ລະບຽບພວກເລວີ 12:1-8
-
ຂັ້ນຕອນການເຮັດໃຫ້ໂຕເອງສະອາດຫຼັງຈາກເກີດລູກ (1-8)
12 ພະເຢໂຫວາເວົ້າກັບໂມເຊອີກວ່າ:
2 “ໃຫ້ບອກພວກອິດສະຣາເອນວ່າ ‘ຖ້າຜູ້ຍິງຖືພາແລະເກີດລູກຊາຍ ຈະຕ້ອງຖືວ່າລາວບໍ່ສະອາດ 7 ມື້. ລາວຈະບໍ່ສະອາດຄືກັບໄລຍະທີ່ເປັນປະຈຳເດືອນ.+
3 ໃນມື້ທີ 8 ລູກຊາຍຂອງລາວຕ້ອງຮັບສິນຕັດ.*+
4 ລາວຕ້ອງຢູ່ເຮືອນໄປອີກ 33 ມື້ຈຶ່ງຈະຖືວ່າລາວສະອາດຈາກເລືອດ. ລາວບໍ່ຄວນຈັບບາຍເຄື່ອງຂອງທີ່ບໍລິສຸດ ແລະບໍ່ຄວນໄປບ່ອນບໍລິສຸດຈົນກວ່າຈະຮອດກຳນົດມື້ຂອງການເຮັດໃຫ້ໂຕສະອາດ.
5 ຖ້າລາວເກີດລູກສາວຈະຕ້ອງຖືວ່າລາວບໍ່ສະອາດ 14 ມື້. ລາວຈະບໍ່ສະອາດຄືກັບໄລຍະທີ່ເປັນປະຈຳເດືອນ. ລາວຕ້ອງຢູ່ເຮືອນໄປອີກ 66 ມື້ຈຶ່ງຈະຖືວ່າລາວສະອາດຈາກເລືອດ.
6 ເມື່ອຜູ້ຍິງເກີດລູກຊາຍຫຼືລູກສາວ ແລະຢູ່ເຮືອນຈົນຮອດກຳນົດມື້ທີ່ເຮັດໃຫ້ໂຕສະອາດແລ້ວ. ລາວຕ້ອງເອົາແກະໂຕຜູ້ອາຍຸ 1 ປີໄປເປັນເຄື່ອງບູຊາເຜົາ+ ແລະເອົານົກເຂົາຫຼືນົກກາງແກໄປເປັນເຄື່ອງບູຊາໄຖ່ບາບ. ລາວຕ້ອງເອົາເຄື່ອງບູຊາເຫຼົ່ານັ້ນໄປໃຫ້ປະໂລຫິດຢູ່ທາງເຂົ້າເຕັ້ນສັກສິດ.*
7 ປະໂລຫິດຈະເອົາເຄື່ອງບູຊາເຫຼົ່ານັ້ນໄປເຜົາໃຫ້ພະເຢໂຫວາ ແລະໄຖ່ຄວາມຜິດໃຫ້ຜູ້ຍິງຄົນນັ້ນ ແລ້ວຈະຖືວ່າລາວສະອາດຈາກເລືອດທີ່ໄຫຼອອກມາ. ນີ້ແມ່ນກົດໝາຍສຳລັບຜູ້ຍິງທີ່ເກີດລູກຊາຍຫຼືລູກສາວ.
8 ຖ້າຜູ້ໃດບໍ່ມີເງິນທີ່ຈະຊື້ແກະ ລາວຕ້ອງເອົານົກເຂົາ 2 ໂຕ ຫຼືນົກກາງແກ 2 ໂຕມາໃຫ້ແທນ.+ ໂຕໜຶ່ງໃຊ້ເປັນເຄື່ອງບູຊາເຜົາ ແລະອີກໂຕໜຶ່ງໃຊ້ເປັນເຄື່ອງບູຊາໄຖ່ບາບ. ປະໂລຫິດຈະໄຖ່ຄວາມຜິດໃຫ້ຜູ້ຍິງຄົນນັ້ນ ແລະຈະຖືວ່າລາວສະອາດ.’”
ຂໍ
^ ຕັດໜັງຫຸ້ມປາຍອະໄວຍະວະເພດຊາຍ
^ ຫຼື “ເຕັ້ນຂໍການຊີ້ນຳ.” ເບິ່ງສ່ວນອະທິບາຍຄຳສັບ.
