ປະຖົມມະການ 9:1-29
9 ພະເຈົ້າອວຍພອນໂນອາແລະພວກລູກຊາຍຂອງລາວວ່າ: “ໃຫ້ພວກເຈົ້າມີລູກມີຫຼານຫຼາຍໆຈົນເຕັມໂລກ.+
2 ສັດປ່າທຸກຊະນິດ ສັດທີ່ບິນໄດ້ທຸກຊະນິດຢູ່ເທິງຟ້າ ສັດທີ່ມີຊີວິດທຸກຊະນິດທີ່ຢູ່ເທິງໂລກ ແລະປາທຸກຊະນິດໃນທະເລຈະຍັງຢ້ານພວກເຈົ້າຢູ່. ສັດທັງໝົດນີ້ຈະຢູ່ໃຕ້ອຳນາດຂອງພວກເຈົ້າ.+
3 ເຮົາຈະໃຫ້ສັດທຸກຊະນິດເປັນອາຫານຂອງເຈົ້າ+ຄືກັບທີ່ເຮົາໃຫ້ພືດຜັກຕ່າງໆກັບເຈົ້າ.+
4 ແຕ່ວ່າຫ້າມເຈົ້າກິນຊີ້ນທີ່ຍັງມີເລືອດຢູ່+ ເພາະເລືອດໝາຍເຖິງຊີວິດ.+
5 ນອກຈາກນັ້ນ ຖ້າມີຄົນຫຼືສັດເຮັດໃຫ້ເຈົ້າເລືອດຕົກຢາງອອກຈົນເສຍຊີວິດ ເຮົາຈະໃຫ້ໄຊ້ຄືນ. ຖ້າເປັນສັດ ສັດນັ້ນກໍຕ້ອງຕາຍ. ຖ້າເປັນຄົນ ຄົນນັ້ນກໍຕ້ອງຊົດໄຊ້ດ້ວຍຊີວິດຂອງລາວ ຍ້ອນວ່າພວກເຈົ້າເປັນພີ່ນ້ອງກັນ.+
6 ຜູ້ໃດທີ່ຂ້າຄົນ* ຜູ້ນັ້ນຈະຖືກຂ້າ+ ຍ້ອນວ່າພະເຈົ້າສ້າງມະນຸດໃຫ້ຄ້າຍຄືກັບເພິ່ນ.+
7 ໃຫ້ເຈົ້າມີລູກມີຫຼານຫຼາຍໆແລະເພີ່ມຈຳນວນຂຶ້ນຈົນເຕັມໂລກ.”+
8 ຈາກນັ້ນ ພະເຈົ້າເວົ້າກັບໂນອາແລະພວກລູກຊາຍຂອງລາວວ່າ:
9 “ຕອນນີ້ເຮົາຈະເຮັດສັນຍາກັບເຈົ້າ+ ແລະລູກຫຼານຂອງເຈົ້າ
10 ລວມທັງສັດຕ່າງໆທີ່ຢູ່ນຳເຈົ້າ ບໍ່ວ່າຈະເປັນນົກ ສັດບ້ານ ຫຼືສັດອື່ນໆທັງໝົດທີ່ອອກມາຈາກເຮືອ.+
11 ເຮົາສັນຍາກັບເຈົ້າວ່າ ເຮົາຈະບໍ່ທຳລາຍສິ່ງທີ່ມີຊີວິດທັງໝົດດ້ວຍນ້ຳຖ້ວມອີກ ແລະເຮົາຈະບໍ່ທຳລາຍໂລກດ້ວຍນ້ຳຖ້ວມອີກຈັກເທື່ອ.”+
12 ພະເຈົ້າເວົ້າຕື່ມອີກວ່າ: “ນີ້ເປັນສັນຍະລັກຂອງຄຳສັນຍາທີ່ເຮົາເຮັດກັບເຈົ້າ ແລະສິ່ງທີ່ມີຊີວິດທັງໝົດທີ່ຢູ່ກັບເຈົ້າ ສັນຍານີ້ຈະໃຊ້ໄດ້ຕະຫຼອດທຸກຍຸກທຸກສະໄໝ.
13 ເຮົາຈະໃຫ້ມີຮຸ້ງຢູ່ເທິງຟ້າເພື່ອເປັນສັນຍະລັກຂອງຄຳສັນຍາທີ່ເຮົາໄດ້ເຮັດກັບສິ່ງທີ່ມີຊີວິດຢູ່ເທິງໂລກ.
14 ທຸກໆເທື່ອທີ່ເຮົາໃຫ້ມີຂີ້ເຝື້ອຢູ່ເທິງຟ້າກໍຈະມີຮຸ້ງຢູ່ຫັ້ນ.
15 ຄຳສັນຍາທີ່ເຮົາໄດ້ເຮັດກັບເຈົ້າແລະກັບສິ່ງທີ່ມີຊີວິດທັງໝົດ ເຮົາຈະບໍ່ລືມແນ່ນອນ. ເຮົາຈະບໍ່ທຳລາຍສິ່ງທີ່ມີຊີວິດທັງໝົດດ້ວຍນ້ຳຖ້ວມອີກຈັກເທື່ອ.+
16 ເມື່ອມີຮຸ້ງຢູ່ເທິງຟ້າເຮົາກໍຈະເຫັນ ແລະຈະຈື່ຄຳສັນຍາທີ່ເຮົາໄດ້ເຮັດກັບທຸກສິ່ງທີ່ມີຊີວິດຢູ່ໃນໂລກ.”
17 ພະເຈົ້າກໍເວົ້າກັບໂນອາອີກເທື່ອໜຶ່ງວ່າ: “ນີ້ເປັນສັນຍະລັກຂອງຄຳສັນຍາທີ່ເຮົາເຮັດກັບທຸກສິ່ງທີ່ມີຊີວິດຢູ່ໃນໂລກ.”+
18 ພວກລູກຊາຍຂອງໂນອາທີ່ເຄີຍຢູ່ນຳກັນໃນເຮືອມີເຊມ ຮາມ ແລະຢາເຟດ.+ ຕໍ່ມາ ຮາມກໍໄດ້ລູກຊາຍຊື່ການາອານ.+
19 ສາມຄົນນີ້ເປັນລູກຂອງໂນອາ. ທຸກຄົນທີ່ຢູ່ທົ່ວໂລກກໍມາຈາກເຂົາເຈົ້າ.+
20 ໂນອາກໍເລີ່ມເຮັດໄຮ່ເຮັດສວນແລະໄດ້ປູກໝາກລະແຊັງ.
21 ມີມື້ໜຶ່ງ ລາວໄດ້ດື່ມເຫຼົ້າແວງແລ້ວກໍເມົາ ແລະລາວກໍນອນປະເປືອຍຢູ່ໃນເຕັ້ນ.
22 ຮາມທີ່ມີລູກຊື່ການາອານໄດ້ເຫັນພໍ່ຂອງໂຕເອງນອນປະເປືອຍຢູ່ ລາວຈຶ່ງໄປບອກອ້າຍທັງສອງຄົນທີ່ຢູ່ທາງນອກ.
23 ເຊມແລະຢາເຟດໄດ້ເອົາຜ້າຜືນໜຶ່ງປົກບ່າຂອງເຂົາເຈົ້າແລະຍ່າງຖອຍຫຼັງເຂົ້າໄປ ແລ້ວເອົາຜ້າຜືນນັ້ນປົກພໍ່ທີ່ນອນປະເປືອຍຢູ່ໂດຍບໍ່ໄດ້ແນມເບິ່ງ ເຂົາເຈົ້າຈຶ່ງບໍ່ໄດ້ເຫັນພໍ່ປະເປືອຍ.
24 ເມື່ອໂນອາຕື່ນຂຶ້ນແລະສ່ວງເມົາແລ້ວ ລາວກໍຮູ້ວ່າລູກຫຼ້າໄດ້ເຮັດຫຍັງ
25 ລາວຈຶ່ງເວົ້າວ່າ:
“ຂໍໃຫ້ການາອານຖືກສາບແຊ່ງ.+
ຂໍໃຫ້ລາວເປັນທາດຂອງພວກອ້າຍ.”+
26 ໂນອາຍັງເວົ້າອີກວ່າ:
“ຂໍໃຫ້ພະເຢໂຫວາພະເຈົ້າຂອງເຊມໄດ້ຮັບຄຳສັນລະເສີນແລະຂໍໃຫ້ການາອານມາເປັນທາດຂອງເຊມ.+
27 ຂໍພະເຈົ້າໃຫ້ຢາເຟດມີດິນຫຼາຍໆແລະຂໍໃຫ້ລາວຢູ່ໃນເຕັ້ນຂອງເຊມນຳ.
ຂໍໃຫ້ການາອານມາເປັນທາດຂອງຢາເຟດຄືກັນ.”
28 ຫຼັງຈາກນ້ຳຖ້ວມໂລກໂນອາກໍມີອາຍຸຕໍ່ໄປອີກ 350 ປີ.+
29 ໂນອາຕາຍຕອນອາຍຸ 950 ປີ.
ຂໍ
^ ແປຕາມໂຕວ່າ “ຜູ້ໃດທີ່ເຮັດໃຫ້ຜູ້ອື່ນເລືອດຕົກຢາງອອກ”
