ເພງສັນລະເສີນ 69:1-36
ເຖິງຜູ້ຄວບຄຸມດົນຕີ ເພງນີ້ຕັ້ງຕາມເພງ “ດອກລິນລີ້.”* ເພງຂອງດາວິດ.
69 ພະເຈົ້າເອີ້ຍ ຂໍພະອົງຊ່ວຍລູກແດ່ ຍ້ອນນ້ຳຖ້ວມສູງຫຼາຍແລະລູກກໍຈະຈົມນ້ຳຕາຍຢູ່ແລ້ວ.+
2 ລູກຄາຢູ່ຂີ້ຕົມບັກເລິກໆ ບໍ່ມີພື້ນແຂງໆໃຫ້ຢຽບເລີຍ.+
ລູກຢູ່ໃນນ້ຳເລິກແລະນ້ຳທີ່ໄຫຼແຮງກໍພັດລູກໄປ.+
3 ລູກຮ້ອງຂໍຄວາມຊ່ວຍເຫຼືອຈົນໝົດແຮງ+ຈົນຄໍຂອງລູກແຫ້ງໄປໝົດແລ້ວ.
ລູກແນມຫາພະເຈົ້າຂອງລູກຈົນເມື່ອຍຕາ.+
4 ຄົນທີ່ຊັງລູກແບບບໍ່ມີເຫດຜົນ+ກໍມີຫຼາຍກວ່າຜົມຢູ່ຫົວຂອງລູກ.
ຄົນທີ່ຢາກຂ້າລູກແລະສັດຕູທີ່ທໍລະຍົດລູກກໍມີຫຼາຍຂຶ້ນໆ.
ເຂົາເຈົ້າໃສ່ຮ້າຍລູກວ່າລູກລັກເຄື່ອງ ແລ້ວກໍຍຶດເອົາເຄື່ອງຂອງລູກໄປ.
5 ພະເຈົ້າເອີ້ຍ ພະອົງຮູ້ດີວ່າລູກໂງ່ຫຼາຍສ່ຳໃດແລະຮູ້ວ່າລູກເຄີຍເຮັດຜິດຫຼາຍສ່ຳໃດ.
6 ພະເຢໂຫວາຜູ້ບັນຊາການກອງທັບ ພະເຈົ້າຜູ້ຍິ່ງໃຫຍ່ສູງສຸດເອີ້ຍຂໍຢ່າໃຫ້ຄົນທີ່ໄວ້ໃຈພະອົງຕ້ອງອັບອາຍຍ້ອນລູກ.
ພະເຈົ້າຂອງອິດສະຣາເອນເອີ້ຍຂໍຢ່າໃຫ້ຄົນທີ່ຂໍການຊີ້ນຳຈາກພະອົງຕ້ອງຂາຍໜ້າຍ້ອນລູກ.
7 ຄົນອື່ນເວົ້າໃຫ້ລູກຍ້ອນລູກຮັບໃຊ້ພະອົງ+ລູກຈຶ່ງຮູ້ສຶກອັບອາຍຫຼາຍ.+
8 ພວກອ້າຍຂອງລູກເຮັດຄືກັບວ່າບໍ່ຮູ້ຈັກລູກ.ພວກນ້ອງຂອງລູກກໍເຮັດຄືກັບວ່າລູກເປັນຄົນຕ່າງຊາດ.+
9 ລູກຮັກວິຫານຂອງພະອົງຫຼາຍຈົນຮູ້ສຶກຄືກັບວ່າມີໄຟລຸກແຮງຢູ່ໃນໂຕຂອງລູກ.+ຄຳເວົ້າຂອງຄົນທີ່ດູຖູກພະອົງກໍຕົກມາຖືກລູກຄືກັນ.+
10 ຕອນທີ່ລູກຖ່ອມໂຕແລະອົດເຂົ້າຄົນອື່ນກໍເວົ້າໃຫ້ລູກ.
11 ຕອນທີ່ລູກນຸ່ງຜ້າເນື້ອຫຍາບເຂົາເຈົ້າກໍດູຖູກລູກ.
12 ພວກທີ່ນັ່ງຢູ່ປະຕູເມືອງເວົ້າຂວັນລູກ.ພວກຂີ້ເຫຼົ້າກໍຮ້ອງເພງເຍາະເຍີ້ຍລູກ.
13 ແຕ່ພະເຢໂຫວາເອີ້ຍ ລູກຈະອະທິດຖານຫາພະອົງໃນເວລາທີ່ພະອົງຈະອີ່ຕົນລູກ.+
ພະເຈົ້າເອີ້ຍ ພະອົງມີຄວາມຮັກທີ່ໝັ້ນຄົງຫຼາຍ.ຂໍພະອົງຕອບຄຳອະທິດຖານຂອງລູກແລະເຮັດໃຫ້ເຫັນວ່າພະອົງເປັນຜູ້ຊ່ວຍໃຫ້ລອດທີ່ລູກໄວ້ໃຈໄດ້.+
14 ຂໍພະອົງຊ່ວຍລູກຂຶ້ນມາຈາກໜອງຂີ້ຕົມແລະຢ່າປ່ອຍໃຫ້ລູກຈົມລົງໄປ.
ຂໍພະອົງຊ່ວຍລູກໃຫ້ພົ້ນຈາກຄົນທີ່ຊັງລູກແລະຊ່ວຍລູກຂຶ້ນມາຈາກນ້ຳເລິກ.+
15 ຂໍພະອົງຢ່າປ່ອຍໃຫ້ນ້ຳຖ້ວມທີ່ໄຫຼແຮງໆພັດລູກໄປ+ຂໍຢ່າປ່ອຍໃຫ້ລູກຈົມຢູ່ນ້ຳເລິກແລະຂໍຢ່າປ່ອຍລູກໄວ້ຢູ່ຂຸມນ້ຳສ້າງທີ່ເລິກໆ.+
16 ພະເຢໂຫວາເອີ້ຍ ຂໍພະອົງຕອບລູກ ຍ້ອນພະອົງຮັກລູກຢ່າງໝັ້ນຄົງ.+
ຂໍພະອົງຫັນມາສົນໃຈລູກ ຍ້ອນພະອົງມີຄວາມເມດຕາຫຼາຍ.+
17 ຂໍພະອົງຢ່າປິ່ນໜ້າໜີຈາກຜູ້ຮັບໃຊ້ຂອງພະອົງ.+
ຂໍພະອົງຕອບລູກໄວໆແດ່ຍ້ອນລູກທຸກໃຈຫຼາຍ.+
18 ຂໍພະອົງຫຍັບເຂົ້າມາໃກ້ໆລູກແລະຊ່ວຍລູກໃຫ້ລອດ.ຂໍພະອົງໄຖ່ລູກຈາກພວກສັດຕູ.
19 ພະອົງຮູ້ດີວ່າລູກຖືກຄົນອື່ນເວົ້າໃຫ້ ຖືກເຮັດໃຫ້ເສຍກຽດ ແລະຖືກເຮັດໃຫ້ອັບອາຍ.+
ພະອົງເຫັນສັດຕູທັງໝົດຂອງລູກແລ້ວ.
20 ຄຳດູຖູກເຮັດໃຫ້ຫົວໃຈລູກແຕກສະຫຼາຍແລະບາດແຜນັ້ນກໍປົວບໍ່ໄດ້.*
ລູກຫວັງວ່າຈະມີຄົນມາເຫັນໃຈ ແຕ່ກໍບໍ່ມີ.+ລູກຊອກຫາຄົນຈະມາປອບໃຈ ແຕ່ກໍບໍ່ເຫັນ.+
21 ເຂົາເຈົ້າເອົາຢາພິດ*ໃຫ້ລູກກິນແທນອາຫານ+ແລະເອົາເຫຼົ້າແວງສົ້ມ*ໃຫ້ລູກກິນແທນນ້ຳ.+
22 ຂໍພະອົງເຮັດໃຫ້ໂຕະຂອງເຂົາເຈົ້າເປັນກັບດັກຈັບເຂົາເຈົ້າ.ຂໍໃຫ້ຄວາມຈະເລີນກ້າວໜ້າຂອງເຂົາເຈົ້າເປັນແຮ້ວຈັບເຂົາເຈົ້າ.+
23 ຂໍໃຫ້ຕາຂອງເຂົາເຈົ້າມົວຈົນເບິ່ງບໍ່ເຫັນແລະຂໍໃຫ້ເຂົາເຈົ້າຢ້ານພະອົງຈົນໂຕສັ່ນ*ຢູ່ຕະຫຼອດ.
24 ຂໍພະອົງເທຄວາມໃຈຮ້າຍໃສ່ເຂົາເຈົ້າແລະສາດຄວາມໃຈຮ້າຍແຮງໃສ່ເຂົາເຈົ້າ.+
25 ຂໍໃຫ້ຄ້າຍ*ຂອງເຂົາເຈົ້າຖືກປະໄວ້ໃຫ້ຮ້າງແລະຂໍໃຫ້ເຕັ້ນຂອງເຂົາເຈົ້າບໍ່ມີໃຜຢູ່ຈັກຄົນ+
26 ຍ້ອນເຂົາເຈົ້າໄລ່ນຳຄົນທີ່ພະອົງຕີແລະເຂົາເຈົ້າມັກເວົ້າຂວັນເລື່ອງຂອງຄົນທີ່ພະອົງເຮັດໃຫ້ເປັນບາດ.
27 ຂໍພະອົງຕື່ມຄວາມຜິດຂອງເຂົາເຈົ້າໃຫ້ຫຼາຍຂຶ້ນອີກ.ຂໍຢ່າໃຫ້ເຂົາເຈົ້າໄດ້ຮັບຄວາມຍຸຕິທຳຈາກພະອົງ.
28 ຂໍໃຫ້ຊື່ຂອງເຂົາເຈົ້າຖືກລຶບອອກຈາກປຶ້ມລາຍຊື່ຄົນທີ່ຈະໄດ້ຊີວິດ.+ຂໍໃຫ້ເຂົາເຈົ້າບໍ່ມີຊື່ຢູ່ນຳຄົນທີ່ເຮັດສິ່ງທີ່ຖືກຕ້ອງ.+
29 ລູກທໍລະມານແລະເຈັບປວດຫຼາຍ.+
ພະເຈົ້າເອີ້ຍ ຂໍພະອົງໃຊ້ລິດເດດຂອງພະອົງປົກປ້ອງລູກແດ່ເດີ້.
30 ຂ້ອຍຈະຮ້ອງເພງສັນລະເສີນຊື່ຂອງພະເຈົ້າແລະຂ້ອຍຈະຮ້ອງເພງຂອບໃຈເພິ່ນ.
31 ພະເຢໂຫວາຈະພໍໃຈສິ່ງເຫຼົ່ານີ້ຫຼາຍກວ່າງົວໂຕຜູ້ແລະຈະພໍໃຈຫຼາຍກວ່າງົວທີ່ມີເຂົາແລະມີກີບຕີນແລ້ວ.+
32 ຄົນຖ່ອມຈະໄດ້ເຫັນຄວາມດີຂອງພະເຈົ້າແລະມີຄວາມສຸກ.
ພວກຄົນທີ່ຮັບໃຊ້ພະເຈົ້າເອີ້ຍ ຂໍໃຫ້ພວກເຈົ້າມີກຳລັງໃຈຫຼາຍຂຶ້ນ.
33 ພະເຢໂຫວາຟັງສຽງຂອງຄົນທຸກ+ແລະເພິ່ນຈະບໍ່ຊັງຄົນຂອງເພິ່ນທີ່ຖືກຈັບໄປເປັນຊະເລີຍ.+
34 ໃຫ້ຟ້າກັບໂລກສັນລະເສີນເພິ່ນ+ໃຫ້ທະເລແລະທຸກສິ່ງໃນທະເລສັນລະເສີນເພິ່ນຄືກັນ.
35 ຍ້ອນພະເຈົ້າຈະຊ່ວຍຊີໂອນ+ແລະຈະສ້າງເມືອງຕ່າງໆໃນຢູດາຄືນໃໝ່.ປະຊາຊົນຈະໄດ້ຢູ່ແລະເປັນເຈົ້າຂອງແຜ່ນດິນນັ້ນ.
36 ລູກຫຼານຜູ້ຮັບໃຊ້ຂອງເພິ່ນຈະໄດ້ຮັບແຜ່ນດິນນັ້ນເປັນມໍລະດົກ+ແລະຄົນທີ່ຮັກຊື່ຂອງເພິ່ນ+ຈະໄດ້ອາໄສຢູ່ຫັ້ນ.
ຂໍ
^ ອາດເປັນທຳນອງຫຼືຮູບແບບເພງ
^ ຫຼື “ແລະລູກຮູ້ສຶກໝົດຫວັງ”
^ ຫຼື “ຕົ້ນໄມ້ທີ່ມີພິດ”
^ ແປຕາມໂຕວ່າ “ນ້ຳສົ້ມສາຍຊູ”
^ ແປຕາມໂຕວ່າ “ສະໂພກສັ່ນ”
^ ຫຼື “ຄ້າຍທີ່ມີກຳແພງອ້ອມ”
