ພະບັນຍັດ 30:1-20
30 “ຄຳອວຍພອນຫຼືຄຳສາບແຊ່ງທີ່ຂ້ອຍໃຫ້ພວກເຈົ້າເລືອກຈະເກີດຂຶ້ນແທ້.+ ຈາກນັ້ນ ຕອນທີ່ຢູ່ໃນປະເທດຕ່າງໆທີ່ພະເຢໂຫວາພະເຈົ້າຂອງພວກເຈົ້າເຮັດໃຫ້ພວກເຈົ້າກະຈັດກະຈາຍໄປຢູ່+ ພວກເຈົ້າຈະສຳນຶກໄດ້ວ່າໂຕເອງເຮັດຜິດ.+
2 ແລ້ວພວກເຈົ້າກັບລູກຫຼານຈະກັບມາຫາພະເຢໂຫວາພະເຈົ້າຂອງພວກເຈົ້າ+ ແລະຈະເຊື່ອຟັງແລະເຮັດຕາມຄຳສັ່ງທີ່ຂ້ອຍບອກພວກເຈົ້າໃນມື້ນີ້ຢ່າງສຸດຫົວໃຈແລະສຸດຊີວິດ.+
3 ເມື່ອເປັນແນວນັ້ນແລ້ວ ພະເຢໂຫວາພະເຈົ້າຂອງພວກເຈົ້າຈະປົດປ່ອຍພວກເຈົ້າຈາກການເປັນຊະເລີຍ.+ ແລ້ວພະເຢໂຫວາພະເຈົ້າຂອງພວກເຈົ້າຈະສະແດງຄວາມເມດຕາ+ ແລະລວບລວມພວກເຈົ້າທີ່ກະຈັດກະຈາຍກັນຢູ່ນຳຊາດຕ່າງໆ.+
4 ເຖິງວ່າພວກເຈົ້າຈະກະຈັດກະຈາຍກັນໄປໄກສ່ຳໃດ ພະເຢໂຫວາພະເຈົ້າຂອງພວກເຈົ້າກໍຈະລວບລວມພວກເຈົ້າກັບມາ.+
5 ພະເຢໂຫວາພະເຈົ້າຂອງພວກເຈົ້າຈະພາພວກເຈົ້າເຂົ້າໄປຍຶດເອົາແຜ່ນດິນທີ່ເຄີຍເປັນຂອງປູ່ຍ່າຕານາຍຂອງພວກເຈົ້າ ແລະພວກເຈົ້າຈະໄດ້ຢູ່ຫັ້ນ. ເພິ່ນຈະອວຍພອນໃຫ້ພວກເຈົ້າຈະເລີນຮຸ່ງເຮືອງແລະມີຈຳນວນຫຼາຍກວ່າປູ່ຍ່າຕານາຍຂອງພວກເຈົ້າ.+
6 ພະເຢໂຫວາພະເຈົ້າຂອງພວກເຈົ້າຈະເຮັດໃຫ້ໃຈຂອງພວກເຈົ້າແລະໃຈຂອງລູກຫຼານຂອງພວກເຈົ້າສະອາດ*+ ເພື່ອພວກເຈົ້າຈະຮັກພະເຢໂຫວາພະເຈົ້າຂອງພວກເຈົ້າຢ່າງສຸດຫົວໃຈແລະສຸດຊີວິດ ແລ້ວພວກເຈົ້າຈະມີຊີວິດຢູ່.+
7 ຈາກນັ້ນ ພະເຢໂຫວາພະເຈົ້າຂອງພວກເຈົ້າຈະເອົາຄຳສາບແຊ່ງທັງໝົດທີ່ພວກເຈົ້າເຈິໄປໃສ່ພວກສັດຕູທີ່ກຽດຊັງແລະຂົ່ມເຫງພວກເຈົ້າ.+
8 ເມື່ອພວກເຈົ້າກັບມາຫາພະເຢໂຫວາ ເຊື່ອຟັງເພິ່ນ ແລະເຮັດຕາມຂໍ້ກຳນົດກົດໝາຍທັງໝົດທີ່ຂ້ອຍບອກພວກເຈົ້າໃນມື້ນີ້
9 ພະເຢໂຫວາພະເຈົ້າຂອງພວກເຈົ້າຈະເຮັດໃຫ້ພວກເຈົ້າຈະເລີນຮຸ່ງເຮືອງ+ ແລະມີລູກມີຫຼານຫຼາຍໆ. ຝູງສັດຂອງພວກເຈົ້າກໍຈະອອກແມ່ແພ່ລູກ ແລະຜົນລະປູກຂອງພວກເຈົ້າກໍຈະອຸດົມສົມບູນ. ພະເຢໂຫວາຍິນດີທີ່ຈະເຮັດໃຫ້ພວກເຈົ້າຈະເລີນຮຸ່ງເຮືອງອີກ ຄືກັບທີ່ເພິ່ນຍິນດີຕອນທີ່ໄດ້ຊ່ວຍປູ່ຍ່າຕານາຍຂອງພວກເຈົ້າ.+
10 ພວກເຈົ້າຈະເຊື່ອຟັງພະເຢໂຫວາພະເຈົ້າຂອງພວກເຈົ້າ ແລະເຮັດຕາມຂໍ້ກຳນົດກົດໝາຍຂອງເພິ່ນທີ່ຂຽນໄວ້ໃນປຶ້ມນີ້ ແລ້ວພວກເຈົ້າຈະກັບມາຫາພະເຢໂຫວາພະເຈົ້າຂອງພວກເຈົ້າຢ່າງສຸດຫົວໃຈແລະສຸດຊີວິດ.+
11 ກົດໝາຍທີ່ຂ້ອຍບອກພວກເຈົ້າໃນມື້ນີ້ ບໍ່ຍາກເກີນໄປທີ່ພວກເຈົ້າຈະເຂົ້າໃຈ ແລະທັງບໍ່ຍາກເກີນໄປທີ່ພວກເຈົ້າຈະເຮັດຕາມ.*+
12 ກົດໝາຍນີ້ບໍ່ໄດ້ຢູ່ເທິງຟ້າ ພວກເຈົ້າຈຶ່ງຈະເວົ້າວ່າ ‘ໃຜຊິຂຶ້ນໄປຫັ້ນແລະເອົາມາໃຫ້ພວກເຮົາເພື່ອພວກເຮົາຊິໄດ້ຍິນແລະເຮັດຕາມໄດ້?’+
13 ແລະກົດໝາຍນີ້ບໍ່ໄດ້ຢູ່ອີກຟາກໜຶ່ງຂອງທະເລເພື່ອພວກເຈົ້າຈະເວົ້າວ່າ ‘ໃຜຊິຂ້າມໄປຟາກນັ້ນແລະເອົາມາໃຫ້ພວກເຮົາເພື່ອພວກເຮົາຊິໄດ້ຍິນແລະເຮັດຕາມໄດ້?’
14 ຄຳເຫຼົ່ານີ້ຢູ່ໃກ້ໆພວກເຈົ້າ ຢູ່ໃນປາກ ແລະຢູ່ໃນໃຈພວກເຈົ້າ+ເພື່ອພວກເຈົ້າຈະເຮັດຕາມໄດ້.+
15 ມື້ນີ້ຂ້ອຍໃຫ້ເຈົ້າເລືອກລະຫວ່າງຊີວິດກັບຄວາມຕາຍ ແລະຄວາມຈະເລີນຮຸ່ງເຮືອງກັບຄວາມຈິບຫາຍ.+
16 ຖ້າເຈົ້າເຊື່ອຟັງຄຳສັ່ງຂອງພະເຢໂຫວາພະເຈົ້າຂອງເຈົ້າທີ່ຂ້ອຍບອກເຈົ້າໃນມື້ນີ້ ໂດຍຮັກພະເຢໂຫວາພະເຈົ້າຂອງເຈົ້າ+ ໃຊ້ຊີວິດຕາມແນວທາງຂອງເພິ່ນ ແລະເຮັດຕາມຄຳສັ່ງ ຂໍ້ກຳນົດແລະກົດໝາຍຂອງເພິ່ນ ເຈົ້າຈະມີຊີວິດຢູ່+ ມີຈຳນວນຫຼາຍຂຶ້ນແລະພະເຢໂຫວາພະເຈົ້າຂອງເຈົ້າຈະອວຍພອນເຈົ້າໃນແຜ່ນດິນທີ່ເຈົ້າຈະເຂົ້າໄປຢູ່.+
17 ແຕ່ຖ້າເຈົ້າປ່ຽນໃຈ+ແລະບໍ່ເຊື່ອຟັງພະເຈົ້າ ແລ້ວເມື່ອຖືກລໍ້ໃຈ ເຈົ້າກໍໄປຂາບໄຫວ້ແລະນະມັດສະການພະເຈົ້າອື່ນໆ+
18 ຂ້ອຍບອກເຈົ້າມື້ນີ້ເລີຍວ່າເຈົ້າຈະຖືກທຳລາຍແນ່ນອນ.+ ເຈົ້າຈະບໍ່ໄດ້ມີຊີວິດຍືນຍາວໃນແຜ່ນດິນທີ່ເຈົ້າຈະຂ້າມແມ່ນ້ຳຈໍແດນໄປຢູ່ນັ້ນ.
19 ຂ້ອຍໃຫ້ຟ້າກັບດິນເປັນພະຍານໃນມື້ນີ້ວ່າ ຂ້ອຍໃຫ້ເຈົ້າເລືອກລະຫວ່າງຊີວິດກັບຄວາມຕາຍ ຄຳອວຍພອນກັບຄຳສາບແຊ່ງ.+ ຂໍໃຫ້ເຈົ້າເລືອກຊີວິດ+ເພື່ອເຈົ້າກັບລູກຫຼານຂອງເຈົ້າຈະມີຊີວິດຢູ່+
20 ໂດຍການຮັກພະເຢໂຫວາພະເຈົ້າຂອງເຈົ້າ+ ເຊື່ອຟັງເພິ່ນ ແລະສັດຊື່ຕໍ່ເພິ່ນສະເໝີ+ ຍ້ອນພະເຢໂຫວາເປັນຜູ້ໃຫ້ຊີວິດເຈົ້າ ແລ້ວເຈົ້າຈະມີຊີວິດຍືນຍາວໃນແຜ່ນດິນທີ່ເພິ່ນສັນຍາວ່າຈະເອົາໃຫ້ອັບຣາຮາມ ອີຊາກ ແລະຢາໂຄບທີ່ເປັນປູ່ຍ່າຕານາຍຂອງເຈົ້າ.”+
