Na mokolo ya 01/01/2020, bandeko ya Betele ya Grande-Bretagne babandaki kokɔta na bandako ya Betele ya sika oyo ezali pene na Chelmsford, na etúká ya Essex. Liboso tókóma na sanza ya 03/2020, bandeko nyonso oyo basalaka kuna bakobanda kofanda mpe kosala na biro ya filiale yango ya sika.

Filiale ya Grande-Bretagne ezalaki liboso na Mill Hill, na Londres, kobanda 1959. Lokola bokoli ezalaki mingi, mosala mpe ekómaki mingi, mpe yango esɛngaki kobakisa bandako mosusu bisika ndenge na ndenge na Londres. Esɛngaki kobongisa bandako yango mpe bandeko ya Betele basɛngelaki kosala mibembo mbala mingi. Na eleko moko boye, filiale yango ezalaki mpe konyata mikanda, ezalaki konyata mikanda koleka 10 % mpo na mosala ya kosakola na mokili mobimba. Na sanza ya 03/2018, nsima ya konyata mikanda na boumeli ya mbula 92, batikaki konyata mikanda mpe batɛkaki bamasini yango ya konyata mikanda. a

Misala ya botóngi ya filiale ya Grande-Bretagne eumelaki mbula 5. Sikoyo misala nyonso ya Betele ekómi kosalema esika moko, yango esali ete básalela malamu makabo ya bolingo ya bandeko. Betele yango ya sika ezali na bandako 2 ya misala mpo na kobimisa bavideo mpe kobongisa bisaleli, babiro, mpe bandako 6 ya kofanda mpo na bato koleka 400. Ezali na ndako moko oyo ezali kosalisa mpo na misala mingi, na ndakisa bazali kosalela yango lokola esika ya likita, esika ya kolya, ezala mpe mpo na milulu mosusu.

Sikoyo, filiale ya Grande-Bretagne ezali kolandela mosala ya kosakola ya bateritware mingi, na ndakisa mosala ya kosakola na îles Malouines, Guernesey, Irlande, île de Man, Jersey mpe Malte. Filiale yango ya sika ekokóma kobimisa mingimingi bavideo, biloko ya koyoka mpe mikanda oyo bakoki kotánga na baaparɛyi. Lisusu, filiale yango ekokoba kokokisa bamposa ya elimo ya basakoli koleka 150 000, oyo bazali na masangá koleka 1 800.

Vizite na Betele yango ekobanda na mokolo ya 06/04/2020. Bato oyo bakosala vizite bakosepela komona na nzela ya biloko oyo ekotyama, istware ya Biblia na Grande-Bretagne ná Irlande mpe ntina oyo Betele ezali na yango na ebongiseli ya Yehova oyo ezali na mosala mingi.

Ndeko Stephen Hardy, oyo azali moko ya bandeko ya Komite ya filiale ya Grande-Bretagne mpe azalaki kosala banda na ebandeli ya mosala yango ya botóngi, alobi boye mpo na makambo oyo bandeko bakutaki na yango: “Yehova amonaki elimo ya komipela ya ebele ya bandeko oyo bautaki na teritware ya mboka na biso ná baoyo bautaki na bamboka mopaya mpe apesaki bango makasi ya kosala. Tokamwaki mpenza na ndenge makambo ekokisamaki, mpe nkembo nyonso esengeli kokende epai ya Yehova.”​—Baefese 3:20.