ບົດທີ 34

ເຮົາຈະເຮັດແນວໃດເພື່ອສະແດງໃຫ້ເຫັນວ່າເຮົາຮັກພະເຢໂຫວາແທ້ໆ?

ເປີດ

ເຈົ້າຮູ້ສຶກໃກ້ຊິດກັບພະເຈົ້າຫຼາຍຂຶ້ນບໍເມື່ອເຈົ້າເລີ່ມຮຽນຄຳພີໄບເບິນ? ເຈົ້າຢາກຈະສະໜິດກັບເພິ່ນຫຼາຍກວ່ານີ້ບໍ? ຄັນຊັ້ນ ຂໍໃຫ້ຈື່ໄວ້ວ່າເມື່ອພະເຢໂຫວາເຫັນວ່າເຈົ້າຮັກເພິ່ນຫຼາຍຂຶ້ນເລື້ອຍໆ ເພິ່ນກໍຈະຮັກແລະເປັນຫ່ວງເຈົ້າຫຼາຍຂຶ້ນຄືກັນ. ແຕ່ເຈົ້າຈະເຮັດແນວໃດເພື່ອສະແດງໃຫ້ເຫັນວ່າເຈົ້າຮັກເພິ່ນແທ້ໆ?

1. ເຮົາຈະເຮັດແນວໃດເພື່ອສະແດງໃຫ້ເຫັນວ່າເຮົາຮັກພະເຢໂຫວາ?

ຖ້າເຮົາເຊື່ອຟັງພະເຢໂຫວາ ເຮົາກໍສະແດງໃຫ້ເຫັນວ່າເຮົາຮັກເພິ່ນ. (ອ່ານ 1 ໂຢຮັນ 5:3) ພະເຢໂຫວາບໍ່ເຄີຍບັງຄັບໃຫ້ໃຜເຊື່ອຟັງເພິ່ນ. ແຕ່ເພິ່ນໃຫ້ໂອກາດເຮົາແຕ່ລະຄົນເລືອກໄດ້ເອງວ່າເຮົາຈະເຊື່ອຟັງເພິ່ນຫຼືບໍ່. ຍ້ອນຫຍັງ? ກໍຍ້ອນວ່າພະເຢໂຫວາຢາກໃຫ້ເຮົາ “ເຕັມໃຈເຊື່ອຟັງ” ເພິ່ນ. (ໂຣມ 6:17) ນີ້ໝາຍຄວາມວ່າພະເຢໂຫວາຢາກໃຫ້ເຈົ້າເຊື່ອຟັງເພິ່ນ ບໍ່ແມ່ນຍ້ອນຖືກບັງຄັບ ແຕ່ຍ້ອນເຈົ້າຮັກເພິ່ນ. ຕອນ 3 ແລະຕອນ 4 ຂອງປຶ້ມນີ້ຈະຊ່ວຍເຈົ້າໃຫ້ສະແດງຄວາມຮັກຕໍ່ພະເຢໂຫວາໄດ້ໂດຍເຮັດສິ່ງທີ່ເພິ່ນມັກ ແລະບໍ່ເຮັດສິ່ງທີ່ເພິ່ນກຽດຊັງ.

2. ເປັນຫຍັງຈຶ່ງບໍ່ງ່າຍທີ່ຈະສະແດງໃຫ້ເຫັນວ່າເຮົາຮັກພະເຢໂຫວາ?

“ຄົນເຮັດດີເຈິຄວາມລຳບາກຫຼາຍຢ່າງ.” (ຄຳເພງ 34:19, ລ.ມ.) ເຮົາທຸກຄົນເປັນມະນຸດບໍ່ສົມບູນແບບ. ແລະເຮົາອາດຈະຕ້ອງເຈິກັບບັນຫາເສດຖະກິດ ຄວາມບໍ່ຍຸຕິທຳ ແລະບັນຫາອື່ນໆອີກຫຼາຍຢ່າງ. ຕອນທີ່ເຮົາຕ້ອງເຈິກັບບັນຫາຫຼາຍຢ່າງເຮົາອາດຮູ້ສຶກວ່າບໍ່ງ່າຍທີ່ຈະເຊື່ອຟັງແລະເຮັດຕາມສິ່ງທີ່ພະເຢໂຫວາບອກ. ແຕ່ຖ້າເຈົ້າພະຍາຍາມເຮັດຕາມສິ່ງທີ່ພະເຢໂຫວາບອກ ເຈົ້າກໍສະແດງໃຫ້ເຫັນວ່າເຈົ້າຮັກເພິ່ນຫຼາຍກວ່າທຸກສິ່ງທຸກຢ່າງ. ແລະເຈົ້າກໍຈະເຮັດໃຫ້ເຫັນນຳອີກວ່າເຈົ້າພັກດີຕໍ່ເພິ່ນ. ແລ້ວພະເຢໂຫວາກໍຈະພັກດີຕໍ່ເຈົ້າ. ເພິ່ນຈະບໍ່ມີວັນປະຖິ້ມເຈົ້າເລີຍ.—ອ່ານຄຳເພງ 4:3

ຮຽນຮູ້ຫຼາຍຂຶ້ນ

ມາເບິ່ງນຳກັນວ່າເປັນຫຍັງພະເຢໂຫວາຈຶ່ງມີຄວາມສຸກຖ້າເຮົາເຊື່ອຟັງເພິ່ນ ແລະອັນໃດຈະຊ່ວຍເຮົາໃຫ້ເຊື່ອຟັງເພິ່ນຕໍ່ໆໄປໄດ້.

3. ເລື່ອງສຳຄັນທີ່ກ່ຽວຂ້ອງກັບເຈົ້າ

ຈາກເລື່ອງລາວໃນປຶ້ມໂຢບ ເຮົາເຫັນວ່າຊາຕານກ່າວຫາໂຢບແລະທຸກຄົນທີ່ຢາກຮັບໃຊ້ພະເຈົ້າ. ອ່ານໂຢບ 1:1, 6-2:10 ແລ້ວລົມກັນກ່ຽວກັບຄຳຖາມຕໍ່ໄປນີ້:

ຊາຕານບອກວ່າໂຢບເຊື່ອຟັງພະເຢໂຫວາຍ້ອນຫຍັງ?—ເບິ່ງໂຢບ 1:9-11
ຊາຕານກ່າວຫາມະນຸດທຸກຄົນວ່າແນວໃດ ລວມທັງໂຕເຈົ້ານຳ?—ເບິ່ງໂຢບ 2:4

ອ່ານໂຢບ 27:5ຂ ແລ້ວລົມກັນກ່ຽວກັບຄຳຖາມຕໍ່ໄປນີ້:

ໂຢບສະແດງໃຫ້ເຫັນແນວໃດວ່າລາວຮັກພະເຢໂຫວາແທ້ໆ?

ໂຢບເຮັດໃຫ້ເຫັນວ່າລາວຮັກພະເຢໂຫວາໂດຍສັດຊື່ຕໍ່ເພິ່ນສະເໝີ

ເຮົາເຮັດໃຫ້ເຫັນວ່າເຮົາຮັກພະເຢໂຫວາເມື່ອເຮົາສັດຊື່ຕໍ່ເພິ່ນສະເໝີ

4. ເຮັດໃຫ້ພະເຢໂຫວາມີຄວາມສຸກ

ອ່ານສຸພາສິດ 27:11 ແລ້ວລົມກັນກ່ຽວກັບຄຳຖາມຕໍ່ໄປນີ້:

ພະເຢໂຫວາຈະຮູ້ສຶກແນວໃດຖ້າເຈົ້າສະຫຼາດແລະເຊື່ອຟັງເພິ່ນ? ເປັນຫຍັງເພິ່ນຈຶ່ງຮູ້ສຶກແບບນັ້ນ?

5. ເຈົ້າສັດຊື່ຕໍ່ພະເຢໂຫວາໄດ້

ຖ້າເຮົາຮັກພະເຢໂຫວາ ເຮົາກໍຢາກຈະບອກເລື່ອງຂອງເພິ່ນໃຫ້ຄົນອື່ນຟັງ. ຖ້າເຮົາສັດຊື່ຕໍ່ເພິ່ນ ເຮົາກໍຢາກຈະເຊື່ອຟັງເພິ່ນແມ່ນແຕ່ຕອນທີ່ບໍ່ງ່າຍ. ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້:

ວິດີໂອ: ປົກປ້ອງຄວາມເຊື່ອເຖິງວ່າຈະເຈິການຕໍ່ຕ້ານ (5:09)

ບາງຄັ້ງເຈົ້າຮູ້ສຶກວ່າຍາກບໍທີ່ຈະບອກເລື່ອງຂອງພະເຢໂຫວາໃຫ້ຄົນອື່ນຟັງ?
ໃນວິດີໂອ ອັນໃດຊ່ວຍໃຫ້ເກຣສັນບໍ່ຢ້ານ?

ເຮົາຈະສັດຊື່ພັກດີຕໍ່ພະເຢໂຫວາໄດ້ງ່າຍຂຶ້ນຖ້າເຮົາຮັກສິ່ງທີ່ເພິ່ນຮັກແລະກຽດຊັງສິ່ງທີ່ເພິ່ນກຽດຊັງ. ອ່ານຄຳເພງ 97:10 ແລ້ວລົມກັນກ່ຽວກັບຄຳຖາມຕໍ່ໄປນີ້:

ຈາກທີ່ເຈົ້າໄດ້ຮຽນມາ ມີຫຍັງແດ່ທີ່ພະເຢໂຫວາຮັກ? ແລະມີຫຍັງແດ່ທີ່ພະເຢໂຫວາກຽດຊັງ?
ອັນໃດຈະຊ່ວຍເຈົ້າໃຫ້ຮັກສິ່ງທີ່ດີແລະກຽດຊັງສິ່ງທີ່ຊົ່ວ?

6. ເຮົາຈະໄດ້ຮັບປະໂຫຍດຖ້າເຮົາເຊື່ອຟັງພະເຢໂຫວາ

ການເຊື່ອຟັງພະເຢໂຫວາເປັນສິ່ງທີ່ດີທີ່ສຸດສະເໝີສຳລັບເຮົາ. ອ່ານເອຊາອີ 48:17, 18 ແລ້ວລົມກັນກ່ຽວກັບຄຳຖາມຕໍ່ໄປນີ້:

ເຮົາໝັ້ນໃຈໄດ້ບໍວ່າພະເຢໂຫວາຮູ້ວ່າອັນໃດດີທີ່ສຸດສຳລັບເຮົາສະເໝີ? ເປັນຫຍັງເຈົ້າຈຶ່ງຄິດແນວນັ້ນ?
ຕັ້ງແຕ່ເຈົ້າເລີ່ມຮຽນຄຳພີໄບເບິນ ແລະໄດ້ຮູ້ຈັກກັບພະເຢໂຫວາ ເຈົ້າໄດ້ຮັບປະໂຫຍດຫຍັງແດ່?

ບາງຄົນເວົ້າວ່າ: “ເຮົາຈະເຮັດຫຍັງພະເຈົ້າກໍບໍ່ສົນໃຈດອກ.”