ເອຊາຢາ 28:1-29
28 ຄວາມຈິບຫາຍຈະເກີດຂຶ້ນກັບມົງກຸດທີ່ງາມໆ*ຂອງພວກເອຟຣາຢິມທີ່ຂີ້ເຫຼົ້າ.+ມົງກຸດນີ້ປະດັບດ້ວຍດອກໄມ້ງາມໆທີ່ກຳລັງຫ່ຽວ.ມັນຢູ່ບ່ອນສູງໆໃນຮ່ອມພູທີ່ອຸດົມສົມບູນຂອງຄົນທີ່ເມົາເຫຼົ້າແວງ.
2 ຖ້າເບິ່ງເດີ້! ພະເຢໂຫວາຈະສົ່ງຜູ້ໜຶ່ງທີ່ແຂງແຮງແລະມີກຳລັງຫຼາຍມາ.
ລາວຈະດຶກມົງກຸດທີ່ງາມໆນັ້ນລົງພື້ນແຮງໆຄືກັບພາຍຸໝາກເຫັບ ຄືກັບລົມພາຍຸທີ່ທຳລາຍທຸກຢ່າງແລະຄືກັບພາຍຸຝົນທີ່ເຮັດໃຫ້ນ້ຳຖ້ວມໜັກ.
3 ມົງກຸດທີ່ງາມໆຂອງພວກເອຟຣາຢິມທີ່ຂີ້ເຫຼົ້າຈະຖືກຢຽບຢູ່ພື້ນຕີນ.+
4 ຄວາມງາມຂອງມົງກຸດນີ້ເປັນຄືກັບດອກໄມ້ທີ່ກຳລັງຫ່ຽວ.ມັນຢູ່ບ່ອນສູງໆໃນຮ່ອມພູທີ່ອຸດົມສົມບູນແລະເປັນຄືກັບໝາກເດື່ອທີ່ສຸກກ່ອນຮອດລະດູ.
ເມື່ອຄົນເຫັນມັນກໍຈະເດັດມາກິນໂລດ.
5 ໃນຕອນນັ້ນ ພະເຢໂຫວາຜູ້ບັນຊາການກອງທັບຈະເປັນມົງກຸດແລະເຄື່ອງປະດັບທີ່ງາມໆຢູ່ຫົວສຳລັບປະຊາຊົນຂອງເພິ່ນທີ່ຍັງເຫຼືອຢູ່.+
6 ເພິ່ນຈະເປັນຜູ້ທີ່ກະຕຸ້ນຜູ້ຕັດສິນໃຫ້ຕັດສິນແບບຍຸຕິທຳ ແລະຈະເປັນກຳລັງໃຫ້ຜູ້ທີ່ປົກປ້ອງປະຕູເມືອງບໍ່ໃຫ້ສັດຕູມາໂຈມຕີ.+
7 ພວກປະໂລຫິດກັບພວກຜູ້ພະຍາກອນກໍຍ່າງຫຼົງທາງຍ້ອນເຫຼົ້າແວງແລະຍ່າງເຊຊ້າຍເຊຂວາຍ້ອນເມົາເຫຼົ້າ.
ເຫຼົ້າແວງເຮັດໃຫ້ເຂົາເຈົ້າສັບສົນເຮັດໃຫ້ເຂົາເຈົ້າຫຼົງທາງແລະຍ່າງເຊໄປເຊມາ.ນິມິດທີ່ເຂົາເຈົ້າເຫັນເຮັດໃຫ້ເຂົາເຈົ້າຍ່າງຜິດທາງແລະເຮັດໃຫ້ເຂົາເຈົ້າຕັດສິນແບບບໍ່ຖືກຕ້ອງ.+
8 ເຂົາເຈົ້າຮາກໃສ່ໂຕະຈົນເຕັມ.ຢູ່ໂຕະມີແຕ່ຮາກຂອງເຂົາເຈົ້າ.
9 ມີຄົນເວົ້າໃຫ້ວ່າ: “ລາວກຳລັງສອນໃຜ?ລາວກຳລັງອະທິບາຍຂ່າວສານໃຫ້ໃຜຟັງ?
ໃຫ້ເດັກນ້ອຍທີ່ຫາກໍເຊົານົມຟັງຕີ້ຫຼືໃຫ້ແອນ້ອຍຟັງບໍ?
10 ທຸກເທື່ອກໍມີແຕ່ສັ່ງກັບສັ່ງໃຫ້ເຮັດຕາມກົດ*ນັ້ນກົດນີ້+ແລະໃຫ້ເຮັດຈັ່ງຊັ້ນຈັ່ງຊີ້.”*
11 ພະເຈົ້າຈະໃຊ້ຄົນທີ່ເວົ້າກະຕຸກກະຕັກແລະເວົ້າພາສາຕ່າງປະເທດມາເວົ້າກັບຄົນຊາດນີ້.+
12 ເພິ່ນເຄີຍບອກຄົນຊາດນີ້ວ່າ: “ນີ້ແມ່ນບ່ອນພັກ. ໃຫ້ຄົນທີ່ເມື່ອຍມາພັກຢູ່ນີ້ ຍ້ອນວ່າບ່ອນນີ້ຈະເຮັດໃຫ້ສົດຊື່ນ.” ແຕ່ເຂົາເຈົ້າກໍບໍ່ສົນໃຈຟັງ.+
13 ສຳລັບເຂົາເຈົ້າ ຄຳເວົ້າຂອງພະເຢໂຫວາເປັນແບບນີ້:
“ທຸກເທື່ອກໍມີແຕ່ສັ່ງກັບສັ່ງໃຫ້ເຮັດຕາມກົດນັ້ນກົດນີ້+ແລະໃຫ້ເຮັດຈັ່ງຊັ້ນຈັ່ງຊີ້.”
ດັ່ງນັ້ນ ຕອນທີ່ເຂົາເຈົ້າຍ່າງເຂົາເຈົ້າຈະສະດຸດແລະລົ້ມຫງາຍຫຼັງ.ເຂົາເຈົ້າຈະບາດເຈັບ ຖືກກັບດັກ ແລະຖືກຈັບ.+
14 ພວກຜູ້ປົກຄອງທີ່ຂີ້ໂມ້ພວກເຈົ້າທີ່ປົກຄອງຊາດນີ້ໃນເມືອງເຢຣູຊາເລັມ ໃຫ້ຟັງສິ່ງທີ່ພະເຢໂຫວາເວົ້າ.
15 ຍ້ອນພວກເຈົ້າເວົ້າຂີ້ໂມ້ວ່າ:
“ພວກເຮົາໄດ້ເຮັດສັນຍາກັບຄວາມຕາຍ+ແລະໄດ້ເຮັດສັນຍາກັບບ່ອນຝັງສົບ*ແລ້ວ.
ເມື່ອນ້ຳໄຫຼມາຖ້ວມມັນຈະບໍ່ໄຫຼມາຮອດພວກເຮົາຍ້ອນພວກເຮົາໃຫ້ຄຳເວົ້າຂີ້ຕົວະເປັນບ່ອນລີ້ໄພແລະໃຫ້ຄຳສອນທີ່ບໍ່ຖືກຕ້ອງເປັນບ່ອນລີ້ຂອງພວກເຮົາ.”+
16 ຍ້ອນແນວນີ້ ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດຈຶ່ງເວົ້າວ່າ:
“ເຮົາເປັນຜູ້ວາງຫີນທີ່ຖືກທົດສອບແລ້ວເພື່ອໃຫ້ເປັນຮາກຖານຢູ່ຊີໂອນ+ແລະເປັນຫີນຫົວແຈ*ທີ່ມີຄ່າຫຼາຍ+ເຊິ່ງຈະເປັນຮາກຖານທີ່ໝັ້ນຄົງ.+
ທຸກຄົນທີ່ສະແດງຄວາມເຊື່ອໃນຫີນນີ້ຈະບໍ່ຢ້ານ.+
17 ເຮົາຈະໃຊ້ຄວາມຍຸຕິທຳເປັນສາຍວັດແທກ*+ແລະຈະໃຊ້ຄວາມຖືກຕ້ອງເປັນເຄື່ອງມືວັດແທກ.+
ໝາກເຫັບຈະທຳລາຍຄຳເວົ້າຕົວະທີ່ເປັນບ່ອນລີ້ໄພແລະນ້ຳກໍຈະຖ້ວມທຳລາຍບ່ອນລີ້ຂອງພວກເຈົ້າ.
18 ສັນຍາທີ່ພວກເຈົ້າເຮັດກັບຄວາມຕາຍຈະຖືກຍົກເລີກແລະສັນຍາທີ່ພວກເຈົ້າເຮັດກັບບ່ອນຝັງສົບ*ກໍຈະຖືກລົບລ້າງຄືກັນ.+
ຕອນທີ່ນ້ຳໄຫຼມາຖ້ວມພວກເຈົ້າຈະຖືກທຳລາຍ.
19 ທຸກເທື່ອທີ່ນ້ຳນັ້ນໄຫຼຜ່ານມາມັນຈະພັດເອົາພວກເຈົ້າໄປ.+ນ້ຳນັ້ນຈະໄຫຼມາທຸກໆມື້ທັງຕອນກາງເວັນແລະຕອນກາງຄືນ.
ເມື່ອເຈິສິ່ງທີ່ເປັນຕາຢ້ານແບບນີ້ ເຂົາເຈົ້າຈະເຂົ້າໃຈໃນສິ່ງທີ່ເຄີຍໄດ້ຍິນ.”*
20 ຕຽງນອນຈະສັ້ນໂພດຈົນຢຽດໂຕບໍ່ໄດ້ແລະຜ້າຫົ່ມກໍຈະນ້ອຍໂພດຈົນຫົ່ມບໍ່ໝົດໂຕ.
21 ພະເຢໂຫວາຈະລຸກຂຶ້ນຈັດການຄືກັບທີ່ເພິ່ນເຄີຍເຮັດຢູ່ພູເປຣາຊີມ.ເພິ່ນຈະລົງມືເຮັດຄືກັບຕອນທີ່ຢູ່ຮ່ອມພູໃກ້ກິເບໂອນ.+ສິ່ງທີ່ເພິ່ນເຮັດຈະເປັນເລື່ອງທີ່ຄິດບໍ່ເຖິງແລະຕາມປົກກະຕິແລ້ວ ເພິ່ນຈະບໍ່ເຮັດແບບນີ້.+
22 ຢ່າເປັນຄົນມັກເຍາະເຍີ້ຍ+ຄັນບໍ່ຊັ້ນ ເຊືອກທີ່ມັດເຈົ້າຢູ່ແຮ່ງຈະຮັດເຈົ້າແໜ້ນຂຶ້ນຍ້ອນພະເຢໂຫວາຜູ້ບັນຊາການກອງທັບພະເຈົ້າຜູ້ຍິ່ງໃຫຍ່ສູງສຸດບອກຂ້ອຍວ່າເພິ່ນໄດ້ຕັດສິນໃຈໄວ້ແລ້ວວ່າຈະທຳລາຍແຜ່ນດິນທັງໝົດ.+
23 ໃຫ້ຕັ້ງໃຈຟັງສຽງຂອງເຮົາແລະໃຫ້ໃສ່ໃຈຟັງສິ່ງທີ່ເຮົາເວົ້າ.
24 ຄົນທີ່ເຮັດນາຈະໄຖນາໝົດມື້ໂດຍທີ່ບໍ່ຫວ່ານເມັດເຂົ້າເລີຍບໍ?
ລາວຈະຊ່າວແຕ່ດິນແລະໄຖໄປໄຖມາຢູ່ແບບນັ້ນບໍ?+
25 ເມື່ອລາວກຽມດິນແລ້ວໆລາວກໍຈະຫວ່ານເມັດຄູມິນດຳ*ແລະເມັດຄູມິນທຳມະດາ*ປູກເຂົ້າວີດ* ເຂົ້າຝ້າງ* ແລະເຂົ້າບາເລໃສ່ນາແລະປູກເຂົ້າສະເປວ*+ໃສ່ອ້ອມແຄມນາບໍ່ແມ່ນບໍ?
26 ພະເຈົ້າສັ່ງສອນ*ຄົນໃນແບບທີ່ຖືກຕ້ອງແລະເພິ່ນກໍໃຫ້ຄຳແນະນຳລາວ.+
27 ເພື່ອຈະເຮັດໃຫ້ເມັດຄູມິນດຳຫຼົ່ນອອກຈາກດອກ ຈະບໍ່ໃຊ້ໄມ້ແປ້ນ*+ແລະຈະບໍ່ໃຊ້ກວຽນຢຽບ
ແຕ່ຈະໃຊ້ໄມ້ເຄາະຕົ້ນຄູມິນດຳແລະຕົ້ນຄູມິນທຳມະດາ.
28 ຕອນທີ່ຟາດເຂົ້າ ຄົນເຮົາຈະຟາດໃຫ້ມຸ່ນຈົນເປັນແປ້ງເຮັດເຂົ້າຈີ່ເລີຍບໍ?
ບໍ່ ລາວຈະບໍ່ຟາດໄປຟາດມາຈົນມັນມຸ່ນດອກ.+ລາວຈະບໍ່ໃຊ້ໄມ້ແປ້ນທີ່ມີມ້າແກ່ເພື່ອເຮັດໃຫ້ເຂົ້າຫຼົ່ນອອກຈາກຮວງຍ້ອນບໍ່ຢາກເຮັດໃຫ້ເມັດເຂົ້າມຸ່ນ.+
29 ຄຳແນະນຳທີ່ມາຈາກພະເຢໂຫວາຜູ້ບັນຊາການກອງທັບກໍເປັນແບບນີ້ຄືກັນ.ຄຳແນະນຳຂອງເພິ່ນດີທີ່ສຸດແລະທຸກສິ່ງທີ່ເພິ່ນເຮັດກໍດີແທ້ໆ.*+
ຂໍ
^ ອາດໝາຍເຖິງຊາມາເຣຍທີ່ເປັນເມືອງຫຼວງ
^ ແປຕາມໂຕວ່າ “ໄມ້ວັດແທກ”
^ ສຳລັບພວກຫົວໜ້າສາສະໜາ ສິ່ງທີ່ເອຊາຢາເວົ້າເປັນຄືກັບການສອນເດັກນ້ອຍແລະເວົ້າແຕ່ຄວາມເກົ່າ
^ ເບິ່ງສ່ວນອະທິບາຍຄຳສັບ
^ ເບິ່ງສ່ວນອະທິບາຍຄຳສັບ
^ ໝາຍເຖິງລູກດິ່ງ
^ ເບິ່ງສ່ວນອະທິບາຍຄຳສັບ
^ ຫຼືອາດແປວ່າ “ເມື່ອເຂົາເຈົ້າເຂົ້າໃຈຂ່າວສານ ເຂົາເຈົ້າຈະຢ້ານຫຼາຍ”
^ ສະໝຸນໄພຊະນິດໜຶ່ງທີ່ເປັນເມັດສີດຳແລະເຜັດຄືກັບພິກໄທ
^ ເຂົ້າຊະນິດໜຶ່ງທີ່ປູກໃນເອຢິບສະໄໝບູຮານ
^ ຕົ້ນພືດຊະນິດໜຶ່ງທີ່ມີເມັດນ້ອຍໆເຊິ່ງໃຊ້ເຮັດເຂົ້າຈີ່ໄດ້
^ ເຂົ້າຊະນິດໜຶ່ງທີ່ໃຊ້ເຮັດເຂົ້າຈີ່ໄດ້
^ ຫຼື “ເມັດຍີ່ຫຼາ” ເຊິ່ງແມ່ນສະໝຸນໄພຊະນິດໜຶ່ງ
^ ຫຼື “ສອນ; ລົງໂທດ”
^ ໄມ້ແປ້ນທີ່ໃຊ້ງົວລາກເພື່ອໃຫ້ເມັດເຂົ້າຫຼົ່ນອອກຈາກຮວງ
^ ຫຼື “ແລະສະຕິປັນຍາຂອງເພິ່ນກໍຫຼາຍແທ້ໆ”
