ຕອນທີ 2
ໃຫ້ສັດຊື່ຕໍ່ກັນແລະກັນ
“ສິ່ງນັ້ນທີ່ພະເຈົ້າໄດ້ກະທຳໃຫ້ຕິດພັນກັນຢູ່ແລ້ວ ຢ່າໃຫ້ຄົນກະທຳໃຫ້ແຍກຈາກກັນເຖີ້ນ.”—ມາລະໂກ 10:9
ພະເຢໂຫວາຮຽກຮ້ອງໃຫ້ເຮົາ “ກະທຳການ [ຮັກສາຄວາມ] ສັດຊື່.” (ມີເກ 6:8) ຄວາມສັດຊື່ເປັນສິ່ງທີ່ສຳຄັນຫຼາຍຕໍ່ຊີວິດຄອບຄົວຂອງທ່ານ ເພາະຄວາມສັດຊື່ກໍ່ໃຫ້ມີຄວາມໄວ້ໃຈ ແລະຄວາມໄວ້ໃຈເປັນສິ່ງທີ່ຈຳເປັນເພື່ອເຮັດໃຫ້ຄວາມຮັກເພີ່ມຂຶ້ນ.
ໃນທຸກມື້ນີ້ເປັນເລື່ອງງ່າຍແທ້ໆທີ່ຄວາມສັດຊື່ໃນຄອບຄົວຈະຖືກທຳລາຍ. ເພື່ອຈະຮັກສາສາຍໃຍຄອບຄົວຂອງທ່ານໄວ້ ທ່ານຕ້ອງຕັ້ງໃຈຢ່າງຄັກແນ່ທີ່ຈະເຮັດໃນສອງສິ່ງນີ້.
1 ຈັດລຳດັບຄວາມສຳຄັນຂອງຄອບຄົວໃຫ້ເໝາະສົມ
ຄຳພີໄບເບິນແນະນຳວ່າ: ໃຫ້ “ລອງເບິ່ງສິ່ງທັງຫຼາຍທີ່ເປັນອັນປະເສີດທີ່ສຸດ [ສຳຄັນກວ່າ].” (ຟີລິບ 1:10) ສິ່ງທີ່ສຳຄັນທີ່ສຸດໃນຊີວິດຂອງທ່ານແມ່ນຄອບຄົວ. ດັ່ງນັ້ນ ທ່ານຕ້ອງຈັດໃຫ້ຄອບຄົວມາກ່ອນສິ່ງໃດໆທັງໝົດ.
ພະເຢໂຫວາຢາກໃຫ້ທ່ານໃສ່ໃຈຄູ່ຂອງທ່ານເປັນພິເສດແລະ “ຊົມຊື່ນຍິນດີໃນຊີວິດ” ນຳກັນ. (ຜູ້ເທສະໜາປ່າວປະກາດ 9:9) ພະອົງບອກຢ່າງຈະແຈ້ງວ່າບໍ່ໃຫ້ປ່ອຍປະລະເລີຍກັນ ແຕ່ໃຫ້ຊອກຫາໂອກາດທີ່ຈະເຮັດໃຫ້ຕ່າງຝ່າຍຕ່າງມີຄວາມສຸກ. (1 ໂກລິນໂທ 10:24) ດັ່ງນັ້ນ ຄວນເຮັດໃຫ້ຄູ່ຂອງທ່ານຮູ້ສຶກວ່າທ່ານເຫັນຄຸນຄ່າແລະຕ້ອງການລາວ.
ຄຳແນະນຳ:
-
ໃຫ້ຈັດເວລາໄວ້ເພື່ອຢູ່ນຳກັນເປັນປະຈຳ ແລະເອົາໃຈໃສ່ຄວາມຈຳເປັນຂອງອີກຝ່າຍໜຶ່ງຢ່າງເຕັມທີ
-
ແທນທີ່ຈະຄິດເຖິງຄຳວ່າ “ຂ້ອຍ” ໃຫ້ຄິດເຖິງຄຳວ່າ “ພວກເຮົາ”
2 ປົກປ້ອງຫົວໃຈຂອງທ່ານໄວ້
ຄຳພີໄບເບິນແນະນຳວ່າ: “ຄົນທຸກຄົນທີ່ເບິ່ງຍິງຜູ້ໜຶ່ງດ້ວຍໃຈຄຶດຢາກໄດ້ໃນຍິງນັ້ນ ຜູ້ນັ້ນໄດ້ຫຼິ້ນຊູ້ສູ່ໃນໃຈເອງກັບຍິງນັ້ນແລ້ວໆ.” (ມັດທາຍ 5:28) ຖ້າຄົນໃດຄົນໜຶ່ງຄິດເຖິງແຕ່ເລື່ອງທີ່ຜິດສິນລະທຳນັ້ນກໍເທົ່າກັບວ່າລາວກຳລັງບໍ່ສັດຊື່ຕໍ່ຄູ່ຂອງຕົນ.
ພະເຢໂຫວາບອກໃຫ້ “ຮັກສາ [ປົກປ້ອງ] ໃຈຂອງເຈົ້າໄວ້.” (ສຸພາສິດ 4:23; ເຢເຣມີ 17:9) ເພື່ອຈະເຮັດໄດ້ເຊັ່ນນັ້ນ ທ່ານຕ້ອງປົກປ້ອງຕາຂອງທ່ານໄວ້. (ມັດທາຍ 5:29, 30) ຂໍໃຫ້ເບິ່ງຕົວຢ່າງຂອງໂຢບເຊິ່ງເປັນຫົວໜ້າຄອບຄົວທີ່ໄດ້ສັນຍາວ່າຈະບໍ່ເບິ່ງຜູ້ຍິງຄົນອື່ນດ້ວຍໃຈລາຄະຕັນຫາ. (ໂຢບ 31:1) ດັ່ງນັ້ນ ຕ້ອງໄດ້ຕັ້ງໃຈຢ່າງເດັດຂາດວ່າຈະບໍ່ເບິ່ງສື່ລາມົກໃດໆ ແລະໃຫ້ຫຼີກລ່ຽງການສົນໃຈຄົນທີ່ບໍ່ແມ່ນຄູ່ຂອງຕົນໃນລັກສະນະຊູ້ສາວ.
ຄຳແນະນຳ:
-
ສະແດງໃຫ້ຄົນອື່ນເຫັນຢ່າງຊັດເຈນວ່າທ່ານແຕ່ງດອງແລ້ວ
-
ໃຫ້ຄິດເຖິງຄວາມຮູ້ສຶກຂອງອີກຝ່າຍໜຶ່ງ ແລະຕ້ອງຍຸດຕິການຕິດຕໍ່ພົວພັນໃດໆທີ່ອາດເຮັດໃຫ້ຄູ່ຂອງທ່ານຮູ້ສຶກບໍ່ສະບາຍໃຈ
