Na kotalela lapolo a moko oyo euti kobima, moto moko kati na bato minei amiyokaka lokola azali ye moko.

•   “Ezala ofandi wapi, to ozali na mbula nini, mayoki ya kozala yo moko ekoki kokómela moto nyonso.”​—Chido Mpemba, moko ya baprezida ya Commission sur les liens sociaux de l’Organisation mondiale de la santé.

 Na bokeseni na oyo bato mingi bakoki kokanisa, mayoki ya kozanga baninga enyokolaka kaka mikóló te, kasi ata mpe bilenge, baoyo bazali na nzoto makasi, bazwi, ezala mpe baoyo babalá. Kozala mosika na basusu mpe komiyoka yo moko ekoki mpenza kobebisa nzoto mpe makanisi ya moto.

•   Dr. Vivek Murthy, monganga monene ya États-Unis alobi: “Komiyoka lokola ozali yo moko esuki kaka te na kozala na mayoki ya mabe.” Abakisi: “Motángo ya bato oyo bazali kokufa mpo na mayoki yango, ekokani na motángo ya bato oyo bazali kokufa mpo bamɛlaka makaya 15 na mokolo moko.”

 Mozalisi na biso asalá biso te mpo tózalaka kaka biso moko. Mokano ya Nzambe ezalaka ntango nyonso ete bato bázala na boninga ya malamu ná bato mosusu.

•   Etinda ya Biblia: “Nzambe alobaki ete: ‘Ezali malamu te moto azala kaka ye moko.’”​—Ebandeli 2:18.

 Nzambe alingi tósala boninga ná ye. Alaki ete akopusana penepene na biso soki biso mpe tosali makasi tópusana penepene na ye.​—Yakobo 4:8.

•   Etinda ya Biblia: “Esengo na baoyo bayebi mposa na bango ya elimo, mpo Bokonzi ya likoló ezali ya bango.”​—Matai 5:3.

 Nzambe alingi ete tósambelaka ye elongo na basusu. Kosambela Nzambe elongo na basusu esalaka ete tózala na esengo.

•   Etinda ya Biblia: “Tótyelanaka likebi mpo tólendisana mpo tózala na bolingo mpe tósala misala ya malamu, tótika te koyanganaka na makita na biso, . . . kasi tólendisanaka.”​—Baebre 10:24, 25.

 Mpo na koyeba makambo mosusu na oyo etali ntina ya kolonga mayoki ya kozala yo moko, tángá lisolo “La solitude à l’ère de la communication.”