ເອຊາຢາ 21:1-17
21 ຕໍ່ໄປນີ້ແມ່ນຄຳຕັດສິນຕໍ່ບ່ອນກັນດານທີ່ເປັນຄືກັບທະເລ.*+
ການທຳລາຍຈະມາຄືກັບພາຍຸທີ່ມາຈາກທິດໃຕ້ມາຈາກບ່ອນກັນດານ ແລະມາຈາກແຜ່ນດິນທີ່ເປັນຕາຢ້ານ.+
2 ພະເຈົ້າໃຫ້ຂ້ອຍເຫັນນິມິດທີ່ເປັນຕາຢ້ານ ແລະເພິ່ນເວົ້າວ່າ:
ຊາດທີ່ຊົ່ວຮ້າຍເຮັດແຕ່ສິ່ງທີ່ຊົ່ວຮ້າຍແລະຊາດທີ່ມັກທຳລາຍກໍມີແຕ່ໄປທຳລາຍ.
ເອລາມ ຂຶ້ນໄປໂຈມຕີໂລດ! ເມເດຍ ລ້ອມເມືອງນີ້ໄວ້ໂລດ!+
ຂ້ອຍຈະທຳລາຍເມືອງນີ້ເພື່ອບໍ່ໃຫ້ມັນເຮັດໃຫ້ຜູ້ອື່ນເດືອດຮ້ອນອີກ.+
3 ນິມິດທີ່ຂ້ອຍເຫັນເຮັດໃຫ້ຂ້ອຍເຈັບປວດທໍລະມານ.+
ຂ້ອຍເຈັບຈົນໃຈຊິຂາດຄືກັບຜູ້ຍິງທີ່ກຳລັງຊິເກີດລູກ.
ຂ້ອຍເຈັບແຮງຫຼາຍຈົນຟັງຕໍ່ໄປບໍ່ໄດ້ແລະຂ້ອຍເຈັບແທ້ເຈັບວ່າຈົນເບິ່ງຕໍ່ໄປບໍ່ໄດ້.
4 ຫົວໃຈຂ້ອຍເຕັ້ນໄວ ແລະຂ້ອຍຢ້ານຈົນໂຕສັ່ນ.
ຕອນໃກ້ຊິຄ່ຳເປັນຍາມທີ່ຂ້ອຍມັກ ແຕ່ຂ້ອຍພັດຢ້ານຫຼາຍ.
5 ຈັດໂຕະຈັດຕັ່ງໃຫ້ພ້ອມເດີ້!
ກິນແລະດື່ມເຫຼົ້າແວງໂລດ!+
ພວກເຈົ້ານາຍເອີ້ຍ ລຸກຂຶ້ນແລະເອົານ້ຳມັນທາໂລ້ຂອງພວກເຈົ້າ!
6 ພະເຢໂຫວາເວົ້າກັບຂ້ອຍວ່າ:
“ໃຫ້ໄປຊອກຄົນມາຍາມ ແລະໃຫ້ລາວບອກວ່າເຫັນຫຍັງແດ່.”
7 ລາວເຫັນລົດຮົບຄັນໜຶ່ງທີ່ມີມ້າແກ່ເຫັນລົດຮົບຄັນໜຶ່ງທີ່ມີລາແກ່ແລະເຫັນລົດຮົບຄັນໜຶ່ງທີ່ມີອູດແກ່.
ລາວຕັ້ງໃຈເບິ່ງເອົາແທ້ເອົາວ່າ.
8 ແລ້ວລາວກໍຮ້ອງດັງໆຄືກັບສຽງແຜດຂອງໂຕສິງວ່າ:
“ພະເຢໂຫວາ ພະເຈົ້າຂອງຂ້ອຍ ຂ້ອຍຢືນຢູ່ປ້ອມສູງໆນີ້ໝົດມື້ແລະຢືນຍາມຢູ່ນີ້ໝົດຄືນ.+
9 ເບິ່ງແມ້ ມີຄົນກຳລັງມາທາງນີ້!
ມີພວກທະຫານຂີ່ລົດຮົບທີ່ມີມ້າແກ່ມາ.”+
ແລ້ວລາວກໍຮ້ອງບອກອີກວ່າ:
“ເມືອງບາບີໂລນຖືກທຳລາຍແລ້ວ! ເມືອງບາບີໂລນຖືກທຳລາຍແລ້ວ!+
ຮູບບູຊາທັງໝົດທີ່ເປັນພະເຈົ້າຂອງເມືອງນີ້ກໍຖືກທຳລາຍຈົນມຸ່ນແລ້ວ.”+
10 ຄົນຊາດດຽວກັນກັບຂ້ອຍເອີ້ຍພວກເຈົ້າຖືກຟາດຄືກັບເຂົ້າຢູ່ລານຟາດເຂົ້າ.+ພະເຢໂຫວາຜູ້ບັນຊາການກອງທັບ ພະເຈົ້າຂອງອິດສະຣາເອນໄດ້ບອກຫຍັງຂ້ອຍ ຂ້ອຍກໍບອກພວກເຈົ້າໝົດແລ້ວ.
11 ຕໍ່ໄປນີ້ແມ່ນຄຳຕັດສິນຕໍ່ດູມາ*
ມີຄົນຈາກເສອີຮ້ອງຖາມວ່າ:+
“ຄົນຍາມເອີ້ຍ ໃກ້ຊິແຈ້ງລະບໍ?
ຄົນຍາມເອີ້ຍ ໃກ້ຊິແຈ້ງລະບໍ?”
12 ຄົນຍາມຕອບວ່າ:
“ໃກ້ຊິແຈ້ງແລ້ວ ແລະຈັກໜ້ອຍກໍຊິຄ່ຳອີກ.
ຖ້າເຈົ້າມີຫຍັງຖາມກໍຖາມໂລດ
ແລະກັບມາຖາມອີກກໍໄດ້.”
13 ຕໍ່ໄປນີ້ແມ່ນຄຳຕັດສິນຕໍ່ທະເລຊາຍ.*
ຂະບວນພໍ່ຄ້າຂອງເດດານເອີ້ຍ+ພວກເຈົ້າຈະນອນຄ້າງຄືນຢູ່ໃກ້ຕົ້ນໄມ້ໃນທະເລຊາຍ.
14 ຄົນໃນແຜ່ນດິນເຕມາເອີ້ຍ+ໃຫ້ພວກເຈົ້າເອົານ້ຳໃຫ້ຄົນທີ່ຫິວນ້ຳແລະເອົາຂອງກິນໃຫ້ຄົນທີ່ໜີມາລີ້ໄພ
15 ຍ້ອນວ່າເຂົາເຈົ້າໄດ້ໜີມາຈາກດາບທີ່ພ້ອມຈະຟັນໜີມາຈາກທະນູທີ່ພ້ອມຈະຍິງ ແລະໜີມາຈາກສົງຄາມທີ່ໂຫດຮ້າຍ.
16 ພະເຢໂຫວາບອກຂ້ອຍວ່າ: “ພາຍໃນ 1 ປີ* ກຽດຂອງຄົນເກດາ+ຈະບໍ່ມີອີກຕໍ່ໄປ
17 ແລະທະຫານຍິງທະນູຂອງພວກເກດາທີ່ລອດຈາກສົງຄາມຈະມີແຕ່ໜ້ອຍດຽວ. ພະເຢໂຫວາພະເຈົ້າຂອງອິດສະຣາເອນໄດ້ບອກໄວ້ຈັ່ງຊີ້.”
ຂໍ
^ ເບິ່ງຄືວ່າໝາຍເຖິງເຂດທີ່ຢູ່ທາງໃຕ້ຂອງບາບີໂລນບູຮານທີ່ແມ່ນ້ຳເອິຟາຣາດແລະແມ່ນ້ຳຕິກຣິດຖ້ວມຕາຝັ່ງທຸກໆປີ
^ ແປວ່າ “ມິດງຽບ.” ນີ້ເປັນຊື່ທີ່ໃຊ້ໃນຄຳພະຍາກອນເມື່ອເວົ້າເຖິງເອໂດມ.
^ ຫຼື “ບ່ອນກັນດານ”
^ ແປຕາມໂຕວ່າ “ພາຍໃນ 1 ປີຕາມປີທີ່ຈ້າງຄົນເຮັດວຽກ.” ໄລຍະເວລາຈ້າງຄົນເຮັດວຽກແມ່ນເຈາະຈົງ ເຊິ່ງເນັ້ນໃຫ້ເຫັນວ່າເວລາທີ່ຄົນເກດາຈະຖືກທຳລາຍກໍແນ່ນອນຄືກັນ.
