ບົດທີ 16

ພະເຢຊູເຮັດຫຍັງຕອນທີ່ຢູ່ເທິງໂລກ?

ເປີດ

ເມື່ອເວົ້າເຖິງພະເຢຊູ ຫຼາຍຄົນອາດນຶກເຖິງເພິ່ນວ່າເປັນແອນ້ອຍທີ່ຢູ່ໃນຮາງຫຍ້າ ເປັນຜູ້ນຳຂອງສາສະໜາຄລິດ ຫຼືອາດນຶກເຖິງຕອນທີ່ເພິ່ນກຳລັງຈະຕາຍ. ແຕ່ເຮົາຈະຮູ້ຈັກເພິ່ນຫຼາຍຂຶ້ນໄດ້ ຖ້າເຮົາເບິ່ງວ່າເພິ່ນເຮັດຫຍັງແດ່ຕອນທີ່ຢູ່ໃນໂລກ. ໃນບົດນີ້ ເຮົາຈະມາເບິ່ງວ່າພະເຢຊູໄດ້ເຮັດສິ່ງທີ່ສຳຄັນຫຍັງແດ່ ແລະເລື່ອງເຫຼົ່ານີ້ມີຜົນກັບເຮົາແນວໃດ.

1. ວຽກສຳຄັນທີ່ສຸດຂອງພະເຢຊູແມ່ນຫຍັງ?

ວຽກສຳຄັນທີ່ສຸດຂອງພະເຢຊູແມ່ນການ “ປະກາດຂ່າວດີເລື່ອງການປົກຄອງຂອງພະເຈົ້າ.” (ອ່ານລູກາ 4:43) ຕອນຢູ່ໃນໂລກ ພະເຢຊູໃຊ້ເວລາສາມປີເຄິ່ງປະກາດຂ່າວດີວ່າພະເຈົ້າຈະຕັ້ງການປົກຄອງຂອງເພິ່ນຂຶ້ນມາ ແລະການປົກຄອງນີ້ຈະມາແກ້ໄຂບັນຫາທຸກຢ່າງຂອງມະນຸດ. a ພະເຢຊູຕັ້ງໃຈບອກຂ່າວດີນີ້ໃຫ້ທຸກຄົນຮູ້.—ມັດທາຍ 9:35

2. ເປັນຫຍັງພະເຢຊູເຮັດການອັດສະຈັນ?

ຄຳພີໄບເບິນບອກວ່າ ‘ພະເຈົ້າໃຫ້ພະເຢຊູເຮັດການອັດສະຈັນແລະສະແດງປາຕິຫານຕ່າງໆ.’ (ກິດຈະການ 2:22) ພະເຢໂຫວາໃຫ້ພະລັງກັບພະເຢຊູ ເພິ່ນຈຶ່ງສາມາດຄວບຄຸມດິນຟ້າອາກາດ ສາມາດລ້ຽງອາຫານຫຼາຍພັນຄົນ ປິ່ນປົວຄົນເຈັບປ່ວຍ ແລະເຖິງຂັ້ນຊ່ວຍຄົນທີ່ຕາຍແລ້ວໃຫ້ກັບມາມີຊີວິດອີກໄດ້. (ມັດທາຍ 8:23-27; 14:15-21; ມາຣະໂກ 6:56; ລູກາ 7:11-17) ການອັດສະຈັນທີ່ພະເຢຊູເຮັດບອກໃຫ້ຮູ້ວ່າພະເຈົ້າສົ່ງເພິ່ນມາ ແລະຍັງເຮັດໃຫ້ເຮົາຮູ້ນຳອີກວ່າພະເຢໂຫວາມີອຳນາດທີ່ຈະແກ້ໄຂບັນຫາທຸກຢ່າງໄດ້.

3. ພະເຢຊູເປັນຕົວຢ່າງໃຫ້ເຮົາແນວໃດ?

ບໍ່ວ່າພະເຢຊູຈະເຮັດຫຍັງ ເພິ່ນກໍເຊື່ອຟັງພະເຢໂຫວາສະເໝີ. (ອ່ານໂຢຮັນ 8:29) ເຖິງວ່າຈະມີບາງຄົນພະຍາຍາມເຮັດໃຫ້ພະເຢຊູເຊົາເຊື່ອຟັງພະເຈົ້າ ແຕ່ຕະຫຼອດຊີວິດຂອງເພິ່ນ ເພິ່ນກໍເຮັດທຸກສິ່ງທຸກຢ່າງຕາມທີ່ພະເຈົ້າບອກໃຫ້ເຮັດ. ພະເຢຊູເຮັດໃຫ້ເຫັນວ່າເຖິງຄົນເຮົາຈະຕ້ອງເຈິກັບບັນຫາຫຼາຍຢ່າງ ແຕ່ເຮົາກໍສາມາດເຊື່ອຟັງພະເຈົ້າໄດ້. ຄຳພີໄບເບິນບອກວ່າ ພະເຢຊູ ‘ເປັນຕົວຢ່າງເພື່ອໃຫ້ພວກເຮົາຍ່າງຕາມຮອຍຕີນເພິ່ນຢ່າງໃກ້ຊິດ.’—1 ເປໂຕ 2:21

ຮຽນຮູ້ຫຼາຍຂຶ້ນ

ພະເຢຊູບອກຂ່າວດີກັບຜູ້ຄົນແລະເຮັດການອັດສະຈັນຫຼາຍຢ່າງ.

4. ພະເຢຊູບອກຂ່າວດີ

ພະເຢຊູຍ່າງຫຼາຍຮ້ອຍກິໂລແມັດຕາມຫົນທາງທີ່ເຕັມແຕ່ຂີ້ຝຸ່ນເພື່ອໄປບອກຂ່າວດີກັບຜູ້ຄົນໃຫ້ຫຼາຍທີ່ສຸດເທົ່າທີ່ຈະເຮັດໄດ້. ອ່ານລູກາ 8:1 ແລ້ວລົມກັນກ່ຽວກັບຄຳຖາມຕໍ່ໄປນີ້:

ພະເຢຊູບອກຂ່າວດີກັບຄົນທີ່ມາຫາເພິ່ນເທົ່ານັ້ນບໍ?
ພະເຢຊູເຮັດຫຍັງເພື່ອຈະໄດ້ພົບຜູ້ຄົນ?

ພະເຈົ້າບອກລ່ວງໜ້າວ່າເມຊີອາຈະປະກາດຂ່າວດີ. ອ່ານເອຊາຢາ 61:1, 2 ແລ້ວລົມກັນກ່ຽວກັບຄຳຖາມຕໍ່ໄປນີ້:

ພະເຢຊູເຮັດໃຫ້ຄຳພະຍາກອນນີ້ເກີດຂຶ້ນແທ້ແນວໃດ?
ເຈົ້າຄິດວ່າຜູ້ຄົນໃນທຸກມື້ນີ້ຈຳເປັນຕ້ອງໄດ້ຍິນຂ່າວດີທີ່ພະເຢຊູປະກາດບໍ?

5. ພະເຢຊູສອນຫຼາຍເລື່ອງທີ່ມີປະໂຫຍດຫຼາຍ

ນອກຈາກຈະບອກຂ່າວດີເລື່ອງການປົກຄອງຂອງພະເຈົ້າແລ້ວ ພະເຢຊູຍັງສອນຫຼາຍເລື່ອງທີ່ມີປະໂຫຍດແລະເອົາໄປໃຊ້ໄດ້ແທ້. ໃຫ້ເຮົາມາເບິ່ງບາງເລື່ອງຈາກຄຳບັນລະຍາຍເທິງພູຂອງພະເຢຊູ ຄຳບັນລະຍາຍນີ້ມີຊື່ສຽງຫຼາຍ. ອ່ານມັດທາຍ 6:14, 34 ແລະ 7:12 ແລ້ວລົມກັນກ່ຽວກັບຄຳຖາມຕໍ່ໄປນີ້:

ຈາກຂໍ້ຄຳພີທີ່ອ່ານໄປ ພະເຢຊູໃຫ້ຄຳແນະນຳເລື່ອງຫຍັງແດ່?
ເຈົ້າຄິດວ່າເລື່ອງທີ່ພະເຢຊູສອນຍັງໃຊ້ໄດ້ໃນທຸກມື້ນີ້ບໍ?

6. ພະເຢຊູເຮັດການອັດສະຈັນ

ພະເຢໂຫວາໃຫ້ພະລັງກັບພະເຢຊູເພື່ອຈະເຮັດການອັດສະຈັນຫຼາຍຢ່າງ. ໃຫ້ເຮົາມາເບິ່ງເລື່ອງໜຶ່ງນຳກັນ ອ່ານມາຣະໂກ 5:25-34 ຫຼື ເປີດວິດີໂອ. ແລ້ວລົມກັນກ່ຽວກັບຄຳຖາມຕໍ່ໄປນີ້:

ວິດີໂອ: ຜູ້ຍິງຄົນໜຶ່ງເຊົາຈາກການເຈັບປ່ວຍ (5:10)

ຜູ້ຍິງຄົນນີ້ໝັ້ນໃຈໃນເລື່ອງຫຍັງ?
ເຈົ້າປະທັບໃຈຫຍັງຈາກການອັດສະຈັນນີ້?

ອ່ານໂຢຮັນ 5:36 ແລ້ວລົມກັນກ່ຽວກັບຄຳຖາມຕໍ່ໄປນີ້:

ຈາກຂໍ້ຄຳພີທີ່ອ່ານໄປ ການອັດສະຈັນທີ່ພະເຢຊູເຮັດ“ເປັນຫຼັກຖານ” ຢືນຢັນເລື່ອງຫຍັງ?

ເຈົ້າຮູ້ບໍ?

ເຮົາຮູ້ເລື່ອງຂອງພະເຢຊູຈາກປຶ້ມຂ່າວດີ 4 ຫົວໃນຄຳພີໄບເບິນຄື ປຶ້ມມັດທາຍ ມາຣະໂກ ລູກາ ແລະໂຢຮັນ. ຜູ້ຂຽນປຶ້ມແຕ່ລະຫົວບອກລາຍລະອຽດຕ່າງໆກ່ຽວກັບພະເຢຊູ. ເມື່ອເຮົາອ່ານປຶ້ມຂ່າວດີທັງ 4 ຫົວ ເຮົາກໍຈະເຫັນເລື່ອງລາວທີ່ໜ້າປະທັບໃຈໃນຊີວິດຂອງເພິ່ນ.

ມັດທາຍ

ປຶ້ມຂ່າວດີຫົວທຳອິດ. ປຶ້ມນີ້ບອກຫຼາຍເລື່ອງທີ່ພະເຢຊູສອນໂດຍສະເພາະເລື່ອງການປົກຄອງຂອງພະເຈົ້າ.
ມາຣະໂກ

ປຶ້ມຂ່າວດີທີ່ສັ້ນທີ່ສຸດ. ປຶ້ມນີ້ເລົ່າເລື່ອງຕ່າງໆຢ່າງວ່ອງໄວແລະໜ້າຕື່ນເຕັ້ນ.
ລູກາ

ປຶ້ມຂ່າວດີຫົວນີ້ບອກໃຫ້ຮູ້ວ່າການອະທິດຖານເປັນເລື່ອງສຳຄັນຫຼາຍສຳລັບພະເຢຊູແລະຍັງບອກອີກວ່າພະເຢຊູເປັນຄົນທີ່ໃຫ້ກຽດຜູ້ຍິງ.
ໂຢຮັນ

ປຶ້ມຂ່າວດີຫົວນີ້ບອກໃຫ້ຮູ້ວ່າພະເຢຊູເວົ້າຫຍັງແດ່ກັບໝູ່ສະໜິດແລະກັບຄົນອື່ນໆ. ນີ້ເຮັດໃຫ້ຮູ້ວ່າແທ້ໆແລ້ວພະເຢຊູເປັນຄົນແນວໃດ.