຈະບໍ່ສະແດງຄວາມເຄົາລົບທຸງຊາດແລະບໍ່ຮ້ອງເພງຊາດ ເພາະນັ້ນເປັນການນະມັດສະການແບບໜຶ່ງ. (1 ໂຢຮັນ 5:21) ເຮົາບໍ່ເຂົ້າໄປຫຍຸ້ງຫຼືສະໜັບສະໜູນຝ່າຍໃດຝ່າຍໜຶ່ງທາງກາງເມືອງ. ເມື່ອເຮົາພະຍາຍາມຮັກສາຄວາມເປັນກາງ ກໍສະແດງວ່າເຮົາພັກດີຕໍ່ການປົກຄອງຂອງພະເຈົ້າແທ້ໆ.

ຮຽນຮູ້ຫຼາຍຂຶ້ນ

ມີສະຖານະການໃດແດ່ທີ່ອາດເຮັດໃຫ້ບໍ່ງ່າຍທີ່ຈະຮັກສາຄວາມເປັນກາງ ແລະເຈົ້າຈະຕັດສິນໃຈໃນແບບທີ່ເຮັດໃຫ້ພະເຢໂຫວາພໍໃຈໄດ້ແນວໃດ.

3. ຄລິດສະຕຽນແທ້ວາງໂຕເປັນກາງ

ພະເຢຊູກັບລູກສິດຂອງເພິ່ນເປັນຕົວຢ່າງໃຫ້ເຮົາ. ອ່ານໂຣມ 13:1, 5-7 ແລະ 1 ເປໂຕ 2:13, 14. ແລ້ວ ເປີດວິດີໂອແລະລົມກັນກ່ຽວກັບຄຳຖາມຕໍ່ໄປນີ້:

ວິດີໂອ: ຄລິດສະຕຽນແທ້ວາງໂຕເປັນກາງ—ຕອນ 1 (4:28)

ເປັນຫຍັງເຮົາຄວນໃຫ້ຄວາມນັບຖືເຈົ້າໜ້າທີ່ບ້ານເມືອງ?
ເຮົາຈະເຮັດຫຍັງໄດ້ແດ່ເພື່ອສະແດງໃຫ້ເຫັນວ່າເຮົາຍອມຢູ່ໃຕ້ອຳນາດເຂົາເຈົ້າ?

ໃນຊ່ວງສົງຄາມ ບາງປະເທດອ້າງວ່າວາງໂຕເປັນກາງ ແຕ່ເຂົາເຈົ້າກັບສະໜັບສະໜູນການສູ້ຮົບຂອງທັງສອງຝ່າຍ. ແທ້ໆແລ້ວຄວາມເປັນກາງໝາຍເຖິງຫຍັງ? ອ່ານໂຢຮັນ 17:16. ແລ້ວ ເປີດວິດີໂອແລະລົມກັນກ່ຽວກັບຄຳຖາມຕໍ່ໄປນີ້:

ວິດີໂອ: ຄລິດສະຕຽນແທ້ວາງໂຕເປັນກາງ—ຕອນ 2 (3:11)

ຄວາມເປັນກາງໝາຍເຖິງຫຍັງ?

ຖ້າເຈົ້າໜ້າທີ່ບ້ານເມືອງສັ່ງໃຫ້ເຮົາເຮັດບາງຢ່າງທີ່ຂັດກັບກົດໝາຍຂອງພະເຈົ້າ ເຮົາຈະເຮັດແນວໃດ? ອ່ານກິດຈະການ 5:28, 29. ແລ້ວ ເປີດວິດີໂອແລະລົມກັນກ່ຽວກັບຄຳຖາມຕໍ່ໄປນີ້:

ວິດີໂອ: ຄລິດສະຕຽນແທ້ວາງໂຕເປັນກາງ—ຕອນ 3 (1:18)

ຖ້າກົດໝາຍຂອງມະນຸດຂັດກັບກົດໝາຍຂອງພະເຈົ້າ ເຮົາຄວນເຊື່ອຟັງກົດໝາຍຂອງໃຜ?
ເຈົ້າຄິດວ່າມີສະຖານະການໃດແດ່ທີ່ຄລິດສະຕຽນຈະບໍ່ເຊື່ອຟັງຄຳສັ່ງຂອງເຈົ້າໜ້າທີ່ບ້ານເມືອງ?

4. ເປັນກາງທັງໃນຄວາມຄິດແລະການກະທຳ

ອ່ານ 1 ໂຢຮັນ 5:21. ແລ້ວ ເປີດວິດີໂອແລະລົມກັນກ່ຽວກັບຄຳຖາມຕໍ່ໄປນີ້:

ວິດີໂອ: ເຫດຜົນທີ່ຄລິດສະຕຽນແທ້ຕ້ອງມີຄວາມກ້າຫານ—ໃນການຮັກສາຄວາມເປັນກາງ (2:49)

ຈາກວິດີໂອ ເປັນຫຍັງພີ່ນ້ອງອະເຍນເກຕັດສິນໃຈບໍ່ສະໜັບສະໜູນພັກການເມືອງຫຼືເຂົ້າຮ່ວມກິດຈະກຳທີ່ສະແດງຄວາມຮັກຊາດ ເຊັ່ນການເຄົາລົບທຸງຊາດ?
ເຈົ້າຄິດວ່າລາວຕັດສິນໃຈໄດ້ຖືກຕ້ອງບໍ?

ມີສະຖານະການຫຍັງອີກທີ່ເຮັດໃຫ້ບໍ່ງ່າຍທີ່ຈະຮັກສາຄວາມເປັນກາງ? ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້:

ວິດີໂອ: ບົດຮຽນຈາກຫໍສັງເກດການ—ຮັກສາຄວາມເປັນກາງໃນໂລກທີ່ມີການແບ່ງແຍກ (5:16)

ຖ້າມີການແຂ່ງຂັນກິລາລະດັບຊາດທີ່ມີຫຼາຍປະເທດມາເຂົ້າຮ່ວມ ເຮົາຈະຮັກສາຄວາມເປັນກາງໄດ້ແນວໃດ?
ຖ້າມີນະໂຍບາຍຂອງພັກການເມືອງທີ່ເຮັດໃຫ້ເຮົາໄດ້ປະໂຫຍດຫຼືເສຍຜົນປະໂຫຍດ ຕອນນັ້ນເຮົາຈະຮັກສາຄວາມເປັນກາງໄດ້ແນວໃດ?
ສິ່ງທີ່ເຮົາໄດ້ຍິນຈາກຂ່າວຫຼືຄົນທີ່ຢູ່ອ້ອມຂ້າງອາດມີຜົນກັບເຮົາແນວໃດໃນເລື່ອງການວາງໂຕເປັນກາງ?