ເຢເຣມີຢາ 32:1-44
32 ພະເຢໂຫວາເວົ້າກັບເຢເຣມີຢາໃນປີທີ 10 ທີ່ກະສັດເຊເດກີຢາປົກຄອງຢູດາເຊິ່ງເປັນປີທີ 18 ທີ່ກະສັດເນບູກາດເນັດຊາ*ປົກຄອງບາບີໂລນ.+
2 ຕອນນັ້ນ ກອງທັບຂອງກະສັດບາບີໂລນລ້ອມເມືອງເຢຣູຊາເລັມຢູ່ ແລະຜູ້ພະຍາກອນເຢເຣມີຢາຖືກກັກໂຕຢູ່ເດີ່ນທະຫານປ້ອງກັນໂຕກະສັດ+ໃນວັງຂອງກະສັດຢູດາ.
3 ເຊເດກີຢາກະສັດຂອງຢູດາໄດ້ກັກຂັງລາວໄວ້+ ແລ້ວເວົ້າວ່າ: “ເປັນຫຍັງເຈົ້າຄືພະຍາກອນແນວນີ້? ເຈົ້າເວົ້າວ່າ ‘ພະເຢໂຫວາບອກວ່າ “ເຮົາຈະມອບເມືອງນີ້ໄວ້ໃນມືຂອງກະສັດບາບີໂລນແລະລາວຈະຍຶດເມືອງນີ້ໄດ້.+
4 ເຊເດກີຢາກະສັດຂອງຢູດາຈະໜີຈາກພວກການເດອາບໍ່ໄດ້. ລາວຈະຖືກມອບໄວ້ໃນມືຂອງກະສັດບາບີໂລນແລະລາວຈະຕ້ອງເວົ້າກັບກະສັດບາບີໂລນແບບໜ້າຕໍ່ໜ້າ.”’+
5 ພະເຢໂຫວາບອກວ່າ ‘ກະສັດບາບີໂລນຈະພາເຊເດກີຢາໄປບາບີໂລນແລະລາວຈະຢູ່ຫັ້ນຈົນກວ່າເຮົາຈະຕັດສິນໃຈວ່າຈະເຮັດແນວໃດກັບລາວ. ເຖິງວ່າພວກເຈົ້າຈະພະຍາຍາມຕໍ່ສູ້ພວກການເດອາຫຼາຍສ່ຳໃດ ແຕ່ພວກເຈົ້າກໍຈະບໍ່ຊະນະ.’”+
6 ເຢເຣມີຢາບອກວ່າ: “ພະເຢໂຫວາເວົ້າກັບຂ້ອຍວ່າ
7 ‘ລູກຊາຍຂອງຊາລຶມລຸງ*ຂອງເຈົ້າທີ່ຊື່ຮານາເມນຈະມາຫາເຈົ້າແລະເວົ້າວ່າ “ໃຫ້ເຈົ້າຊື້ດິນຂອງຂ້ອຍຢູ່ອານາໂທດ+ ຍ້ອນເຈົ້າເປັນຄົນທຳອິດທີ່ມີສິດຈະຊື້ໄດ້.”’”+
8 ຮານາເມນລູກຊາຍຂອງລຸງກໍໄດ້ມາຫາຂ້ອຍຢູ່ເດີ່ນທະຫານປ້ອງກັນໂຕກະສັດຄືກັບທີ່ພະເຢໂຫວາໄດ້ບອກໄວ້. ລາວເວົ້າກັບຂ້ອຍວ່າ: “ຂໍໃຫ້ເຈົ້າຊື້ດິນຂອງຂ້ອຍຢູ່ອານາໂທດໃນເຂດຂອງພວກເບັນຢາມິນ ຍ້ອນເຈົ້າມີສິດທີ່ຈະຊື້ແລະເປັນເຈົ້າຂອງມັນໄດ້. ໃຫ້ເຈົ້າຊື້ໄວ້ເປັນຂອງໂຕເອງເດີ້.” ຕອນນັ້ນ ຂ້ອຍກໍເລີຍເຂົ້າໃຈວ່າພະເຢໂຫວາຢາກໃຫ້ຂ້ອຍເຮັດແນວນັ້ນ.
9 ຂ້ອຍຈຶ່ງຊື້ດິນຢູ່ອານາໂທດຈາກຮານາເມນລູກຊາຍຂອງລຸງ. ຂ້ອຍຊັ່ງເງິນ+ໃຫ້ລາວ 17 ເຊເກນ.**
10 ຂ້ອຍໄດ້ເຮັດໃບສັນຍາຊື້ຂາຍ+ ຈ້ຳກາໃສ່ໃບສັນຍານັ້ນ ເອີ້ນພະຍານ+ມາເຊັນຊື່ ແລະຊັ່ງເງິນຢູ່ຊິງ.
11 ແລ້ວຂ້ອຍກໍເອົາໃບສັນຍາຊື້ຂາຍທີ່ເຮັດຖືກຕ້ອງຕາມກົດໝາຍທັງສະບັບທີ່ຈ້ຳກາແລະສະບັບທີ່ຍັງບໍ່ທັນຈ້ຳກາ
12 ໄປໃຫ້ບາຣຸກ+ລູກຊາຍຂອງເນຣີຢາ+ຫຼານຊາຍຂອງມາເຊຢາຕໍ່ໜ້າຮານາເມນລູກຊາຍຂອງລຸງຂ້ອຍ ຕໍ່ໜ້າພະຍານທີ່ເຊັນຊື່ໃນສັນຍາ ແລະຕໍ່ໜ້າຄົນຢິວທັງໝົດທີ່ນັ່ງຢູ່ເດີ່ນທະຫານປ້ອງກັນໂຕກະສັດ.+
13 ແລ້ວຂ້ອຍກໍສັ່ງບາຣຸກຕໍ່ໜ້າທຸກຄົນວ່າ:
14 “ພະເຢໂຫວາຜູ້ບັນຊາການກອງທັບພະເຈົ້າຂອງອິດສະຣາເອນບອກວ່າ ‘ໃຫ້ເອົາສັນຍາຊື້ຂາຍນີ້ທັງສະບັບທີ່ຈ້ຳກາແລະສະບັບທີ່ຍັງບໍ່ທັນຈ້ຳກາໄປໃສ່ໄວ້ໃນໂຖດິນເພື່ອຈະເກັບໄວ້ດົນໆ’
15 ຍ້ອນພະເຢໂຫວາຜູ້ບັນຊາການກອງທັບເວົ້າວ່າ ‘ຈະມີການຊື້ຂາຍເຮືອນ ດິນ ແລະສວນໝາກລະແຊັງຢູ່ແຜ່ນດິນນີ້ອີກເທື່ອໜຶ່ງ.’”+
16 ຫຼັງຈາກເອົາໃບສັນຍາຊື້ຂາຍໃຫ້ບາຣຸກລູກຊາຍຂອງເນຣີຢາແລ້ວ ຂ້ອຍກໍອະທິດຖານຫາພະເຢໂຫວາວ່າ:
17 “ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເອີ້ຍ ພະອົງໄດ້ສ້າງສະຫວັນແລະໂລກດ້ວຍພະລັງອຳນາດ+ແລະລິດເດດທີ່ຍິ່ງໃຫຍ່*ຂອງພະອົງ. ບໍ່ມີສິ່ງໃດຍາກເກີນໄປສຳລັບພະອົງ.
18 ພະອົງເປັນຜູ້ທີ່ສະແດງຄວາມຮັກທີ່ໝັ້ນຄົງຕໍ່ຄົນຫຼາຍພັນຊົ່ວອາຍຸຄົນ ແຕ່ພະອົງລົງໂທດລຸ້ນລູກລຸ້ນຫຼານຕາມຄວາມຜິດທີ່ລຸ້ນພໍ່ໄດ້ເຮັດ.+ ພະອົງເປັນພະເຈົ້າທ່ຽງແທ້ທີ່ມີລິດເດດແລະມີອຳນາດຫຼາຍ. ຊື່ຂອງພະອົງແມ່ນພະເຢໂຫວາຜູ້ບັນຊາການກອງທັບ.
19 ການສັ່ງສອນຈາກພະອົງດີແທ້ໆ*ແລະພະອົງເຮັດສິ່ງທີ່ຍິ່ງໃຫຍ່ຫຼາຍຢ່າງ.+ ພະອົງເຝົ້າເບິ່ງການໃຊ້ຊີວິດຂອງມະນຸດ+ເພື່ອຈະຕອບແທນແຕ່ລະຄົນຕາມສິ່ງທີ່ເຂົາເຈົ້າເຮັດ.+
20 ພະອົງໄດ້ເຮັດການອັດສະຈັນຫຼາຍຢ່າງຢູ່ແຜ່ນດິນເອຢິບເຊິ່ງຄົນອື່ນກໍຮູ້ຈັກຈົນຮອດທຸກມື້ນີ້. ພະອົງໄດ້ເຮັດໃຫ້ໂຕເອງມີຊື່ສຽງໃນອິດສະຣາເອນແລະໃນຊາດຕ່າງໆ+ຄືກັບທີ່ເປັນຢູ່ໃນທຸກມື້ນີ້.
21 ພະອົງໃຊ້ການອັດສະຈັນ ພະລັງອຳນາດ ລິດເດດທີ່ຍິ່ງໃຫຍ່ ແລະສິ່ງທີ່ເປັນຕາຢ້ານຫຼາຍຢ່າງເພື່ອຊ່ວຍພວກອິດສະຣາເອນປະຊາຊົນຂອງພະອົງອອກມາຈາກເອຢິບ.+
22 ຕໍ່ມາ ພະອົງກໍເອົາແຜ່ນດິນນີ້ທີ່ມີນ້ຳນົມກັບນ້ຳເຜີ້ງຫຼາຍ+ໃຫ້ເຂົາເຈົ້າ ເຊິ່ງເປັນແຜ່ນດິນທີ່ພະອົງເຄີຍສັນຍາວ່າຈະຍົກໃຫ້ປູ່ຍ່າຕານາຍຂອງເຂົາເຈົ້າ.+
23 ແລ້ວເຂົາເຈົ້າກໍໄດ້ເຂົ້າມາຍຶດເອົາແຜ່ນດິນນີ້. ແຕ່ເຂົາເຈົ້າພັດບໍ່ເຊື່ອຟັງແລະບໍ່ເຮັດຕາມກົດໝາຍຂອງພະອົງ. ເຂົາເຈົ້າບໍ່ໄດ້ເຮັດຕາມທີ່ພະອົງສັ່ງຈັກຢ່າງເລີຍ ພະອົງຈຶ່ງເຮັດໃຫ້ເຂົາເຈົ້າເຈິຄວາມຈິບຫາຍທັງໝົດນີ້.+
24 ພວກສັດຕູເອົາດິນມາກອງເປັນໂນນຈຸກຳແພງເພື່ອຈະຍຶດເອົາເມືອງນີ້.+ ຄົນໃນເມືອງຖືກຂ້າດ້ວຍດາບ+ ຕາຍຍ້ອນຄວາມອຶດຢາກແລະໂລກລະບາດ.*+ ເຂົາເຈົ້າຈະຕ້ອງຕົກຢູ່ໃນມືຂອງພວກການເດອາທີ່ກຳລັງມາໂຈມຕີແນ່ນອນ. ພະອົງກໍເຫັນວ່າສິ່ງທີ່ພະອົງເວົ້າໄວ້ເກີດຂຶ້ນທັງໝົດແລ້ວ.
25 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເອີ້ຍ ທັງໆທີ່ເມືອງນີ້ຈະຖືກພວກການເດອາຍຶດໄປຢູ່ແລ້ວ ແຕ່ພະອົງກໍຍັງບອກລູກວ່າ ‘ໃຫ້ເອົາເງິນໄປຊື້ດິນໃຫ້ໂຕເອງແລະເອີ້ນພະຍານມາເຊັນຊື່.’”
26 ພະເຢໂຫວາຈຶ່ງເວົ້າກັບເຢເຣມີຢາວ່າ:
27 “ເຮົາແມ່ນເຢໂຫວາຜູ້ເປັນພະເຈົ້າຂອງມະນຸດທຸກຄົນ. ມີສິ່ງໃດຍາກເກີນໄປສຳລັບເຮົາບໍ?
28 ພະເຢໂຫວາເວົ້າວ່າ ‘ເຮົາຈະເອົາເມືອງນີ້ໃຫ້ພວກການເດອາແລະໃຫ້ເນບູກາດເນັດຊາກະສັດຂອງບາບີໂລນ. ລາວຈະຍຶດເອົາເມືອງນີ້ໄດ້.+
29 ພວກການເດອາທີ່ມາຕໍ່ສູ້ເມືອງນີ້ຈະເຂົ້າມາແລະຈູດເມືອງນີ້+ ແລະຈູດເຮືອນທີ່ມີຄົນເອົາເຄື່ອງບູຊາຕ່າງໆໃຫ້ພະບາອານແລະເທເຄື່ອງບູຊາດື່ມໃຫ້ພະເຈົ້າອື່ນໆຢູ່ເທິງດາດຟ້າ ເຊິ່ງເປັນສິ່ງທີ່ເຮັດໃຫ້ເຮົາໃຈຮ້າຍຫຼາຍ.’+
30 ພະເຢໂຫວາບອກວ່າ ‘ພວກອິດສະຣາເອນແລະພວກຢູດາເຮັດແຕ່ສິ່ງທີ່ເຮົາເຫັນວ່າຊົ່ວຕັ້ງແຕ່ຕອນທີ່ເຂົາເຈົ້າຍັງນ້ອຍ.+ ພວກອິດສະຣາເອນເຮັດໃຫ້ເຮົາບໍ່ພໍໃຈຢູ່ເລື້ອຍໆ.
31 ສຳລັບເມືອງນີ້ຕັ້ງແຕ່ມື້ທີ່ມັນຖືກສ້າງຈົນຮອດທຸກມື້ນີ້ ມັນກໍມີແຕ່ເຮັດໃຫ້ເຮົາໃຈຮ້າຍຫຼາຍ.+ ເຮົາບໍ່ຢາກເຫັນເມືອງນີ້ອີກຕໍ່ໄປ+
32 ຍ້ອນຄວາມຊົ່ວທັງໝົດທີ່ພວກອິດສະຣາເອນແລະພວກຢູດາໄດ້ເຮັດ. ເຂົາເຈົ້າທຸກຄົນ ທັງພວກກະສັດ+ ພວກເຈົ້ານາຍ+ ພວກປະໂລຫິດ ພວກຜູ້ພະຍາກອນ+ ຄົນຢູດາ ແລະຄົນໃນເມືອງເຢຣູຊາເລັມໄດ້ເຮັດໃຫ້ເຮົາໃຈຮ້າຍ.
33 ເຂົາເຈົ້າປິ່ນຫຼັງໃຫ້ເຮົາແລະບໍ່ຫຼຽວໜ້າມາຫາເຮົາເລີຍ.+ ເຖິງວ່າເຮົາຈະພະຍາຍາມສອນເຂົາເຈົ້າເທື່ອແລ້ວເທື່ອອີກ* ແຕ່ກໍບໍ່ມີໃຜຍອມຟັງແລະຍອມຮັບການສັ່ງສອນຈາກເຮົາ.+
34 ເຂົາເຈົ້າເອົາຮູບບູຊາທີ່ເປັນຕາຂີ້ດຽດໄປໄວ້ໃນວິຫານທີ່ຖືກເອີ້ນຕາມຊື່ຂອງເຮົາເພື່ອເຮັດໃຫ້ວິຫານນັ້ນບໍ່ສະອາດ.+
35 ເຂົາເຈົ້າຍັງໄດ້ສ້າງບ່ອນນະມັດສະການພະບາອານຢູ່ຮ່ອມພູຮິນໂນມ*+ເພື່ອຈະເອົາລູກຊາຍແລະລູກສາວຂອງໂຕເອງໄປເຜົາບູຊາໃຫ້ພະໂມເລັກ.+ ສິ່ງທີ່ເປັນຕາຂີ້ດຽດທີ່ເຮັດໃຫ້ພວກຢູດາເຮັດຜິດແບບນັ້ນເປັນສິ່ງທີ່ເຮົາບໍ່ໄດ້ສັ່ງໃຫ້ເຂົາເຈົ້າເຮັດ+ແລະບໍ່ເຄີຍຢູ່ໃນຄວາມຄິດຂອງເຮົາເລີຍ.’
36 ພວກເຈົ້າເວົ້າວ່າ ‘ເມືອງນີ້ຈະຖືກມອບໄວ້ໃນມືຂອງກະສັດບາບີໂລນຍ້ອນຈະມີຄົນຖືກຂ້າດ້ວຍດາບ ຈະມີຄົນຕາຍຍ້ອນຄວາມອຶດຢາກແລະໂລກລະບາດ’ ແຕ່ຕອນນີ້ພະເຢໂຫວາພະເຈົ້າຂອງອິດສະຣາເອນກຳລັງບອກວ່າ
37 ‘ເຮົາຈະລວບລວມເຂົາເຈົ້າຈາກແຜ່ນດິນຕ່າງໆທີ່ເຮົາເຮັດໃຫ້ເຂົາເຈົ້າກະຈັດກະຈາຍກັນໄປຢູ່ຕອນທີ່ເຮົາໃຈຮ້າຍຫຼາຍ.+ ເຮົາຈະພາເຂົາເຈົ້າກັບມາບ່ອນນີ້ແລະໃຫ້ເຂົາເຈົ້າໄດ້ຢູ່ຢ່າງປອດໄພ.+
38 ເຂົາເຈົ້າຈະເປັນປະຊາຊົນຂອງເຮົາແລະເຮົາຈະເປັນພະເຈົ້າຂອງເຂົາເຈົ້າ.+
39 ເຮົາຈະໃຫ້ເຂົາເຈົ້າເປັນນ້ຳໜຶ່ງໃຈດຽວກັນ+ແລະມີວິທີໃຊ້ຊີວິດແບບດຽວກັນເພື່ອທີ່ເຂົາເຈົ້າຈະນັບຖື*ເຮົາສະເໝີ ເຊິ່ງຈະເຮັດໃຫ້ເຂົາເຈົ້າແລະລູກຫຼານຂອງເຂົາເຈົ້າໄດ້ຮັບປະໂຫຍດ.+
40 ເຮົາຈະເຮັດສັນຍາທີ່ໃຊ້ໄດ້ຕະຫຼອດໄປກັບເຂົາເຈົ້າ+ແລະເຮົາສັນຍາວ່າຈະບໍ່ເຊົາເຮັດດີກັບເຂົາເຈົ້າ.+ ເຮົາຈະເຮັດໃຫ້ເຂົາເຈົ້ານັບຖືເຮົາຕະຫຼອດເພື່ອທີ່ເຂົາເຈົ້າຈະບໍ່ປະຖິ້ມເຮົາ.+
41 ເຮົາຈະມີຄວາມສຸກທີ່ໄດ້ເຮັດສິ່ງດີໆໃຫ້ເຂົາເຈົ້າ.+ ເຮົາຈະໃຫ້ເຂົາເຈົ້າຢູ່ໃນແຜ່ນດິນນີ້ຕະຫຼອດໄປ.+ ເຮົາຈະເຮັດທັງໝົດນີ້ຢ່າງສຸດຫົວໃຈແລະສຸດກຳລັງຂອງເຮົາ.’
42 ພະເຢໂຫວາບອກວ່າ ‘ຄືກັບທີ່ເຮົາໄດ້ເຮັດໃຫ້ປະຊາຊົນເຫຼົ່ານີ້ເຈິຄວາມຈິບຫາຍຄັ້ງໃຫຍ່ ເຮົາກໍຈະເຮັດໃຫ້ເຂົາເຈົ້າໄດ້ຮັບສິ່ງດີຕ່າງໆທີ່ເຮົາໄດ້ສັນຍາໄວ້.+
43 ຈະມີການຊື້ຂາຍດິນຢູ່ແຜ່ນດິນນີ້ອີກເທື່ອໜຶ່ງ+ ເຖິງວ່າພວກເຈົ້າຈະເວົ້າວ່າ “ມັນເປັນແຜ່ນດິນທີ່ຮ້າງເປົ່າ ບໍ່ມີຄົນແລະສັດອາໄສຢູ່ ແລະຕົກເປັນຂອງພວກການເດອາແລ້ວ.”
44 ຈະມີການຊື້ຂາຍດິນ ຈະມີການເຮັດໃບສັນຍາຊື້ຂາຍແລະຈ້ຳກາໃສ່ ແລະຈະມີການເອີ້ນພະຍານມາເຊັນຊື່ໃນເຂດຂອງພວກເບັນຢາມິນ+ ໃນເຂດທີ່ຢູ່ອ້ອມແອ້ມເມືອງເຢຣູຊາເລັມ ໃນເມືອງຕ່າງໆຂອງຢູດາ+ ໃນເມືອງຕ່າງໆທີ່ຢູ່ເຂດພູ ຢູ່ທົ່ງພຽງ+ ແລະຢູ່ທາງໃຕ້ ຍ້ອນເຮົາຈະພາຄົນທີ່ຖືກຈັບໄປເປັນຊະເລີຍໃຫ້ກັບມາ.’+ ພະເຢໂຫວາເວົ້າໄວ້ແນວນີ້.”
ຂໍ
^ ແປຕາມໂຕວ່າ “ເນບູກາດເຣັດຊາ” ເຊິ່ງເປັນການສະກົດອີກແບບໜຶ່ງ
^ ຫຼື “ອາວ”
^ ຫຼືອາດແປວ່າ “ຄຳ 7 ເຊເກນກັບເງິນ 10 ເຊເກນ”
^ 193,8 ກຣາມ. ເບິ່ງພາກຜະໜວກ ຂ14.
^ ແປຕາມໂຕວ່າ “ແຂນທີ່ຢຽດອອກ”
^ ຫຼື “ພະອົງມີຄວາມຕ້ອງການທີ່ຍິ່ງໃຫຍ່”
^ ຫຼື “ພະຍາດ”
^ ແປຕາມໂຕວ່າ “ຕື່ນແຕ່ເຊົ້າແລະສອນ”
^ ແປຕາມໂຕວ່າ “ຮ່ອມພູຂອງລູກຊາຍຮິນໂນມ.” ເບິ່ງຄຳວ່າ “ເກເຮັນນາ” ໃນສ່ວນອະທິບາຍຄຳສັບ.
^ ແປຕາມໂຕວ່າ “ຢ້ານຢຳ”
