ເຢເຣມີຢາ 34:1-22
34 ຕອນທີ່ເນບູກາດເນັດຊາ*ກະສັດຂອງບາບີໂລນ ກອງທັບຂອງລາວ ອານາຈັກຕ່າງໆທີ່ຢູ່ໃຕ້ການປົກຄອງຂອງລາວ ແລະຊາດຕ່າງໆກຳລັງຕໍ່ສູ້ກັບເມືອງເຢຣູຊາເລັມແລະເມືອງຕ່າງໆທີ່ຢູ່ອ້ອມແອ້ມ ພະເຢໂຫວາໄດ້ເວົ້າກັບເຢເຣມີຢາວ່າ:+
2 “ພະເຢໂຫວາພະເຈົ້າຂອງອິດສະຣາເອນບອກວ່າ ‘ໃຫ້ເຈົ້າໄປບອກເຊເດກີຢາ+ກະສັດຂອງຢູດາແນວນີ້ “ພະເຢໂຫວາບອກວ່າ ‘ເຮົາຈະມອບເມືອງນີ້ໄວ້ໃນມືຂອງກະສັດບາບີໂລນ ແລ້ວລາວຈະຈູດເມືອງນີ້.+
3 ເຈົ້າຈະໜີບໍ່ລອດ. ເຈົ້າຈະຖືກຈັບແລະຖືກສົ່ງໂຕໄປໃຫ້ກະສັດບາບີໂລນ.+ ເຈົ້າຈະໄດ້ເຈິກັບລາວແລະລາວຈະລົມກັບເຈົ້າແບບໜ້າຕໍ່ໜ້າ ແລ້ວເຈົ້າຈະຖືກພາໄປບາບີໂລນ.’+
4 ແຕ່ເຊເດກີຢາກະສັດຂອງຢູດາເອີ້ຍ ໃຫ້ຟັງຄຳເວົ້າຂອງພະເຢໂຫວາເດີ້. ‘ພະເຢໂຫວາເວົ້າເຖິງເຈົ້າວ່າ “ເຈົ້າຈະບໍ່ຖືກຂ້າດ້ວຍດາບ.
5 ເຈົ້າຈະໄດ້ຕາຍຢ່າງສະຫງົບ.+ ເຂົາເຈົ້າຈະຈັດພິທີເຜົາເຄື່ອງຫອມໃຫ້ເຈົ້າຄືກັບທີ່ເຄີຍເຮັດໃຫ້ປູ່ຍ່າຕານາຍຂອງເຈົ້າແລະກະສັດທີ່ປົກຄອງກ່ອນເຈົ້າ. ເຂົາເຈົ້າຈະຮ້ອງໄຫ້ໄວ້ທຸກໃຫ້ເຈົ້າແລ້ວເວົ້າວ່າ ‘ກະສັດຂອງພວກເຮົາເອີ້ຍ ຄືຈາກພວກເຮົາໄປ!’ ເລື່ອງນີ້ຈະເກີດຂຶ້ນຍ້ອນເຮົາເຢໂຫວາໄດ້ເວົ້າໄວ້ແລ້ວ.”’”’”
6 ຜູ້ພະຍາກອນເຢເຣມີຢາໄດ້ບອກຄຳເວົ້າທັງໝົດນີ້ໃຫ້ເຊເດກີຢາກະສັດຂອງຢູດາຟັງຢູ່ເຢຣູຊາເລັມ
7 ຕອນທີ່ກອງທັບຂອງກະສັດບາບີໂລນກຳລັງຕໍ່ສູ້ເມືອງເຢຣູຊາເລັມແລະເມືອງຂອງຢູດາທີ່ຍັງເຫຼືອຢູ່+ ເຊິ່ງກໍຄືເມືອງລາກິດ+ແລະເມືອງອາເຊກາ.+ ໃນພວກເມືອງທີ່ມີກຳແພງສູງອ້ອມຮອບ ມີແຕ່ 2 ເມືອງນີ້ເທົ່ານັ້ນທີ່ຍັງບໍ່ທັນຖືກເອົາຊະນະ.
8 ພະເຢໂຫວາເວົ້າກັບເຢເຣມີຢາຫຼັງຈາກທີ່ກະສັດເຊເດກີຢາເຮັດສັນຍາກັບທຸກຄົນໃນເມືອງເຢຣູຊາເລັມວ່າໃຫ້ປ່ອຍທາດເປັນອິດສະຫຼະ.+
9 ທຸກຄົນຕ້ອງປ່ອຍທາດຊາຍຍິງຄົນເຮັບເຣີໄປແລະບໍ່ຄວນມີຄົນຢິວຄົນໃດເກັບຄົນຊາດດຽວກັນໄວ້ເປັນທາດອີກ.
10 ພວກເຈົ້ານາຍແລະປະຊາຊົນທັງໝົດກໍເຊື່ອຟັງ. ເຂົາເຈົ້າພາກັນສັນຍາວ່າຈະປ່ອຍທາດຊາຍຍິງຂອງໂຕເອງໄປໃຫ້ໝົດ. ເຂົາເຈົ້າເຊື່ອຟັງແລະປ່ອຍທາດໄປ.
11 ແຕ່ຕໍ່ມາ ເຂົາເຈົ້າພັດໄປນຳເອົາທາດຊາຍຍິງທີ່ເຂົາເຈົ້າປ່ອຍໄປກັບມາແລະບັງຄັບເຂົາເຈົ້າໃຫ້ເປັນທາດອີກ.
12 ພະເຢໂຫວາຈຶ່ງເວົ້າກັບເຢເຣມີຢາອີກເທື່ອໜຶ່ງ. ພະເຢໂຫວາເວົ້າວ່າ:
13 “ພະເຢໂຫວາພະເຈົ້າຂອງອິດສະຣາເອນບອກວ່າ ‘ເຮົາໄດ້ເຮັດສັນຍາກັບປູ່ຍ່າຕານາຍຂອງເຈົ້າ+ໃນມື້ທີ່ເຮົາພາເຂົາເຈົ້າອອກມາຈາກການເປັນທາດໃນແຜ່ນດິນເອຢິບ+ໂດຍບອກວ່າ
14 “ຖ້າພວກເຈົ້າຄົນໃດຊື້ທາດຊາຍຍິງທີ່ເປັນຄົນເຮັບເຣີມາ ແລະທາດນັ້ນເຮັດວຽກຮັບໃຊ້ເຈົ້າ 6 ປີແລ້ວ ໃນປີທີ 7* ພວກເຈົ້າຕ້ອງປ່ອຍທາດນັ້ນໃຫ້ເປັນອິດສະຫຼະ.”+ ແຕ່ປູ່ຍ່າຕານາຍຂອງພວກເຈົ້າພັດບໍ່ສົນໃຈແລະບໍ່ເຊື່ອຟັງເຮົາເລີຍ.
15 ບໍ່ດົນມານີ້* ພວກເຈົ້າເອງກໍໄດ້ກັບໃຈແລະເຮັດສິ່ງທີ່ເຮົາເຫັນວ່າຖືກຕ້ອງໂດຍປ່ອຍຄົນຊາດດຽວກັນໃຫ້ເປັນອິດສະຫຼະແລະເຮັດສັນຍາຕໍ່ໜ້າເຮົາຢູ່ວິຫານທີ່ຖືກເອີ້ນຕາມຊື່ຂອງເຮົາ.
16 ແຕ່ພວກເຈົ້າພັດປ່ຽນໃຈແລະເຮັດໃຫ້ເຮົາເສຍຊື່ສຽງ+ໂດຍໄປນຳເອົາທາດຊາຍຍິງທີ່ພວກເຈົ້າປ່ອຍໃຫ້ໄປຢູ່ໃນບ່ອນທີ່ເຂົາເຈົ້າຢາກຢູ່ ແລະບັງຄັບເຂົາເຈົ້າໃຫ້ກັບມາເປັນທາດອີກ.’
17 ພະເຢໂຫວາຈຶ່ງບອກວ່າ ‘ພວກເຈົ້າບໍ່ໄດ້ເຊື່ອຟັງເຮົາຕອນທີ່ພວກເຈົ້າປ່ອຍພີ່ນ້ອງແລະຄົນຊາດດຽວກັນໃຫ້ເປັນອິດສະຫຼະ.+ ດັ່ງນັ້ນ ເຮົາຈະປ່ອຍພວກເຈົ້າໃຫ້ເປັນອິດສະຫຼະໂດຍໃຫ້ພວກເຈົ້າຖືກຂ້າດ້ວຍດາບ ຕາຍຍ້ອນຄວາມອຶດຢາກ+ແລະໂລກລະບາດ* ແລະເຮົາຈະເຮັດໃຫ້ຊາດຕ່າງໆໃນໂລກນີ້ຢ້ານຫຼາຍເມື່ອເຫັນພວກເຈົ້າ.’+ ພະເຢໂຫວາເວົ້າໄວ້ແນວນີ້.
18 ‘ນີ້ແມ່ນສິ່ງທີ່ຈະເກີດຂຶ້ນກັບຄົນທີ່ຜິດສັນຍາກັບເຮົາຄື ຄົນທີ່ບໍ່ໄດ້ເຮັດຕາມສັນຍາທີ່ເຮັດໄວ້ຕໍ່ໜ້າເຮົາຕອນທີ່ເຂົາເຈົ້າຜ່າງົວນ້ອຍອອກເປັນ 2 ຕ່ອນແລະຍ່າງຜ່ານກາງ 2 ຕ່ອນນັ້ນ.+
19 ຄົນທີ່ຍ່າງຜ່ານກາງງົວນ້ອຍ 2 ຕ່ອນນັ້ນແມ່ນພວກເຈົ້ານາຍຂອງຢູດາ ພວກເຈົ້ານາຍຂອງເຢຣູຊາເລັມ ພວກຂ້າລາຊະການ ພວກປະໂລຫິດ ແລະປະຊາຊົນທັງໝົດທີ່ຢູ່ໃນແຜ່ນດິນນີ້.
20 ເຮົາຈະມອບເຂົາເຈົ້າໄວ້ໃນມືຂອງພວກສັດຕູແລະຄົນທີ່ຢາກຂ້າເຂົາເຈົ້າ. ສົບຂອງເຂົາເຈົ້າຈະເປັນອາຫານຂອງນົກຢູ່ເທິງຟ້າແລະສັດປ່າຢູ່ເທິງດິນ.+
21 ເຮົາຈະມອບເຊເດກີຢາກະສັດຂອງຢູດາແລະພວກເຈົ້ານາຍຂອງລາວໄວ້ໃນມືຂອງພວກສັດຕູ ໃນມືຂອງຄົນທີ່ຢາກຂ້າເຂົາເຈົ້າ ແລະໃນມືຂອງກອງທັບກະສັດບາບີໂລນ+ທີ່ກຳລັງຖອຍກອງທັບໄປຈາກພວກເຈົ້າ.’+
22 ພະເຢໂຫວາບອກວ່າ ‘ເຮົາຈະອອກຄຳສັ່ງແລະພາເຂົາເຈົ້າກັບມາເມືອງນີ້. ເຂົາເຈົ້າຈະໂຈມຕີແລະຍຶດເມືອງນີ້ ແລ້ວກໍຈູດມັນຖິ້ມ.+ ເຮົາຈະເຮັດໃຫ້ເມືອງຕ່າງໆຂອງຢູດາກາຍເປັນບ່ອນຮ້າງເປົ່າແລະບໍ່ມີໃຜອາໄສຢູ່.’”+
ຂໍ
^ ແປຕາມໂຕວ່າ “ເນບູກາດເຣັດຊາ” ເຊິ່ງເປັນການສະກົດອີກແບບໜຶ່ງ
^ ແປຕາມໂຕວ່າ “ໃນຕອນທ້າຍຂອງປີທີ 7”
^ ແປຕາມໂຕວ່າ “ມື້ນີ້”
^ ຫຼື “ພະຍາດ”
