Na mokolo ya 31/10/2018, Cour d’appel ya etúká ya Ganja na Azerbaïdjan endimaki ekateli oyo tribinale ya moke ezwaki ya kokweisa ndeko Vahid Abilov oyo azali na mbula 19 mpo aboyaki kokɔta mosala ya soda mpo na kotosa lisosoli na ye. Atako Vahid akɔtaki bolɔkɔ te, tribinale elobaki ete ezali na makambo oyo asengeli kosala mpe mosusu oyo akoki kosala te na boumeli ya mbula moko. Na ndakisa, asengelaki koyanola na mituna oyo bakonzi bazalaki kotuna ye pɔsɔ nyonso mpe akoki kobima Azerbaïdjan te. Vahid azali na libaku ya nsuka mpo na kosɛnga sikoyo Tribinale monene etalela likambo na ye, tribinale ya nsuka ya Azerbaïdjan na makambo ya kosambisa.

Mokakatano ya ndeko na biso ebandaki na sanza ya 05/2018. Ntango azalaki na mbula 18, basɛngaki ye apesá lapolo na etúká ya Aghdam na Departema ya guvɛrnema oyo etalelaka likambo ya kokɔtisa bato na mosala ya soda mpe kobongisa bango mpo na etumba. Kuna akomaki mokanda oyo amonisaki ntina oyo akoki kosala mosala ya soda te. Akomaki: “Lisosoli na ngai oyo eteyami na Biblia epekisi ngai kokɔta mosala ya soda. Naboyi te kosala misala mosusu mpo na bato ya mboka na ngai mpe nazali koluka te kokima mikumba na ngai lokola mwana-mboka ya Azerbaïdjan. Nazali kosɛnga bino kaka bópesa ngai mosala mosusu na esika ya mosala ya soda.” Bakonzi baboyaki likambo oyo Vahid asɛngaki, mpe na mokolo ya 09/07/2018 bafundaki ye ete azali koluka kokima mosala ya soda.

Ntango azalaki kosamba na cour d’appel ya Ganja, ndeko Abilov amonisaki lisusu ntina oyo aboyaki kokɔta mosala ya soda. Na tribinale atángaki Yisaya 2:4 mpe alimbolaki ete mateya ya Biblia nde endimisaki ye moko ete “asengelaki te koyekola etumba.” Atako alimbolelaki bango, tribinale ekweisaki ye kaka. Tosengeli kozela mpe komona soki Tribinale monene ekondima kokokisa mposa na ye ya kosala mosala lokola bana-mboka nyonso.

Ntango Azerbaïdjan ekɔtaki na kati ya conseil de l’Europe na 2001, ezwaki ekateli ya kotya mobeko ya kopesa moto mosala mosusu na esika ya mosala ya soda. Guvɛrnema ezwaki naino te ekateli ya ndenge wana. Yango wana, bandeko na biso mbala na mbala balongisaka ekateli na bango ya koboya kokɔta mosala ya soda mpo na mateya oyo bandimaka. Na ebandeli ya mbula, tribinale ya etúká moko ya Azerbaïdjan ekweisaki moko ya bandeko na biso, Emil Mehdiyev na likambo ete alingaki kokima mosala ya soda mpe basɛngaki ye ayaka kosamba na boumeli ya mbula moko. Asɛngaki lisusu Tribinale monene etalela likambo na ye. Longola yango, dosye minei ya bandeko na biso ya Azerbaïdjan oyo baboyaka mosala ya soda mpo na kotosa lisosoli na bango ezali naino na Tribinale monene ya Mpoto oyo etalelaka ntomo ya moto. Atako bazali kokutana na mikakatano wana, bandeko na biso bazali kokoba kotyela Yehova motema mpe koboya komikɔtisa na makambo ya politiki.​—Yoane 15:19.