ປະຖົມມະການ 49:1-33
49 ຢາໂຄບເອີ້ນລູກຊາຍທຸກຄົນມາແລະເວົ້າວ່າ: “ຫຍັບເຂົ້າມາໃກ້ໆພໍ່ ແລ້ວພໍ່ຊິບອກວ່າອະນາຄົດຂອງພວກເຈົ້າຊິເປັນແນວໃດ.
2 ພວກລູກຊາຍຂອງຢາໂຄບຫຍັບເຂົ້າມາໃກ້ໆແລະຟັງພໍ່. ອິດສະຣາເອນພໍ່ຂອງພວກເຈົ້າມີເລື່ອງຊິເວົ້ານຳ.
3 ຣູເບັນ+ ເຈົ້າເປັນລູກກົກຂອງພໍ່+ ເປັນເຫື່ອແຮງຂອງພໍ່ ເປັນຜົນງານທຳອິດຈາກພະລັງຂອງພໍ່. ເຈົ້າເປັນຄົນທີ່ມີກຽດຫຼາຍທີ່ສຸດແລະເຂັ້ມແຂງທີ່ສຸດ.
4 ເຈົ້າເປັນຄືກັບນ້ຳທີ່ໄຫຼແຮງໆ ບໍ່ໄດ້ຄວບຄຸມໃຈໂຕເອງ. ເຈົ້າຊິບໍ່ໄດ້ກຽດສູງສຸດນັ້ນ ເພາະເຈົ້າໄປນອນນຳເມຍຂອງພໍ່.*+ ລາວນອນນຳເມຍຂອງພໍ່ໂຕເອງ. ລາວເຮັດແບບນັ້ນແທ້ໆ!
5 ຊີເມໂອນກັບເລວີ ສອງອ້າຍນ້ອງນີ້+ໃຊ້ດາບຂ້າຄົນອື່ນຢ່າງໂຫດຫ້ຽມ.+
6 ພໍ່ບໍ່ຢາກຫຍຸ້ງກ່ຽວກັບພວກເຈົ້າ. ຢ່າໃຫ້ພໍ່ຢູ່ກຸ່ມດຽວກັບພວກເຈົ້າ. ເພາະພວກເຈົ້າໃຈຮ້າຍແລ້ວກໍໄປຂ້າຄົນ.+ ພວກເຈົ້າຕັດເອັນຂາງົວຫຼິ້ນຕາມໃຈ.
7 ຍ້ອນພວກເຈົ້າໃຈຮ້າຍແລະໂຫດຫ້ຽມຫຼາຍ ໃຫ້ພວກເຈົ້າຖືກສາບແຊ່ງ.+ ພໍ່ຈະໃຫ້ພວກເຈົ້າແຍກກັນຢູ່ໃນແຜ່ນດິນຢາໂຄບແລະຈະໃຫ້ພວກເຈົ້າກະຈັດກະຈາຍກັນໄປໃນແຜ່ນດິນອິດສະຣາເອນ.+
8 ສ່ວນເຈົ້າຢູດາ+ ພວກອ້າຍນ້ອງຈະສັນລະເສີນເຈົ້າ.+ ເຈົ້າຈະຊະນະພວກສັດຕູ.+ ພວກລູກຫຼານຂອງພໍ່ກໍຈະກົ້ມຄຳນັບເຈົ້າ.+
9 ຢູດາເປັນລູກສິງ.+ ເຈົ້າຈະກິນເຫຍື່ອແລ້ວລຸກໄປ. ເຈົ້າຈະນອນລົງແລະບິດຄີງຄືກັບໂຕສິງ. ຈະບໍ່ມີໃຜກ້າມາກວນເຈົ້າ.
10 ຄ້ອນຂອງກະສັດຈະເປັນຂອງຢູດາສະເໝີ.+ ໄມ້ຄ້ອນເທົ້າຂອງຜູ້ປົກຄອງຈະຢູ່ລະຫວ່າງຕີນຂອງລາວຈົນກວ່າຊີໂລ*ຈະມາ+ ແລະທຸກຊົນຊາດຈະເຊື່ອຟັງລາວ.+
11 ລາວມັດລາໄວ້ຢູ່ເຄືອໝາກລະແຊັງ ແລະລາວມັດລານ້ອຍໄວ້ຢູ່ເຄືອໝາກລະແຊັງພັນດີ. ລາວຊັກເຄື່ອງນຸ່ງດ້ວຍເຫຼົ້າແວງແລະລາວຊັກເສື້ອຄຸມດ້ວຍນ້ຳໝາກລະແຊັງ.
12 ຕາລາວແດງຍ້ອນເຫຼົ້າແວງແລະແຂ້ວລາວຂາວຍ້ອນນ້ຳນົມ.
13 ເຊບູລູນ+ຈະອາໄສຢູ່ໃກ້ທະເລ. ລາວຈະຢູ່ໃກ້ບ່ອນທີ່ເຮືອມາຈອດ.+ ເຂດຂອງລາວຂະຫຍາຍໄປເກືອບຮອດຊີໂດນ.+
14 ອິດຊາຄາ+ເປັນລາທີ່ແຂງແຮງ. ລາວນອນໄດ້ສະບາຍໆເຖິງວ່າມີກະເປົາຕິດຢູ່ອານທັງສອງຂ້າງ.
15 ລາວຈະເຈິບ່ອນທີ່ດີແລະຈະເຈິແຜ່ນດິນທີ່ອຸດົມສົມບູນ. ລາວມີໜ້າທີ່ຮັບຜິດຊອບຫຼາຍຢ່າງ. ລາວຈະຕ້ອງເຮັດວຽກໜັກ.
16 ດານ+ເປັນຕະກູນໜຶ່ງໃນອິດສະຣາເອນທີ່ຈະຕັດສິນປະຊາຊົນທຸກຄົນ.+
17 ດານຈະເປັນງູຢູ່ແຄມທາງ ເປັນງູພິດຢູ່ຂ້າງທາງ. ມັນຈະຕອດຂາມ້າ*ຈົນເຮັດໃຫ້ຄົນທີ່ຢູ່ຫຼັງມ້າຫງາຍຫຼັງຕົກລົງມາ.+
18 ແຕ່ພະເຢໂຫວາພະເຈົ້າຂອງຂ້ອຍ ຂ້ອຍຈະລໍຖ້າໃຫ້ພະອົງຊ່ວຍພວກເຮົາໃຫ້ລອດ.
19 ສຳລັບຄາດ+ ພວກສັດຕູຈະມາໂຈມຕີລາວ ແຕ່ລາວຊິສູ້ຄືນແລະໄລ່ຕີຕອນທີ່ສັດຕູຖອຍໜີ.+
20 ອາເຊ+ຈະມີອາຫານຢ່າງອຸດົມສົມບູນ. ລາວຈະມີອາຫານທີ່ດີຄືກັບອາຫານຂອງກະສັດ.+
21 ນັບທາລີ+ຈະເປັນກວາງໂຕແມ່ທີ່ມີຫຸ່ນງາມໆ. ລາວເປັນຄົນທີ່ເວົ້າຄຳມ່ວນໆ.+
22 ໂຢເຊັບ+ເປັນງ່າຂອງຕົ້ນໄມ້ທີ່ຢູ່ແຄມນ້ຳເຊິ່ງເກີດໝາກຫຼາຍ. ງ່າຕ່າງໆຂອງມັນແຕກອອກໄປນອກກຳແພງ.
23 ພວກຄົນຍິງທະນູກຽດຊັງລາວ. ເຂົາເຈົ້າຈອບແຕ່ຊິມາຮຸກຮານແລະຍິງລາວ.+
24 ແຕ່ລາວຫ້າງທະນູໄວ້+ແລະມືຂອງລາວແຂງແຮງແລະວ່ອງໄວ.+ ແຮງຂອງລາວມາຈາກຜູ້ທີ່ມີພະລັງທີ່ຊ່ວຍຢາໂຄບ ມາຈາກຜູ້ລ້ຽງແກະແລະຫີນຂອງອິດສະຣາເອນ.
25 ລາວເປັນຂອງຂວັນຈາກພະເຈົ້າທີ່ພໍ່ນະມັດສະການ ແລະເພິ່ນຈະຊ່ວຍລາວ. ລາວຈະຢູ່ກັບຜູ້ມີອຳນາດສູງສຸດ. ພະເຈົ້າຈະອວຍພອນລາວໂດຍໃຫ້ນ້ຳຈາກຟ້າແລະໃຫ້ນ້ຳຈາກໃຕ້ດິນ.+ ພະເຈົ້າຈະອວຍພອນໃຫ້ລາວມີລູກຫຼາຍໆແລະມີສັດລ້ຽງຫຼາຍໆ.
26 ຄວາມງາມທີ່ໝັ້ນຄົງຂອງພູທຽບບໍ່ໄດ້ເລີຍກັບພອນທີ່ມາຈາກພໍ່ຂອງລາວ.+ ພອນເຫຼົ່ານັ້ນຈະຢູ່ກັບໂຢເຊັບຕໍ່ໆໄປ. ພອນນັ້ນຈະຢູ່ເທິງຫົວຂອງຄົນທີ່ຖືກເລືອກໃນພວກອ້າຍນ້ອງ.+
27 ເບັນຢາມິນ+ຈະເປັນຄືໝາປ່າທີ່ຈີກຊີ້ນຂອງເຫຍື່ອ.+ ຕອນເຊົ້າລາວຈະກິນຊີ້ນຂອງເຫຍື່ອທີ່ຈັບມາໄດ້ ແລະຕອນແລງລາວກໍຈະແບ່ງຂອງທີ່ປຸ້ນມາ.”+
28 ຄົນເຫຼົ່ານີ້ແມ່ນ 12 ຕະກູນຂອງອິດສະຣາເອນ ແລະຄຳເວົ້າທັງໝົດນີ້ແມ່ນຄຳອວຍພອນທີ່ພໍ່ໃຫ້ເຂົາເຈົ້າ. ລາວອວຍພອນໃຫ້ແຕ່ລະຄົນຕາມຄວາມເໝາະສົມຂອງເຂົາເຈົ້າ.+
29 ຫຼັງຈາກນັ້ນ ຢາໂຄບສັ່ງເຂົາເຈົ້າວ່າ: “ອີກບໍ່ດົນພໍ່ກໍຊິບໍ່ໄດ້ຢູ່ແລ້ວ.+ ໃຫ້ຝັງພໍ່ໄວ້ຢູ່ກັບປູ່ຍ່າຕານາຍໃນຖ້ຳທີ່ຢູ່ດິນຂອງເອຟະໂຣນຄົນເຮດ.+
30 ຖ້ຳນັ້ນຢູ່ມັກເປລາໃກ້ກັບມາມເຣໃນແຜ່ນດິນການາອານ. ອັບຣາຮາມຊື້ດິນນັ້ນຈາກເອຟະໂຣນຄົນເຮດເພື່ອໃຊ້ເປັນບ່ອນຝັງສົບ.
31 ຢູ່ຫັ້ນເຂົາເຈົ້າໄດ້ຝັງອັບຣາຮາມກັບຊາຣາ+ ແລະກໍໄດ້ຝັງອີຊາກ+ກັບເຣເບກາເມຍຂອງລາວນຳ ແລະພໍ່ກໍໄດ້ຝັງເລອາໄວ້ຢູ່ຫັ້ນຄືກັນ.
32 ພວກເຮົາໄດ້ຊື້ດິນກັບຖ້ຳນີ້ຈາກລູກຫຼານຂອງເຮດ.”+
33 ເມື່ອຢາໂຄບສັ່ງຄວາມກັບພວກລູກຊາຍແລ້ວ ລາວກໍຢຽດຂາຢູ່ເທິງຕຽງແລະຫາຍໃຈບາດສຸດທ້າຍ. ແລ້ວຢາໂຄບກໍຕາຍແລະໄປຢູ່ນຳປູ່ຍ່າຕານາຍຂອງລາວ.*+
ຂໍ
^ ແປຕາມໂຕວ່າ “ເຈົ້າລຸກຂຶ້ນໄປເທິງຕຽງນອນຂອງພໍ່”
^ ແປວ່າ “ຜູ້ທີ່ຈະມາ”
^ ແປຕາມໂຕວ່າ “ຕອດສົ້ນຕີນມ້າ”
^ ເປັນສຳນວນບົດກອນທີ່ໝາຍເຖິງຕາຍ
