ພວກຜູ້ຕັດສິນ 1:1-36
1 ຫຼັງຈາກທີ່ໂຢຊວຍຕາຍແລ້ວ+ ພວກອິດສະຣາເອນຖາມພະເຢໂຫວາວ່າ:+ “ໃນພວກເຮົານີ້ ແມ່ນໃຜທີ່ຄວນຈະຂຶ້ນໄປຕໍ່ສູ້ກັບພວກການາອານກ່ອນ?”
2 ພະເຢໂຫວາຕອບວ່າ: “ໃຫ້ຕະກູນຢູດາຂຶ້ນໄປກ່ອນ+ ແລ້ວເຮົາຈະເອົາດິນໃຫ້ເຂົາເຈົ້າ.”
3 ຕະກູນຢູດາຈຶ່ງໄປເວົ້າກັບຕະກູນຊີເມໂອນພີ່ນ້ອງຂອງເຂົາເຈົ້າວ່າ: “ຂໍມາຊ່ວຍພວກເຮົາຕໍ່ສູ້ກັບພວກການາອານໃນເຂດທີ່ເປັນດິນມູນຂອງພວກເຮົາ*ແດ່.+ ບາດຮອດທີພວກເຈົ້າ ພວກເຮົາກະຊິຊ່ວຍຕໍ່ສູ້ກັບສັດຕູໃນເຂດຂອງພວກເຈົ້າ.” ແລ້ວຕະກູນຊີເມໂອນກໍໄປນຳເຂົາເຈົ້າ.
4 ຈາກນັ້ນ ຕະກູນຢູດາໄດ້ຂຶ້ນໄປ ແລະພະເຢໂຫວາກໍຊ່ວຍເຂົາເຈົ້າໃຫ້ເອົາຊະນະພວກການາອານກັບພວກເປຣິຊີ.+ ເຂົາເຈົ້າຂ້າສັດຕູຕາຍ 10.000 ຄົນຢູ່ເມືອງເບເຊັກ.
5 ເຂົາເຈົ້າໄດ້ເຈິອາໂດນີເບເຊັກຢູ່ຫັ້ນແລະໄດ້ຕໍ່ສູ້ກັບລາວ. ເຂົາເຈົ້າໄດ້ຊະນະພວກການາອານ+ກັບພວກເປຣິຊີ.+
6 ຕອນທີ່ອາໂດນີເບເຊັກໜີໄປ ເຂົາເຈົ້າຈັບລາວໄດ້ ແລະຕັດໂປ້ມືໂປ້ຕີນຂອງລາວທັງສອງເບື້ອງ.
7 ອາໂດນີເບເຊັກເລີຍເວົ້າວ່າ: “ຂ້ອຍເອງກໍເຄີຍຕັດໂປ້ມືກັບໂປ້ຕີນຂອງກະສັດ 70 ອົງມາແລ້ວ ແລະໃຫ້ພວກເຂົາກິນເສດອາຫານຢູ່ກ້ອງໂຕະຂອງຂ້ອຍ. ຕອນນີ້ ພະເຈົ້າເຮັດກັບຂ້ອຍຄືກັບທີ່ຂ້ອຍໄດ້ເຮັດກັບພວກເຂົາ.” ແລ້ວເຂົາເຈົ້າໄດ້ເອົາອາໂດນີເບເຊັກໄປເມືອງເຢຣູຊາເລັມ+ ແລະລາວກໍຕາຍຢູ່ຫັ້ນ.
8 ພວກລູກຫຼານຂອງຢູດາໄດ້ໄປໂຈມຕີເມືອງເຢຣູຊາເລັມ+ແລະຍຶດເມືອງນັ້ນໄດ້. ເຂົາເຈົ້າຂ້າຄົນໃນເມືອງແລະເຜົາເມືອງນັ້ນ.
9 ຈາກນັ້ນ ເຂົາເຈົ້າກໍໄປຕໍ່ສູ້ກັບພວກການາອານຢູ່ເຂດພູ ເຂດເນເກັບ ແລະເຂດເຊເຟລາ.+
10 ແລ້ວເຂົາເຈົ້າກໍໄປຕໍ່ສູ້ກັບພວກການາອານທີ່ຢູ່ເມືອງເຮັບໂຣນ. (ແຕ່ກີ້ເມືອງເຮັບໂຣນມີຊື່ວ່າກີຣິອາດອາຣະບາ.) ເຂົາເຈົ້າໄດ້ຂ້າເຊຊາຍ ອາຮີມານ ແລະຕານມາຍ.*+
11 ຕໍ່ມາ ເຂົາເຈົ້າກໍໄປຕໍ່ສູ້ກັບຄົນໃນເມືອງເດບີ.+ (ແຕ່ກີ້ເມືອງເດບີມີຊື່ວ່າກີຣິອາດເສເຟ.)+
12 ແລ້ວກາເລັບ+ກໍເວົ້າວ່າ: “ຜູ້ໃດທີ່ຍຶດເມືອງກີຣິອາດເສເຟໄດ້ ຂ້ອຍຊິຍົກອັກສາລູກສາວຂອງຂ້ອຍໃຫ້ຜູ້ນັ້ນ.”+
13 ແລ້ວໂອດນີເອນ+ລູກຊາຍຂອງເກນັດ+ທີ່ເປັນນ້ອງຊາຍຂອງກາເລັບກໍຍຶດເມືອງນັ້ນໄດ້. ກາເລັບຈຶ່ງຍົກອັກສາລູກສາວຂອງໂຕເອງໃຫ້ເປັນເມຍຂອງໂອດນີເອນ.
14 ຕອນທີ່ອັກສາຊິເມືອເຮືອນນຳຜົວ ລາວພະຍາຍາມໃຫ້ຜົວຂໍດິນກັບພໍ່ຂອງລາວ ລາວຈຶ່ງລົງຈາກຫຼັງລາໄປຫາພໍ່ເອງ.* ກາເລັບຖາມລາວວ່າ: “ລູກຢາກໄດ້ຫຍັງ?”
15 ລາວຕອບພໍ່ວ່າ: “ຂໍພໍ່ອວຍພອນແລະເອົາຂອງຂວັນໃຫ້ລູກແດ່. ດິນທີ່ພໍ່ຍົກໃຫ້ລູກຢູ່ທາງທິດໃຕ້ຫັ້ນມັນແຫ້ງແລ້ງ ຂໍພໍ່ຍົກກຸນໂລມາອິມ*ໃຫ້ລູກນຳ.” ກາເລັບຈຶ່ງຍົກກຸນໂລເທິງກັບກຸນໂລລຸ່ມໃຫ້ລາວ.
16 ລູກຫຼານຂອງພໍ່ເຖົ້າຂອງໂມເຊ+ທີ່ເປັນຄົນເກນີ+ໄດ້ອອກຈາກເມືອງແຫ່ງຕົ້ນປາມ+ພ້ອມກັບຄົນໃນຕະກູນຢູດາ. ເຂົາເຈົ້າເດີນທາງໄປບ່ອນກັນດານຢູດາທີ່ຢູ່ທາງທິດໃຕ້*ຂອງເມືອງອາຣັດ+ແລະອາໄສຢູ່ຫັ້ນ.+
17 ແຕ່ຕະກູນຢູດາກັບຕະກູນຊີເມໂອນທີ່ເປັນພີ່ນ້ອງກັນກໍໄດ້ໄປຕໍ່ສູ້ກັບພວກການາອານທີ່ຢູ່ເມືອງເຊຟັດ ແລະທຳລາຍເມືອງນັ້ນຈົນເຫຼືອແຕ່ຊາກຫັກພັງ+ ແລ້ວເຂົາເຈົ້າຕັ້ງຊື່ໃຫ້ເມືອງນັ້ນວ່າໂຮມາ.*+
18 ຫຼັງຈາກນັ້ນ ຕະກູນຢູດາກໍໄປຍຶດເອົາເມືອງຄາຊາ+ ເມືອງອາຊະກາໂລນ+ ແລະເມືອງເອັກໂຣນ+ ລວມທັງເຂດຂອງເມືອງເຫຼົ່ານັ້ນ.
19 ພະເຢໂຫວາຢູ່ນຳຕະກູນຢູດາ. ເຂົາເຈົ້າຍຶດເຂດພູໄດ້ ແຕ່ເຂົາເຈົ້າໄລ່ຄົນທີ່ຢູ່ທົ່ງພຽງອອກໄປບໍ່ໄດ້ ເພາະພວກນັ້ນມີລົດຮົບທີ່ມີມີດເຫຼັກຍາວຕິດຢູ່ກົງລໍ້.+
20 ຕະກູນຢູດາເອົາເມືອງເຮັບໂຣນໃຫ້ກາເລັບຕາມທີ່ໂມເຊສັນຍາໄວ້.+ ກາເລັບໄດ້ຂັບໄລ່ລູກຫຼານ 3 ຄົນຂອງອານາກອອກໄປຈາກເມືອງນັ້ນ.+
21 ແຕ່ຕະກູນເບັນຢາມິນບໍ່ໄດ້ຂັບໄລ່ພວກເຢບຸດທີ່ຢູ່ໃນເມືອງເຢຣູຊາເລັມອອກໄປ. ພວກເຢບຸດຈຶ່ງຢູ່ໃນເມືອງເຢຣູຊາເລັມກັບຄົນໃນຕະກູນເບັນຢາມິນຈົນຮອດທຸກມື້ນີ້.+
22 ຕອນນັ້ນ ລູກຫຼານຂອງໂຢເຊັບ+ໄດ້ຂຶ້ນໄປຕໍ່ສູ້ເມືອງເບເທນ ແລະພະເຢໂຫວາກໍຢູ່ນຳເຂົາເຈົ້າ.+
23 ລູກຫຼານຂອງໂຢເຊັບໄດ້ໄປສອດແນມເມືອງເບເທນ. (ແຕ່ກີ້ເມືອງນີ້ມີຊື່ວ່າລູເຊ.)+
24 ພວກທີ່ໄປສອດແນມເຫັນຜູ້ຊາຍຄົນໜຶ່ງອອກມາຈາກເມືອງ. ເຂົາເຈົ້າຈຶ່ງເວົ້າກັບຜູ້ຊາຍຄົນນັ້ນວ່າ: “ຖ້າເຈົ້າບອກວິທີເຂົ້າເມືອງນີ້ໃຫ້ພວກເຮົາ ພວກເຮົາຊິບໍ່ຂ້າເຈົ້າ.”*
25 ຜູ້ຊາຍຄົນນັ້ນກໍເລີຍບອກວິທີເຂົ້າເມືອງໃຫ້ພວກຄົນສອດແນມຮູ້. ເຂົາເຈົ້າເອົາດາບຂ້າຄົນຢູ່ໃນເມືອງນັ້ນ ແຕ່ປ່ອຍຜູ້ຊາຍຄົນນັ້ນກັບຄອບຄົວຂອງລາວໄປ.+
26 ຜູ້ຊາຍຄົນນັ້ນກໍເລີຍໄປຢູ່ແຜ່ນດິນຂອງພວກເຮດ ໄປສ້າງເມືອງໜຶ່ງຢູ່ຫັ້ນແລະຕັ້ງຊື່ເມືອງວ່າລູເຊ. ເມືອງນັ້ນຖືກເອີ້ນແນວນັ້ນຈົນຮອດທຸກມື້ນີ້.
27 ຕະກູນມານາເຊບໍ່ໄດ້ຍຶດເອົາເມືອງເບັດເຊອານ ເມືອງຕາອານັກ+ ເມືອງໂດເຣ ເມືອງອິບເລອາມ ເມືອງເມກິດໂດ ແລະເມືອງນ້ອຍໆທີ່ຢູ່ອ້ອມແອ້ມເມືອງເຫຼົ່ານັ້ນ.+ ພວກການາອານຈຶ່ງຍັງອາໄສໃນແຜ່ນດິນນັ້ນຕໍ່ໄປ.
28 ເມື່ອພວກອິດສະຣາເອນມີຄົນຫຼາຍແລະມີກຳລັງຫຼາຍຂຶ້ນ ເຂົາເຈົ້າບໍ່ໄດ້ຂັບໄລ່ພວກການາອານອອກໄປຈົນໝົດ+ ແຕ່ພັດໃຊ້ພວກເຂົາໃຫ້ເຮັດວຽກໜັກຄືກັບທາດ.+
29 ຕະກູນເອຟຣາຢິມບໍ່ໄດ້ຂັບໄລ່ພວກການາອານທີ່ຢູ່ເມືອງເກເຊອອກໄປ. ພວກການາອານຈຶ່ງຍັງຢູ່ໃນເມືອງເກເຊຕໍ່ໄປ.+
30 ຕະກູນເຊບູລູນບໍ່ໄດ້ຂັບໄລ່ຄົນທີ່ຢູ່ໃນເມືອງກີດໂຣນແລະເມືອງນາຮາໂລນ+ອອກໄປ. ພວກການາອານຈຶ່ງຍັງຢູ່ນຳເຂົາເຈົ້າຕໍ່ໄປ ແລະຖືກໃຊ້ໃຫ້ເຮັດວຽກໜັກຄືກັບທາດ.+
31 ຕະກູນອາເຊບໍ່ໄດ້ຂັບໄລ່ຄົນທີ່ຢູ່ໃນເມືອງອັກໂກ ເມືອງຊີໂດນ+ ເມືອງອາຮະລາບ ເມືອງອັກຊິບ+ ເມືອງເຮັນບາ ເມືອງອາຟິກ+ ແລະເມືອງເຣໂຮບ+ອອກໄປ.
32 ຄົນໃນຕະກູນອາເຊຈຶ່ງຍັງຢູ່ກັບພວກການາອານໃນແຜ່ນດິນນັ້ນຕໍ່ໄປ ຍ້ອນເຂົາເຈົ້າບໍ່ໄດ້ຂັບໄລ່ພວກການາອານອອກໄປ.
33 ຕະກູນນັບທາລີບໍ່ໄດ້ຂັບໄລ່ຄົນໃນເມືອງເບັດເຊເມັດແລະເມືອງເບັດອານາດ+ອອກໄປ. ຄົນໃນຕະກູນນັບທາລີຈຶ່ງຍັງຢູ່ກັບພວກການາອານໃນແຜ່ນດິນນັ້ນຕໍ່ໄປ.+ ຄົນໃນເມືອງເບັດເຊເມັດແລະເມືອງເບັດອານາດຖືກຕະກູນນັບທາລີໃຊ້ໃຫ້ເຮັດວຽກໜັກຄືກັບທາດ.
34 ພວກອາໂມບໍ່ຍອມໃຫ້ຄົນໃນຕະກູນດານລົງມາຢູ່ທົ່ງພຽງ ເຂົາເຈົ້າຈຶ່ງຕ້ອງຢູ່ໃນເຂດພູຕໍ່ໄປ.+
35 ສ່ວນພວກອາໂມກໍຍັງຢູ່ພູເຮເລດ ຢູ່ໃນເມືອງອາຢາໂລນ+ ແລະເມືອງຊາອານບີມ+ຕໍ່ໄປ. ແຕ່ເມື່ອລູກຫຼານຂອງໂຢເຊັບມີຄົນຫຼາຍແລະມີກຳລັງຫຼາຍຂຶ້ນ ເຂົາເຈົ້າກໍໃຊ້ພວກອາໂມໃຫ້ເຮັດວຽກໜັກຄືກັບທາດ.
36 ເຂດແດນຂອງພວກອາໂມເລີ່ມຈາກບ່ອນທີ່ຈະຂຶ້ນໄປອັກຣັບບີມ+ ແລະຈາກເສລາໄປຈົນຮອດເຂດພູ.
ຂໍ
^ ແປຕາມໂຕວ່າ “ຕອນຂອງຂ້ອຍ”
^ “ເຊຊາຍ ອາຮີມານ ແລະຕານມາຍ” ອາດໝາຍເຖິງລູກຫຼານຂອງເຂົາເຈົ້າ
^ ຫຼືອາດແປວ່າ “ຕົບມືເອີ້ນຕອນຢູ່ຫຼັງລາ”
^ ແປວ່າ “ອ່າງນ້ຳ”
^ ຫຼື “ເນເກັບ”
^ ແປວ່າ “ສິ່ງທີ່ຕ້ອງທຳລາຍບໍ່ໃຫ້ເຫຼືອ”
^ ແປຕາມໂຕວ່າ “ພວກເຮົາຊິສະແດງຄວາມຮັກທີ່ໝັ້ນຄົງຕໍ່ເຈົ້າ”
