ບົດຮຽນ 10

ທ່ານຈະຮູ້ຈັກການນະມັດສະການແທ້ໄດ້ແນວໃດ?

ເປີດ

1. ມີສາສະໜາແທ້ພຽງສາສະໜາດຽວບໍ?

“ຈົ່ງລະວັງໃຫ້ດີດ້ວຍຜູ້ທຳນວາຍບໍ່ຈິງ.”—ມັດທາຍ 7:15

ພະເຍຊູສອນຜູ້ຕິດຕາມພະອົງວ່າມີສາສະໜາແທ້ພຽງແຕ່ສາສະໜາດຽວ. ການນະມັດການແທ້ຄືກັບທາງເສັ້ນໜຶ່ງທີ່ພາໄປເຖິງຊີວິດຕະຫຼອດໄປ. ພະເຍຊູບອກວ່າ: “ຜູ້ທີ່ພົບທາງນັ້ນມີບໍ່ຫຼາຍຄົນ.” (ມັດທາຍ 7:14) ພະເຈົ້າຍອມຮັບການນະມັດສະການທີ່ອາໄສຄວາມຈິງທີ່ມາຈາກພະຄຳຂອງພະອົງເທົ່ານັ້ນ. ຜູ້ນະມັດສະການແທ້ທັງໝົດເປັນເອກະພາບກັນໃນຄວາມເຊື່ອ.—ອ່ານໂຢຮັນ 4:23, 24; 14:6; ເອເຟດ 4:4, 5

ເບິ່ງວິດີໂອ ພະເຈົ້າຍອມຮັບທຸກສາສະໜາບໍ?

ຂໍອະໄພ ໂປແກຣມໂຫຼດບໍ່ໄດ້.ດາວໂຫຼດວິດີໂອນີ້

2. ພະເຍຊູບອກຫຍັງກ່ຽວກັບຄລິດສະຕຽນປອມ?

“ເຂົາປະກາດຕົວວ່າຮູ້ຈັກພະເຈົ້າ ແຕ່ວ່າເຂົາປະຕິເສດພະອົງເສຍດ້ວຍການຂອງເຂົາ.”—ຕິໂຕ 1:16

ພະເຍຊູເຕືອນວ່າຜູ້ພະຍາກອນປອມຈະເຮັດໃຫ້ຫຼັກຄຳສອນຄລິດສະຕຽນເສື່ອມເສຍ. ພາບລັກພາຍນອກຂອງພວກເຂົາຈະຄ້າຍຄືກັບຜູ້ນະມັດການແທ້. ຫຼາຍຄົນທີ່ໄປໂບດອ້າງວ່າຕົນເປັນຄລິດສະຕຽນ. ແຕ່ທ່ານສາມາດເບິ່ງອອກໄດ້ຈາກທີ່ເຂົາເຈົ້າເປັນແທ້ໆ. ໂດຍວິທີໃດ? ການນະມັດສະການແທ້ເທົ່ານັ້ນຈະເຮັດໃຫ້ຄົນເຮົາເປັນຄລິດສະຕຽນແທ້ເຊິ່ງຈະເຫັນໄດ້ຈາກຄຸນສົມບັດ ແລະການດຳລົງຊີວິດຂອງເຂົາເຈົ້າ.—ອ່ານມັດທາຍ 7:13-23

3. ທ່ານຈະຮູ້ຈັກຜູ້ນະມັດສະການແທ້ໄດ້ແນວໃດ?

ຂໍໃຫ້ພິຈາລະນາຈຸດພິເສດຫ້າຢ່າງຕໍ່ໄປນີ້:

ຜູ້ນະມັດສະການແທ້ເຊື່ອວ່າຄຳພີໄບເບິນເປັນພະຄຳຂອງພະເຈົ້າ. ເຂົາເຈົ້າຈຶ່ງພະຍາຍາມດຳເນີນຊີວິດຕາມຄຳພີໄບເບິນ. ດັ່ງນັ້ນ ສາສະໜາແທ້ຈຶ່ງຕ່າງຈາກສາສະໜາທີ່ມີພື້ນຖານຈາກຄວາມຄິດຂອງມະນຸດ. (ມັດທາຍ 15:7-9) ຜູ້ນະມັດສະການແທ້ບໍ່ໄດ້ສອນແນວໜຶ່ງແລ້ວເຮັດອີກແນວໜຶ່ງ.—ອ່ານໂຢຮັນ 17:17; 2 ຕີໂມເຕ 3:16, 17
ລູກສິດແທ້ຂອງພະເຍຊູນັບຖືຊື່ຂອງພະເຈົ້າເຊິ່ງແມ່ນເຢໂຫວາ. ພະເຍຊູນັບຖືຊື່ຂອງພະເຈົ້າໂດຍການບອກໃຫ້ຄົນອື່ນຮູ້ຈັກຊື່ນັ້ນ. ພະອົງຊ່ວຍຄົນອື່ນໃຫ້ຮູ້ຈັກພະເຈົ້າ ແລະສອນເຂົາເຈົ້າໃຫ້ອະທິດຖານເພື່ອໃຫ້ຊື່ຂອງພະເຈົ້າເປັນທີ່ນັບຖື. (ມັດທາຍ 6:9) ເຂດທີ່ທ່ານຢູ່ມີສາສະໜາໃດທີ່ເວົ້າເຖິງຊື່ຂອງພະເຈົ້າ?—ອ່ານໂຢຮັນ 17:26; ໂລມ 10:13, 14
ຄລິດສະຕຽນແທ້ສອນເລື່ອງລາຊະອານາຈັກຂອງພະເຈົ້າ. ພະເຈົ້າສົ່ງພະເຍຊູມາເພື່ອປະກາດຂ່າວດີເລື່ອງລາຊະອານາຈັກ. ລາຊະອານາຈັກຂອງພະເຈົ້າເປັນຄວາມຫວັງດຽວຂອງມວນມະນຸດ. ພະເຍຊູສືບຕໍ່ເວົ້າກ່ຽວກັບລາຊະອານາຈັກຂອງພະເຈົ້າຈົນເຖິງວັນທີ່ພະອົງສິ້ນຊີວິດ. (ລືກາ 4:43; 8:1; 23:42, 43) ພະອົງບອກວ່າສາວົກຂອງພະອົງຈະປະກາດເລື່ອງລາຊະອານາຈັກຂອງພະເຈົ້າ. ຖ້າມີບາງຄົນມາເວົ້າກັບທ່ານເລື່ອງລາຊະອານາຈັກຂອງພະເຈົ້າ ເຂົາເຈົ້າຈະເປັນສາສະໜາໃດ?—ອ່ານມັດທາຍ 24:14
ສາວົກຂອງພະເຍຊູບໍ່ເປັນສ່ວນໜຶ່ງຂອງໂລກທີ່ຊົ່ວຮ້າຍນີ້. ທ່ານຈະຮູ້ຈັກເຂົາເຈົ້າໄດ້ຈາກການທີ່ເຂົາເຈົ້າບໍ່ມີສ່ວນໃນການເມືອງ ຫຼືການຂັດແຍ່ງທາງສັງຄົມ. (ໂຢຮັນ 17:16) ນອກຈາກນັ້ນ ເຂົາເຈົ້າບໍ່ໄດ້ຮຽນແບບແນວການກະທຳແລະທັດສະນະຄະຕິຂອງໂລກນີ້ທີ່ກໍ່ຜົນເສຍຫາຍ.—ອ່ານຢາໂກໂບ 4:4
ຄລິດສະຕຽນແທ້ມີຄວາມຮັກກັນແລະກັນຢ່າງໂດດເດັ່ນ. ຈາກພະຄຳຂອງພະເຈົ້າ ເຂົາເຈົ້າຮຽນຮູ້ທີ່ຈະໃຫ້ຄວາມນັບຖືຄົນໃນທຸກເຊື້ອຊາດ. ສາສະໜາປອມສະໜັບສະໜູນສົງຄາມລະຫວ່າງຊາດຕ່າງໆຢ່າງດຸເດືອດ ແຕ່ຜູ້ນະມັດສະການແທ້ຈະບໍ່ເຮັດແນວນັ້ນ. (ມີເກ 4:1-3) ແທນທີ່ຈະເຮັດແນວນັ້ນ ຄລິດສະຕຽນແທ້ເສຍສະລະທັງເວລາ ແລະຊັບສິນສ່ວນຕົວຢ່າງບໍ່ເຫັນແກ່ຕົວເພື່ອຊ່ວຍເຫຼືອ ແລະໃຫ້ການໜູນໃຈຄົນອື່ນ.—ອ່ານໂຢຮັນ 13:34, 35; 1 ໂຢຮັນ 4:20

4. ທ່ານຈະຮູ້ຈັກສາສະໜາແທ້ໄດ້ແນວໃດ?

ຄຳສອນຈາກສາສະໜາໃດທີ່ສອນຕາມພະຄຳຂອງພະເຈົ້າ ນັບຖືຊື່ຂອງພະເຈົ້າ ແລະປະກາດວ່າລາຊະອານາຈັກຂອງພະເຈົ້າເປັນຄວາມຫວັງດຽວຂອງມະນຸດຊາດ. ຄົນກຸ່ມໃດທີ່ສະແດງຄວາມຮັກແລະຫຼີກເວັ້ນການເຮັດສົງຄາມ? ທ່ານມີຄວາມຄິດເຫັນແນວໃດ?—ອ່ານ 1 ໂຢຮັນ 3:10-12

ຂ່າວດີຈາກພະເຈົ້າ!