ຈົດໝາຍສະບັບທີສອງເຖິງຕີໂມທຽວ 4:1-22
4 ຂ້ອຍຂໍສັ່ງເຈົ້າຕໍ່ໜ້າພະເຈົ້າແລະຕໍ່ໜ້າພະຄລິດເຢຊູຜູ້ທີ່ຈະຕັດສິນ+ທັງຄົນເປັນແລະຄົນຕາຍ+ຕອນທີ່ເພິ່ນມາ+ໃນຖານະກະສັດ.+ ຂ້ອຍຂໍສັ່ງວ່າ
2 ໃຫ້ປະກາດຖ້ອຍຄຳຂອງພະເຈົ້າຢ່າງຈິງຈັງ+ທັງຕອນທີ່ສະດວກແລະຕອນທີ່ລຳບາກ. ໃຫ້ຕັກເຕືອນ+ ຕຳໜິ ແລະໂນ້ມນ້າວ ແຕ່ໃຫ້ເຮັດແບບນັ້ນດ້ວຍຄວາມອົດທົນແລະດ້ວຍການສອນຢ່າງຊຳນິຊຳນານ.+
3 ຈະມີໄລຍະໜຶ່ງທີ່ເຂົາເຈົ້າຈະບໍ່ຍອມຟັງຄຳສອນທີ່ເປັນປະໂຫຍດ+ ແຕ່ຈະລວບລວມຄູສອນໄວ້ຫຼາຍໆເພື່ອໃຫ້ສອນເລື່ອງທີ່ເຂົາເຈົ້າຢາກຟັງ.+
4 ເຂົາເຈົ້າຈະເຊົາຟັງຄວາມຈິງແລ້ວປ່ຽນໄປຟັງເລື່ອງຂີ້ຕົວະແທນ.
5 ສ່ວນເຈົ້າ ກໍໃຫ້ມີສະຕິໃນທຸກສະພາບການ ອົດທົນຄວາມຍາກລຳບາກ+ ເຮັດໜ້າທີ່ຂອງຜູ້ປະກາດຂ່າວດີ* ແລະເຮັດວຽກຮັບໃຊ້ຂອງເຈົ້າໃຫ້ສຳເລັດຄົບຖ້ວນ.+
6 ຂ້ອຍເປັນຄືກັບເຄື່ອງບູຊາດື່ມທີ່ກຳລັງຖືກເທໃສ່ແທ່ນບູຊາ+ແລະເວລາທີ່ຂ້ອຍຈະຖືກປົດປ່ອຍ+ກໍໃກ້ຈະຮອດແລ້ວ.
7 ຂ້ອຍໄດ້ຕໍ່ສູ້ໃນການສູ້ຮົບທີ່ມີກຽດ.+ ຂ້ອຍແລ່ນແຂ່ງຈົນຮອດເສັ້ນໄຊແລ້ວ+ ແລະຂ້ອຍກໍຍັງຮັກສາຄວາມເຊື່ອໄວ້ໄດ້.
8 ຕອນນີ້ ມົງກຸດສຳລັບຄົນທີ່ພະເຈົ້າຍອມຮັບລໍຖ້າຂ້ອຍຢູ່.+ ຜູ້ເປັນນາຍທີ່ຕັດສິນຢ່າງຍຸຕິທຳ+ຈະເອົາມົງກຸດນີ້ໃຫ້ຂ້ອຍເມື່ອຮອດມື້ນັ້ນ.+ ແຕ່ບໍ່ແມ່ນໃຫ້ຂ້ອຍຄົນດຽວ ເພິ່ນຈະເອົາໃຫ້ທຸກຄົນທີ່ຕັ້ງໃຈລໍຖ້າມື້ທີ່ເພິ່ນຈະມາສະແດງລິດເດດຂອງເພິ່ນ.
9 ໃຫ້ເຈົ້າພະຍາຍາມມາຫາຂ້ອຍໄວໆ.
10 ເດມາ+ຖິ້ມຂ້ອຍໄປເມືອງເທຊະໂລນິກແລ້ວຍ້ອນລາວຮັກໂລກນີ້.* ສ່ວນເກເຊັນໄດ້ໄປແຂວງຄາລາເຕຍແລະຕີໂຕກໍໄປແຂວງດັນມາເຕຍ.
11 ຕອນນີ້ມີແຕ່ລູກາທີ່ຢູ່ກັບຂ້ອຍ. ຂໍໃຫ້ເຈົ້າພາມາຣະໂກມານຳ ຍ້ອນລາວຊ່ວຍຂ້ອຍໄດ້ໃນເລື່ອງວຽກຮັບໃຊ້.
12 ຂ້ອຍໃຊ້ຕີຂີໂກ+ໄປເມືອງເອເຟໂຊແລ້ວ.
13 ຕອນທີ່ເຈົ້າມາ ຂໍໃຫ້ເອົາເສື້ອຄຸມທີ່ຂ້ອຍຝາກໄວ້ກັບກາຣະໂບທີ່ຢູ່ເມືອງໂທອາດມາໃຫ້ຂ້ອຍແດ່ ແລະໃຫ້ເອົາມ້ວນໜັງສືຕ່າງໆມານຳ ໂດຍສະເພາະແມ່ນມ້ວນທີ່ເຮັດຈາກໜັງສັດ.
14 ອາເລັກຊັນເດີທີ່ເປັນຊ່າງທອງແດງທຳຮ້າຍຂ້ອຍຫຼາຍເທື່ອແລ້ວ. ພະເຢໂຫວາ*ຈະຕອບແທນລາວໃຫ້ສົມກັບສິ່ງທີ່ລາວເຮັດ.+
15 ເຈົ້າເອງກໍຕ້ອງລະວັງໂຕຄືກັນ ຍ້ອນລາວຕໍ່ຕ້ານຂ່າວສານຂອງພວກເຮົາຫຼາຍ.
16 ຕອນທີ່ຂ້ອຍແກ້ຄະດີເທື່ອທຳອິດ ບໍ່ມີໃຜມາຊ່ວຍຂ້ອຍເລີຍ. ເຂົາເຈົ້າພາກັນຖິ້ມຂ້ອຍໄປໝົດ. ຂໍພະເຈົ້າຢ່າເອົາໂທດເຂົາເຈົ້າ.
17 ແຕ່ຕອນນັ້ນ ຜູ້ເປັນນາຍຢູ່ຄຽງຂ້າງແລະໃຫ້ກຳລັງໃຈຂ້ອຍສະເໝີ ຂ້ອຍຈຶ່ງເຮັດວຽກປະກາດໄດ້ສຳເລັດຄົບຖ້ວນແລະຊ່ວຍຄົນທຸກຊາດໃຫ້ໄດ້ຍິນຂ່າວສານນັ້ນ.+ ເພິ່ນຍັງຊ່ວຍຂ້ອຍໃຫ້ລອດຈາກປາກສິງນຳອີກ.+
18 ຜູ້ເປັນນາຍຈະຊ່ວຍຂ້ອຍໃຫ້ລອດຈາກການກະທຳທີ່ຊົ່ວຮ້າຍທຸກຢ່າງແລະຈະຊ່ວຍຂ້ອຍໃຫ້ລອດເຂົ້າສູ່ການປົກຄອງທີ່ຢູ່ໃນສະຫວັນຂອງເພິ່ນ.+ ຂໍໃຫ້ເພິ່ນໄດ້ຮັບການຍ້ອງຍໍສັນລະເສີນຕະຫຼອດໄປ. ອາແມນ.*
19 ຂ້ອຍຂໍຝາກຄວາມຄິດຮອດໄປຫາປີຊະກາກັບອາກີລາ+ ແລະໂອເນຊີໂຟໂຣກັບຄົນໃນເຮືອນຂອງລາວນຳ.+
20 ເອຣາຊະໂຕ+ຍັງຢູ່ໃນເມືອງໂກຣິນໂທແລະຂ້ອຍໃຫ້ໂທຟີໂມ+ຢູ່ເມືອງມີເລໂຕຍ້ອນລາວບໍ່ສະບາຍ.
21 ຂໍໃຫ້ເຈົ້າພະຍາຍາມມາຫາຂ້ອຍໃຫ້ໄດ້ກ່ອນຮອດຍາມໜາວ.
ຢູບູໂລຝາກຄວາມຄິດຮອດໄປຫາເຈົ້າ. ນອກຈາກນັ້ນ ປູເດ ລີໂນ ກະໂລເດຍກັບພີ່ນ້ອງທຸກຄົນກໍຝາກຄວາມຄິດຮອດໄປຫາເຈົ້າຄືກັນ.
22 ຂໍໃຫ້ຜູ້ເປັນນາຍຢູ່ກັບເຈົ້າຍ້ອນນ້ຳໃຈທີ່ເຈົ້າສະແດງ. ຂໍໃຫ້ເຈົ້າໄດ້ຮັບຄວາມກະລຸນາທີ່ຍິ່ງໃຫຍ່ຈາກເພິ່ນສະເໝີ.
ຂໍ
^ ຫຼື “ປະກາດຂ່າວດີຕໍ່ໆໄປ”
^ ຫຼື “ຍຸກນີ້.” ເບິ່ງຄຳວ່າ “ຍຸກ” ໃນສ່ວນອະທິບາຍຄຳສັບ.
^ ເບິ່ງພາກຜະໜວກ ກ5
^ ຫຼື “ຂໍໃຫ້ເປັນແນວນັ້ນ”
