ຕອນທີ 7
ວິທີອົບຮົມສັ່ງສອນລູກ
“ຄຳທັງຫຼາຍທີ່ເຮົາສັ່ງແກ່ເຈົ້າໃນວັນນີ້ຈົ່ງຖືຮັກສາໄວ້ໃນໃຈຂອງເຈົ້າ. ຄຳນັ້ນຈົ່ງສອນແກ່ພວກລູກຂອງເຈົ້າ.”—ພະບັນຍັດ 6:6, 7
ເມື່ອພະເຢໂຫວາກໍ່ຕັ້ງຄອບຄົວ ພະອົງໄດ້ມອບໝາຍໃຫ້ພໍ່ແມ່ເບິ່ງແຍງລູກ. (ໂກໂລດ 3:20) ດັ່ງນັ້ນ ພໍ່ແມ່ຈຶ່ງມີໜ້າທີ່ຮັບຜິດຊອບຫຼັກທີ່ຈະຝຶກສອນລູກໃຫ້ຮັກພະເຢໂຫວາແລະໃຫ້ເປັນຜູ້ໃຫຍ່ທີ່ມີຄວາມຮັບຜິດຊອບ. (2 ຕີໂມເຕ 1:5; 3:15) ແຕ່ເພື່ອຈະເຮັດໄດ້ເຊັ່ນນັ້ນ ທ່ານຈະຕ້ອງຮູ້ຈັກຄວາມຄິດຈິດໃຈຂອງລູກ. ສິ່ງທີ່ສຳຄັນແມ່ນທ່ານຕ້ອງເປັນຕົວຢ່າງໃຫ້ລູກ. ເພື່ອທ່ານຈະເປັນຜູ້ສອນຄຳຂອງພະເຢໂຫວາໃຫ້ລູກໄດ້ດີທີ່ສຸດ ທ່ານຕ້ອງໃຫ້ຄຳສອນນັ້ນເຂົ້າໄປໃນໃຈຂອງທ່ານກ່ອນ.—ຄຳເພງ 40:8
1 ຢູ່ພ້ອມສະເໝີເພື່ອໃຫ້ລູກກ້າເຂົ້າຫາ
ຄຳພີໄບເບິນແນະນຳວ່າ: ໃຫ້ “ວ່ອງໄວໆຈະຟັງ ໃຫ້ຊ້າໆຈະເວົ້າ.” (ຢາໂກໂບ 1:19) ຖ້າຢາກໃຫ້ລູກກ້າເຂົ້າມາເວົ້ານຳເມື່ອພວກເຂົາຕ້ອງການ ທ່ານຕ້ອງເຮັດໃຫ້ເຫັນວ່າພ້ອມທີ່ຈະຮັບຟັງ. ລູກຈະສະແດງຄວາມຮູ້ສຶກອອກມາໄດ້ງ່າຍຂຶ້ນ ຖ້າທ່ານສ້າງໃຫ້ມີບັນຍາກາດແບບເປັນກັນເອງ. (ຢາໂກໂບ 3:18) ແຕ່ຖ້າລູກຮູ້ສຶກວ່າທ່ານຈະຮ້າຍຫຼືລົງໂທດ ລູກອາດຈະບໍ່ກ້າເວົ້າຄວາມຈິງທັງໝົດໃຫ້ທ່ານຮູ້. ດັ່ງນັ້ນ ທ່ານຕ້ອງອົດທົນກັບລູກແລະເຮັດໃຫ້ເຂົາເຈົ້າໝັ້ນໃຈວ່າທ່ານຮັກເຂົາເຈົ້າສະເໝີ.—ມັດທາຍ 3:17; 1 ໂກລິນໂທ 8:1
ຄຳແນະນຳ:
-
ໃຫ້ຢູ່ພ້ອມສະເໝີເມື່ອລູກຕ້ອງການເວົ້ານຳ
-
ໃຫ້ລົມກັບລູກເປັນປະຈຳ ບໍ່ແມ່ນສະເພາະແຕ່ຕອນທີ່ເຂົາເຈົ້າມີບັນຫາເທົ່ານັ້ນ
2 ພະຍາຍາມເຂົ້າໃຈຄວາມຮູ້ສຶກຂອງລູກ
ຄຳພີໄບເບິນແນະນຳວ່າ: “ຜູ້ທີ່ລະວັງ [ມີຄວາມເຂົ້າໃຈທີ່ເລິກເຊິ່ງ] ດ້ວຍຄຳບອກກໍຈະພົບການດີ.” (ສຸພາສິດ 16:20) ເພື່ອຈະຮູ້ຈັກຄວາມຄິດຈິດໃຈຂອງພວກລູກ ທ່ານຕ້ອງເຂົ້າໃຈສິ່ງທີ່ເຂົາເຈົ້າເວົ້າແລະທ່ານຕ້ອງໄດ້ຄິດຄັກໆ. ເປັນເລື່ອງທຳມະດາທີ່ຄົນໜຸ່ມສາວມັກຈະເວົ້າເກີນຄວາມຈິງ ຫຼືເວົ້າກົງກັນຂ້າມກັບຄວາມໝາຍຂອງຄຳທີ່ເວົ້າອອກມາ. “ຕອບຄວາມກ່ອນໄດ້ຍິນກໍເປັນການບ້າແລະຄວາມອາຍໃຈຖືກຄົນທີ່ຕອບຢ່າງນັ້ນ.” (ສຸພາສິດ 18:13) ສະນັ້ນ ຢ່າຟ້າວໃຈຮ້າຍໃສ່ລູກ.—ສຸພາສິດ 19:11
ຄຳແນະນຳ:
-
ບໍ່ຄວນຂັດຈັງຫວະຫຼືສະແດງອາການອອກຫຼາຍໂພດ ບໍ່ວ່າລູກຈະເວົ້າຫຍັງອອກມາກໍຕາມ
-
ຂໍໃຫ້ຄຶດເຖິງຕອນທີ່ທ່ານມີອາຍຸສ່ຳດຽວກັບເຂົາເຈົ້າ ທ່ານຮູ້ສຶກແນວໃດແລະອັນໃດທີ່ສຳຄັນຕໍ່ທ່ານໃນຕອນນັ້ນ
3 ເປັນນ້ຳໜຶ່ງໃຈດຽວກັນ
ຄຳພີໄບເບິນແນະນຳວ່າ: “ລູກຊາຍເອີຍ ຈົ່ງຟັງຄວາມສຶກສາແຕ່ພໍ່ຂອງເຈົ້າແລະຢ່າປະຖິ້ມຄວາມສັ່ງສອນແຕ່ແມ່ຂອງເຈົ້າ.” (ສຸພາສິດ 1:8) ພະເຢໂຫວາມອບອຳນາດໃຫ້ທັງພໍ່ແລະແມ່ມີສິດໃນຕົວລູກ. ດັ່ງນັ້ນ ທ່ານຕ້ອງສອນພວກລູກໃຫ້ນັບຖືແລະເຊື່ອຟັງທ່ານ. (ເອເຟດ 6:1-3) ແຕ່ລູກຈະຮັບຮູ້ໄດ້ຫາກພໍ່ແລະແມ່ບໍ່ “ລວມເຂົ້າສະຫນິດກັນ [ເປັນນ້ຳໜຶ່ງໃຈດຽວກັນ].” (1 ໂກລິນໂທ 1:10) ຖ້າທ່ານບໍ່ເຫັນດີນຳກັນ ກໍບໍ່ຕ້ອງເຮັດໃຫ້ລູກເຫັນ ເພາະການເຮັດແບບນັ້ນຈະເຮັດໃຫ້ລູກບໍ່ນັບຖືທ່ານໃນຖານະພໍ່ແມ່.
ຄຳແນະນຳ:
-
ໃຫ້ປຶກສາແລະຕົກລົງກັນວ່າພວກທ່ານຈະສັ່ງສອນແລະລົງໂທດລູກແນວໃດ
-
ຖ້າທ່ານບໍ່ເຫັນດີນຳກັນໃນວິທີການຝຶກສອນລູກ ໃຫ້ພະຍາຍາມເຂົ້າໃຈຄວາມຄິດຂອງອີກຝ່າຍໜຶ່ງ
4 ວາງແຜນຢ່າງຄັກແນ່
ຄຳພີໄບເບິນແນະນຳວ່າ: “ຈົ່ງເຝິກຫັດເດັກນ້ອຍຕາມລະບຽບຮີດຄອງແຫ່ງຕົນ.” (ສຸພາສິດ 22:6) ການອົບຮົມສັ່ງສອນລູກຈະບໍ່ປະສົບຄວາມສຳເລັດດ້ວຍຄວາມບັງເອີນ. ທ່ານຕ້ອງວາງແຜນຢ່າງຄັກແນ່ໃນເລື່ອງການສັ່ງສອນແລະການລົງໂທດ. (ຄຳເພງ 127:4; ສຸພາສິດ 29:17) ການສັ່ງສອນບໍ່ແມ່ນມີແຕ່ການລົງໂທດເທົ່ານັ້ນ ແຕ່ທ່ານຕ້ອງໄດ້ຊ່ວຍເຂົາເຈົ້າໃຫ້ເຂົ້າໃຈເຫດຜົນທີ່ຖືກລົງໂທດ. (ສຸພາສິດ 28:7) ໃນນັ້ນ ທ່ານຕ້ອງໄດ້ສອນລູກໃຫ້ຮັກຄຳສອນຂອງພະເຢໂຫວາແລະເຂົ້າໃຈຫຼັກການຕ່າງໆນຳອີກ. (ຄຳເພງ 1:2) ການເຮັດແນວນີ້ຈະຊ່ວຍລູກໃຫ້ເປັນຄົນມີເຫດມີຜົນແລະຮູ້ໄຈ້ແຍກສິ່ງດີສິ່ງຊົ່ວ.—ເຫບເລີ 5:14
ຄຳແນະນຳ:
-
ຕ້ອງໄດ້ສອນລູກໃຫ້ເຂົ້າໃຈວ່າພະເຈົ້າມີຊີວິດຢູ່ແທ້ ເປັນຜູ້ທີ່ເຂົາເຈົ້າໄວ້ໃຈໄດ້
-
ຕ້ອງຊ່ວຍລູກໃຫ້ຮູ້ໄຈ້ແຍກ ແລະຫຼີກລ່ຽງສິ່ງທີ່ເປັນອັນຕະລາຍທາງສິນລະທຳ ເຊິ່ງຈະພົບເຫັນໄດ້ທາງອິນເຕີເນັດແລະເຄືອຄ່າຍທາງສັງຄົມ. ຕ້ອງສອນເຂົາເຈົ້າໃຫ້ຮູ້ວິທີທີ່ຈະບໍ່ຕົກເປັນເຫຍື່ອຂອງພວກທີ່ມຸ່ງທຳຮ້າຍທາງເພດ.
“ຈົ່ງເຝິກຫັດເດັກນ້ອຍຕາມລະບຽບຮີດຄອງແຫ່ງຕົນ.”
ເລື່ອງທີ່ເຈົ້າອາດຈະມັກ
ຄຳສອນໃນຄຳພີໄບເບິນ
ວິດີໂອແລະກິດຈະກຳສຳລັບເດັກນ້ອຍ
ໃຊ້ວິດີໂອຈາກຄຳພີໄບເບິນແລະກິດຈະກຳທີ່ມ່ວນໆເຫຼົ່ານີ້ສອນລູກໃຫ້ມີຄວາມເຊື່ອ.
